Вести
Француски новинар убиен во напад со дронови во Украина, обвинета е Русија
Француски новинар е убиен, а украински фотограф е повреден во напад со руски беспилотни летала во близина на линиите на фронтот, соопштија Киев и францускиот претседател Емануел Макрон на 3 октомври.
„Нашиот сонародник, фоторепортер Антони Лаликан, ја придружуваше украинската војска на фронтот. Со длабока тага ја примив веста за неговата смрт од руски напад со дронови“, напиша Макрон на мрежата Икс.
„Изразувам искрено сочувство до неговото семејство, најблиските и сите негови колеги кои, ризикувајќи ги своите животи, нè информираат и сведочат за реалноста на војната“, додаде францускиот претседател.
Од украинската војска преку социјалните мрежи соопштија дека фотографот Григориј Иванченко е повреден во истиот напад и е во стабилна состојба.
„Двајцата новинари носеа лична заштитна опрема, а нивните панцири имаа ознаки – натпис ’ПРЕС‘“, соопшти украинската бригада.
„Непријателот уште еднаш цинично ги прекрши нормите на меѓународното хуманитарно право. Овој факт уште еднаш ја потврдува подмолноста и суровоста на непријателската војска“, се додава во соопштението.
Како што посочија украинските власти, во периодот кога бил убиен, 37-годишниот Лаликан бил сместен со украинските сили во близина на фронтовската линија во регионот Донецк.
Европската и меѓународната федерација на новинари го окарактеризираа убиството како „воено злосторство“.
Организациите посочија дека Лаликан е првиот новинар убиен од беспилотно летало во украинската војна, иако УНЕСКО соопшти уште 21 новинар биле убиени на друг начин во Украина откако Москва ја започна целосната инвазија во февруари 2022 година.
Киев соопшти дека Лаликан и Иванченко биле сместени во близина на областа Дружкивка, на околу 20 километри од фронтовската линија во регионот Донецк.
Меѓународната организација Репортери без граници (RSF) повика на брза истрага.
„Лаликан загинал додека ја вршел својата работа, сведочејќи за последиците од војната. Неговата посветеност, признаена од неговите колеги, беше исто толку голема колку и ризиците што тој ги презеде за да ги објави вестите“, изјави шефот на оваа организација, Тибо Брутин.
Украинскиот министер за надворешни работи, Андриј Сибига, рече дека Москва „продолжува намерно да таргетира новинари, што е гнасен злостор и кршење на меѓународното хуманитарно право“.
„Ќе вложиме максимални напори сторителите да бидат повикани на одговорност“, рече тој.
Во меѓувреме, шефот на Меѓународната агенција за атомска енергија (МААЕ), Рафаел Гроси, изјави дека разговара за предлози со Москва и Киев за начини за враќање на електричната енергија во нуклеарната централа Запорожје, најголема во Европа.
Од 23 септември, централата е исклучена од надворешно напојување и се лади со дизел генератори за итни случаи. Таа беше окупирана од руските сили кратко време по почетокот на целосната инвазија, но главно ја управува украински персонал.
Објектот не произведува електрична енергија, но неговите реактори мора да се ладат со дизел генератори за итни случаи за да се спречи нуклеарна катастрофа. Двете страни се обвинуваат меѓу себе за гранатирање на централата.
Далеку од бојното поле, разузнавачката агенција на Данска – членка на НАТО, објави дека руски воени бродови постојано пловеле по патеки на судир, го насочувале своето оружје кон данските воени бродови и го нарушувале движењето во данските води што го поврзуваат Балтичкото со Северното Море.
„Видовме неколку инциденти во данските теснеци, каде што хеликоптерите и воените бродови на данските воздухопловни сили беа цел на радари за следење, а кон нив и физички биле насочени оружја од руски воени бродови“, изјави шефот на данската служба за одбранбено разузнавање, Томас Аренкиел, на прес-конференција.
Белата куќа соопшти дека ваквиот извештај го сфаќа сериозно.
„Тоа е нешто што администрацијата го сфаќа многу сериозно и ние постојано го следиме. Советот за национална безбедност во Белата куќа е во постојана кореспонденција со нашите сојузници од НАТО“, изјави портпаролката на Белата куќа, Каролин Ливит.
Во регионот, тензиите се високи откако имаше инциденти со сомнителни саботажи поврзани со подводни кабли и цевководи, упади во туѓи воздушни простори и забележување на дронови, за кои сомнежите се дека голем дел се поврзани со Москва.
види ги сите денешни вести
Комесар на ОН: Има шанса да се стави крај на колежот во Газа
Високиот комесар на ОН за човекови права, Волкер Турк, изјави во саботата дека предложениот мировен план на американскиот претседател Доналд Трамп за Газа е „клучна можност“ за „да се стави крај на колежот и страдањето еднаш засекогаш“ на палестинската територија.
Турк се надева дека моментумот кон завршување на војната во Газа ќе „го отвори патот за траен прекин на непријателствата, проследен со закрепнување и реконструкција, во согласност со меѓународното право за човекови права и хуманитарното право, и многу потребно решение за две држави“, соопшти неговата канцеларија на мрежата Икс.
„Ова е клучна можност за сите страни и влијателни држави да дејствуваат со добра волја за да се стави крај на колежот и страдањето во Газа еднаш засекогаш, да се преплави Појасот Газа со хуманитарна помош и да се обезбеди ослободување на заложниците и на многу палестински притвореници“, се додава во соопштението.
Планот на САД вклучува прекин на огнот, ослободување на заложниците во рок од 72 часа, постепено повлекување на израелската армија од Газа, разоружување на Хамас, негово исклучување од власта и протерување на неговите борци од Газа.
Светската здравствена организација (СЗО) го поздрави мировниот план за Газа, вклучувајќи ја и можноста за обнова на болниците, додека генералниот директор на здравствената агенција на ОН, Тедрос Аданом Гебрејесус, во саботата изјави дека „мирот е најдобриот лек“.
Палестинското движење Хамас, кое САД и ЕУ го сметаат за терористичка организација, во петокот соопшти дека е подготвено за итни преговори за ослободување на Израелците што ги држи како заложници во Газа и за прекин на војната, како дел од планот предложен од Трамп.
Израел во саботата објави дека се подготвува да ја спроведе првата фаза од планот на Трамп за ослободување на сите заложници, без да спомене прекин на бомбардирањето. Потоа израелската армија ја објави својата намера да продолжи со операциите во Газа и покрај повиците од семејствата на заложниците и Трамп веднаш да го запре бомбардирањето, бидејќи се чинеше можно да се постигне договор со Хамас барем за ослободување на затворениците.
Розов пикник во Скопје: Потребна е скининг програма за рак на дојка
Во овој момент во Македонија задолжителна скрининг програма не постои и тоа е навистина проблем, порачаа од ХЕМА-ОНКО кое денеска, 4 октомври, организираше Розов пикник во чест на сите жени што се борат со рак на дојка.
„Ние веќе преговараме оваа скрининг програма да стане облигаторна за сите граѓани од 40 до 69 години, исто така да стане облигаторна за матичните лекари, односно тие да ја водат грижата за своите пациентки. Се преговара со тимовите од радиологија да се изнајдат доволно термини“, рече Ана Марјановиќ од ХЕМА-ОНКО.
Таа додаде дека една ваква скрининг програма во пракса треба да биде ефикасна, реална и долгорочна, да ги опфати сите пациенти за да даде вистински резултати.
„Доколку канцерот се дијагностицира во нулти или во прв стадиум сите знаеме дека прогнозите се извонредни, дека овие пациенти ќе можат да продолжат со својот живот како никогаш да го немале“, рече Марјановиќ.
Од здружението сметаат дека во државата треба да се направат уште многу работи за пациентите што се борат со рак, како се измени на Законот за здравствена заштита, позитивната листа на лекови, но и начинот на кој е организирана онкологија којашто, според нив, треба да биде дисперзирана и во други градови.
Она што е добро, според нив, е што годинава хормонската терапија за пациентките со рак на дојка е подостапна, во аптеките и што е обезбедена терапија за уште една група пациенти со триплнегатив канцер коишто имаат генетски зависен карцином.
Во Северна Македонија, на државната Клиника за онкологија годишно има по околу 800 новодијагностицирани пациенти со канцер на дојка. Се очекува дека до крајот на 2025 година оваа бројка ќе достигне и до околу 1.200 пациенти.
Возрасната граница на заболени се спушта како во светски рамки, така и во земјава, па сè почесто заболуваат и девојки и жени од 30 до 40 години.
Лидерите од Западен Балкан на самит во Драч
Лидерите од земјите од Западен Балкан, в понеделник – 6 октомври, ќе се сретнат на самит во рамки на иницијативата Брдо-Бриони, што ќе се одржи во албанскиот град Драч.
Главна тема на разговорите ќе биде европската перспектива на Западен Балкан, со посебен фокус на Планот за раст од ЕУ.
Планот за раст, кој претставува финансиски инструмент на ЕУ, се однесува на периодот од 2024 до 2027 година. Тој содржи вкупно шест милијарди евра, од кои четири се во форма на заеми, додека две милијарди се неповратни грантови. Секоја земја има своја реформска агенда чие исполнување е услов за добивање на парите.
На самитот во Драч, од Северна Македонија ќе присуства претседателката Гордана Сиљановска-Давкова, а, како што пренесе државната агенција МИА, потврдено е учеството и на претседателите на Црна Гора – Јаков Милатовиќ, Србија – Александар Вучиќ, Косово – Вјоса Османи, како и на членовите на Претседателството на Босна и Херцеговина Жељка Цвијановиќ, Денис Беќировиќ и Жељко Комшиќ.
Процесот Брдо-Бриони е заедничка словенечко-хрватска иницијатива започната во 2013 година, а нејзини членови се земјите од Западен Балкан.
Самитот во Драч го организираат претседателите на Словенија и Хрватска, Наташа Пирц Мусар и Зоран Милановиќ, а домаќин е албанскиот претседател, Бајрам Бегај.
„Годинешниот состанок ќе се одржи под мотото ’Заеднички интереси, заедничка посветеност кон заедничка иднина: заедно кон ЕУ‘. Заедно со прашањето за европската перспектива на земјите од Западен Балкан, ќе се фокусира и на зајакнување на регионалната соработка“, објавија организаторите.
Целта на иницијативата Брдо-Бриони е да се поттикне меѓусебна соработка и да се олеснат напорите на земјите од регионот на нивниот пат кон ЕУ.
Од 2013, состаноци во рамки на оваа иницијатива се одржуваат секоја година. Во 2024, ваков самит се одржа во Црна Гора каде лидерите во заедничка изјава ја нагласија важноста од добрососедските односи и регионалната соработка. Тие се обврзаа и на понатамошни реформи, зајакнување на стратешкиот дијалог со ЕУ и спроведување на Зелената агенда за Западен Балкан.
Десетици повредени откако руски дрон погоди украински патнички воз
Руски дрон погоди патнички воз во Украина, предизвикувајќи непознат број жртви во најновиот напад врз цивилна цел, во тековната инвазија на Кремљ.
Видео објавено на социјалните медиуми покажува како патнички вагон на украински железници е во пламен и над него се издига црн чад. Возот сообраќал на редовна линија од Шостка до Киев, во североисточниот регион Суми.
Русија систематски ја напаѓа железничката инфраструктура на Украина, обидувајќи се да ја парализира логистиката, вклучително и транспортот на воен товар.
Украинскиот претседател Володимир Зеленски на социјалните медиуми напиша дека „веќе е познато дека десетици луѓе се повредени“, додека регионалниот гувернер Олег Хрихоров рече дека се бројат жртви.
„Ова е терор што светот нема право да го игнорира. Секој ден, Русија одзема човечки животи. И само сила може да ги принуди да запре ова. Слушнавме силни изјави од Европа и Америка и крајно време е тие да станат реалност“, напиша Зеленски.
Нападот доаѓа во време кога надежите за мир изгледаат далечни додека целосната инвазија на Русија се приближува кон четвртата годишнина.
Додека напорите на САД за посредување во мировен договор донесоа мал напредок; позициите на Украина и Русија остануваат далечни. Американскиот претседател Доналд Трамп досега не успеа да организира трилатерален самит или средба лице в лице меѓу рускиот и украинскиот претседател, при што Москва се обидува да избегне директни разговори.
Претходно на 4 октомври, украинската војска објави дека изминатата ноќ имало руски напади со 109 дронови „Шахед“, „Гербер“ и други видови, како и три балистички ракети „Искандер-М/КН-23“.
Украина ја напаѓа руската нафтена индустрија
Во меѓувреме, во текот на ноќта меѓу 3 и 4 октомври, украинските дронови ја погодија една од најголемите рафинерии за нафта во Русија, индустријата која е клучна за финансирање на војската на Кремљ.
Рафинеријата за нафта која се наоѓа во Кириши во рускиот Ленинградски регион, веќе неколку пати беше мета на украински напади.
„Во објектот се регистрирани експлозии и пожар. Резултатите од штетата се утврдуваат. Рафинеријата за нафта Кириши е една од најголемите на територијата на земјата агресор. Нејзиниот годишен капацитет е 18,4 милиони тони преработка на нафта годишно“, се вели во соопштението на украинскиот Генералштаб.
Гувернерот на Ленинград, Александар Дрозденко, на социјалните медиуми напиша дека воздушната одбрана работи на спречување беспилотни летала над Кириши и наведе дека има пожар во индустриската зона, а противпожарните служби се борат со огнот.
Во последните месеци, Киев ги интензивираше нападите врз руската енергетска инфраструктура, кои се чини дека предизвикуваат недостиг на гориво и зголемување на цените во Русија.
На 3 октомври во гувернерот Евгениј Солнцев од регионот на Орск во Русија, кој се наоѓа на приближно 1.400 километри од линиите на фронтот во Украина, рече дека „непријателски беспилотни летала“ нападнале локален индустриски објект.
Голем број видеа објавени на социјалните медиуми, кои РСЕ ги потврди, прикажуваат како голем чад се издига од локалната голема рафинерија за нафта. Подоцна истиот ден, Украинската безбедносна служба (СБУ) потврди дека нејзини беспилотни летала го извршиле нападот.
Фон дер Лајен: На дофат е примирје во Газа
Изразената подготвеност на Хамас да ги ослободи заложниците и да се ангажира за предлогот за мир, кој беше даден од американскиот претседател Доналд Трамп, според претседателката на Европската Комисија Урсула фон дер Лајен е охрабрувачка.
„Овој момент мора да се искористи. На дофат се итно примирје во Газа и ослободување на сите заложници“, наведе Фон дер Лајен.
Хамас, која е прогласена за терористичка организација од ЕУ и САД, соопшти дека е подготвена да ослободи дел од заложниците и се согласи со делови од планот на Трамп за ставање крај на војната. Изјавата на Хамас дојде откако американскиот претседател даде рок до недела за да се изјасни дали групата го прифаќа или отфрла планот.
Во соопштението, радикалната палестинска организација наведе и дека е подготвена да „го предаде управување со Појасот Газа на палестинско независно тело (технократи) врз основа на палестинскиот национален консензус и со поддршка на арапските и исламските сили“.
Сепак, порача дека за некои делови од планот ќе бара преговори.
Планот на Трамп од 20 точки, беше поддржан и од Израел.
Покрај претседателката на Европската комисија со реакции по изјавата на Хамас се јавија и други европски лидери.
Ослободувањето на сите заложници и примирјето во Газа се „на дофат“, порача и францускиот претседател Емануел Макрон.
„Обврската на Хамас мора да се исполни без одложување. Сега имаме можност да направиме решителен напредок кон мирот … Би сакал да им се заблагодарам на претседателот Доналд Трамп и на неговиот тим за нивната посветеност на мирот“, наведе Макрон.
Според британскиот премиер Кир Стармер, прифаќањето на мировниот план на САД од страна на Хамас е значаен чекор напред.
„Силно ги поддржуваме напорите на претседателот Трамп, кои нè доведоа поблиску до мирот од кога било досега. Сега постои можност да се прекинат борбите, заложниците да се вратат дома и хуманитарната помош да стигне до оние на кои им е толку очајно потребна“, рече Стармер.
Реагираше и германскиот канцелар Фридрих Мерц, порачувајќи дека и Германија ќе продолжи да се ангажира.
„Заложниците мора да бидат ослободени. Хамас мора да се разоружа. Борбите мора веднаш да престанат. Сето ова мора да се случи многу брзо. По речиси две години, ова е најдобрата шанса за мир“, порача Мерц.
Хамас во соопштението не наведе дали се согласува со разоружување, барање кое претходно го отфрлаше.
Високиот функционер на Хамас, Муса Абу Марзук, во петокот за Ал Џезира изјави дека групата нема да се разоружа пред да се заврши израелската „окупација“, додавајќи дека прашањата за иднината на Газа треба да се дискутираат во рамките на сеопфатна палестинска национална рамка од која дел ќе биде и Хамас.
По огласувањето на Хамас за планот на Трамп, американскиот претседател го повика Израел да го прекине бомбардирањето на Газа.
Јапонија може да ја добие првата жена премиер
Владејачката конзервативна партија во Јапонија ја избра Санае Такаичи за свој нов лидер, со што 64-годишната политичарка е првата жена што може да стане премиер во историјата на земјата.
Либерално-демократската партија, која владееше со Јапонија поголемиот дел од повоената ера, ја избра Такаичи со цел да ја врати довербата од јавноста која е огорчена поради зголемувањето на цените, но и се повеќе наклонета кон опозицијата која ветува економски стимулации и построги мерки против мигрантите.
Актуелниот премиер Шигеру Ишиба, кој е на функцијата нешто повеќе од една година, минатиот месец објави дека ќе поднесе оставка по серијата изборни порази во кои владејачката коалиција на Либерално-демократската партија (ЛДП) го загуби мнозинството во двата дома на парламентот.
Такаичи важи за една од поконзервативните кандидати за премиер, кои се наклонети кон десно.
Таа е долгогодишен обожавател на првата британска премиерка, Маргарет Тачер, но многумина не ја гледаат како поборник за напредок.
Конзервативната Такаичи долго време се спротивставува на законодавството што би им дозволило на жените да ги задржат своите момински презимиња по стапувањето во брак, тврдејќи дека тоа е спротивно на традицијата. Таа, исто така, се спротивставува на истополовите бракови.
Такаичи е редовна посетителка на контроверзното светилиште Јасукуни, кое им оддава почит на жртвите од војната во Јапонија, вклучувајќи и некои осудени воени злосторници. Доколку биде избрана за премиерка, таа рече дека почесто ќе патува во странство за да ја пренесе пораката дека Јапонија се вратила на сцената.
Гласањето за нов премиер во парламентот се очекува на 15 октомври, а Такаичи се смета за фаворитка, бидејќи владејачката коалиција има најмногу места во него.
Пет турски државјани обвинети за убиство на нивен сонародник во Штип
Пет државјани на Турција се обвинети за убиството на Енес Оздемир, уште еден државјанин на Турција, кое се случи на 8 мај во Штип, соопшти штипското Основно јавно обвинителство (ОЈО) откако поднело обвинение до судот.
Еден од обвинетите се товари дека директно го извршил кривичното дело убиство, а се гони и за неовластено држење на оружјето со кое ја убил жртвата.
Од останатите, тројца се обвинети дека му помогнале во извршувањето на делото, додека петообвинета е девојка која се гони за помаѓање откако се случило убиството.
Првообвинетиот е 21-годишно момче кое во Северна Македонија било без регулиран престој. Според обвинителството, на почетокот на мај тоа купило полуавтоматски пиштол од непознато лице во Скопје, а потоа се договорило со жртвата да се сретнат во кафе-бар во центарот на Штип.
„Тие седнале на една од масите во аголот од летната тераса на кафе барот и разговарале околу 15 минути. Во еден момент обвинетиот отишол до тоалетот и веднаш се вратил, го извадил пиштолот и започнал да пука кон оштетениот, нанесувајќи му шест огнострелни повреди од кои починал“, велат од ОЈО Штип.
Тројца од останатите обвинети, пак, иако знаеле што планира, обвинителството тврди дека му обезбедиле логистичка поддршка – го сместиле во станот каде живееле и му помогнале да го купи пиштолот. На денот на убиството, според информациите од обвинителството, тие го превезле и до Штип.
Според ОЈО, по убиството тие ја повикале петообвинетата да ги превезе со нејзиниот автомобил назад за Скопје, но враќајќи се забележале дека има полиција на патарината „Миладиновци“.
„Таа го запрела возилото на околу 300 триста метри пред патарината, овозможувајќи му на директниот извршител да излезе и да почне да бега надвор од коловозот, покрај автопатот, каде подоцна бил пронајден и уапсен. Останатите продолжиле да се движат со возилото кон патарината и биле запрени од полициските службеници, кои започнале да ги легитимираат и да вршат преглед над возилото“, пишува во соопштението од обвинителството.
Како што се додава, иако се обиделе да избегаат, за кратко време биле фатени и уапсени.
Четворица од обвинетите веќе се наоѓаат во притвор и ОЈО Штип бара мерката да им биде продолжена. За петообвинетата, пак, на сила се поблаги мерки на претпазливост.
Хамас се согласи со мировниот план, Трамп порача Израел да го прекине бомбардирањето
Американскиот претседател Доналд Трамп порача дека Израел „мора веднаш“ да го прекине бомбардирањето на Појасот Газа, откако радикалната палестинска група Хамас соопшти дека ќе се согласи со некои аспекти од неговиот план за завршување на војната, вклучително и ослободување на заложниците и предавање на контролата врз крајбрежната енклава. Но, како што наведе Хамас, ќе бара преговори за многу други услови.
Агенцијата Ројтерс, која имала увид во копија од одговорот на Хамас, која е прогласена за терористичка организација од САД и ЕУ, потсетува дека ова следува откако Трамп предложи мировен план од 20 точки и даде рок до неделата за Хамас да го прифати или отфрли предлогот.
На својата социјална мрежа „Трут“, Трамп повикувајќи се на соопштението на Хамас, напиша дека верува оти групата е подготвена за траен мир.
„Израел мора веднаш да го прекине бомбардирањето на Газа за да можеме безбедно и брзо да ги извлечеме заложниците! Премногу е опасно да се направи тоа во моментов. Веќе разговараме за деталите што треба да се разработат. Ова не е само за Газа, ова е за долгоочекуваниот мир на Блискиот Исток“, напиша Трамп.
Хамас во соопштението не наведе дали ќе се согласи со условот да се разоружа, барање од Израел и САД што претходно го отфрли.
Од друга страна, високиот функционер на Хамас, Муса Абу Марзук, во петокот за Ал Џезира изјави дека групата нема да се разоружа пред да се заврши израелската „окупација“, додавајќи дека прашањата за иднината на Газа треба да се дискутираат во рамките на сеопфатна палестинска национална рамка од која дел ќе биде и Хамас.
Хамас во соопштението наведе дека „ги цени арапските, исламските и меѓународните напори, како и оние на американскиот претседател Доналд Трамп, и повиците за прекин на војната во Појасот Газа, размена на затвореници и итна испорака на помош“.
Групата додаде дека објавува „одобрување на ослободувањето на сите окупациски (израелски) затвореници – и живи и мртви, во согласност со формулата за размена содржана во предлогот на претседателот Трамп, со потребните услови на терен за да се случи размената“.
Сепак, Хамас наведе дека „во овој контекст… ја потврдува својата подготвеност веднаш да влезе во преговори, преку посредници, за да ги разговара деталите“.
Радикалната палестинска организација изјави дека е подготвена да „го предаде управување со Појасот Газа на палестинско независно тело (технократи) врз основа на палестинскиот национален консензус и со поддршка на арапските и исламските сили“.
Планот на Трамп беше поддржан и од Израел, арапските и европските сили.
Тој повикува на итен прекин на огнот, размена на сите заложници што ги држи Хамас за палестинските затвореници што ги држи Израел, постепено повлекување на Израелците од Газа, разоружување на Хамас и воспоставување преодна влада предводена од меѓународно тело.
Заменик-генералниот секретар на ОН за хуманитарни прашања, Том Флечер, рече дека иницијативата на Трамп за Газа отвора можности.
„Исто така, им нуди на Палестинците шанса да добијат помош којашто спасува животи, и шанса заложниците да се вратат дома“, рече Флечер во петокот.
Планот на Трамп повикува на дистрибуција на помош во Газа без мешање од неутрални меѓународни групи, а ОН наведоа дека 170.000 метрички тони се подготвени да влезат на палестинската територија.
Израел ја започна офанзивата во Газа по нападот на Хамас врз Израел на 7 октомври 2023 година, во кој беа убиени околу 1.200 луѓе, а 251 лице беа однесени како заложници во Газа. Израел тврди дека остануваат неослободени уште 48 заложници, од кои 20 се живи.
Повеќе од 66.000 луѓе, пак, се убиени во последователните израелски напади врз Појасот Газа, според здравствените власти во Газа контролирани од Хамас.
Русија и Украина продолжуваат со меѓусебни напади врз енергетската инфраструктура
Русија и Украина разменија во петокот воздушни напади врз енергетската инфраструктура, додека борбите продолжуваат во услови на застој во мировниот процес за завршување на најголемиот и најсмртоносен конфликт во Европа од Втората светска војна.
Околу пладне во регионот Орск, кој се наоѓа на околу 1.400 километри од фронтот во воено разурната Украина, гувернерот на Оренбуршката област, Евгениј Солнцев, изјави дека „непријателски дронови“ нападнале индустриски објект во таа област.
„Технолошките процеси во претпријатието не се нарушени. Службите за итни случаи се на терен“, додаде тој, претходно соопштувајќи дека локалниот аеродром го запрел своето работење.
Низа видеа, потврдени за Радио Слободна Европа, објавени на социјалните мрежи, прикажуваат огромни облаци чад што се издигаат од големата рафинерија за нафта Орскњефтеоргсинтез.
Службата за безбедност на Украина (СБУ) потврди дека нејзини дронови го извршиле нападот.
Во последните месеци, Киев ги интензивираше нападите врз руската енергетска инфраструктура, што, според сè, предизвикува недостиг на гориво и пораст на цените во Русија.
Само во септември, Украина соопшти дека гаѓала неколку руски рафинерии во пограничната Брјанска област, како и во Самарската и Башкортостанската област, кои се во руската територија.
Нападот со дрон врз Орск следува по извештајот на американскиот весник „Волстрит џурнал“ (The Wall Street Journal), во кој се наведува дека САД ќе ѝ обезбедат на Украина разузнавачки информации за далечни цели во руската енергетска инфраструктура.
Според весникот, новите податоци би ѝ олесниле на Украина да ја напаѓа руската инфраструктура со цел да ѝ се ускратат на Москва приходите за воените напори.
Кон крајот на септември, претседателот на САД, Доналд Трамп, пред Генералното собрание на Обединетите нации изјави дека смета оти руската економија стагнира поради војната.
Кремљ подоцна го негираше ова тврдење, но призна дека „Русија доживува одредени тензии“.
Во петокот, Русија продолжи да напаѓа региони низ Украина со ракети и дронови, оштетувајќи цивилна и енергетска инфраструктура, соопштија локални власти.
Украинските сили за противвоздушна одбрана соопштија дека во ноќниот руски напад биле користени 381 дрон и 35 ракети, додавајќи дека главни цели биле енергетски објекти во Харкивската и Полтавската област.
Главната украинска гасна мрежа, „Нафтогас“, соопшти дека нападот бил „најголемиот“ врз инфраструктурата за производство на гас од почетокот на руската инвазија.
Генералниот директор на „Нафтогас“, Серхиј Корецки, изјави дека нападите се насочени терористички акти против цивилни објекти што обезбедуваат производство на гас.
„Без воено значење. Уште една манифестација на руската подлост, насочена исклучиво кон нарушување на грејната сезона и одземање на можноста да ги затоплуваме украинските домови во зима“, рече Корецки. „Како резултат на нападот, значителен дел од нашите објекти е оштетен. Дел од штетата е критична.“
Доцна во петокот, гувернерот на Доњецката област, Вадим Филашкин соопшти дека дел од регионот е без струја поради руското гранатирање.
„Русите продолжуваат да ја гаѓаат критичната инфраструктура. Денес нивна цел беше енергетиката“, изјави Филашкин на Телеграм.
Тој додаде дека надлежните служби ќе го обноват снабдувањето со струја што е можно побрзо.
Мултимедија
Најпосетени
Што треба да знаете