Вести
Претставници на САД и Русија ќе разговараат за продолжување на работата на амбасадите
На 10 април во Истанбул, Русија и Соединетите Држави ќе ги продолжат разговорите за нормализација на работата на нивните дипломатски претставништва.
Портпаролката на Стејт департментот, Тами Брус, на 8 април им рече на новинарите дека делегациите од Москва и Вашингтон ќе одржат втор круг консултации фокусирани на работата на амбасадите.
Брус рече дека нема да се разговара за никакви политички или безбедносни прашања и нагласи дека војната во Украина „апсолутно нема“ да биде на дневен ред.
„Овие разговори се исклучиво фокусирани на работата на нашите амбасади, а не на нормализација на севкупните билатерални односи, што може да се случи, како што споменавме, само кога ќе има мир меѓу Русија и Украина“, рече таа.
Портпаролката на руското МНР Марија Захарова претходно информираше дека руската делегација ќе ја предводи рускиот амбасадор во САД Александар Дарчиев, а американската делегација ќе ја предводи заменик-помошникот државен секретар за европски и евроазиски прашања Соната Култер.
Последен пат претставниците на Вашингтон и Москва се сретнаа во Истанбул на 27 февруари. И двете страни го опишаа првиот круг разговори, одржан зад затворени врати, како корисен.
Американската страна потоа соопшти дека на средбата биле дефинирани чекорите за нормализирање на функционирањето на дипломатските претставништва на двете земји. Руската страна соопшти дека предложила обновување на директните летови меѓу земјите.
Годините на затегнати односи доведоа до ограничувања на дипломатската работа во главните градови. Двете страни испратија многу дипломати дома откако Русија ја започна својата целосна инвазија на Украина во 2022 година.
Американскиот претседател Доналд Трамп се залага за подобрување на односите откако се врати во Белата куќа во јануари.
Русија минатата недела го испрати пратеникот Кирил Дмитриев во Вашингтон на покана на пратеникот на Трамп Стив Виткоф. Дмитриев по разговорите изјави дека гледа „позитивна динамика“ во односите меѓу Москва и Вашингтон, но дека разликите остануваат и дека се потребни уште неколку средби за нивно решавање.
Тој исто така рече дека се работи на обновување на директните летови меѓу Русија и САД.
види ги сите денешни вести
Француски новинар убиен во напад со дронови во Украина, обвинета е Русија
Француски новинар е убиен, а украински фотограф е повреден во напад со руски беспилотни летала во близина на линиите на фронтот, соопштија Киев и францускиот претседател Емануел Макрон на 3 октомври.
„Нашиот сонародник, фоторепортер Антони Лаликан, ја придружуваше украинската војска на фронтот. Со длабока тага ја примив веста за неговата смрт од руски напад со дронови“, напиша Макрон на мрежата Икс.
„Изразувам искрено сочувство до неговото семејство, најблиските и сите негови колеги кои, ризикувајќи ги своите животи, нè информираат и сведочат за реалноста на војната“, додаде францускиот претседател.
Од украинската војска преку социјалните мрежи соопштија дека фотографот Григориј Иванченко е повреден во истиот напад и е во стабилна состојба.
„Двајцата новинари носеа лична заштитна опрема, а нивните панцири имаа ознаки – натпис ’ПРЕС‘“, соопшти украинската бригада.
„Непријателот уште еднаш цинично ги прекрши нормите на меѓународното хуманитарно право. Овој факт уште еднаш ја потврдува подмолноста и суровоста на непријателската војска“, се додава во соопштението.
Како што посочија украинските власти, во периодот кога бил убиен, 37-годишниот Лаликан бил сместен со украинските сили во близина на фронтовската линија во регионот Донецк.
Европската и меѓународната федерација на новинари го окарактеризираа убиството како „воено злосторство“.
Организациите посочија дека Лаликан е првиот новинар убиен од беспилотно летало во украинската војна, иако УНЕСКО соопшти уште 21 новинар биле убиени на друг начин во Украина откако Москва ја започна целосната инвазија во февруари 2022 година.
Киев соопшти дека Лаликан и Иванченко биле сместени во близина на областа Дружкивка, на околу 20 километри од фронтовската линија во регионот Донецк.
Меѓународната организација Репортери без граници (RSF) повика на брза истрага.
„Лаликан загинал додека ја вршел својата работа, сведочејќи за последиците од војната. Неговата посветеност, признаена од неговите колеги, беше исто толку голема колку и ризиците што тој ги презеде за да ги објави вестите“, изјави шефот на оваа организација, Тибо Брутин.
Украинскиот министер за надворешни работи, Андриј Сибига, рече дека Москва „продолжува намерно да таргетира новинари, што е гнасен злостор и кршење на меѓународното хуманитарно право“.
„Ќе вложиме максимални напори сторителите да бидат повикани на одговорност“, рече тој.
Во меѓувреме, шефот на Меѓународната агенција за атомска енергија (МААЕ), Рафаел Гроси, изјави дека разговара за предлози со Москва и Киев за начини за враќање на електричната енергија во нуклеарната централа Запорожје, најголема во Европа.
Од 23 септември, централата е исклучена од надворешно напојување и се лади со дизел генератори за итни случаи. Таа беше окупирана од руските сили кратко време по почетокот на целосната инвазија, но главно ја управува украински персонал.
Објектот не произведува електрична енергија, но неговите реактори мора да се ладат со дизел генератори за итни случаи за да се спречи нуклеарна катастрофа. Двете страни се обвинуваат меѓу себе за гранатирање на централата.
Далеку од бојното поле, разузнавачката агенција на Данска – членка на НАТО, објави дека руски воени бродови постојано пловеле по патеки на судир, го насочувале своето оружје кон данските воени бродови и го нарушувале движењето во данските води што го поврзуваат Балтичкото со Северното Море.
„Видовме неколку инциденти во данските теснеци, каде што хеликоптерите и воените бродови на данските воздухопловни сили беа цел на радари за следење, а кон нив и физички биле насочени оружја од руски воени бродови“, изјави шефот на данската служба за одбранбено разузнавање, Томас Аренкиел, на прес-конференција.
Белата куќа соопшти дека ваквиот извештај го сфаќа сериозно.
„Тоа е нешто што администрацијата го сфаќа многу сериозно и ние постојано го следиме. Советот за национална безбедност во Белата куќа е во постојана кореспонденција со нашите сојузници од НАТО“, изјави портпаролката на Белата куќа, Каролин Ливит.
Во регионот, тензиите се високи откако имаше инциденти со сомнителни саботажи поврзани со подводни кабли и цевководи, упади во туѓи воздушни простори и забележување на дронови, за кои сомнежите се дека голем дел се поврзани со Москва.
Хамас се согласи со мировниот план, Трамп порача Израел да го прекине бомбардирањето
Американскиот претседател Доналд Трамп порача дека Израел „мора веднаш“ да го прекине бомбардирањето на Појасот Газа, откако радикалната палестинска група Хамас соопшти дека ќе се согласи со некои аспекти од неговиот план за завршување на војната, вклучително и ослободување на заложниците и предавање на контролата врз крајбрежната енклава. Но, како што наведе Хамас, ќе бара преговори за многу други услови.
Агенцијата Ројтерс, која имала увид во копија од одговорот на Хамас, која е прогласена за терористичка организација од САД и ЕУ, потсетува дека ова следува откако Трамп предложи мировен план од 20 точки и даде рок до неделата за Хамас да го прифати или отфрли предлогот.
На својата социјална мрежа „Трут“, Трамп повикувајќи се на соопштението на Хамас, напиша дека верува оти групата е подготвена за траен мир.
„Израел мора веднаш да го прекине бомбардирањето на Газа за да можеме безбедно и брзо да ги извлечеме заложниците! Премногу е опасно да се направи тоа во моментов. Веќе разговараме за деталите што треба да се разработат. Ова не е само за Газа, ова е за долгоочекуваниот мир на Блискиот Исток“, напиша Трамп.
Хамас во соопштението не наведе дали ќе се согласи со условот да се разоружа, барање од Израел и САД што претходно го отфрли.
Од друга страна, високиот функционер на Хамас, Муса Абу Марзук, во петокот за Ал Џезира изјави дека групата нема да се разоружа пред да се заврши израелската „окупација“, додавајќи дека прашањата за иднината на Газа треба да се дискутираат во рамките на сеопфатна палестинска национална рамка од која дел ќе биде и Хамас.
Хамас во соопштението наведе дека „ги цени арапските, исламските и меѓународните напори, како и оние на американскиот претседател Доналд Трамп, и повиците за прекин на војната во Појасот Газа, размена на затвореници и итна испорака на помош“.
Групата додаде дека објавува „одобрување на ослободувањето на сите окупациски (израелски) затвореници – и живи и мртви, во согласност со формулата за размена содржана во предлогот на претседателот Трамп, со потребните услови на терен за да се случи размената“.
Сепак, Хамас наведе дека „во овој контекст… ја потврдува својата подготвеност веднаш да влезе во преговори, преку посредници, за да ги разговара деталите“.
Радикалната палестинска организација изјави дека е подготвена да „го предаде управување со Појасот Газа на палестинско независно тело (технократи) врз основа на палестинскиот национален консензус и со поддршка на арапските и исламските сили“.
Планот на Трамп беше поддржан и од Израел, арапските и европските сили.
Тој повикува на итен прекин на огнот, размена на сите заложници што ги држи Хамас за палестинските затвореници што ги држи Израел, постепено повлекување на Израелците од Газа, разоружување на Хамас и воспоставување преодна влада предводена од меѓународно тело.
Заменик-генералниот секретар на ОН за хуманитарни прашања, Том Флечер, рече дека иницијативата на Трамп за Газа отвора можности.
„Исто така, им нуди на Палестинците шанса да добијат помош којашто спасува животи, и шанса заложниците да се вратат дома“, рече Флечер во петокот.
Планот на Трамп повикува на дистрибуција на помош во Газа без мешање од неутрални меѓународни групи, а ОН наведоа дека 170.000 метрички тони се подготвени да влезат на палестинската територија.
Израел ја започна офанзивата во Газа по нападот на Хамас врз Израел на 7 октомври 2023 година, во кој беа убиени околу 1.200 луѓе, а 251 лице беа однесени како заложници во Газа. Израел тврди дека остануваат неослободени уште 48 заложници, од кои 20 се живи.
Повеќе од 66.000 луѓе, пак, се убиени во последователните израелски напади врз Појасот Газа, според здравствените власти во Газа контролирани од Хамас.
Русија и Украина продолжуваат со меѓусебни напади врз енергетската инфраструктура
Русија и Украина разменија во петокот воздушни напади врз енергетската инфраструктура, додека борбите продолжуваат во услови на застој во мировниот процес за завршување на најголемиот и најсмртоносен конфликт во Европа од Втората светска војна.
Околу пладне во регионот Орск, кој се наоѓа на околу 1.400 километри од фронтот во воено разурната Украина, гувернерот на Оренбуршката област, Евгениј Солнцев, изјави дека „непријателски дронови“ нападнале индустриски објект во таа област.
„Технолошките процеси во претпријатието не се нарушени. Службите за итни случаи се на терен“, додаде тој, претходно соопштувајќи дека локалниот аеродром го запрел своето работење.
Низа видеа, потврдени за Радио Слободна Европа, објавени на социјалните мрежи, прикажуваат огромни облаци чад што се издигаат од големата рафинерија за нафта Орскњефтеоргсинтез.
Службата за безбедност на Украина (СБУ) потврди дека нејзини дронови го извршиле нападот.
Во последните месеци, Киев ги интензивираше нападите врз руската енергетска инфраструктура, што, според сè, предизвикува недостиг на гориво и пораст на цените во Русија.
Само во септември, Украина соопшти дека гаѓала неколку руски рафинерии во пограничната Брјанска област, како и во Самарската и Башкортостанската област, кои се во руската територија.
Нападот со дрон врз Орск следува по извештајот на американскиот весник „Волстрит џурнал“ (The Wall Street Journal), во кој се наведува дека САД ќе ѝ обезбедат на Украина разузнавачки информации за далечни цели во руската енергетска инфраструктура.
Според весникот, новите податоци би ѝ олесниле на Украина да ја напаѓа руската инфраструктура со цел да ѝ се ускратат на Москва приходите за воените напори.
Кон крајот на септември, претседателот на САД, Доналд Трамп, пред Генералното собрание на Обединетите нации изјави дека смета оти руската економија стагнира поради војната.
Кремљ подоцна го негираше ова тврдење, но призна дека „Русија доживува одредени тензии“.
Во петокот, Русија продолжи да напаѓа региони низ Украина со ракети и дронови, оштетувајќи цивилна и енергетска инфраструктура, соопштија локални власти.
Украинските сили за противвоздушна одбрана соопштија дека во ноќниот руски напад биле користени 381 дрон и 35 ракети, додавајќи дека главни цели биле енергетски објекти во Харкивската и Полтавската област.
Главната украинска гасна мрежа, „Нафтогас“, соопшти дека нападот бил „најголемиот“ врз инфраструктурата за производство на гас од почетокот на руската инвазија.
Генералниот директор на „Нафтогас“, Серхиј Корецки, изјави дека нападите се насочени терористички акти против цивилни објекти што обезбедуваат производство на гас.
„Без воено значење. Уште една манифестација на руската подлост, насочена исклучиво кон нарушување на грејната сезона и одземање на можноста да ги затоплуваме украинските домови во зима“, рече Корецки. „Како резултат на нападот, значителен дел од нашите објекти е оштетен. Дел од штетата е критична.“
Доцна во петокот, гувернерот на Доњецката област, Вадим Филашкин соопшти дека дел од регионот е без струја поради руското гранатирање.
„Русите продолжуваат да ја гаѓаат критичната инфраструктура. Денес нивна цел беше енергетиката“, изјави Филашкин на Телеграм.
Тој додаде дека надлежните служби ќе го обноват снабдувањето со струја што е можно побрзо.
Меѓународните новинарски здруженија ја осудија кампањата против новинарите во Србија
Меѓународната федерација на новинари (IFJ) и Европската федерација на новинари (EFJ) на 3 октомври ги осудија кампањите за дискредитација на новинари во Србија и ги повикаа властите да спроведат истрага за анонимните летоци кои се дистрибуираат низ Србија, а чии мети се четворица новинари.
Овие летоци досега бea распространети по приватни поштенски сандачиња и на јавни места во Белград и други градови.
Во летоците секој од новинарите е опишан како личност со „крвави раце“, обвинувајќи ги дека организираат таканаречена „обоена револуција“.
Со „обоена револуција“ властите во Србија ги нарекуваат антивладините протести предводени од студенти, на кои се бара одговорност за загинувањето на 16 лица при уривањето на настрешницата на Железничката станица во Нови Сад на 1 ноември 2024 година.
На летоците се објавени фотографии и навредливи текстови за Динко Грухоњиќ, Сања Игњатовиќ Екер, Иван Ивановиќ и Марко Видојковиќ.
„Овие закани се резултат на конструирани наративи кои со месеци неуморно ги шират јавни функционери, вклучително и претседателот на Србија, Александар Вучиќ, како и прорежимски таблоиди, со цел дискредитација на независното известување за антикорупциските протести“, се наведува во соопштението на IFJ и EFJ.
Тие предупредија дека „таквите злонамерни тврдења поттикнуваат омраза кон новинарите кои постојано се мета на закани со смрт само затоа што ја известуваат вистината“.
Во Србија, во 2025 година, според базата на податоци на Независното здружение на новинари на Србија, се забележани повеќе од 130 напади врз новинари.
Според последниот извештај на меѓународната организација Фридом Хаус (Freedom House), Србија се наоѓа на листата на држави со најголем пад на слободите во последните десет години.
Оваа организација со седиште во САД, која ја документира состојбата со човековите права и слободи во светот, како главен „виновник“ за падот на слободите во Србија ја посочи власта.
Вучиќ: Сите се подготвуваат за војна, Косово се обидува да ги придобие ЕУ и НАТО на своја страна
Претседателот на Србија, Александар Вучиќ на 3 октомври изјави дека „сите се подготвуваат за војна“ и дека Косово „се обидува да го искористи предвоеното време“ за да го придобие на своја страна мнозинството од европските и НАТО земји.
Вучиќ така одговори на новинарско прашање во врска со изјавата на претседателката на Косово, Вјоса Османи, која во пресрет на Самитот на европските лидери за безбедност и одбрана во Копенхаген ја повика Европа да ги спречи „агресивните и дестабилизирачки тактики на Србија кон соседите“.
„Апсолутно никој веќе не го слуша тоа, но Приштина ќе продолжи со прогон на српскиот народ и со провокации“, рече Вучиќ пред новинарите за време на отворањето на делницата од брзата железница Белград – Суботица.
Османи, пред Самитот во Копенхаген, потсети дека Косово на 21 септември ја одбележало втората годишнина од вооружениот напад на група Срби врз полицијата во Бањска, при што беше убиен еден полицаец.
„Европската унија сè уште бара одговорност. Немаше никаква одговорност и време е тие свои зборови да ги претворат во дела“, рече Османи.
Таа додаде дека претседателот на Србија, Александар Вучиќ се обидува да го копира рускиот лидер Владимир Путин „користејќи тактики на агресија и дестабилизација кон соседите“, и дека затоа „е важно земјите членки на ЕУ да сфатат дека наградувањето на Србија за сојузништво со Русија не е патот кој води кон напред“.
„Земјите кои се усогласија 100 отсто со ЕУ треба да бидат наградени, а не тие што ја избраа Москва како свој пат напред“, рече Османи.
Говорејќи за Самитот во Копенхаген, Вучиќ изјави дека „во светот ќе биде сè потешко“ и дека „мисли дека одиме кон голем судир“.
„Сите се подготвуваат за војна. И кога веќе знаеме дека ќе има војна – а ќе има, ви велам, затоа што гледам што се случува и како сите се подготвуваат – никој не се подготвува за разговори, сите гледаат кој ќе биде на чија страна. Ги копаат своите ровови и го чекаат почетокот“, рече Вучиќ.
Вучиќ додаде и дека Србија „ќе даде сè од себе“ за да не учествува во таа војна.
Самитот на Европската политичка заедница се одржа откако Данска кон крајот на септември мораше да го затвори аеродромот во Копенхаген поради појава на дронови, како и по повеќекратните руски навлегувања со дронови во воздушниот простор на други европски земји.
Во врска со извештајот на УНМИК за ситуацијата на Косово, кој ќе биде претставен во Советот за безбедност на 21 октомври, Вучиќ изјави дека очекува тој да биде „делумно објективен“.
„Нема да ги прикаже сите ужасни последици од управувањето на Курти (вршител на должноста премиер на Косово), но сигурен сум дека ќе укаже на сите проблеми со кои се соочува српскиот народ. Сега тоа сите го гледаат и сите го знаат. Тоа го знаат и нашите партнери на Запад, и Американците, и Европејците“, рече Вучиќ.
„Остра е реакцијата на Вашингтон, кој ја прекинува можноста за стратешки дијалог со Приштина, но немојте да го очекувате тоа од Брисел. За нив во овој момент е најважно сите да бидат антируски ориентирани, затоа што тие, со или без причина, чувствуваат закана од руската страна, исто како што Русите чувствуваат закана од целокупниот Запад“, изјави Вучиќ.
Директорот на „Србијагас“ не исклучува нови рокови за примена на санкции кон НИС
Директорот на компанијата „Србијагас“, Душан Бајатовиќ изјави дека не ја исклучува можноста САД да дадат „уште некои рокови“ за разговори околу примената на санкциите кон Нафтената индустрија на Србија (НИС).
САД во јануари воведоа санкции за НИС поради мнозинското руско сопствеништво, но нивното стапување на сила беше одложено шест пати. Последен пат до 1 октомври, а потоа рокот беше дополнително продолжен за уште осум дена – до 8 октомври.
„Не ја исклучувам ниту можноста да добиеме понуда да купуваме американска нафта и на тој начин практично да го 'израмниме' дефицитот што го имаме во трговијата со Америка, а е поврзан со царините од 36 проценти“, изјави Бајатовиќ на 3 октомври на седница на собранискиот Одбор за економија, трговија и енергетика.
Претседателот на Србија, Александар Вучиќ, ден претходно изјави дека Русија предложила САД да преземат дел од акциите на НИС, како и дека оваа компанија би купувала одредена количина американска нафта која би се доставувала преку Јадранскиот нафтовод (ЈАНАФ).
Сепак, Вучиќ посочи дека „не е сигурен“ дали САД ќе го прифатат предлогот на Москва и дека не верува оти тоа ќе го реши проблемот со санкциите.
Бајатовиќ изјави дека „одредени работи ќе се случат и во однос на управувањето со НИС“, но дека тој, додека не се исцрпат другите можности, не е сигурен дека Србија е во позиција да разговара за сопственичката структура на таа компанија, во која Русите се мнозински сопственици.
„Ако се случи да мораме да купуваме американска нафта, тоа ќе биде нешто поскапо, затоа што и таа е на пазарот. Го видовме она што Трамп ѝ го наметна на Европа, па дали е подобро да имаме наш сопствен преработувач?“, рече Бајатовиќ.
Тој истакна дека, во случај да се воведат санкции, не е сигурен дека Србија има доволно цистерни и бродови за да може да увезува нафта од околните земји.
Бајатовиќ наведе дека гас ќе има доволно и дека нема да поскапи за населението, но дека стопанството ќе мора да плати онолку колку што тоа гориво чини за Србијагас.
Иако сопственичката структура на НИС повеќепати беше менувана, мнозинството сè уште е во рацете на руските компании. Газпром излезе од сопственичката структура на НИС во септември, а еден од значајните сопственици стана друга компанија управувана од Газпром – фирмата Интелиџенс од Санкт Петербург.
Акционерското друштво Интелиџенс стана сопственик на 11,3 отсто од уделот во компанијата, покажаа податоците објавени на веб-страницата на Белградската берза на 21 септември.
Најголем удел во НИС сè уште има Газпром њефт, ќерка фирма на Газпром (44,9 отсто), додека државата Србија поседува 29,9 отсто. Остатокот од уделот го сочинуваат мали акционери.
Мицкоски - Мацут: Унапредување на билатералните односи и економската соработка, гасно и коридорско поврзување
Гасното и коридорското поврзување со Србија, е темата на која македонскиот премиер, Христијан Мицкоски разговарал на денешната средба со премиерот на Република Србија, Ѓуро Мацут кој престојува во официјална посета на нашата земја.
„Разговаравме за гасно и коридорско поврзување, како и за унапредување на економската соработка меѓу двете држави. Уверени сме дека заедничките проекти ќе придонесат за посилни врски и подобра иднина за нашите граѓани“, напиша премиерот на неговиот Фејсбук профил.
Од владината прес-служба информираат дека двајцата премиери разговарале и за унапредување на билатералните односи, економската соработка и инфраструктурното поврзување. Акцент бил ставен и на трговската размена, заедничките енергетски проекти и олеснувањето на движењето на луѓе и стоки.
Премиерот Мицкоски истакнал дека Србија е искрен партнер и пријател, со кого ја споделуваме визијата за стабилен, безбеден и просперитетен Балкан.
Премиерот Мацут изразил поддршка за реформските процеси во државата нагласувајќи дека Белград и Скопје ќе продолжат да соработуваат на заеднички проекти кои се во интерес на граѓаните на двете земји. Двете страни се согласиле дека продлабочувањето на пријателските врски меѓу двете држави претставува значаен придонес за регионалната стабилност и европската перспектива на Западен Балкан.
До ФЗО пристигнале уште 15 претставки за сомнителни кардиолошки интервенции
Во Фондот за здравствено осигурување пристигнале 15 претставки од пациенти за сомнителни кардиохируршки интервенции, кои се препратени до Министерството за здравство за натамошно постапување. Ова денеска (3 октомври) го соопшти генералниот директор на ФЗО, Сашо Клековски кој рече дека пет од претставките се индивидуални, а десет се поднесени од установа.
Според него, досега се пристигнати вкупно 25 претставки од пациенти за сомнителни кардиолошки интервенции.
„Претставките опфаќаат различни периоди, најстарата е за нешто што се случило во 2010 година“, рече тој.
Клековски додаде дека во основа, има три категории поплаки, односно претставки: „едната е каде можно е да им е направена интервенција на пациенти, а немало потреба од тоа, втората е каде на пациенти требало да им се направи, а не им е направено тоа што требало да се направи, и третата се однесува на пациенти кај кои од тоа што е направено нема да има помош. Во смисла интервенциите кои се направени кај пациенти кои можеби се во терминална фаза нема да водат кон подобрување на нивната здравствена состојба или кон продолжување на животниот век“.
Директорот на Фондот, додаде дека тоа може да го спореди со „давање скапи онколошки лекови на терминално болни пациенти, каде единствено палијативна нега е потребна во моментот“
Апелираше и дека не треба да се очекуваат брзи резултати и не е пожелно да има брзо резултати, бидејќи тие би биле погрешни.
„Тука брзината е помалку важна од квалитетот на сработеното, бидејќи мора да бидеме сигурни во тоа што ќе постапиме и доколку има сериозни грешки тоа треба да заврши со кривични пријави, да биде еден процес на барање и преземање одговорност, а ние како здравствени власти да извлечеме поука како да го промениме системот од контрола на квантитет кој контрола на квалитет на сработеното“, потенцира Клековски.
Извештајот пак, кој претходно го објави ФЗО, а кој се однесува на ланската година, покажува дека Фондот обезбедил над 16 милиони евра (вкупно 16.747.967 евра) за кардиоваскуларни интервенции во двете приватни клинички болници „Жан Митрев“ и „Аџибадем Систина“.
Станува збор за интервенции што осигурениците имаат право да ги направат во приватните болници, а не плаќаат речиси ништо, исто како да ги направиле на државно. Ги плаќа Фондот преку таканаречените договорни надоместоци кои ги дава и за приватни и за јавни здравствени установи.
За овие операции на срце и на крвни садови, Фондот има случено договори со четири болници - две приватни, „Аџибадем Систина“ и „Жан Митрев“ и две државни, Клиника за кардиохирургија и Клиника за торакална и васкуларна хирургија.
Во минатите четири години до Фондот за здравство не стигнале претставки од пациенти за непотребни медицински интервенции.
„Сепак, немаме законска надлежност да ја оценуваме медицинската оправданост на изведените интервенции, ниту да вршиме инспекциски надзор врз стручната работа на здравствените установи. Овие надлежности се во доменот на Државниот здравствен и санитарен инспекторат или на специјални комисии што ги формира министерот за здравство“, соопштија од ФЗОМ.
Надлежност на Фондот е да следи дали има неправилности во користењето на парите од страна на болниците. По таа основа, Фондот за здравство соопшти дека по сопствен наод направиле девет контроли за приватно наплатени средства, но не откриваат кој бил исходот.
Приватните превозници во Скопје ќе возат редуцирано поради неисплатен долг од ЈСП
До понеделник (6 октомври 2025) доколку не биде исплатен долгот кон приватните превозници во Град Скопје, нивниот возен ред ќе биде намален за 70 проценти. Тие ќе возат само прва смена од 5 до 10 часот - соопшти денеска сопственикот на „Јофи Бус“, Јовица Зафировски.
Приватните превозници Јофи Бус, Вестор Транс, Радос Компани кои сообраќаат во Скопје денеска побараа од ЈСП да им биде исплатен вкупниот долг од 170 милиони денари, од кој, како што изјавија, во моментов се доспеани 90 милиони денари.
„Долгот кон нас не е подмирен од април, односно од пред шест месеци. Ако вработените на ЈСП можат да издржат без плата шест месеци, ние не можеме. Денеска имавме план да прекинеме со возење, но сакаме да бидеме коректни кон граѓаните на Скопје и ќе чекаме до понеделник. Доколку ни се уплатат средства ние сакаме да работиме и ќе продолжиме да возиме. Ни треба уплата веднаш од ЈСП“, истакна Зафировски.
Доколку не се исплатат парите до понеделник, приватниците рекоа дека ќе се редуцира возењето, односно трите компании ќе возат само прва смена со 30 проценти капацитет, сѐ до исплатата на долгот.
Директорот на ЈСП Скопје Драги Кушовски, кој се придружи на прес-конференцијата на приватните превозници, рече дека е позната состојбата во која се наоѓа ЈСП и дека тоа не е никакво оправдување, но нагласи дека кон приватните превозници се исплаќаат долговите согласно нивните можности.
„Траба да се престане со манипулација на граѓаните. Недостаток на автобуси знаеме дека има, а ние да пуштаме наши автобуси да бидат полни за да се штедат приватните автобуси за да не се амортизираат, тоа не е дозволиво. Треба да бидат коректни кон граѓаните, а не да се влечат позади автобусите на ЈСП. Долгот кон сите тројца приватни превозници е околу 60 милиони денари“, истакна Кушовски.
На ова реагираа приватните превозници дека долгот е поголем поради што настана надвикување која информација е точна. И двете страни бараа да се покажат уплатите, но сѐ остана само на зборови. Директорот на ЈСП ги праша дали имале средба и дали се договориле дека исплатата ќе се врши според можностите на ЈСП, приватниците потврдија, но рекоа дека не им е исплатена сумата, односно им е исплатен само мал дел од долгот. Вчера им биле исплатени по 300 илјади денари, а пред пет недели по 10 милиони денари за долгот од март.
Превозниците на директорот му посочија дека не можат да ги покријат долговите кон бензинските пумпи и дека веќе им се најавени извршители.
Уставниот суд на Република Српска одлучи дека референдумот за Додик не ги нарушува виталните интереси на Бошњаците
Советот за заштита на виталните интереси на Уставниот суд на Република Српска (РС) одлучи дека одлуката за референдум за пресудата против Милорад Додик и одземањето на неговиот мандат не го нарушува виталниот национален интерес на бошњачкиот народ.
Уставниот суд на РС одлучи по жалбата на Бошњаците во Советот на народот на РС.
Заклучено е дека изјавите на Клубот на делегати на бошњачкиот народ во Советот на народот на Република Српска, во кои се изразуваат загриженост и претпоставки за можните последици што резултатите од референдумот и нивното спроведување можат да ги имаат за бошњачкиот народ, како и за потенцијална дискриминација, „не се правно релевантни за прашањето за повреда на виталниот национален интерес“.
Одлуката за одржување на референдумот ја усвои Народното собрание на РС на 22 август, по конечната пресуда на Судот на Босна и Херцеговина и одлуката на ЦИК за одземање на мандатот на Додик.
Неговиот мандат му беше одземен официјално кон средината на август, откако Судот на Босна и Херцеговина го осуди на една година затвор за непочитување на одлуките на Високиот претставник, казна што тој ја плати веднаш, и шестгодишна забрана за вршење јавни и политички функции.
Еден од заклучоците, усвоени од Собранието на РС, е дека референдумот ќе се одржи на 25 октомври оваа година.
Уставот на Босна и Херцеговина не предвидува можност субјектите самостојно да распишуваат референдуми за одлуките на државните институции.
Пониските нивоа на власт во Босна и Херцеговина можат законски да распишуваат референдум само за прашања од нивна надлежност, но не и за национални.
Патем, одлуката за референдумот на 22 август беше проследена со усвојување на измени на Законот за референдум и граѓанска иницијатива по итна постапка, што треба да му овозможи на Собранието на РС да формира посебни комисии за референдуми.
На 29 август, Бошњачкиот клуб во Советот започна постапка за заштита на националниот интерес поради таа одлука.
Исто така, за овој Клуб, спорни се и измените на Законот за референдум на РС, кои предвидуваат дека референдумот може да го спроведе ад хок комисија назначена од Парламентот на ентитетот.
Потоа, Народниот совет на Република Српска не го усвои ветото на Бошњачкиот клуб, по што одлуката за референдумот заврши пред Уставниот суд на Република Српска.
Мултимедија
Најпосетени
Што треба да знаете