Вести
Солзи и гнев на почетокот на судењето против 13 млади велешани, обвинети за сексуална злоупотреба на малолетничка
Родители, роднини и пријатели од рано утрово пред Кривичниот суд во Скопје чекаа да пристигнат полициските комбиња кои од притвор носеа тринаесетмина велешани сите на возраст од 20 до 30 години. Тројца се обвинети за „трговија со дете“, дел се товарат за кривично дело „полов напад и силување„ а еден и за производство и дистрибуција на детска порнографија. Родителите кои беа присутни таму коментираа дека се „наместени“ и дека правдата ќе излезе на виделина. Ги пречекаа со прегратки и солзи, но и гнев за она што се случува.
По почетокот на главната расправа, според информациите од Кривичен суд, еден од обвинетите признал вина и судијата му изрекол двегодишна затворска казна за делото „полов напад врз дете“. До правосилноста на пресудата му е изречен куќен притвор.
Во судницата 6 во која претседател на судечкиот совет беше судијата Осман Шабани атмосферата беше помирна. Пред почетокот на главната расправа беа прочитани сите обвинети со нивните бранители и констатирано дека се присутни и судењето може да почне. Но, дел од адвокатите на момчињата побараа сведочењето на малолетничката за сексуалните злоупотреби и таканаречените забави на кои се случувало ова, да бидат повлечени од докази.
За дел е спорно тоа што таа била сослушувана без нивно присуство, а за дел тоа што распитот се одвивал неколку денови пред воопшто да започне истрага за обвинетите. Еден од адвокатите тврдеше дека има повреда на Законот за кривична постапка бидејќи во делот на правото на одбрана, бидејќи препознавањето на неговиот клиент како учесник во делото било од фотографија без негово присуство.
„Видео, тонскиот запис и записниците од сослушувањето на детето жртва да се издвојат од листата докази. Има две цедеа со сослушувања и записници изработени во февруари и март годинава. Наредбата за истрага на мојот клиент е донесена последниот ден од март, односно неколку денови по изготвување на репродукциите од распитот на девојчето. Тој ниту знаел ниту можел да присуствува и да превземе било какви дејства со што е прекршен ЗКП“, рече Еленко Миланов, адвокат на еден од обвинетите.
Според обвинителката Милица Гаврилова ваквите предлози треба да се отфрлат бидејќи исказот е даден според сите закони и меѓународни конвенции кои ги штитат правата на детето.
„Наводите на адвокатите се неосновани од едноставна причина што испитувањето на девојчето е согласно Законот за правда на децата, но и протоколот за сузбивање на трговијата со луѓе особено на жени и деца на Обединетите нации кои го има потпишано нашата земја во 2000 година. Повторното соочување и навраќање на настаните кои траеле една година би била секундарна виктимизација“, рече обвинителката Милица Гаврилова.
Судијата остана на ставот дека сепак сведочењата на оштетеното девојче кое било злоупотребувано, ќе бидат докази во постапката. И покрај тоа што обвинителката остави можност јавноста да присуствува на судскиот процес освен на рочиштата каде ќе сведочи малолетничката или, ќе се гледаат видео материјалите од забавите каде била сексуално злоупотребувана сепак судијата одлучи целиот судски процес да се води зад затворени врати за новинарите.
Ова како што рече е заради потребата од заштита на приватниот живот на обвинетите момчиња, а посебно на жртвата. Се очекуваат лични и интимни детали при сведочењата кои сепак ќе користат при одлучувањето, рече судијата.
Во јануари годинава oбвинителството за гонење организиран криминал и корупција го објави случајот. Во соопштението се велеше дека првоосомничениот, дваесет и петгодишен велешанец, од крајот на декември 2021 година и во текот на 2022 година, со употреба на закана над детето – жртва им овозможил на останатите осомничени и на други НН лица да вршат полови дејствија со жртвата на трговија со луѓе – по пат на сексуални активности, сексуална експлоатација и порнографија.
„Тој, во декември 2021 година преку апликацијата Instagram остварил комуникација со четиринаесетгодишното девојче – жртва на трговија со луѓе и по неколку неделна континуирана комуникација преку апликацијата, откако стекнал доверба кај жртвата, ја довел во заблуда дека ќе започнат љубовна врска. На првата средба бил направен порнографски материјал што првоосомничениот го користел како закана за да го присили девојчето да доаѓа и на други средби, заканувајќи се дека доколку не дојде, материјалите со интимна содржина ќе ги објави и ќе ги сподели на социјалните мрежи, со што ќе и наштети на нејзината чест и углед.“, пишуваше во соопштението.
Според обвинителството забавите се случувале во станови што биле наменски изнајмувани на повеќе локации во Велес. На средбите присуствувале повеќемина кои прво конзумирале дрога и алкохолни пијалоци, па во таква состојба вршеле полови дејствија врз детето.
Обвинение беше поднесено против 15, но двајцата тетовци се спогодија со обвинителството и добија условни казни. Сега од 13 велешани кои седнаа на обвинителна клупа, 12 се во притвор, а еден е во куќен притвор. Дел од обвинетите се соочуваат со минимум 3 годишни затворски казни, додека дел со минимум осум години затвор.
види ги сите денешни вести
На средба со Нетанјаху, Трамп ќе се обиде да го протурка договорот за Газa
Американскиот претседател Доналд Трамп денеска (29 септември)ќе се сретне со израелскиот премиер Бенјамин Нетанјаху во Белата куќа на разговори со „високи влогови“ со цел да го протурка мировниот план за Газа.
Трамп вели дека договорот за прекин на речиси двегодишната војна во Газа, ослободување на заложниците што ги држи Хамас и разоружување на палестинската радикална група, која САД и ЕУ ја сметаат за терористичка организација, е практично постигнат по разговорите со арапските лидери минатата недела.
Тој навести на можен пробив во неделата, и на својата социјална мрежа „Truth Social“ напиша:
„Сите се согласуваат за нешто посебно, за прв пат досега. Ќе го направиме тоа!!!“
Сепак, Нетанјаху даде малку причини за оптимизам во последните денови.
Во пркосното обраќање пред ОН во петокот, тој вети дека ќе го „заврши договорот“ со Хамас и вети дека ќе ја блокира палестинската држава, неодамна призната од клучните западни земји.
Израелскиот премиер, исто така, се чини дека не е подготвен да ја запре воената офанзива во градот Газа, која принуди стотици илјади луѓе да избегаат во последните недели.
Ова ќе биде четврта посета на Нетанјаху на Белата куќа откако Трамп се врати на власт во јануари, додека американскиот претседател се обидува да стави крај на конфликтот за кој рече дека би можел да го реши во рок од неколку дена.
Вообичаено верен сојузник на Нетанјаху, Трамп неодамна покажа знаци на фрустрација.
Минатата недела, тој го предупреди Нетанјаху да не го анексира Западниот Брег, бидејќи некои членови на израелскиот кабинет инсистираат на тоа дека е премиер, а исто така се спротивстави и на неодамнешниот напад на Израел врз членови на Хамас во клучниот американски сојузник Катар.
Двајцата лидери ќе се обратат на заедничка прес-конференција во понеделник во 13:15 часот по источно време (19:15 часот по средноевропско време).
Минатата недела, Трамп изрази зголемен оптимизам во врска со изгледите за договор по средбата со арапските и муслиманските лидери на маргините на Генералното собрание на ОН.
Наводниот договор од 21 точка, на кој работат САД, почна да се оформува во последните денови и предвидува разоружување на Хамас, ослободување на сите заложници и прекин на огнот.
Поранешниот британски премиер Тони Блер беше споменат во некои медиумски извештаи дека, според предлогот на САД, тој ќе биде можен лидер на преодната влада во Појасот Газа.
Телото „Меѓународна преодна власт за Газа“ би работело со поддршка на ОН и земјите од Заливот пред конечно да ја предаде контролата на реформираната Палестинска власт (ПА).
Нетанјаху, за време на својот говор во ОН, цврсто ја отфрли идејата дека Палестинската власт со седиште во Рамала има улога во управувањето со Појасот Газа, што го правеше сè додека Хамас не ја презеде власта во 2007 година.
Во неделата, тој изрази длабоки сомнежи дека Палестинската самоуправа може да се реформира.
Војната во Појасот Газа започна со напад на Хамас на 7 октомври 2023 година, кога, според израелските податоци, околу 1200 луѓе беа убиени, додека 251 лице беше земено како заложник.
Повеќе од 65.549 Палестинци се убиени во последователните израелски офанзиви во Појасот Газа, според здравствените власти на територијата контролирана од Хамас.
Почна кампањата за Локалните избори, ќе трае до 17 октомври
Партиите и независните кандидати денеска (29 септември) започнуват со официјалните претставувања пред гласачите. Изборната кампања почнува денеска и ќе трае до 17 октомври на полноќ по што следува 24-часовен молк пред гласањето на 19 октомври (втор круг 2 ноември). Освен на терен меѓу и со поддржувачите, кампањата е веќе започната и на социјалните мрежи.
ВМРО-ДПМНЕ и коалицијата изборната кампања за Локалните избори 2025 ја започнуваат вечер во Скопје на голем настан на кој ќе го промовираат кандидатот за градоначалник на Град Скопје Орце Ѓорѓиевски. Претставувањето на сите кандидати за градоначалници и носители на листите за советници се одржа во саботата во Штип.
Централниот настан на СДСМ и коалицијата вечер е во Крушево каде кандидат за градоначалник е Томе Христоски, а претходно нивниот изборен караван ќе биде во Демир Хисар и Могила. Тие вчера имаа претставување на сите кандидати на коалицијата што ја предводи опозициската партија.
Кандидатот за градоначалник на Град Скопје, проф. Горан Марковски, поддржан од граѓанско-политичката платформа Независни заедно кампањата ќе ја почне со прес-конференција на Љубљанска во Карпош.
Централниот настан за претставување на кандидатите за градоначалници ВРЕДИ ќе го одржи во вторник во Скопје, а денеска свое претставување ќе има кандидатот за градоначалник на Чаир и вицепремиер Изет Меџити и советничката листа за оваа скопска општина на плоштадот Скендербег.
Демократската унија за интеграција (ДУИ) централниот настан за претставување на кандидатите за градоначалници го одржа синоќа во Скопје.
Вчера претставување на своите кандидати за градоначалници и советници организираше и коалицијата „Искуство за успех“ што ја сочинуват ЛДП, ГРОМ, Интегра и ПЦЕР.
Претставувања на кандидатите за градоначалници и совети ќе има и во други општини.
Како што е предвидено во Изборниот законик (член 69а) за изборна кампања се смета јавно собирање и други јавни настани организирани од страна на учесникот во изборната кампања, јавно истакнување на плакати, видео презентации на јавни места, изборно медиумско и интернет претставување, дистрибуирање на печатени материјали и јавно претставување на потврдените кандидати од надлежните изборни органи и нивните програми.
Локалните избори 2025 се осми од независноста на државата, а четврти на кои се избираат градоначалници и советнички листи во 80 општини и Градот Скопје. Ќе се гласа на 3480 избирачки места за 309 кандидати за градоначалници и 576 кандидатски листи за членови на општинските совети или за вкупно 10 490 кандидати.
На изборите учествуваат 22 партии, 19 коалиции и 119 групи на избирачи односно независни кандидатури.
Најмногу кандидати за градоначалници има за Градот Скопје - 16.
Според Изборниот законик, локалните избори се одржуваат на секои четири години во втората половина на октомври. Локалната самоуправа е организирана во 80 општини и Градот Скопје како посебна единица на локалната самоуправа.
Бранко Блануша-кандидат на опозицијата за претседател на Република Српска
Бранко Блануша е кандидат на Српската демократска партија(СДС), најголемата опозициска партија во Република Српска(РС), за претседател на РС на предвремените избори закажани за 23 ноември.
Ова го одлучи Главниот одбор на СДС на седница во Бања Лука на 28 септември, потврди Александра Пандуревиќ од оваа политичка партија за Радио Слободна Европа.
Одлуката, како што рече, е донесена едногласно.
Блануша е член на Српската демократска партија во Градскиот комитет на Бања Лука.
Главните опозициски партии во Република Српска остануваат на ставот дека сакаат да одат заедно со еден кандидат што треба да го даде Српската демократска партија, која меѓу нив има најмногу пратеници во собранието на ентитетот.
Само Партијата за демократски напредок, предводена од градоначалникот на Бања Лука, Драшко Станивуковиќ, не ја изрази својата поддршка.
РС нема претседател од 18 август, кога Судот на Босна и Херцеговина го потврди одземањето на мандатот на Милорад Додик, откако беше потврдена неговата едногодишна затворска казна и шестгодишна забрана за вршење јавна функција поради непочитување на одлуките на Кристијан Шмит, висок претставник на меѓународната заедница во Босна и Херцеговина.
Од 25 до 29 септември продолжува регистрацијата на политички партии за предвремените избори за претседател на Република Српска од редовите на српскиот народ.
Регистрацијата на коалиции ќе биде можна на 6 и 7 октомври, а предизборната кампања ќе трае од 8 до 22 ноември.
Предвремените избори во БиХ ќе го чинат ентитетот околу 3,3 милиони евра, а парите ги обезбеди државното Министерство за финансии.
Виетнам евакуира илјадници луѓе и затвора аеродроми поради тајфунот Буалој
Виетнам ги затвори аеродромите и евакуираше илјадници луѓе во областите под закана од бура во недела, 28 септември, додека засилувачкиот тајфун Буалои се приближуваше кон земјата, неколку дена откако предизвика најмалку десет смртни случаи и широко распространети поплави на Филипините, јави Ројтерс.
Тајфунот генерираше ветрови со брзина до 133 км/ч (83 милји на час) до 10 часот по Гринич и се предвидува дека ќе стигне до копното во централен Виетнам околу 1 часот по полноќ во понеделник, забавувајќи се додека се приближува кон брегот, објави државниот весник „Тан Ниен“.
„Ова е брзо движечка бура - со брзина речиси двојно поголема од просечната - со силен интензитет и широка област на влијание. Способен е да предизвика повеќе природни катастрофи истовремено, вклучувајќи силни ветрови, обилни дождови, поплави, ненадејни поплави, лизгање на земјиштето и крајбрежно поплавување.“, соопшти Националната агенција за временска прогноза.
Властите во централната провинција Ха Тин почнаа да евакуираат повеќе од 15.000 луѓе, соопшти Владата, додавајќи дека илјадници војници се во готовност.
Жителите во Вин, главниот град на провинцијата Нге Ан, каде што се очекува тајфунот да стигне до копното, брзаат да ги обезбедат домовите, да врзат чамци и да редат вреќи со песок или вреќи полни со вода на покривите.
„Веќе претрпевме загуби од неодамнешниот тајфун Каџики оваа година и сè уште не сме заздравеле“, рече Буи Ти Тујет, 41-годишен жител. „Во последните 20 години живеејќи тука, не сум се чувствувал толку исплашен поради бури.“
Виетнам ги прекина операциите на четири крајбрежни аеродроми, вклучувајќи го и меѓународниот аеродром Да Нанг и го прилагоди времето на полетување на неколку летови, соопшти Управата за цивилно воздухопловство.
Училиштата во погодената област од тајфунот ќе бидат затворени во понеделник, а затворањето е можно да се продолжи доколку е потребно.
Со долга крајбрежна линија свртена кон Јужното Кинеско Море, Виетнам е подложен на тајфуни кои често се смртоносни. Минатата година, тајфунот Јаги уби околу 300 луѓе и предизвика материјална штета од 3,3 милијарди долари.
Над 66.000 Палестинци убиени во војната меѓу Израел и Хамас, според Министерството за здравство на Газа
Повеќе од 66.000 Палестинци се убиени во војната меѓу Израел и Хамас, соопшти Министерството за здравство на Газа на 28 септември, јави АП.
Министерството во својот дневен извештај соопшти дека бројот на жртви се искачил на 66.005, со дополнителни 168.162 повредени по нападот на Хамас на 7 октомври 2023 година.
Меѓу загинатите имало 79 лица кои биле донесени во болници во последните 24 часа, соопшти Министерството.
Израелската војска продолжи со својата офанзива во Газа додека премиерот Бенјамин Нетанјаху беше во Вашингтон и планираше да се сретне со американскиот претседател Доналд Трамп во понеделник. Израелската офанзива уништи огромни области на Газа, расели околу 90% од населението и предизвика катастрофална хуманитарна криза, а експертите велат дека населението во градот Газа се соочува глад.
Министерството, кое е дел од администрацијата предводена од Хамас, организација означена за терористичка од страна на САД и ЕУ, не прави разлика помеѓу цивили и милитанти во бројот на жртви, но соопшти дека жените и децата сочинуваат околу половина од загинатите.
Нивните бројки се сметаат за веродостојна проценка од страна на Обединетите нации (ОН) и многу независни експерти.
НАТО го зголемува своето присуство на Балтикот откако беа видени беспилотни летала во Данска
НАТО „ја зголеми будноста“ во Балтикот по она што Копенхаген го нарече упад на несакани беспилотни летала во данскиот воздушен простор, изјави портпаролот на алијансата Мартин О'Донел на прес-конференцијата во текот на ноќта меѓу саботата и неделата, 28 септември.
„Зголемените мерки вклучуваат повеќе платформи за разузнавање, надзор и извидување и најмалку една фрегата за воздушна одбрана во регионот западно од Русија“, рече О'Донел.
Тој рече дека високите претставници на НАТО биле во постојан контакт со данските лидери во врска со инцидентите со беспилотни летала, најновите во низата нарушувања на воздушниот простор на алијансата.
Видувањата на мистериозни беспилотни летала низ Данска и Норвешка од понеделникот доведоа до затворање на неколку аеродроми, а Данска алудираше на можна руска вмешаност.
Неколку земји-членки на НАТО велат дека руски борбени авиони и беспилотни летала го нарушиле нивниот воздушен простор во Европа во последните недели, обвинувајќи ја Москва дека ја тестира Алијансата.
Москва во четвртокот ги отфрли сите сугестии дека стои зад беспилотните летала, а министерот за надворешни работи Сергеј Лавров во саботата предупреди дека НАТО ќе ризикува „решителен одговор“ доколку покаже „каква било агресија против мојата земја“.
Русија изврши голем напад врз Украина, Полска ги крена борбените авиони
Русија лансираше стотици беспилотни летала и ракети кон Киев и други делови од Украина рано во неделата (28 септември) при што загинаа најмалку четири лица и беа повредени десетици, во еден од најдолготрајните напади врз главниот град откако започна целосната војна, јави Ројтерс.
Соседна Полска го затвори својот воздушен простор во близина на два југоисточни града, а нејзините воздухопловни сили ги кренаа авионите како одговор сè додека опасноста не помине.
Украинската војска соопшти дека Русија ноќта лансирала 595 беспилотни летала и 48 ракети, а нејзината воздушна одбрана соборила 568 беспилотни летала и 43 ракети.
Во соопштението се наведува дека главната цел на нападот бил главниот град Киев.
Претседателот на Украина, Володимир Зеленски, рече дека нападот траел повеќе од 12 часа и предизвикал голема штета на кардиолошка клиника, фабрики и станбени згради.
Тој ги обнови повиците до меѓународната заедница да дејствува решително за да ги прекине приходите од енергија на Русија што ја финансираат нејзината инвазија. Украина досега не успеа да го убеди американскиот претседател Доналд Трамп да воведе санкции врз Москва.
„Времето за решителна акција е одамна задоцнето и сметаме на силен одговор од САД, Европа, Г7 и Г20“, напиша Зеленски на Телеграм.
Зеленски рече дека нападот бил насочен кон неколку региони на север, центар и југ, вклучувајќи го и јужниот град Запорожје, каде властите соопштија дека најмалку 16 лица се повредени.
Снимките објавени на социјалните мрежи покажаа дека неколку згради се тешко оштетени и се во пламен во Запорожје.
Службите за итни случаи соопштија дека најмалку четири лица се убиени, додека локалните власти пријавиле дека 67 лица се повредени низ целата земја.
Од полноќ почнува кампањата за локалните избори
Од денеска, 28 септември, на полноќ почнува кампањата за локалните избори 2025 што ќе се одржат на 19 октомври (втор круг на 2 ноември).
Кампањата ќе трае 20 дена.
На изборите има вкупно 309 кандидати за градоначалници и 576 кандидатски листи за членови на општинските совети со вкупно 10. 490 кандидати.
Државната изборна комисија(ДИК) на седница во петокот го заклучи Избирачкиот список ва кој се запишани вкупно 1.832.415 избирачи.
Претседателот на ДИК Борис Кондарко, информираше дека согласно евиденцијата на надлежните органи право на глас имаат вкупно 112.000 избирачи кои се на привремена работа или престој во странство, 2.162 избирачи кои се на издржување казна затвор или се во притвор и 450 избирачи од домовите за стари лица.
Во државата се констатирани 3.480 избирачки места, од кои во 132 избирачки места се потпишани помалку од десет избирачи, на кои гласањето ќе биде спроведено на најблиското избирачко место.
Вкупниот буџет за одржување на локалните избори 2025 изнесува 9 милиони 760 илјади евра, од кои две третини се пари наменети за медиумите и платеното политичко рекламирање. Дополнително на овие пари е и сумата за надоместоците на членовите на избирачките одбори(ИО) и транспортот и дистрибуцијата на членовите на ИО и избирачкиот материјал од општинските изборни комисии до избирачките места каде ќе се гласа, бидејќи тие ги обезбедуваат локалните самоуправи.
Според Изборниот законик, локалните избори се одржуваат на секои четири години во втората половина на октомври. Локалната самоуправа е организирана во 80 општини и Градот Скопје како посебна единица на локалната самоуправа. Во состав на Градот Скопје функционираат 10 општини, кои имаат поделени надлежности со Градот.
Локални избори во Северна Македонија се одржаа во 1996, 2000, 2005, 2009, 2013, 2017 и 2021 година.
Европските сили го предупредуваат Иран додека санкциите повторно стапуваат во сила
Обединетите нации(ОН) официјално повторно воведоа санкции за Иран поради неговата нуклеарна програма, зголемувајќи го притисокот врз земјата од Блискиот Исток, која веќе страда од глобална изолација и економски превирања по претходните рунди на западни санкции.
На 28 септември на полноќ, т.н европска тројка(ЕЗ) - Велика Британија, Франција и Германија, кои го предводеа потегот, објавија дека врз Иран повторно се воведени таканаречени „брзи“ санкции.
Е3 веднаш го предупреди Техеран против какви било „ескалаторски“ чекори како одговор на потегот и ја повика исламската република да се врати на преговори, особено со Соединетите Американски Држави.
„Повторното воведување на санкциите на ОН не е крај на дипломатијата“, соопштија министрите за надворешни работи на Е3 во заедничка изјава.
„Го повикуваме Иран да се воздржи од какви било ескалациски дејствија и да се врати на почитување на своите правно обврзувачки обврски во врска со заштитните мерки“, се додава во соопштението.
Во него се наведува дека „во јули 2025 година, му понудивме на Иран ограничено, еднократно продолжување под услов Иран да се согласи да ги продолжи директните и безусловни преговори со Соединетите Американски Држави, да се врати на почитување на своите правно обврзувачки обврски за заштитни мерки и да го реши прашањето за неговите залихи на високо збогатен ураниум“.
„За жал, Иран не ги презеде потребните чекори за да одговори на нашата загриженост. Особено, Иран не ги овласти инспекторите на Меѓународната агенција за атомска енергија (МААЕ) да го вратат пристапот до нуклеарните постројки на Иран, ниту пак изготви и достави до МААЕ извештај за своите залихи на високо збогатен ураниум.“
Укината суспензијата за параолимпијците од Русија и Белорусија пред игрите во Италија
Генералното собрание на Меѓународниот параолимписки комитет (МПК) ја укина суспензијата на Русија и Белорусија и им го врати статусот на полноправни членови на оваа организација.
Забраната да се натпреваруваат беше од руската инвазија на Украина во февруари 2022 година.
Одлуката беше изгласана на Генералното собрание на МПК на 27 септември во Сеул, Јужна Кореја и го отвора патот за руските и белоруските параолимписки спортисти да се натпреваруваат под своите национални знамиња на Зимските олимписки игри Милано-Кортина што ќе се одржат од 6 до 15 март 2026 година.
Ова доаѓа осум дена откако Меѓународниот олимписки комитет (МОК) го одобри учеството на руските и белоруските спортисти на претстојните игри во Италија под неутрални знамиња, како што беше случајот на Летните олимписки игри во Париз во 2024 година.
Рускиот параолимписки комитет го поздрави укинувањето на суспензијата, нарекувајќи ја фер и „пример за тоа како треба да се заштитат правата на спортистите, без дискриминација врз основа на националност или политичко влијание“.
Украина соопшти дека Меѓународниот параолимписки комитет „ги предал олимписките вредности“ со враќањето на полноправното членство на Русија и Белорусија.
Делумна суспензија за руските и белоруските параолимписки спортисти беше усвоена есента 2023 година, дозволувајќи им на руските и белоруските спортисти да се натпреваруваат на Параолимписките игри во Париз во 2024 година под строги услови на неутралност.
ИПЦ претходно ги исклучи руските и белоруските параолимписки комитети од игрите во Пекинг во 2022 година, неколку дена откако Русија ја започна својата инвазија на Украина на 24 февруари.
За да се квалификува за Параолимписките игри, спортистот мора да има активна меѓународна федерациска лиценца за сезоната 2025-2026.
Мултимедија
Најпосетени
Што треба да знаете