Вести
Пристигнуваат „ер трактори“ и хеликоптери од Турција, Словенија, Србија и Црна Гора за гаснење на пожарите
Во Центарот за управување со кризи денеска на 15 јули се одржа седница на Управувачкиот комитет за координација на системот за управување со кризи, со која претседаваше министерот за внатрешни работи Панче Тошковски. На седницата присуствуваа и министрите за одбрана Владо Мисајловски и за надворешни работи и трговија Тимчо Муцунски, како и раководителот на Групата за процена на ризици и опасности Стојанче Ангелов, соопшти МВР.
„На седницата беше утврдена потребата да се активираат меѓународните механизми за обезбедување на помош во воздухоплови, кои ќе се вклучат во гаснењето на пожарите кои деновиве ја зафатија државата. Денеска претпладне од Турција пристигнаа два „ер трактори“ и еден хеликоптер, кои веќе активно работат на терен. Во текот на утрешниот ден ќе пристигнат два хеликоптери од Словенија и по еден хеликоптер од Србија и од Црна Гора“, изјави министерот Тошковски.
Министрите изразија благодарност до пријателските земји кои ни помагаат во справувањето со огнената стихија, се вели во соопштението од МВР.
Српскиот вицепремиер и министер за внатрешни работи Ивица Дачиќ денеска изјави дека телефонски е пристигнато барање за помош од Северна Македонија поради големиот број пожари.
„Сè уште не сме го добиле официјално, но разговаравме на телефон. Побараа од Северна Македонија да им помогнеме да го изгаснат пожарот. Слични барања има и од Република Српска. Мислам дека имаме доволно капацитет за помош во двете држави истовремено, во хуманата акција за гасење пожари“, рече Дачиќ.
Дачиќ нагласи дека Србија ќе испрати хеликоптери за гаснење на пожарот и додаде дека не сака тоа да биде оценето како испраќање хеликоптери заради остварување на воена доминација.
Пожарите беснеат и опустошуваат површини колку цели градови во Северна Македонија. Прогласена е 30 дена кризна состојба. Но, има криза и во делот на опремата за справување со пожарите, гаснат и возила стари 45 години. Нема и луѓе, па општините си помагаат, а почна да пристига помош и од други држави.
Министерството за земјоделство, шумарство и водостопанство по барање на ЈП „Национални шуми“, даде согласност за воведување на целосна забрана за движење во шумите и шумското земјиште, поради зголемена опасност и превенирање од појава на шумски пожари на отворен простор.
Целосната забрана за движење во шумите од 06:00 до 20:00 часот почна денеска (15 јули), а ќе трае до проценката дека ризикот од шумски пожари е намален.
види ги сите денешни вести
Велика Британија воведе санкции против криумчарите на луѓе
Велика Британија воведе санкции против озлогласените банди вклучени во криумчарење луѓе и против нивните помагачи, објави Министерството за надворешни работи на Велика Британија.
Акцијата е дел од кампањата на британската влада за заштита на своите граници и намалување на нерегуларната миграција.
Меѓу санкционираните се членови на црногорските криминални групи - шкаљарски и кавачки клан, како и шверцери од Србија, Северна Африка и Блискиот Исток.
Санкциите опфаќаат замрзнување сметки, забрана на граѓани и компании од Велика Британија да работат со средствата на тие лица, да им обезбедат средства или ресурси, како и забрана за нивен влез и престој во Обединетото Кралство.
Санкциите се насочени кон 25 лица и субјекти вклучени во шверц - од добавувачи на бродови, до неформални „носачи“ на пари до Блискиот Исток, до водачи на криминални групи од Балканот и Северна Африка, соопшти Британската амбасада во Подгорица.
Санкциите стапуваат на сила веднаш и се први во светот што ја погодуваат нерегуларната миграција и организираниот имиграциски криминал.
Режимот на санкции му дава овластување на Министерството за надворешни работи на Велика Британија да воведува санкции врз финансиерите и компаниите што овозможуваат шверцерски активности.
Герапетритис: Атина го поддржува Скопје на европскиот пат, важна е целосна имплементација на договорот од Преспа
„Длабоко верувам во потенцијалот на нашите односи. Во силата на дипломатијата заснована на почит и во нашата заедничка способност да изградиме иднина што ќе биде функционална. Не само денес, туку и за генерациите што доаѓаат“, изјави министерот за надворешни работи и надворешна трговија Тимчо Муцунски по средбата со неговиот грчки колега Јоргос Герапетритис во Атина и порача дека „меѓусебното почитување е основата врз која се гради трајна соработка“.
На средбата на шефовите на двете дипломатии во фокусот беа билатералните односи, соработката во повеќе области и европската перспектива на регионот.
Герапетритис потсети на поддршката на Грција за членството на Северна Македонија во НАТО во 2020 година и изрази желба за унапредување на соработката во рамките на Алијансата.
Тој се осврна и на Солунската агенда од 2003 година за забрзување на интеграцијата на Западен Балкан во Европската Унија, при тоа уште еднаш изразувајќи ја грчката поддршка за ЕУ перспективата на нашата земја и на регионот.
„Сакам повторно да ја истакнам поддршката на Грција за напредокот на Северна Македонија по европскиот пат, врз основа на утврдените услови и начелото на сопствени заслуги, со особено внимание на основните критериуми. Во овој контекст, дозволете ми да ја подвлечам крајната важност од целосна, доследна и со добра волја имплементација на договорот од Преспа, вклучително и ерга омнес употребата на уставното име на државата“, рече Герапетритис.
Муцунски во обраќањето рече дека на средбата била истакната важноста на меѓународното јавно право и обврските што двете земји ги имаат преземено и во тој контекст наведе дека меѓусебната почит е основа за градење на трајна соработка и оти длабоко и искрено верува во „нашите односи и во силата на дипломатијата засновани на почит“.
„Изразив благодарност за доследната поддршка што Грција ја дава за нашиот европски пат и за нејзината постојана улога како застапник на европската иднина на Западен Балкан. Тоа партнерство не само што го цениме, го гледаме како суштинско“, рече Муцунски.
Тој рече дека со грчкиот колега се осврнале и на „напредокот што носи реални резултати за нашите граѓани“. Тоа се инвестиции, трговија, инфраструктура, енергија, при што разговарале и за проекти како што се Коридорот 10 и интерконекторот за гас.
Министерството за надворешни работи и надворешна трговија соопшти и дека Муцунски изразил искрена благодарност за солидарноста што Грција ја покажа за време на трагедијата во Кочани на 16 март при што загинаа 62 лица, а околу 200 беа повредени, како и при неодамнешните итни состојби во близина на Дојран.
Министерот оценил дека тоа не се само гестови на помош – туку вистински дела на пријателство, соопшти МНР.
Ова беше прва работна посета на македонскиот шеф на дипломатијата на Атина.
Претходно, Герапетритис и Муцунски се сретнаа и на почетокот на април годинава на маргините на „Делфи економскиот форум“ во Грција.
Северна Македонија и Грција, имаа речиси тридецински спор околу старото уставно име на државата – Република Македонија, кој беше надминат со потпишување на Преспанскиот договор на 17 јуни 2018 година кога со двете држави раководеа владите предводени од тогашните премиери Зоран Заев и Алексис Ципрас.
По шест години од потпишувањето на Преспанскиот договор, уставното име на Северна Македонија се врати во фокусот на надворешната политика на земјава откако ВМРО-ДПМНЕ убедливо победи на парламентарните и претседателските избори на 8 мај 2024 година.
По изборите, лидерот на ВМРО-ДПМНЕ и сегашен премиер, Христијан Мицкоски, најави дека ќе го следи патот на новата претседателка на државата, Гордана Сиљановска Давкова, која во својата заклетва го користеше само името „Македонија“ и јасно порача дека не се откажува од тоа во јавните настапи бидејќи е нејзино лично право на самоопределување.
Преспанскиот договор го потпишаа поранешните влади во Северна Македонија и Грција предводени од тогашните премиери Зоран Заев и Алексис Ципрас. Потписите ги ставија ексминистрите за надворешни работи Никола Димитров и Никос Коѕијас.
Северна Македонија е кандидат за членство во ЕУ од 2005 година. Откако државата го реши речиси тридеценискиот спор околу името, официјална Атина го тргна ветото на евроатлантскиот пат на земјата. Државата го промени уставното име додавајќи ја придавката „Северна“ и стана членка на НАТО во 2020, но истата година вето за отпочнување преговори со ЕУ стави Бугарија.
Потоа, договор беше постигнат во 2022 година со усвојување на т.н. „француски предлог“ со кој се предвиде Скопје да ги продолжи евроинтеграциите откако во преамбулата од Уставот ќе ја вметне и бугарската заедница.
Уставните измени не се случија, а Владата предводена од ВМРО-ДПМНЕ бара гаранции дека нема да има нови условувања во иднина од бугарска страна и нема да се оспорува македонскиот идентитет и јазик.
Повеќе од 100 организации бараат итно да се стави крај на гладот во Газа
Повеќе од 100 хуманитарни организации и организации за човекови права ги повикаа владите итно да дејствуваат за да го спречат ширењето на гладот во Газа.
Тие, исто така, побараа итен и траен прекин на огнот, како и отстранување на сите пречки за дистрибуција на хуманитарна помош.
Во соопштението, потпишано од 111 организации, вклучувајќи ги „Мерсу корпс“ (Mercy Corps), Норвешкиот совет за бегалци и „Рефјуџис интернешнал“ (Refugees International), се предупредува дека гладот во Газа се шири со брзо темпо, додека клучната помош - како што се храна, вода и лекови - останува блокирана на границата бидејќи на хуманитарните организации им е забрането да работат.
„Додека израелската влада ги држи луѓето од Газа под опсада и продолжува да ги изгладнува, хуманитарните работници им се придружуваат во редовите за храна, ризикувајќи да бидат погодени. Залихите се целосно исцрпени. Затворањата и одложувањата предизвикани од целосната опсада на израелската влада создадоа хаос, глад и смрт“, велат организациите.
Тие ги повикаа владите веднаш да ги отстранат сите бирократски и административни пречки што го блокираат доставувањето помош, да ги отворат сите копнени премини кон Газа, да обезбедат ање помошта да стигне до сите луѓе на кои им е потребна, без бариери, да се отфрли воената контрола врз дистрибуцијата на помошта и да се врати хуманитарната помош под водство на ОН, врз основа на меѓународните принципи на хуманитарна акција.
„Државите мора да преземат конкретни мерки - како што е запирање на снабдувањето со оружје и муниција - со цел да се стави крај на опсадата“, се вели во соопштението.
Израел, кој ги контролира сите приливи на помош во Газа, негира одговорност за недостигот од храна.
Повеќе од 800 луѓе се убиени во последните недели обидувајќи се да добијат храна. Повеќето, наводно, биле убиени од израелски војници распоредени во близина на центрите за дистрибуција на помош управувани од Хуманитарната фондација Газа.
Фондацијата, која е поддржана од Соединетите Американски Држави, е критикувана од хуманитарни организации, вклучувајќи ги и Обединетите нации, поради наводен недостаток на неутралност.
Според властите во Газа, Израел досега убил околу 60.000 Палестинци во енклавата.
Собрание: Гаши е во стабилна здравствена состојба
Стабилна е здравствената состојба на претседателот на Собранието, Африм Гаши, информира собраниската прес-служба откако Гаши синоќа бил хоспитализиран на Универзитетската клиника за дигестивна хирургија во Скопје поради болки во стомакот.
„Во моментов се вршат детални лекарски прегледи. Сите понатамошни информации ќе бидат навремено доставени до јавноста од надлежните институции“, соопштија од Собранието.
Оттаму нема детали како ќе работи законодавниот дом и дали се откажани некои од активностите на претседателот на Собранието.
Претходно, директорот на Клиниката, доктор Огнен Костовски, во изјава за „360 степени“ потврди дека претседателот на Собранието е примен во болница со преплет на цревата. Во моментов, како што кажа оттаму, пациентот е подобар, прима лекови и засега не се планира хируршка интервенција.
Протести во Украина откако Зеленски потпиша закон со кој се ограничува моќта на клучни агенции за борба против корупцијата
Демонстранти излегоа на улиците во неколку украински градови доцна на 22 јули откако претседателот на Украина, Володимир Зеленски, потпиша закон со кој се заоструваат ограничувањата за две клучни агенции за борба против корупцијата, поради критиките од европските сојузници на Киев, јави Радио Слободна Европа(РСЕ) на англиски јазик.
Стотици Украинци протестираа во центарот на Киев барајќи Зеленски да стави вето на законот.
Тие сметаат дека законот е донесен набрзина и дека ќе дозволи мешање на владата во случаи на корупција од висок профил.
Вкупно 263 пратеници во Врховната рада (украинскиот парламент) гласаа за закононот, кој ја ограничува независноста на Националното биро за борба против корупцијата на Украина (НАБУ) и Специјализираното обвинителство за борба против корупцијата (САПО).
НАБУ истражува корупција меѓу државните институции, додека САПО гони други видови корупција.
Зеленски во видео обраќање рече дека антикорупциската инфраструктура на Украина треба да се исчисти од руско влијание, додавајќи дека НАБУ и САПО ќе продолжат со својата работа.
„Исто така е важно главниот обвинител да биде посветенда обезбеди вистинска одговорност за оние што го кршат законот. Тоа навистина ѝ е потребно на Украина“, рече Зеленски.
На 21 јули, украинската агенција за внатрешна безбедност уапси двајца службеници на НАБУ - едниот под сомнение за шпионажа за Русија, другиот поради наводни деловни врски со руски субјекти - и спроведе десетици претреси насочени кон вработените во агенцијата.
СБУ тврдеше дека некои службеници имале врски со забранети политички групи, вклучително и поранешната партија на еден украински пратеник во бегство.
НАБУ соопшти дека операцијата отишла многу подалеку од легитимна загриженост за безбедноста и се проширила на „неповрзани прашања“ како што се сообраќајни прекршоци од пред неколку години.
Агенцијата предупреди дека обемот на акцијата ефикасно ја парализирал нејзината мисија.
Европската унија го нарече усвојувањето на законот „сериозен чекор назад“, додека други критичари на законот изразија загриженост дека тој претставува пресврт по една деценија демократизација.
Организацијата „Транспаренси интернешнл“, чии оценки за перцепција на корупцијата внимателно се следат низ светот, соопшти Украина значително се подобрила во последните години поради „реформите насочени кон европска интеграција и исполнување на меѓународните обврски“.
Сепак, земјата минатата година забележа пад на индексите за корупција бидејќи реформите биле „спроведени само формално“ или спроведувањето „намерно било одложено“.
Севкупно, Украина се рангираше на 105 место од 180 земји во Индексот за перцепција на корупцијата на организацијата за 2024 година - пред Русија и Белорусија, но зад Молдавија, Унгарија и Романија.
Светската здравствена организација предупреди на епидемија од вирус што го шират комарци
Светската здравствена организација (СЗО) упати итен апел за спречување на повторна појава на епидемијата на вирусот чикунгуња, што го шират комарци.
Таква епидемија го зафати светот пред две децении.
Причина за загриженост се новите епидемии во регионот на Индискиот Океан, кои сега се шират во Европа и на други континенти.
Според претставникот на СЗО, Дијана Рохас Алварез, околу 5,6 милијарди луѓе во 119 земји живеат во области каде што постои ризик од овој вирус, кој предизвикува треска, силна болка во зглобовите и може да доведе до долготраен инвалидитет.
„Сведоци сме на повторување на историјата“, рече таа, споредувајќи ја сегашната ситуација со епидемијата од 2004-2005 година, која зафати речиси половина милион луѓе, главно во мали островски територии, пред да се прошири низ целиот свет.
Најновиот бран на пренос започна на почетокот на 2025 година, со големи епидемии на истите острови во Индискиот Океан кои претходно беа погодени, вклучувајќи ги Реунион и Маврициус.
Алварез рече дека вирусот сега заразил околу една третина од населението на островот Реунион.
Ширењето продолжува и во други земји, како што се Мадагаскар, Сомалија и Кенија, додека бројни случаи се регистрирани и во Индија и делови од Југоисточна Азија, рече таа.
Особено загрижувачко е зголемувањето на бројот на увезени случаи во Европа.
Од 1 мај, околу 800 увезени случаи на вирусот чикунгуња се регистрирани во Франција, рече Алварез.
Бидејќи комарците касаат во текот на денот, неопходна е превенција, употреба на инсектициди и облека со долги ракави, препорачува СЗО.
Германскиот канцелар под притисок да го заостри ставот кон Израел
Германскиот канцелар Фридрих Мерц е под притисок да го заостри ставот кон Израел.
Членовите на неговата коалиција бараат Берлин да се придружи на изјавата на десетици западни земји во која се осудуваат „нехуманите убиства“ на Палестинците.
Мерц, кој е претседател на германската десничарска Христијанско-демократската унија (ЦДУ) е сè покритичен кон Израел.
Сепак, неговата земја не беше вклучена во заедничката изјава - објавена во понеделник од комесарот на Европската унија (ЕУ)за управување со кризи и 28 западни земји, вклучувајќи ги Велика Британија и Франција - во која се повикува Израел веднаш да ги запре непријателствата.
Земјите ја критикуваа многу бавната дистрибуција на помошта за Палестинците во Газа и нагласија дека е „застрашувачки“ што повеќе од 800 цивили загинаа чекајќи помош.
Рим Алабали Радован, министерка за меѓународен развој во владата на Мерц и членка на Социјалдемократската партија (СПД), , која е помлад партнер во владејачката коалиција, изјави дека не е задоволна од одлуката на Германија да не ја потпише декларацијата.
„Барањата во писмото до израелската влада ми се разбирливи. Би сакала Германија да се придружи на сигналот испратен од 29-те партнери“, рече таа.
Мерц рече дека Европскиот совет веќе издаде заедничка декларација, која е „практично иста по содржина како она што беше наведено во писмото“.
„Бев меѓу првите што јасно кажаа - исто така и во Германија - дека ситуацијата таму повеќе не е прифатлива“, рече Мерц, негирајќи какви било поделби во неговата коалиција по ова прашање.
Претходно оваа недела, тој рече дека разговарал со израелскиот премиер Бенјамин Нетанјаху, на кого му кажал дека Германија „не ја поддржува политиката на израелската влада кон Газа“.
Германските власти велат дека имаат посебна одговорност кон Израел поради историското наследство на Холокаустот и одговорноста на Германија за тие злосторства.
Поради оваа причина, тие веруваат дека можат да постигнат повеќе преку тајни дипломатски канали отколку преку јавни изјави.
Мерц е еден од ретките европски лидери кој изјави дека би го примил Нетанјаху и покрај потерницата издадена од Меѓународниот кривичен суд за наводни воени злосторства.
Израел ги отфрла обвинувањата против Нетанјаху, велејќи дека се политички мотивирани.
Меѓународниот кривичен суд наведува дека сите потписници на основачкиот статут на судот, вклучувајќи ги и 27-те членки на ЕУ, се обврзани да го уапсат Нетанјаху ако влезе на нивна територија.
Критичарите на ставот на Мерц кон Израел, вклучувајќи ги и коалициските партнери, велат дека наследството од Холокаустот не може да се користи како оправдување за игнорирање на израелските злосторства, туку дека, напротив, мотото по Холокаустот „никогаш повеќе“ мора да се примени сега – во Газа.
Ребалансот помина во Собрание, за власта стабилен, за опозицијата предизборен поткуп
Пратениците со 65 гласа „за“ и 14 „против“ го изгласаа ребалансот на Буџетот за 2025 година. Тој е планиран со приход од 5,8 милијарди евра и расход од 6,5 милијарди евра што е за процент повеќе од предвидениот буџет. Буџетскиот дефицит изнесува 41,3 милијарди денари или 4% од БДП, над законската граница од 3 до 3,5%.
Стапката на економски раст останува проектирана на 3,7%, а инфлацијата се очекува да биде околу 2,8%. Очекувањата на власта се дека буџетот ќе обезбеди фискална стабилност и континуитет на клучните државни програми.
Според поранешниот вицепремиер и пратеник Фатмир Битиќи од опозициската СДСМ ребалансот не е развоен и не е социјално одговорен, туку е буџет за селективна поддршка со краткорочни политички пресметки, скроен како предизборен поткуп за изборите во октомври.
„Денес немаме никаков глобален шок, ниту криза, туку имаме криза во планирањето, криза во отченоста, криза во вредносниот систем низ кој се креираат економските политики во држава“, рече Битиќи.
Тој обвини дека двојно се зголемени трошоците за стоки и услуги и дека дуплирана е ставката за набавка на автомобили, а за ЕКСПО 2027 што ќе се одржува во Србија, Владата ќе потроши 1,8 милиони евра за штанд од 134 метри квадратни, односно 5.550 евра по метар квадратен.
Според пратениците од владејачкото мнозинство главните промени во распределбата ја опфаќаат зголемената поддршка за Министерствата за транспорт и врски, социјална политика, образование и наука, како и за исплата на плати и пензии.
Капиталните инвестиции изнесуваат 772 милиони евра со акцент на инфраструктурата и поддршка за општините.
Министерката за финанасии Гордана Димитриевска Кочовска изјави дека дополнувања на Буџетот произлегуваат од реалните потреби на граѓаните, институциите и стопанството и се во согласност со макроекономските движења и реализацијата во првата половина на годината.
Владата предложи измени на Законот за пензиско и инвалидско осигурување за да се покачат пензиите
Владата на денешната седница го усвои предлог законот за изменување на Законот за пензиско и инвалидско осигурување, со што следи покачување на пензиите, објави денеска (22 јули) владината прес-служба.
Премиерот Христијан Мицкоски претходно на прес-конференција изјави дека Владата денеска ќе го разгледа предлог-законот за линеарно зголемување на пензиите, кој потоа ќе биде испратен до Собранието.
Инаку, законски, од септември требаше да се врати старата методологија со која пензиите се усогласуваат 50 отсто според порастот на трошоците на живот и 50 отсто според порастот на просечната плата. Ова усогласување се прави двапати годишно - во март и во септември.
Отстапување се направи минатата година, кога ВМРО-ДПМНЕ за да го исполни предизборното ветување за повисоки пензии, линеaрно ги зголеми пензиите за по 5.000 денари за сите пензионери. Тие добија по 2.500 денари во септември 2024 година и по уште толку во март 2025 година.
Според податоците од Фондот за пензиско и инвладиско осигурување(ПИОМ), во државата во мај имало вкупно 344.796 пензионери. Просечната пензија истиот месец била 26.157 денари. Највисоката исплатена пензија е 88.013 денари и ја земале само 18 пензионери во државата.
Спогодби со 13 обвинети за незаконски одобрени инвалидски пензии
Основното јавно обвинителство за гонење на организиран криминал и корупција, во рамки на предметот „Синдром“ поднесе обвинителен предлог против 36 лица. Тие се осомничени за серија кривични дела поврзани со незаконско посредување за добивање права на туѓа нега и инвалидска пензија.
„Постои основано сомневање дека десетмина од обвинетите сториле кривични дела и тоа: Злосторничко здружување, кривично дело – Давање поткуп и кривично дело – Примање награда за противзаконито влијание, пет лица сториле кривично дело Злосторничко здружување и кривично дело – Примање поткуп, две лица сториле кривично дело Злосторничко здружување и кривично дело – Примање награда за противзаконито влијание, додека останатите 19 лица се обвинети дека сториле кривично дело Давање награда за противзаконито влијание и кривично дело – Давање поткуп“, стои во соопштението од Обвинителството.
Од таму информираат дека 13 обвинети склучиле спогодби со обвинителството и за нив се изречени пресуди и санкции.
Основниот кривичен суд Скопје ја осудил првообвинетата на единствена казна затвор во траење од три години и шест месеци за кривично дело – Злосторничко здружување, кривично дело – Давање поткуп и кривично дело – Примање поткуп, а неа воедно ѝ се одземаат и противправно стекнати 15000 евра
На останатите кои се спогодиле им е изречена алтернативна мерка – условни осуди на казна затвор од 1 до 2 години, која нема да се изврши доколку тие во рок од три односно пет години не сторат ново кривично дело.
Според доказите, обвинетите меѓу кои има лекари, адвокат и службени лица, организирани во две криминални групи посредувале и незаконски овозможувале добивање права на туѓа нега и инвалидска пензија во текот на 2023 година и до април 2024 година.
Услугата ја наплаќале по цена од 150 до 5000 евра, зависно од видот и времетраењето на правото што се обезбедувало.
Со обвинителниот акт јавниот обвинител му предложил на судот на обвинетите да им бидат продолжени веќе изречените мерки на обезбедување – мерка притвор за пет лица и мерка куќен притвор за пет лица, а за останатите обвинети - мерки на претпазливост.
Кон крајот на април годинава од Обвинителстовото соопштија дека по повеќемесечна предистражна постапка, Министерството за внатрешни работи спровело акција во која биле извршени претреси на повеќе локации на подрачјето на Скопје, Велес, Тетово и Гостивар.
Постапувајќи по кривичната пријава, предметниот обвинител донесе Наредба за спроведување на истражна постапка против 49 лица, информираа од Обвинителството на 24 април.
Мултимедија
Најпосетени
Што треба да знаете