Советот за безбедност на ОН доцна во понеделник, 17 ноември, одобри резолуција подготвена од Соединетите Држави со која се поддржува планот на претседателот Доналд Трамп за прекин на војната во Појасот Газа.

Резолуцијата, исто така, овластува меѓународни сили за стабилизација во палестинската енклава.

Израел и палестинската група Хамас, која е прогласена за терористичка група од САД и другите сили, минатиот месец се согласија за првата фаза од планот на Трамп од 20 точки за Газа - прекин на огнот во нивната двегодишна војна и договор за ослободување на заложниците.

Сепак, резолуцијата на ОН се смета за клучна за легитимирање на привременото управно тело и нудење гаранции на земјите кои размислуваат да испратат трупи во Газа.

Што пишува во резолуцијата?

Текстот на резолуцијата наведува дека земјите-членки можат да учествуваат во Мировниот комитет со кој претседава Трамп, дизајниран како транзициско тело кое би го надгледувало обновата и економското закрепнување на Газа.

Видете и ова:

Вашингтон ја претстави нацрт-резолуција за планот на Трамп за Газа пред партнерите во ОН

Исто така, овластува меѓународни сили за стабилизација, кои би обезбедиле демилитаризација на Газа, вклучително и уништување на оружјето и воената инфраструктура.

Хамас повтори дека нема да се разоружа и тврдеше дека неговата борба против Израел е легитимен отпор.

„Резолуцијата воспоставува меѓународен механизам за старателство за Појасот Газа, на што се спротивставуваат нашиот народ и нашите фракции“, се вели во соопштението издадено по усвојувањето на резолуцијата.

Пат кон палестинското самоопределување

Мајк Валц, амбасадорот на САД во ОН, рече дека резолуцијата, која го вклучува планот на Трамп од 20 точки како анекс, „отвора можен пат кон самоопределување за Палестинците каде што ќе има маслинови гранки наместо ракети и каде што постои можност за договор на политичкиот хоризонт“.

Русија, која има право на вето во Советот за безбедност, претходно ја остави отворена можноста за противење, но се воздржа од гласање, дозволувајќи резолуцијата да помине.

Амбасадорите на Русија и Кина во ОН, кои исто така се воздржаа, се пожалија дека резолуцијата не ѝ дава на ОН јасна улога во иднината на Газа.

„Во суштина, Советот го дава својот благослов на американската иницијатива врз основа на ветувањата на Вашингтон, давајќи целосна контрола врз Појасот Газа на Мировниот комитет и Меѓународните сили за стабилизација, чии модалитети сè уште не ги знаеме“, рече рускиот амбасадор Василиј Небензја по гласањето.

Поддршка од Палестинската самоуправа

Палестинската самоуправа ја поздрави резолуцијата и изјави дека е подготвена да учествува во нејзиното спроведување.

Дипломатите рекоа дека поддршката на владата за резолуцијата минатата недела била клучна за спречување на руско вето.

Видете и ова:

Трамп „нема да толерира“ одложување на неговиот план за Газа

Американскиот претседател Доналд Трамп го нарече гласањето како „момент од историски размери“ во објава на социјалните мрежи.

„Членовите на одборот и многу други возбудливи најави ќе бидат дадени во наредните недели“, напиша Трамп.

Резолуцијата стана контроверзна во Израел, бидејќи ја споменува можноста за палестинска државност во иднина.

Во текстот на резолуцијата се наведува дека „условите за кредибилен пат кон палестинско самоопределување и државност конечно може да бидат воспоставени“ откако Палестинската самоуправа ќе ја спроведе својата програма за реформи и ќе напредува реконструкцијата на Газа.

„Соединетите Држави ќе го охрабрат дијалогот меѓу Израел и Палестинците со цел да се постигне договор за политички хоризонт за мирен и просперитетен соживот“, се наведува во документот.

Израелскиот премиер Бенјамин Нетанјаху, под притисок од десничарските членови на неговата влада, во неделата изјави дека Израел останува против палестинска држава и вети дека ќе ја демилитаризира Газа „на лесен или на тежок начин“.

Нерешените билатерални прашања меѓу членките од ЕУ и земјите кои не се членки на Унијата треба да се решаваат билатерално и тие не смеат да се користат како лост за блокирање на процесот на пристапување на земјите кандидати за членство, се наведува во Предлог-извештајот за Стратегијата на ЕУ за проширувањето на Европскиот парламент, во кој се потенцира дека некои од државите кои се стремат да се приклучат кон блокот веќе со години имаат статус на кандидати за членство.

„Проширувањето е една од најсилните алатки на ЕУ во надворешната политика и геополитиката и останува клучен двигател на долгорочната безбедност, мир, стабилност и просперитет во Европа врз основа на заеднички демократски вредности и претставува историска можност со значајни социо-економски, политички и безбедносни предности и за ЕУ и за земјите опфатени со процесот на проширување“, се нагласува во Извештајот.

Како што јави МИА, при денешната презентацијата на документот пред Комитетот за надворешни работи (АФЕТ) на Европскиот парламент, известувачот, литванскиот европратеник Петрас Ауштевичиус изјави дека ЕУ мора да има стратегија за проширувањето, а не само еднократен план, и дека не смее да дозволи тој процес да биде држен во заложништво од која било земја членка, бидејќи се работи за обединување на Европа и зближување на Европејците.

Според него, проширувањето е особено важно во услови на руската агресија врз Украина и обидите на Русија да предизвика поделби во Европа и да оствари влијание врз одредени европски земји.

Литванскиот европратеник смета дека ЕУ мора да ја одржи функционалноста на пристапниот процес, па затоа мора да премине кон носење одлуки со квалификувано мнозинство и тоа мора да го направи навремено и на најтранспарентен начин.

„Цврсто верувам дека секоја земја кандидат посветена на членството, преку реформи и наша поддршка може да ја постигне својата цел и да стане полноправен член на нашата заедница“, додаде Ауштевичиус.

Видете и ова:

ЕУ е подготвена за ново проширување, но кои ќе бидат следни членки и кога?

Во Предлог-извештајот се потенцира дека проширувањето е процес базиран на заслуги и секоја земја кандидат мора да биде оценета според сопствените заслуги во спроведувањето на Копенхашките критериуми, усогласеноста со законодавството на ЕУ и исполнувањето на сите дополнителни услови утврдени во рамката за проширување.

„Проширувањето е добитна опција и за сегашните и за идните земји членки и политичка итност од демонстрирање на посветеноста на ЕУ кон процесот на проширување. Проширувањето на ЕУ ќе ја зајакне европската безбедност. Иднината на Западниот Балкан, Украина и Молдавија е во рамките на ЕУ“, се наведува во извештајот.

Според документот, пристапувањето има и суштинско значење во поттикнувањето на регионалното помирување и стабилност, зголемување на отпорноста и заштита на земјите кандидати од штетно надворешно мешање.

Во извештајот се посочува дека „процесот на подготовка за проширувањето“ треба да се одвива паралелно и во ЕУ и во земјите кандидати и се повикуваат европските институции да ги преземат потребните реформи за да се осигура дека нивното неспроведување нема да го одложи пристапувањето на новите земји членки. Во документот исто така се изразува жалење што прекумерната употреба на консензусот постојано го забавува проширувањето на ЕУ и се потсетува дека член 49 од Договорот за ЕУ овозможува премин кон одлучување со квалификувано мнозинство без негови измени.

Европратениците имаат рок до 2 декември да поднесат амандмани на Предлог-извештајот, по што тој најверојатно ќе биде ставен на гласање на седницата на Комитетот предвидена за 15 јануари следната година.

Главниот јавен обвинител, Љупчо Коцевски соопшти дека во текот на вчерашниот ден и денеска (19 и 20 ноември) се води предистражна постапка против лица вработени во УЈП, а кои на некој начин се поврзани со предметот за пожарот во дискотеката „Пулс“ во Кочани.

„Денеска се приведени околу десетина лица и во моментов се вршат претреси на лицата опфатени со кривичната пријава. Во овој момент можам да кажам само дека се работи за вработени во УЈП, а за кривични дела допрва ќе видиме. Првичните сознанија се дека се работи за кривичните дела - злупотреба на службена положба и овластување, како и примање и давање мито“, рече Коцевски.

Тој посочи дека се работи за постапка поврзана со предметот за Кочани, како и дека за дел приведените се доставени и соодветени електронски комуникации и пораки.

„Дел од тие комуникации што беа презентирани во јавноста, дел се опфатени. Меѓутоа дадена е изјава Обвинителството дека дел од тие електронски пораки се дадени во Судот. Меѓутоа, тоа беше само дел за тој предмет, а се поврзани и со овие лица. Ова е постапка во врска со предметот за Кочани“, рече Коцевски.

Видете и ова:

„Дискотеката „Пулс“ во Кочани со години била буре барут“, оцени еден од обвинителите на првото рочиште

Главниот јавен обвинител уште истакна дека во моментов не може да соопшти за кои лица се работи, дека јавноста ќе биде запознаена откако ќе се земат генералиите, а за мерките што ќе бидат предложени против приведените ќе биде донесена одлука откако ќе бидат земени изјавите од приведените.

За предметот рече дека ќе се води во Обвинителството во Кочани, со оглед на тоа што тоа е подрачјето на извршувањето на евентуалното кривично дело.

„Доколку излезе нешто ново, можеби тоа да биде преземено од Обвинителството за организиран криминал. Засега надлежно е Обвинителството во Кочани“, рече Коцевски.

За односниот предмет посочи дека е заведен во Кочани и истиот не може да се спои со предметот за пожарот во дискотеката бидејќи, како што посочи, се работи за кривични дела за злоупотреба на службена должност и овластување и земање и давање поткуп, односно, како што објасни, се работи за кривични дела што немаат врска со предметот што е во тек за кривичниот настан во дискотеката во Кочани.

По осум месеци вчера почна судскиот процес за пожарот во дискотеката „Пулс“ во Кочани, во кој загинаа 63 лица, а 200 беа повредени. Вкупниот број на обвинети во судскиот процес е 35 лица и три фирми. Меѓу нив се поранешни министри за економија, бивши градоначалници на Кочани, инспектори и други службеници.

Судењето ќе продолжи во вторник, 25 ноември, со изјаснување за вина на обвинетите и воведни зборови на одбраната.

Претседателот на Косово, Вјоса Османи ја потпиша одлуката за распуштање на Собранието, откако не беше постигнат договор пратениците денеска да гласаат за неколку важни договори за земјата.

Претседателот на Демократската партија на Косово, Бедри Хамза, изјави дека за време на средбата со Османи побарал изборите да се одржат на 21 декември, објаснувајќи дека на земјата „ѝ се потребни институции што е можно поскоро“.

Тој додаде дека втората спомената опција за одржување вонредни избори е 28 декември.

Претседателот на Алијансата за иднината на Косово, Рамуш Харадинај бара изборите да се одржат на 21 декември и неговата партија самостојно да оди на нови избори.

Од друга страна, лидерот на партијата Гуџо, Фатон Пеци, изјави дека неговата партија бара изборите да се одржат на 28 декември, за да Централната изборна комисија (ЦИК) има доволно време да се подготви за изборниот процес.

Состанокот се одржа еден ден откако потпретседателот на Движењето Самоопределување (ЛВВ), Глаук Коњуфца, не успеа да ги обезбеди потребните гласови за формирање нова влада на 19 ноември.Извештаите за овој состанок доаѓаат откако потпретседателот на Движењето Самоопределување Глаук Коњуфца, не успеа да ги обезбеди потребните гласови за формирање нова влада на 19 ноември.

Исто како Коњуфца, лидерот на движењето Самоопределување Албин Курти, не успеа да формира нова влада на 26 октомври.

Затоа Косово сè уште има Влада со технички мандат од парламентарните избори одржани на 9 февруари 2025 година.

Видете и ова:

Самоопределување - од движење против власта до власт против сите

Главните политички партии на косовските Албанци не постигнаа консензус за голем број прашања, вклучително и за одржувањето на изборниот процес, па затоа процесите се одложуваат досега.

Според Уставот, доколку друг мандатар не успее да формира Влада, претседателот Османи мора да распише нови избори, кои мора да се одржат во рок од 40 дена од датумот на распишувањето.

Од претседателскиот кабинет не одговорија на прашањето на Радио Слободна Европа за можниот датум на распишување на изборите.

Досега, 28 декември се споменуваше како можен датум, поради големото присуство на дијаспората во Косово. Сепак, според познавачите на политичката ситуација, овој датум е предоцна, бидејќи постои можност меѓународниот фактор да не биде вклучен во следењето на изборите поради празниците.

Европската Унија се подготвува значително да ги прошири своите полициски и гранични мисии во Газа како дел од напорите за поддршка на мировниот план на Соединетите Држави, јави ДПА.

Се очекува министрите за надворешни работи на ЕУ во четврток во Брисел да се согласат за предлозите за подобрена улога на Европската Унија и, доколку е потребно, да ги прилагодат мандатите на постојните мисии, дознава ДПА.

Според планот, ЕУ би можела да ја користи својата полициска мисија со седиште на Западниот Брег, Еупол Копс, за да ја преземе водечката улога во изградбата на нови полициски сили за воено разорениот Појас Газа и да обучи околу 3000 палестински безбедносни службеници на среден рок.

На долг рок, целта е да се обучат сите 13 000 лица за кои се очекува дека ќе бидат потребни. На краток рок, Еупол Копс би помогнал во обновата на судските и безбедносните структури во Газа и би организирал програми за обука за палестински полициски инструктори во полициска академија во Ерихон, кофинансирана од Германија.

Досега, цивилната полиција во Газа работеше под контрола на палестинската милитантна група Хамас, која водеше двегодишна војна со Израел, која го остави поголемиот дел од територијата во урнатини. Хамас е прогласена за терористичка организација од САД и ЕУ.

Се очекува новите сили тесно да соработуваат со планираната меѓународна стабилизациска мисија, наложена со резолуција на Советот за безбедност на ООН претходно оваа недела. Министрите на ЕУ во Брисел, исто така, разговараат за проширување на мисијата на блокот за следење на границите за Газа.

Видете и ова:

Советот за безбедност на ОН усвои резолуција за планот на Трамп за Газа

Според информациите на ДПА, ЕУ во иднина би можела да помогне во преработката на стоки, не само на преминот Рафа, туку и на точки како што е Керем Шалом. Како почетен чекор, се очекува мисијата да продолжи да го поддржува движењето на луѓето низ Рафа откако преминот повторно ќе се отвори.

Франција е еден од најсилните застапници за пошироки мандати. Францускиот министер за надворешни работи Жан-Ноел Баро, на неодамнешниот состанок на ЕУ во Луксембург, изјави дека е важно да се обезбеди безбедно да стигне хуманитарната помош до Газа.

Проширената улога на „Еупол Копс“ би можела да го поддржи и планираниот процес на разоружување на Хамас во Појасот Газа, рече тој.

Се очекува најновите случувања во војната во Украина, исто така, да бидат во центарот на вниманието во разговорите во четврток, 20 ноември. Се очекува министрите да започнат со дискусија со украинскиот министер за надворешни работи Андриј Сибиха за најитните потреби на Киев.

Во ЕУ се преземаат напори за обезбедување дополнителна долгорочна финансиска поддршка, вклучително и евентуално ставање на располагање на Украина на замрзнатите руски државни средства.

Нов американски предлог за запирање на војната во Украина бара од Киев да се откаже од дел од својата територија и од дел од своето вооружување, јавуваат новинските агенции, додека украиннскиот претседател Володимир Зеленски престојува во Турција во обид да ја оживее мировните преговори.

Американските предлози исто така, како што јавуваат новинските агенции, вклучуваат намалување на големината на украинските вооружени сили и прифаќање на повлекување на американската воена помош, која била клучна за Украина во борбата против руските сили.

Дополнително, нема да бидат дозволени странски војници на украинска територија и Киев повеќе нема да добива оружје со долг дострел.

Предлозите, кои во детали ги објавија Фајненшл Тајмс (The Financial Times) и Ројтерс (Reuters), во голема мера се поклопуваат со цврстите барања кои Русија ги поставува од почетокот на годинава, кога американскиот претседател Доналд Трамп се обиде да отвори директни преговори со Москва за војната во Украина.

Немаше веднаш јавен одговор од украинските официјални лица на овие извештаи. Еден украински функционер со директно познавање на предлогот ги потврди неговите содржини, но немаше дополнителни коментари.

Непосредно по објавувањето на предлозите, Зеленски објави порака на социјалната платформа Телеграм во која му се заблагодари на турскиот претседател за организирањето на последните преговори.

Тој исто така го пофали „одлучувачкиот чекор и лидерството на претседателот Трамп [и] секој силен и праведен предлог за завршување на оваа војна. И само претседателот Трамп и Соединетите Американски Држави имаат доволно сила за војната конечно да заврши.“

Зеленски требаше да се сретне со високи официјални лица од американското Министерство за одбрана во Киев на 20 ноември.

Предлозите можат да го стават Зеленски во тешка позиција.

Видете и ова:

Зеленски во Турција, додека скандалот околу неговиот соработник се продлабочува

На бојното поле, украинските сили се борат да ги задржат руските сили кои се поголеми и подобро опремени, иако руските сили претрпуваат огромни загуби.

Русија се приближува кон клучниот град Покровск како дел од целта на Путин да ја контролира целата источна област на Донбас.

Русија исто така ги бомбардира украинските градови и енергетската инфраструктура, со цел да ги деморализира веќе исцрпените Украинци.

Синоќа, руски крстосувачки проектили погодиле два станбени објекти во западниот град Тернопил, при што загинале најмалку 25 лица, а десетици биле повредени.

Зеленски претходно ги одбиваше барања од Москва, Украина да се откаже од територија или да го намали својот арсенал, велејќи дека тоа само би ја ослабило Украина и би ја изложило на потенцијална нова инвазија во иднина.

Дома, Зеленски е политички ослабен поради голем скандал со корупција кој го опфаќа дел од неговите министри и долгорочни бизнис партнери.
Украинските законодавци повикаа Зеленски да го отпушти својот шеф на кабинетот, Андриј Јермак.

Истражувањето за корупција се однесува на наводи дека средства наменети за изградба на одбрана за заштита на ранливата енергетска инфраструктура од руски воздушни напади биле присвоени преку поткуп за политички внатрешни лица.

Најблискиот сојузник на Зеленски

Јермак имал значајна улога во претходните дипломатски средби за постигнување примирје или мировен договор за време на целосната инвазија на Русија.

Тоа што не е избран од народот, Јермак е можеби најверниот политички сојузник на украинскиот претседател.

Но, сега тој се соочува со растечки притисок за отпуштање или оставка додека истрагата за висока корупција се засилува.

„Ако Јермак не биде отпуштен во наредните неколку дена, се плашам дека можеме да влеземе во целосна политичка криза дома,“ изјави Олена Прокопенко, постар член на Германскиот Маршал Фонд за Радио Слободна Европа.

Скандалот со корупцијата кулминираше минатата недела кога двете водечки украински антикорупциски агенции објавија докази со детали од нивните наоди.

Проблемот е уште поголем затоа што Зеленски се обиде да ја укине автономијата на агенциите за време на летото, но се повлече поради најголемите протести на улица од почетокот на рускиот напад во февруари 2022.

Откритијата веќе доведоа до оставки на министерот за енергија и министерот за правда, додека близок сојузник на Зеленски, Тимур Миндич, ја напушти државата.

Али Баба

Тајни снимки објавени од истражителите покажаа дека осомничените користеле кодни имиња. На 18 ноември, еден украински пратеник изјави дека едно од тие имиња, Али Баба, всушност е Јермак.

Пратеникот Јарослав Железњак рече дека снимките покажуваат дека Јермак наводно упатувал ненаведени официјални лица да истражуваат функционери од Националното антикорупциско биро на Украина (NABU).

Јермак не одговори на прашањата на РСЕ. Зеленски објави дека ќе се сретне со законодавци од неговата партија на 20 ноември, што предизвикува шпекулации дали Јермак можеби ќе биде отпуштен.

Додека политичката температура во Киев расте,две опозициски партии побараа оставка на целата Влада.

Руските сопственици се согласиле да го продадат својот удел во Нафтената индустрија на Србија (НИС), кој изнесува 56,15 проценти, изјави српската министерка за рударство и енергетика на Србија, Дубравка Ѓедовиќ Хандановиќ. Нафтената индустрија на Србија е од 9 октомври под американски санкции поради мнозинското руско сопствеништво.

Но руската и српската страна засега не откриваат кои би можеле да бидат потенцијалните купувачи. НИС побара од САД лиценца за работа додека траат преговорите за сопственичката структура.

„САД нема да дозволат никој што може да биде поврзан со Русите да го купи НИС, како на пример Кина,“ вели за Радио Слободна Европа, Боже Драшковиќ, универзитетски професор во пензија.

Гаспром Нефт, рускиот мнозински сопственик на НИС, како и самата компанија, не одговорија на прашањата на Радио Слободна Европа со кого преговараат за предавање на контролата и управувањето.

Освен претходните информации дека руските мнозински сопственици на НИС преговараат со азиски и европски партнери за сопствеништвото, српските официјални лица не открија повеќе детали.

Професорот по економија Боже Драшковиќ смета дека е можно формален купувач на НИС да биде некој од арапските земји.

„Би им дозволиле на арапските земји, на пример на Емиратите, Кувајт, Саудиска Арабија, иако е прашање дали воопшто им е потребно тоа,“ оцени Драшковиќ.

„На можните европски купувачи – било Французи, Германци или кој било друг – нивните земји нема да им дозволат купување поради спречување на трансферот на купопродажната цена,“ додаде тој.

Американскиот OFAC не одговори на прашањето на РСЕ која опција за излез на руското сопствеништво од НИС би им била прифатлива.

Српската минисерка Ѓедовиќ Хандановиќ, изјави дека Србија е „многу вклучена и информирана“ за преговорите за продажба, но додаде дека не може да се зборува за третата страна сè додека не завршат преговорите за купување на рускиот удел.

„Тоа се деловни разговори на сериозни компании и додека не завршат или барем најважните детали не бидат дефинирани, не е ни сериозно да се зборува за тоа,“ додаде таа.

Видете и ова:

Што би значела национализацијата на српската нафтена индустрија?

Наскоро потоа, НИС ја информираше јавноста дека од Канцеларијата за контрола на странски средства (OFAC) при Министерството за финансии на САД била побарана посебна лиценца што би овозможила продолжување на работењето.

„Во согласност со статусот на преговорите меѓу акционерите и заинтересираните страни, до OFAC е испратено барање за добивање нова лиценца што би овозможила работа додека траат преговорите за одржливо решение за НИС,“ беше наведено.

Во тоа соопштение беше истакнато дека претходната лиценца дозволувала преговорите меѓу акционерите и други заинтересирани страни за промената на сопственичката структура на НИС да траат до 13 февруари.

Со последната лиценца беа одобрени преговорите за промена на сопствеништвото, но не и понатамошното работење на НИС.
Санкциите за НИС стапија во сила на 9 октомври, во обид американската администрација да спречи Русија приходите од енергетиката да ги користи за војната во Украина.

Претходно санкциите беа одложувани осум пати, а во меѓувреме сопственичката структура на компанијата повеќепати се менуваше, но и понатаму мнозинството остана во рацете на руските компании, додека Србија има 29,87 проценти удел.

Украинскиот претседател Володимир Зеленски пристигна во Турција на 19 ноември во обид да ги оживее застојаните мировни преговори, додека расте притисокот врз украинскиот лидер и неговиот шеф на кабинет Андриј Јермак поради корупциски скандал.

Зеленски се состана со турскиот претседател Реџеп Таип Ердоган, но дипломатски извор за Радио Слободна Европа изјави дека, Зеленски нема да се сретне со специјалниот пратеник на САД, Стив Виткоф, кој исто престојува во Анкара.

Претходно, Јермак, кој патува со Зеленски, објави на социјалните мрежи дека „сите планирани средби се одвиваат според распоредот“ и дека тој е „во постојан контакт со претставници на администрацијата на Доналд Трамп, особено со специјалниот претставник на претседателот на САД, Стив Виткоф.“

Корупциската истрага што ѝ создава проблеми на украинската власт се однесува на наводи дека средствата наменети за изградба на одбрана, која треба да ја заштити ранливата енергетска инфраструктура на Украина од руски воздушни напади, биле пренасочени во форма на мито за политички инсајдери.

Јермак одигра значајна улога во претходните дипломатски средби насочени кон барање пат до примирје или мировен договор во услови на целосната руска инвазија врз Украина, која трае речиси четири години.

Видете и ова:

Зеленски продолжува со патувањата среде корупциската афера во Украина

Како неизбран функционер, назначен директно на позицијата, Јермак можеби е најдоверливиот политички сојузник на украинскиот претседател. Но, сега тој се соочува со сè поголем притисок за разрешување или оставка, додека истрагата за високо ниво на корупција забрзува.

„Ако Јермак не биде отпуштен во следните неколку дена, се плашам дека може да влеземе во целосна домашна политичка криза,“ изјави Олeна Прокопенко, виша соработничка во Германскиот Маршалов Фонд, за РСЕ на 19 ноември.

Корупциските обвиненија кулминираа минатата недела кога двете водечки антикорупциски агенции во Украина објавија докази со кои ги детализираа своите наоди.

Проблемот е уште поголем поради тоа што Зеленски летово се обиде да ја намали автономијата на овие агенции, но беше принуден да се повлече од законските измени откако таа ги поттикна најголемите улични протести од почетокот на целосната руска офанзива во февруари 2022 година.

Тајни снимки објавени од истражителите покажаа дека осомничените работеле под кодни имиња. На 18 ноември, украински пратеник тврдеше дека едно од тие имиња – Али Баба – всушност било Јермак.

Пратеникот, Јарослав Железњак, рече дека записите покажуваат како наводно Јермак им наредувал на неименувани функционери да истражуваат претставници на Националното биро за борба против корупцијата на Украина (НАБУ).

Јермак, кој на 21 ноември полни 54 години, не одговорил на барањата за коментар од украинската редакција на РСЕ.

Зеленски објави дека ќе се сретне со пратениците од неговата партија „Слуга на народот“ на 20 ноември, што поттикна шпекулации дали Јермак може да биде отпуштен.

Рускиот „Лукоил“ на 19 ноември соопшти дека го задржува правото да побара судска заштита на своите права и, како што вели, легитимните интереси во Бугарија, откако таму беше назначен надворешен управител за управување со неговите средства, јавува новинската агенција Ројтерс.

„Лукоил ги презема сите неопходни чекори за да ја заврши продажбата на рафинеријата, мрежата на бензински пумпи и другите средства во Бугарија на нов сопственик и очекува дека активностите на надворешниот администратор нема да го попречат овој процес“, соопшти компанијата.

Минатата недела, бугарската влада назначи специјален управител кој ќе го надгледува работењето на рафинеријата на „Лукоил“ во Бургас по 21 ноември, кога треба да стапат на сила санкциите на САД, и да ја продаде компанијата доколку е потребно. Вашингтон ги воведе санкциите поради војната на Русија против Украина.

Законските измени му даваат на идниот специјален управител (назначен од државата) широки овластувања, вклучително и можност за продажба на средствата на компаниите, а неговите дејства се исклучени од судска контрола.

Видете и ова:

Зошто бугарските служби ја чуваат рафинеријата Лукоил во Бургас?

Минатата недела, претседателот на Бугарија Румен Радев стави вето на измените, кои беа поништени од парламентарната комисија за енергетика само неколку часа подоцна.

Во среда на 13 ноември, лидерот на владејачката ГЕРБ, Бојко Борисов изјави дека веќе е избрано лице за позицијата специјален управител, без да го прецизира неговото име.

Британската влада испрати предупредување до Кремљ откако соопшти дека руски воен брод влегол во британски води и насочил ласери кон британските пилоти.

Министерот за одбрана Џон Хили денеска (19 ноември)изјави дека бродот „влегол“ во британските води по втор пат оваа година, по претходниот упад во јануари.

„Јантар“ е на работ на британските води, северно од Шкотска, откако влезе во пошироките води на Велика Британија во последните неколку недели“, рече тој за време на прес-конференцијата на Даунинг стрит.

Британската војска распореди фрегата на Кралската морнарица и авиони на Кралските воздухопловни сили за „да го следат и следат секое движење на овој брод, при што Јантар насочувал ласери кон нашите пилоти“, додаде тој.

Тој ја нарече употребата на ласерите „длабоко опасна“ и му испрати порака на рускиот претседател Владимир Путин.

„Ве гледаме. Знаеме што правите. Ако Јантар патува на југ оваа недела, ние сме подготвени“.

Видете и ова:

Русија изврши масовни напади низ Украина, а Полска и Романија ја активираа воздушната одбрана

Хили рече дека Јантар е „дел од руска флота дизајнирана да ја стави и држи во опасност нашата подморска инфраструктура и онаа на нашите сојузници“.

Велика Британија и сојузниците на НАТО изразија растечка загриженост за ризикот што Москва го претставува за офшор инфраструктурата по саботажата во последните месеци на неколку подводни телекомуникациски и енергетски кабли.

Експертите и политичарите ја обвинија Русија за оркестрирање хибридна војна против Западот, додека двете страни се судираат околу Украина.

Романија, членка на НАТО, која се граничи со Украина, испрати борбени авиони рано во среда по нов упад со беспилотни летала на нејзина територија, соопшти Министерството за одбрана.

Романија постојано забележува нарушувања на својот воздушен простор, вклучително и фрагменти од беспилотни летала што паѓаат на нејзина територија, по руската инвазија на Украина во 2022 година.

„Во најновиот инцидент, два германски борбени авиони на НАТО ја следеа ситуацијата во воздухот веднаш по полноќ на границата со Украина, по руските воздушни напади“, соопшти романското Министерство за одбрана во соопштение за медиумите.

До жителите на југоисточниот округ Тулча било испратено телефонско предупредување и „неколку минути бил откриен сигнал од беспилотно летало, кое влегло приближно осум километри (пет милји) во националниот воздушен простор“ пред да исчезне од радарот.

Видете и ова:

Русија изврши масовни напади низ Украина, а Полска и Романија ја активираа воздушната одбрана

Потоа беспилотното летало „повторно се појавуваше на радарот приближно 12 минути“, соопшти Министерството, а предупредување беше испратено и до жителите на југоисточниот округ Галац.

„Уште два авиони, Ф-16 на романските воздухопловни сили, беа испратени“, додаде министерството, велејќи дека „не се пријавени случаи на удар на авион со земјата“.

„Тимови специјалисти се подготвени да започнат со пребарувања на терен“, се додава во соопштението.

Во понеделник, Романија нареди евакуација на две села (прва таква евакуација во земјата како резултат на војната во Украина) откако руски напад со беспилотни летала преку реката Дунав во соседна Украина запали брод што превезувал течен нафтен гас.

Наредбата за евакуација беше укината во вторник.