Вести
Од 1 декември поскапува парното греење, повисоки сметки за околу 130 денари
Од 1 декември цената на топлинската енергија за домаќинствата ќе се зголеми во просек од 5.9 проценти, соопшти денеска претседателот на Регулаторната комисија за енергетика, Марко Бислимоски.
За корисниците кои се снабдуваат преку најголемиот систем (ЕСМ Дистрибуција, ЕСМ Снабдување и ЕСМ Производство) поскапувањето изнесува во просек 5,9%, додека за потрошувачите на ЕСМ Енергетика зголемувањето е 7,6%, а за Скопје Север – Енерџи Еко Линк околу 7,7%.
„Просечната сметка ќе биде зголемена за околу 130 денари, од сегашните 2.200 денари на 2.330 денари“, истакна претседателот на РКЕ, Марко Бислимоски.
Тој нагласи дека е потребно долгорочно стратешко планирање и сериозна модернизација на топловодната мрежа за да се намалат дефектите, да се подобри квалитетот на снабдување и да се овозможи проширување на мрежата.
Бислимоски вели дека парното греење и понатаму е најекономично решение.
Според него, анализите покажуваат дека доколку сите исклучени корисници повторно се приклучат на системот, сметките би се намалиле за околу 10 проценти.
Во моментов, околу 65.000 потрошувачи се снабдуваат со топлинска енергија.
Продолжи судењето за ‘Онкологија 2’ со сведоштва за финансиски неправилности
Со сведочење на раководителка на одделението за финансиско, сметководствено и шалтерско работење на Клиниката за онкологија, денеска во Основниот кривичен суд продолжи судењето за случајот „Онкологија 2” во кој се обвинети поранешниот медицински директор на Клиниката за радиотерапија и онкологија Нино Васев и економскиот директор на Клиниката Нехад Нухи за незаконско набавување лекови, прикривање преку фиктивни тендери и присвојување на дел од терапијата.
На прашања на Основното јавно обвинителство кои се однесуваа за финансиското работење на Клиниката за периодот од 2018 до 2022 година, раководителката на одделението наведе дека во овој период извршувала контрола, координација и подготовка на финансиски и статистички извештаи, завршни сметки и редовна комуникација со Фондот за здравство, Министерството за здравство и Државниот завод за статистика.
Прашана дали овие ингеренции ѝ биле одземени, таа одговори „ингиренциите ми беа одземени од крајот на 2019 почетокот на 2020 година“.
Објасни дека по тринеделен ковид-карантин открила дека дел од нејзините обврски ѝ биле пренесени на колешка без писмено решение.
„Кога се вратив видов дека мојата обврска за подготвување на налозите за плаќање спрема набавувачите веќе ја имаше преземено моја колешка и бев комплетно тргната од таа работа. Писмено се обратив, се претставив која сум, меѓутоа тоа не се случи“, рече сведокот.
Раководителката сведочеше и за соработката со обвинетиот Васев, за кој рече дека до пред ковид периодот соработувале доста добро, нагласувајќи дека Клиниката немала никакви долгови дотогаш.
„Соработувавме доста добро, Клиниката тогаш немаше никакви долгови, но пред да се разболам приметив дека Васев имаше поладен однос со мене и не можеше да го издржи таквото пресметување за плаќање спрема добавувачите што беше исправно“, рече сведокот.
Во делот на финансиското работење, таа потврди дека редовно доставувала извештаи до Министерството за здравство и Фондот за здравство.
„Доставував два извештаја, еден за финансиското работење, другиот за тоа колку приход остваруваме и колку пациенти имаме кои не се државјани на Македонија или Македонци кои немаат осигурување“, изјави сведокот.
За долговите на Клиниката посочи дека како раководителка имала обврска да доставува месечни извештаи до Фондот за здравство, за што, му предложила на Васев да се обратат до ФЗОМ писмено за да го зголемат буџетот за Клиниката, бидејќи, како што рече, се зголемувал бројот на пациенти, а Клиниката имала сѐ помалку пари.
Прашана дали Клиниката добила тужби од економски оператори таа одговори „имавме тужби од два економски оператори. Еден од нив поднесе тужба за неплатени фактури за периодот 2021/22 година со голема камата од приближно еден милион евра, по што на крај дојде до блокирање на двете сметки“.
Во текот на расправата, обвинителката Ана Гоговска Јакимовска, посочи дека дополнително ќе му достави на Судот материјални докази кои сведокот ги доставил денеска, по што адвокатот на Васев, Вељо Кадиев, приговараше дека не постои записник за тоа како се прибавени тие докази.
Судот оцени дека за да може одбраната да поставува вкрстени прашања до сведокот, потребно е претходно да добие примероци од документите. Поради тоа, на Јавното обвинителство му е наложено да обезбеди копии, а вкрстеното испитување на сведокот беше одложено за следното рочиште кое треба да се одржи на 11 декември годинава.
Според обвинението, во периодот 2018–2022 година Васев и Нухи незаконски набавувале лекови, ги прикривале преку фиктивни тендери и присвојувале дел од терапијата, со што го оштетиле државниот буџет за речиси 36 милиони евра. Двајцата обвинети ја негираат вината и тврдат дека станува збор за политички мотивиран процес.
Покрај „Онкологија 2“, во тек е и процесот „Онкологија 1“ против Васев и уште двајца лекари за несовесно лекување пациенти.
Бројот на жртви во пожарот во Хонг Конг се искачи на 128
Бројот на жртви во најлошиот пожар во Хонг Конг во последните речиси 80 години се искачи на 128, а околу 200 лица се уште се водат како исчезнати откако пожарот што го зафати висококатниот станбен комплекс пред два дена, изјави во петок шефот за безбедност на градот.
Шефот за безбедност на Хонг Конг, Крис Танг, на прес-конференција изјави дека противпожарните аларми во комплексот Ванг Фук Корт, осумкатна зграда во северниот округ Таи По, не работеле.
Спасувачките напори се завршени и најмалку 79 лица, вклучувајќи 12 пожарникари, се повредени, рече тој.
Станбениот блок, во кој живеат повеќе од 4.600 луѓе, бил на бамбусово скеле и завиткан во зелена мрежа за реновирање кога пожарот избувнал и брзо се проширил во среда попладне.
Полицијата соопшти дека уапсила тројца вработени во градежна компанија под сомнение за убиство од небрежност поради употреба на небезбедни материјали, вклучително и запаливи панели од пена што ги блокирале прозорците.
Додека пожарникарите се бореле со пожарот во петок, семејствата имале мачна задача да ги прегледаат фотографиите од мртвите направени од спасувачите.
До рано утрово во четврток, 279 лица беа воделе како исчезнати, а тој број не е ажуриран повеќе од 24 часа.
„Ќе се обидеме насилно да влеземе во сите единици во седум згради за да се осигураме дека нема други потенцијални жртви“, изјави за новинарите во петокот заменик-шефот на противпожарната служба Дерек Чен.
Тој рече дека 25 повици за помош до противпожарната служба се уште се нерешени, вклучувајќи три во последните неколку часа, на кои ќе им се даде приоритет.
Пожарот што избувна во среда е најсмртоносниот во Хонг Конг од 1948 година, кога 176 лица загинаа во пожар во магацин, а исто така предизвика споредби со пожарот во Гренфел Тауер во Лондон во кој загинаа 72 лица во 2017 година.
За пожарот беа обвинети компаниите што го обложиле надворешниот дел со запалива облога, како и пропустите на владата и градежната индустрија.
Полицијата уапси двајца директори и еден инженерски консултант на „Престиж констракшн“, за која владата соопшти дека извршувала работи за одржување во Ванг Фук Корт повеќе од една година.
„Имаме причина да веруваме дека одговорните страни на компанијата биле крајно небрежни, што довело до оваа несреќа и предизвикало пожарот да се шири неконтролирано, што резултирало со големи жртви“, изјави началникот на полицијата, Ајлин Чунг, во четврток.
Полицијата запленила тендерска документација, списоци на вработени, 14 компјутери и три мобилни телефони при претресот на канцеларијата на компанијата, додаде градската влада.
Бирото за развој на градот размислува за постепено заменување на бамбусовите скелиња со метални скелиња како мерка за безбедност.
Лидерот на Хонг Конг, Џон Ли, изјави дека владата ќе формира фонд од 300 милиони хонгконшки долари (39 милиони долари) за да им помогне на жителите, додека некои од најголемите кинески компании објавија донации.
Втората ноќ по пожарот, десетици евакуирани лица поставија душеци во блискиот трговски центар, а многумина рекоа дека официјалните центри за евакуација треба да бидат резервирани за оние на кои им е најпотребно.
Луѓето - од постари жители до ученици - се завиткаа во јоргани и се собраа во шатори пред „Мекдоналдс“ и продавниците, додека волонтерите делеа грицки и залихи.
Хонг Конг, еден од најгусто населените градови во светот, е преполн со висококатници. Рапидните цени на недвижностите во градот долго време се извор на незадоволство, а аналитичарите велат дека трагедијата би можела да поттикне незадоволство кон властите и покрај напорите за заострување на политичката и националната безбедносна контрола.
Муртезани: Постизборно работиме на враќање на дијалогот и довербата меѓу Скопје и Софија
Министерот за европски прашања Орхан Муртезани изјави дека по локалните избори заедно со европските партнери се работи на воспоставување дијалог и враќање на довербата меѓу Скопје и Софија, со цел да се надмине спорот и да се одблокира евроинтегративниот процес на земјава.
Муртезани ова го кажа на денешната прес-конференција во Скопје со министерката за европски прашања на Шведска Јесика Розенкранц, одговарајќи на новинарско прашање дали евентуално се подготвува трет протокол со Бугарија за да се надминат разликите, што неодамна како предлог го спомна претседателката Гордана Сиљановска-Давкова, како едно од креативните решенија.
„Тоа што се работи константно по локалните избори заедно со нашите европски партнери е воспоставување на дијалогот и враќање на довербата, бидејќи без дијалог и доверба не може да стане збор за надминување на проблемот. Во моментов се прават напори за воспоставување дијалог и градење доверба, а потоа ќе стане збор и за можните начини за надминување на проблемот“, изјави Муртзани.
Во однос на неодамнешнта изјава на американската амбасадорка Анџела Агелер дека е убедена оти се работи на прашањето со уставните измени, Муртезани одговори потврдно велејќи дека тоа е преземена обврска, но додаде дека во моментов не може да се говори за процесот на измени да Уставот, „бидејќи сите наши грижи и дилеми не се соодветно адресирани“.
„Секако дека на уставните измени мора да се работи. Тоа е преземена обврска без која нема преговори и нема членство во ЕУ, меѓутоа како што нагласив во моментов не може ние да зборуваме за процесот на уставни измени кога сите тие наши грижи и дилеми не се соодветно адресирани, а за да бидат адресирани треба да се воспостави редовен дијалог, да се врати довербата меѓу двете соседни земји за да можеме на европски начин да градиме задничка европска иднина иднина“, рече министерот за европски прашања.
Mинистерката за европски прашања на Шведска, Јесика Розенкранц pосочи дека добриот дијалог со соседите е добредојден за самиот процес на пристапување.
„Го поддржуваме секој добар дијалог што може да се постигне во овој контекст, а за самиот процес Шведска знае дека кога ќе се усвојат уставните измени, ЕУ и сите земји-членки треба да го почитуваат тој договор и веднаш потоа формално да отпочнат преговорите, рече таа, повторувајќи ја поддршката на Шведска за исполнување на реформите.
Идејата за нов протокол со цел одблокирање на евроинтеграциите на Северна Македонија, која потегна од претседателката Сиљановска Давкова, го нарече креативно решение.
„Има протокол, тоа е записник обичен потпишан од двајца министри. Со записник вие менувате меѓународен Договор или му додавате. Отворете го Договорот за пријателство и добрососедство, еден збор нема таму за уставни измени. Тогаш нека бидат креативни, трет протокол нека усогласат во кој ќе кажат дека не може прашањата врзани за историјата, културата и идентитетот да бидат услов“, посочи Сиљановска-Давкова.
Изминаа четири години откако Северна Македонија ја одржа првата меѓувладина конференција со Брисел, но оттогаш не отвори ниту еден кластер од пристапните преговори со ЕУ.
За тоа да се случи, потребно е Северна Македонија да ја вметне бугарската заедница во Преамбулата од Уставот. Ова е услов на кој инсистира Бугарија, додека македонската влада бара гаранции дека во иднина нема да има нови условувања од бугарската страна.
Во 2022 беше пронајден компромис за преговарачката рамка на Северна Македонија која прифати во Преамбулата од Уставот, да се додаде и бугарската заедница, а од друга страна, се задржа чистата формулација за македонскиот јазик со тоа што Бугарија даде унилатерална изјава во која го изрази својот став за ова прашање. Тогаш беше потпишан и протокол меѓу министрите за надворешни работи, Бујар Османи и Теодора Генчовска.
Северна Македонија мора да ги донесе уставните измени согласно заклучоците на Советот на Европа од 2022 година за да напредува на својот пат кон Европската Унија“, порача еврокомесарката за проширување, Марта Кос од Брисел при презентирањето на извештајот за напредокот на државата на 4 ноември.
Украинските антикорупциски истражители извршија претрес во просториите на шефот на кабинетот на Зеленски
Националното биро за борба против корупција на Украина (НАБУ) и Специјализираното обвинителство за борба против корупција (САПО) во петокот објавија дека спровеле претреси во просториите на Андриј Јермак, шефот на Кабинетот на претседателот на Украина.
Јермак се смета за близок соработник на претседателот Володимир Зеленски дури и пред да влезе во политиката, а исто така игра клучна улога во надворешната политика и донесувањето одлуки.
Сè уште не е познато во кој случај се спроведуваат претресите, ниту каков е статусот на шефот на претседателската канцеларија, иако претходно имаше обвинувања дека Јермак е вмешан во корупциски скандал во енергетскиот сектор што ја тресе Украина.
„НАБУ и САПО спроведуваат истражни дејствија во просториите на шефот на Кабинетот на претседателот на Украина. Истражните дејствија се одобрени и се спроведуваат како дел од истрагата. Деталите ќе бидат објавени подоцна“, соопшти прес-службата на НАБУ.
Прес-службата на САПО ја издаде истата порака.
Јермак потврди дека истражителите на НАБУ и САПО го претресуваат неговиот стан, додавајќи дека целосно соработува.
„Истражителите немаат пречки. Тие добија целосен пристап до станот, моите адвокати се на лице место и соработуваат со органите за спроведување на законот“, рече Јермак на Телеграм.
Информации за претресот на просториите на Јермак објавија некои украински медиуми и пратеници.
Одговарајќи на прашање од РСЕ за ова, портпаролот на Европската комисија, Гијом Мерсие, рече дека „сите истраги покажуваат дека антикорупциските тела се воспоставени и им е дозволено да функционираат во Украина. Борбата против корупцијата е централен елемент на нашиот пакет за проширување, кој го дава нашиот општ став за ова прашање. Дозволете ми да нагласам дека борбата против корупцијата е клучна за една земја да се приклучи кон Европската Унија“.
Претходно, пратеникот Јарослав Железњак од партијата „Голос“ изјави дека Јермак е наведен како „Али Баба“ во евиденцијата на НАБУ во случајот со корупциски скандал во енергетскиот сектор.
Според него, „Али Баба“ во евиденцијата дава задачи за прогон на агенти на НАБУ и може да стои зад обидот за отстранување на независноста на НАБУ и САПО во јули, што беше спречено со протести.
Скандалот со енергијата се однесува на корупциска шема што доведе до пренасочување на средствата наменети за изградба на одбранбени системи за заштита на ранливата енергетска инфраструктура на Украина од руски воздушни напади кон трети страни.
Пратеник од партијата „Слуга на народот“ на Зеленски, Федир Вениславски, изјави дека Јермак треба да поднесе оставка од функцијата шеф на претседателскиот кабинет, но дека „последниот збор го има претседателот“.
На 22 ноември, Зеленски, среде скандалот, го назначи Јермак за шеф на украинската делегација за учество во преговорите со САД и другите меѓународни партнери на Украина, како и со претставници на Русија, за постигнување мир.
Скандалот со корупцијата вклучува луѓе на највисоките нивоа на украинската влада, а во неговиот центар е бизнисменот Тимур Миндич - стар пријател и поранешен деловен партнер на Зеленски - кој избега од земјата неколку часа пред почетокот на сослушувањата во врска со истрагата на 10 ноември.
Скандалот и истрагата доведоа и до оставки на министерот за енергетика и министерот за правда.
Расте бројот на жртви по пожарот во Хонг Конг, сопствениците на градежната компанија уапсени
Полицијата во Хонг Конг во четвртокот (27 ноември) ги уапси сопствениците на градежната компанија поради сомнение за убиство од небрежност по најголемиот пожар во градот во последните 80 години. Пожарот однесе најмалку 83 животи, а десетици лица се водат како исчезнати - јави Ројтерс.
До раните утрински часови, пожарникарите веќе во голема мера го ставија под контрола огнот што беснееше повеќе од 24 часа, разорувајќи го станбениот комплекс Ванг Фук Корт во северниот дел на Тај По. Комплексот бил во тек на реновација и обвиткан со бамбуски скелиња и зелена мрежа.
Повеќето жртви се пронајдени во два од вкупно осум блока во станбениот комплекс, изјави заменик директорот на Пожарникарските служби, Дерек Армстронг Чан.
Тој рече дека пожарникарите пронашле жители кои биле живи во неколку од зградите, но не даде дополнителни детали. Весникот South China Morning Post објави дека еден преживеан е пронајден на скалите во една од зградите.
Спасувачите се бореа со интензивна топлина и густ чад додека се обидуваа да стигнат до жителите за кои се стравуваше дека се заробени на горните катови на комплексот.
„Ќе продолжиме со прскање вода за да се намалат температурите“, додаде тој.
Полицијата уапси двајца директори и еден инженерски консултант од Prestige Construction, фирма ангажирана за одржување на зградите. Полицијата соопшти дека уапсените се сомничат за убиство од небрежност поради користење небезбедни материјали.
„Имаме причина да веруваме дека одговорните лица во компанијата биле сериозно небрежни, што доведе до оваа несреќа и предизвика пожарот да се прошири неконтролирано, резултирајќи со големи жртви“, соопшти полицијата.
Полицијата заплени документи за тендери, список на вработени, 14 компјутери и три мобилни телефони при претрес во канцеларијата на компанијата, соопшти владата.
Најголемиот пожар од 1948 година
Бројот на потврдени загинати се искачи на 83, соопштија хонгконгските итни служби. Тоа го прави најсмртоносниот пожар во Хонг Конг од 1948 година, кога во пожар во магацин загинаа 176 лица.
Владата во раните утрински часови во четврток соопшти дека 279 лица се водат како исчезнати, но тој податок не е ажуриран.
Владата ќе воспостави фонд од 300 милиони хонгконгски долари (39 милиони долари) за помош на жителите, додека некои компании веќе најавија донации.
На втората ноќ по пожарот, десетици евакуирани поставија душеци во трговскиот центар во близина додека волонтери делеа закуски и хигиенски средства.
Осумте блока од комплексот со 2.000 станови беа дом на повеќе од 4.600 луѓе.
Претседателот на Кина, Си Џинпинг, повика на „целосен напор“ за гаснење на пожарот и минимизирање на жртвите и загубите, пренесе државната телевизија CCTV. Раководството на владата на Хонг Конг и Комунистичката партија на Кина брзо реагираа за да покажат дека ѝ придаваат максимално значење на трагедијата.
Високиот ценовен раст на недвижности во Хонг Конг долго време предизвикува незадоволство, а трагедијата може да го зголеми незадоволството кон властите, и покрај обидите за затегнување на политичката и националната безбедност.
Србија го продолжи рокот за избор на нови работници во здравството на Косово
Неколку српски политички партии на Косово, кои на октомвриските избори добија советнички места во одделни општини со српско мнозинство, реагираа на одлуката на Министерството за здравство на Србија да го продолжи рокот до 15 јануари наредната година за избор на нови работници во своите институции што функционираат во српските средини.
Станува збор за конкурс за неколку стотици нови работни места, кој пред сè, а во пресрет на локалните избори на Косово на 12 октомври, го најави самиот претседател на Србија Александар Вучиќ, наведувајќи дека државата Србија се грижи за српската заедница на Косово.
Сега продолжувањето на рокот за избор на нови работници се образложува со големиот број пријавени кандидати.
Инаку, поддршка од официјален Белград има само Српска листа, која на локалните избори победи во сите десет општини со српско мнозинство. На февруарските парламентарни избори пак, освои девет од вкупно десет пратенички мандати резервирани за српската заедница.
Новите вонредни парламентарни избори ќе се одржат на 28 декември, затоа што Самоопределување, партијата што освои најмногу гласови на февруарските избори, но недоволно за самостојно да формира Влада, не доби поддршка од другите партии за формирање нови институции.
Така, продолжувањето на рокот за избор на работници во здравствените институции на Србија на Косово ќе се совпадне со предизборната кампања.
Поради тоа, Српската демократија на Александар Арсенијевиќ ја осуди оваа одлука, повикувајќи ги раководителите на здравствените институции да престанат да се однесуваат според партиски налози и предизборни калкулации, туку да работат во интерес на својата заедница.
Инаку, директор на Клиничко-болничкиот центар во Северна Митровица е претседателот на Српска листа, Златан Елек, но членови на Српска листа се на раководни позиции и во други здравствени институции.
Српската демократија во своето соопштение потсети дека ова не е првпат граѓаните да бидат „измамени за да ги поддржат челниците на Српска листа“.
Во пресрет на парламентарните избори во февруари годинава, Србија исто така имаше отворен конкурс за здравствените институции на Косово, но тој беше поништен поради протестите за „нетранспарентно“ и „партиско вработување на подобни лица“.
Истото сценарио, инаку, се повторува речиси во секоја предизборна кампања на Косово, кога Српска листа ветува работни места, станови или други бенефиции од буџетот на Србија.
Милија Бишевац, лидерот на Српското народно движење, исто така ја критикуваше одлуката за продолжување на рокот за избор на работници во српските здравствени институции, наведувајќи дека работните места се чуваат како „влог за уцена на граѓаните на претстојните избори“, и дека на крајот работата ја добиваат роднини или оние кои се „лојални“ на Српска листа.
Реагираше и Косовскиот сојуз на Горан Маринковиќ, оценувајќи дека станува збор за „злоупотреба на народот“.
Еуген Цаколи од невладиниот Косовски демократски институт претходно за РСЕ изјави дека „незаконските активности на институциите на Србија на Косово имаат јасни политички импликации за време на предизборната кампања“. Според него, тајмингот и пораката која се испраќа оставаат сомнеж дека станува збор за обид за „координирано влијание врз гласачите“.
Премиерот на Косово во оставка, Албин Курти во октомври ја обвини Србија дека се меша во локалните избори на Косово со тоа што ветува работни места и финансиски бенефиции.
Тој ја повика Европската унија да го осуди мешањето на Белград во изборите на Косово и да ја санкционира Србија поради тоа.
Од Европската унија не одговорија конкретно на овие обвинувања од Косово, но наведоа дека сите граѓани мора да имаат можност да го остварат своето право слободно да гласаат, без надворешни мешања и манипулации.
Курти: Првата муниција 'Made in Kosovo' ќе биде произведена кон крајот на 2026
Вршителот на должноста премиер на Косово, Албин Курти изјави дека првата муниција од фабриката што ќе биде изградена во Ѓаковица ќе биде произведена кон крајот на 2026 година.
Владата на Косово во петокот го одобри барањето за експропријација на земјиштето на поранешниот земјоделски комбинат Еренику кај Ѓаковица, за изградба на индустриска зона каде што ќе биде подигната фабриката за муниција.
„Со тоа го отвораме патот на терен за изградба на фабриката за муниција, прва од таков вид во Косово, која ќе ѝ служи на нашата војска, ќе ја зголеми нашата безбедност и дополнително ќе ги унапреди нашите одбранбени капацитети“, рече Курти на почетокот на седницата на Владата.
Во ноември минатата година, Владата најави започнување на процесот за отворање фабрика за производство на муниција и лабораторија за дизајнирање дронови.
Потоа, во декември 2024 година, Владата на Косово потпиша договор со турскиот производител „Makine ve Kimya Endüstrisi“ за основање фабрика за муниција во Косово.
„Изградбата на оваа фабрика, за која имаме потпишано договор со турскиот производител, ќе биде завршена во текот на наредната година. Првата муниција од оваа фабрика ќе биде произведена кон крајот на 2026 година. Покрај фабриката за муниција, оваа индустриска зона ќе им служи и на други инвеститори со кои сме во контакт и ќе произведуваме различни видови воени производи, воени и цивилни дронови ‘Made in Kosovo’“, рече Курти.
Тој наведе дека Косовските безбедносни сили, кои денес го одбележуваат својот ден, се опремени со модерна опрема.
Во период од четири години, вложени се повеќе од 430 милиони евра во набавка на вооружување за КБС, рече Курти.
Последните години, Косово го зголеми буџетот за одбрана и неодамна доби дронови, оклопни возила и друга опрема купена од различни американски производители.
КБС е моментално во процес на трансформација во војска. До завршувањето на овој процес, во 2028 година, се очекува овие сили да имаат над 7.500 активни припадници и резервисти, во споредба со нешто над 4.000 колку што имаат во моментов.
Загрижувачки ниска транспарентност на универзитетите – истражување на ФОП
Само два од седум универзитети објавуваат универзитетски гласник, кој е документ каде што се официјализираат сите одлуки на Сенатот и на Ректоратот. Ова е еден од заклучоците во истражувањето кое граѓанската организација Форум за образовни промени го спровела од јануари до август годинава.
Истражувањето нотира загрижувачки тренд на системска нетранспарентност на јавните универзитети во државава, од кои само три го објавуваат буџетот.
Врз основа на ваквите заклучоци, Форумот за образовни промени (ФОП) креираше Индекс на транспарентност на јавните универзитети.
Како што соопшти претседателот на ФОП, Бленди Ходаи, најтранспарентен според стандардите за креирање на Индексот на транспарентност е Универзитетот на Југоисточна Европа.
Второто место со ист број поени го делат Универзитетот „Св. Кирил и Методиј“-Скопје и Универзитетот „Гоце Делчев“-Штип.
На четврто место е Универзитетот „Св. Апостол Павле“ во Охрид, на петто и шесто, како делумно транспарентни, се Универзитетот „Св. Климент Охридски“ во Битола и „Мајка Тереза“ во Скопје.
На последното место како целосно нетранспарентен е Државниот универзитет во Тетово.
Индексот на транспарентност на ФОП е креиран врз основа на анализа на содржините што универзитетите ги имаат објавено на нивните веб-страници и од директни контакти со универзитетите да одговарат на барање за пристап до информации и до документи кои се од јавен карактер и кои универзитетите законски мора да ги имаат објавено.
Како пример за таква информација е и буџетот на универзитетот кој, рече Ходаи, треба да биде објавен на универзитетската веб-страница, „а не за него да прашува некоја невладина организација или медиумите“.
„Транспарентноста на јавните универзитети е предуслов за добро управување и за квалитетно образование. Тие се финансираат од државниот буџет и од парите на даночните обврзници и имаат законска обврска да бидат отворени и отчетни кон граѓаните и кон студентите. Недостигот на транспарентност воедно е и недостиг на отчетност и на одговорност“, истакна Ходаи.
Истражувањето на ФОП содржи и заклучоци и препораки за надминување на слабостите, а како што рече Ходаи, „ова не е само мерен инструмент, туку повик за реформи и за создавање култура на транспарентност и отчетност и култура на квалитетно образование“.
Дека нивото на транспарентност на универзитетите е ниско, оваа граѓанска организација предупреди и во истражувањето кое го објави пред неколку месеци.
Тогаш, ФОП меѓу другото, препорача дека Универзитетите треба да го објават на своите веб-страници Правилникот за исплата на плати, надоместоци и додатоци на плата за вработените во универзитетите, заклучувајќи дека „поголемиот дел од буџетот што државата го издвојува за државните универзитети оди за плати“.
По претставка на родителите на загинатите во Кочани, закажана Анкетна комисија
За 9-ти декември е закажана седницата на Постојаната анкетна комисија за заштита на човековите слободи и права на која пратениците ќе дебатираат за политичката одговорност во случајот со трагедијата во дискотеката „Пулс“. Ова следува по поднесената претставка од родителите на загинатите во пожарот во Кочани. Анкетната комисија беше и едно од нивните барања кои ги испорачаа пред Законодавниот дом на триесеттиот протест познат како „Марш за ангелите“.
Претседателот на Постојаната анкетна комисија за заштита на човековите слободи и права и пратеник на Левица, Димитар Апасиев денеска (27 ноември) информираше дека станува збор за редовна седница на оваа Комисија, а не за надзорна или јавна расправа.
„За да не настане конфузија во јавноста, ова не е надзорна, ниту е јавна расправа, туку е редовна седница. Тоа е специфичен вид на седница на Комисијата кога таа постапува по претставка на здружение или на граѓани. Досега во парламентарната историја имало неколку такви случаи на постапување. Минатиот пат беше за надзорна и сѐ уште водиме управен спор со спикерот Гаши кој бил во право“, изјави Апасиев на денешната прес конференција.
Тој додаде дека доколку власта не дојде и нема кворум за работа, тогаш седницата ќе биде прекината.
„Ние како пратеничка група со шест пратеници, имаме право на по еден претставник во двете комисии – и во таа каде што ние сме иницијатори и во другата ние ќе учествуваме. Јас очекувам да се формираат и двете анкетни комисии веќе на наредната пленарна седница“, изјави Апасиев.
Како што рече тој, седницата е закажана на овој датум, со цел да не се поклопи со судското рочиште закажано на 10 декември. Според Апасиев, на седницата ќе може да се обратат и подносителите на претставката.
На прашањето дали иницијативата на власта за Анкетна комисија ќе биде ставена на Постојаната анкетна комисија со која тој раководи, Апасиев појасни дека таа ќе биде посебна Анкетна комисија, додека неговата е постојана како редовно работно тело.
„Таа ќе биде ад-хок комисија која треба да 45 дена или два месеци да заврши со квази истражни функции. Ние по закон и Деловник не смееме да истражуваме како Јавното обвинителство, но можеме да лоцираме политичка одговорност. Значи, мојата Комисија со која јас претседавам е Постојана анкетна комисија и таа редовно си работи без оглед на овие две, а овие две, едната од ВМРО-ДПМНЕ и другата од опозицијата се посебни анкетни комисии кои се ад-хок тела и кои сѐ уште не се формирани. Има само иницијатива“, рече Апасиев.
Информираше и дека нивната иницијатива за Анкетна комисија за Кочани која беше вратена од спикерот Гаши, веќе ја доработиле и ја спровеле до Пленумот.
Последната анкетна комисија која се формираше во Собранието се обиде да утврди политичка одговорност по објавувањето на аферата за злоупотреба на биолошката терапија на Клиниката за онкологија.
Расправата во оваа комисија по неколку месеци заврши брз утврдени заклучоци за политичка одговорност. Тогашната владејачка партија СДСМ, заклучоците на пратеничката од ВМРО-ДПМНЕ Рашела Мизрахи ги опиша во јавноста како „партиски заклучоци“, и без прецизна листа на лица кои би носеле политичка одговорност.
Претходно во разговор за РСЕ, поранешниот претседател на Собранието, Тито Петковски и поранешната пратеничка, Ѓулистана Марковска предупредија дека долгогодишната практика на македонските институции покажа дека анкетните комисии честопати служат како партиски механизам, а не како алатка за отчетност.
Мултимедија
Најпосетени
Што треба да знаете