Израелската армија нареди евакуација на целиот град Газа пред планираниот израелски напад.

„Израелската армија е решена да го победи Хамас и ќе дејствува во областа Газа со голема сила, исто како што правеше низ целиот појас“, напиша на платформата X Авичај Адрае, портпарол на израелската армија за арапски јазик.

Во соопштението, жителите на Газа беа поканети да се упатат по крајбрежниот пат кон ал-Маваси на југот од Појасот Газа, кој Израел го означи како „хуманитарна“ зона.

Ова е прва наредба на армијата за евакуација на целиот град.

Претходно, вакви повици беа упатени само за одредени области.

Во понеделник, израелскиот премиер Бенјамин Нетанјаху им порача на жителите на Газа да „излезат оттаму“ пред планираниот израелски напад врз градот.

Видете и ова:

Израелската армија вели дека Газа е „опасна борбена зона“

На денот кога шест Израелци беа убиени во палестинска пукотница на автобуска станица во Ерусалим, Нетанјаху вети дека ќе ја засили војната против теророт, истакнувајќи дека израелската војска „елиминирала гнезда на тероризам“ на Западниот Брег и „урнала 50 терористички облакодери“ во Газа во последните два дена.

Овие уривања се само почеток на голема копнена кампања во градот Газа, рече тој.

„Затоа ја користам оваа можност да им кажам на луѓето од Газа, слушајте внимателно: Предупредени сте, излезете!“

Газа е најголемата населба на палестинската територија и е дом на околу еден милион луѓе.

Нетанјаху во неделата изјави дека околу 100.000 луѓе досега ја напуштиле областа.

Хуманитарните организации предупредуваат на понатамошно влошување на веќе катастрофалната ситуација за цивилното население.

Унгарскиот сервис на Радио Слободна Европа/Радио Либерти ќе престане со работа на полноќ на 21 ноември, околу пет години откако беше повторно лансиран за да им обезбеди на Унгарците точни, независни вести и информации.

Во порака до својата публика, сервисот рече дека неговиот тим „работел посветено на обезбедување независно новинарство за публиката во Унгарија“.

Содржината на сервисот ќе остане достапна онлајн.

„Длабоко сме благодарни за довербата, ангажманот и поддршката што ни ја покажаа нашите читатели“, се вели во соопштението.

Претседателот и извршен директор на РСЕ/РЛ, Стив Капус, ја пофали работата на новинарите на унгарскиот сервис.

„Нивниот професионализам, посветеност и непоколеблива посветеност на нашата мисија го обликуваа нашиот успех на значаен начин и ние остануваме длабоко благодарни за сè што донесоа во оваа организација“, рече тој.

Унгарскиот сервис беше повторно лансиран во 2020 година по наредба на Конгресот на САД. Пред тоа, работеше помеѓу 1950 и 1993 година.

Агенцијата на САД за глобални медиуми (УСАГМ), која ги надгледува РСЕ/РЛ, Гласот на Америка и другите меѓународни медиуми на САД, го извести Конгресот на 5 ноември 2025 година за својата намера да ја затвори унгарската служба на РСЕ/РЛ. Затворањето ќе стапи на сила на 21 ноември 2025 година.

„Благодарни сме за вниманието и поддршката на нашата публика од првиот ден од нашето ново работење и ни беше чест да им обезбедиме уникатни и оригинални приказни“, рече Тибор Вовес, раководител на унгарската служба на РСЕ/РЛ.

Основното јавно обвинителство Кочани поведе постапка против вкупно 11 лица за коруптивни кривични дела поврзани со работата на клубот „Пулс“, соопшти Јавното обвинителство.

Во соопштението се вели дека за тројца од нив донесена е наредба за спроведување истрага.

Станува збор за двајца даночни контролори од Службата за даночна контрола при Регионалниот даночен инспекторат во Регионална дирекција Штип, кои ја искористиле својата службена положба и овластување и пристапот до податоци и информации за ненајавени контроли во правни субјекти – даночни обврзници и со цел да прибават противправна имотна корист и подароци му ги откривале информациите и го предупредувале за контролите одговорното лице во клубот.

„Тие се осомничени за – Примање поткуп од член 357 од Кривичниот законик, додека одговорното лице – син на реалниот сопственик на клубот „Пулс“ е осомничен за – Давање поткуп од член 358 од Кривичниот законик. За првите двајца обвинителството до надлежниот суд достави предлог за определување мерка притвор, додека за третиот на сила се мерки на претпазливост во првиот предмет поврзан со пожарот во „Пулс“, па се бара проширување на тие мерки со забрана за воспоставување и одржување контакти и со новоосомничените“, се вели во соопштението од Обвинителството.

Видете и ова:

Приведени десеттина вработени во УЈП во Штип

Во него се посочува и дека шестмина осомничени, даночни инспектори и управници од регионалните дирекции на УЈП во Штип и Струмица, им овозможувале на правните субјекти „ММММ кафе“ и „Пулс“ да ги избегнуваат даночните контроли и да работат без соодветна фискализација, со што се осомничени дека сториле – Злоупотреба на службената положба и овластување согласно член 353 од Кривичниот законик.За нив се предложени мерки на претпазливост.

„Сопственикот на „Пулс“ кој веќе е во притвор во другиот предмет е осомничен за Фалсификување исправа според член 378 од Кривичниот законик, бидејќи подолг временски период свесно и со умисла за време на контроли од Управата за јавни приходи приложувал преправени фискални апарати со контролни фискални извештаи со невистинити податоци, кои истиот ги употребувал како вистински, а се со цел и намера избегнување на парични глоби и затворање на објектот“, пишува во соопштението од Обвинителството.

Осомничена е и инспекторка од Државниот пазарен инспекторат која исто така е опфатена со претходната постапка, во која и се определени мерки на претпазливост и за која сега се обезбедени дополнителни докази и за кривично дело Оддавање службена тајна од член 360 од Кривичниот законик поради откривање информации за ненајавени контроли.

Инаку, утринава Републичкиот јавен обвинител, Љупчо Коцевски и од Министерството за внатрешни работи потврдија дека во тек е истрагата на повеќе локации во земјата, а во која се опфатени вработени во Управата за јавни приходи.

За предметот рече дека ќе се води во Обвинителството во Кочани, со оглед на тоа што тоа е подрачјето на извршувањето на евентуалното кривично дело.

Коцевски посочи дека истиот не може да се спои со предметот за пожарот во дискотеката бидејќи, како што посочи, се работи за кривични дела за злоупотреба на службена должност и овластување и земање и давање поткуп, односно, како што објасни, се работи за кривични дела што немаат врска со предметот што е во тек за кривичниот настан во дискотеката во Кочани.

Видете и ова:

„Дискотеката „Пулс“ во Кочани со години била буре барут“, оцени еден од обвинителите на првото рочиште

По осум месеци вчера почна судскиот процес за пожарот во дискотеката „Пулс“ во Кочани, во кој загинаа 63 лица, а 200 беа повредени. Вкупниот број на обвинети во судскиот процес е 35 лица и три фирми. Меѓу нив се поранешни министри за економија, бивши градоначалници на Кочани, инспектори и други службеници.

Судењето ќе продолжи во вторник, 25 ноември, со изјаснување за вина на обвинетите и воведни зборови на одбраната.

Државниот пазарен инспекторат спроведе акција против нелегалната трговија со тутунски производи во пет градови. Во 16 од 23 проверени компании, инспекторите затекнале тутунски производи без документи за набавка и без акцизни марки.

„Затекнатите производи во количина од над 3.000 пакувања со вредност од над 1.000.000 денари се привремено одземени и предадени во Агенцијата за управување со одземен имот на Република Северна Македонија. За констатираните прекршоци, Државниот пазарен инспекторат, постапувајќи согласно законските надлежности, издаде прекршочни платни налози, за неправилностите достави известување и до другите надлежни институции, Царинската управа и Министерството за внатрешни работи за нивно понатамошно постапување“, соопшти Пазарниот инспекторат.

Српскиот претседател Александар Вучиќ изјави дека руските сопственици преговараат за продажба на нивниот удел во Српската нафтена индустрија (НИС) со три партнери.

Санкциите на САД врз НИС стапија на сила на 9 октомври, во обид на американската администрација да ја спречи Русија да ги користи приходите од енергија за војната во Украина.

Вучиќ изјави дека во наредните денови ќе разговара со претставници на американската администрација за да добие лиценца за продолжување на работата на НИС и рафинеријата во Панчево додека не се заврши продажбата на нафтената компанија.

Тој ги отфрли обвинувањата дека Србија ќе ги обезбеди парите за купување на НИС и дека сопственикот ќе биде некој друг.

„Не можеме ни да инсистираме на правото на првенствено одбивање, на кое како малцински партнер имаме право, бидејќи Русите ќе ни кажат дека ова не е доброволна, туку присилна продажба“, рече Вучиќ.

Тој додаде дека Србија ќе има пари да плати за рускиот удел во НИС, но дека Русите одлучиле да преговараат со други.

Видете и ова:

Кои би можеле да бидат купувачите на Нафтената индустрија на Србија?

На 18 ноември, НИС побара посебна лиценца од Соединетите Американски Држави за работа додека траат преговорите меѓу акционерите и заинтересираните страни за промена на сопственичката структура.

Во 2008 година, српската влада продаде 51 процент од акциите на НИС на руската државна компанија „Газпром Нефт“ за 400 милиони евра, без тендер.

Во меѓувреме, сопственичката структура на НИС се промени неколку пати, но таа останува во мнозинска сопственост на руски компании, при што Србија држи 29,87 проценти од акциите.

НИС е единствената компанија во Србија која се занимава со истражување, производство и рафинирање на нафта, како и со производство на природен гас.

Србија е единствената земја во Европа, заедно со Белорусија, која не се приклучи на санкциите на Европската Унија против Русија поради нејзината инвазија на соседна Украина.

Нерешените билатерални прашања меѓу членките од ЕУ и земјите кои не се членки на Унијата треба да се решаваат билатерално и тие не смеат да се користат како лост за блокирање на процесот на пристапување на земјите кандидати за членство, се наведува во Предлог-извештајот за Стратегијата на ЕУ за проширувањето на Европскиот парламент, во кој се потенцира дека некои од државите кои се стремат да се приклучат кон блокот веќе со години имаат статус на кандидати за членство.

„Проширувањето е една од најсилните алатки на ЕУ во надворешната политика и геополитиката и останува клучен двигател на долгорочната безбедност, мир, стабилност и просперитет во Европа врз основа на заеднички демократски вредности и претставува историска можност со значајни социо-економски, политички и безбедносни предности и за ЕУ и за земјите опфатени со процесот на проширување“, се нагласува во Извештајот.

Како што јави МИА, при денешната презентацијата на документот пред Комитетот за надворешни работи (АФЕТ) на Европскиот парламент, известувачот, литванскиот европратеник Петрас Ауштевичиус изјави дека ЕУ мора да има стратегија за проширувањето, а не само еднократен план, и дека не смее да дозволи тој процес да биде држен во заложништво од која било земја членка, бидејќи се работи за обединување на Европа и зближување на Европејците.

Според него, проширувањето е особено важно во услови на руската агресија врз Украина и обидите на Русија да предизвика поделби во Европа и да оствари влијание врз одредени европски земји.

Литванскиот европратеник смета дека ЕУ мора да ја одржи функционалноста на пристапниот процес, па затоа мора да премине кон носење одлуки со квалификувано мнозинство и тоа мора да го направи навремено и на најтранспарентен начин.

„Цврсто верувам дека секоја земја кандидат посветена на членството, преку реформи и наша поддршка може да ја постигне својата цел и да стане полноправен член на нашата заедница“, додаде Ауштевичиус.

Видете и ова:

ЕУ е подготвена за ново проширување, но кои ќе бидат следни членки и кога?

Во Предлог-извештајот се потенцира дека проширувањето е процес базиран на заслуги и секоја земја кандидат мора да биде оценета според сопствените заслуги во спроведувањето на Копенхашките критериуми, усогласеноста со законодавството на ЕУ и исполнувањето на сите дополнителни услови утврдени во рамката за проширување.

„Проширувањето е добитна опција и за сегашните и за идните земји членки и политичка итност од демонстрирање на посветеноста на ЕУ кон процесот на проширување. Проширувањето на ЕУ ќе ја зајакне европската безбедност. Иднината на Западниот Балкан, Украина и Молдавија е во рамките на ЕУ“, се наведува во извештајот.

Според документот, пристапувањето има и суштинско значење во поттикнувањето на регионалното помирување и стабилност, зголемување на отпорноста и заштита на земјите кандидати од штетно надворешно мешање.

Во извештајот се посочува дека „процесот на подготовка за проширувањето“ треба да се одвива паралелно и во ЕУ и во земјите кандидати и се повикуваат европските институции да ги преземат потребните реформи за да се осигура дека нивното неспроведување нема да го одложи пристапувањето на новите земји членки. Во документот исто така се изразува жалење што прекумерната употреба на консензусот постојано го забавува проширувањето на ЕУ и се потсетува дека член 49 од Договорот за ЕУ овозможува премин кон одлучување со квалификувано мнозинство без негови измени.

Европратениците имаат рок до 2 декември да поднесат амандмани на Предлог-извештајот, по што тој најверојатно ќе биде ставен на гласање на седницата на Комитетот предвидена за 15 јануари следната година.

Главниот јавен обвинител, Љупчо Коцевски соопшти дека во текот на вчерашниот ден и денеска (19 и 20 ноември) се води предистражна постапка против лица вработени во УЈП, а кои на некој начин се поврзани со предметот за пожарот во дискотеката „Пулс“ во Кочани.

„Денеска се приведени околу десетина лица и во моментов се вршат претреси на лицата опфатени со кривичната пријава. Во овој момент можам да кажам само дека се работи за вработени во УЈП, а за кривични дела допрва ќе видиме. Првичните сознанија се дека се работи за кривичните дела - злупотреба на службена положба и овластување, како и примање и давање мито“, рече Коцевски.

Тој посочи дека се работи за постапка поврзана со предметот за Кочани, како и дека за дел приведените се доставени и соодветени електронски комуникации и пораки.

„Дел од тие комуникации што беа презентирани во јавноста, дел се опфатени. Меѓутоа дадена е изјава Обвинителството дека дел од тие електронски пораки се дадени во Судот. Меѓутоа, тоа беше само дел за тој предмет, а се поврзани и со овие лица. Ова е постапка во врска со предметот за Кочани“, рече Коцевски.

Видете и ова:

„Дискотеката „Пулс“ во Кочани со години била буре барут“, оцени еден од обвинителите на првото рочиште

Главниот јавен обвинител уште истакна дека во моментов не може да соопшти за кои лица се работи, дека јавноста ќе биде запознаена откако ќе се земат генералиите, а за мерките што ќе бидат предложени против приведените ќе биде донесена одлука откако ќе бидат земени изјавите од приведените.

За предметот рече дека ќе се води во Обвинителството во Кочани, со оглед на тоа што тоа е подрачјето на извршувањето на евентуалното кривично дело.

„Доколку излезе нешто ново, можеби тоа да биде преземено од Обвинителството за организиран криминал. Засега надлежно е Обвинителството во Кочани“, рече Коцевски.

За односниот предмет посочи дека е заведен во Кочани и истиот не може да се спои со предметот за пожарот во дискотеката бидејќи, како што посочи, се работи за кривични дела за злоупотреба на службена должност и овластување и земање и давање поткуп, односно, како што објасни, се работи за кривични дела што немаат врска со предметот што е во тек за кривичниот настан во дискотеката во Кочани.

По осум месеци вчера почна судскиот процес за пожарот во дискотеката „Пулс“ во Кочани, во кој загинаа 63 лица, а 200 беа повредени. Вкупниот број на обвинети во судскиот процес е 35 лица и три фирми. Меѓу нив се поранешни министри за економија, бивши градоначалници на Кочани, инспектори и други службеници.

Судењето ќе продолжи во вторник, 25 ноември, со изјаснување за вина на обвинетите и воведни зборови на одбраната.

Претседателката на Косово, Вјоса Османи, изјави дека е одлучено предвремените избори да се одржат на 28 декември.

За време на прес-конференцијата по состанокот што го одржа претходно во текот на денот со претставници на политичките партии, Османи изјави дека осум партии се за 28 декември, пет за 21 декември, а три партии посочија дека би бил соодветен кој било датум.

Таа претходно потпиша и одлука за распуштање на Собранието, откако политичките лидери не успеаја да постигнат никаков договор пратениците да се обидат да гласаат за неколку важни договори за земјата денес.

„Во согласност со Уставот на Косово и важечкото законодавство, како и по денешното прифаќање на одлуката на Собранието на Косово во врска со неуспехот на вториот премиер да формира влада, претседателот на Република Косово денес го распушти деветтото свикување на Собранието на Република Косово“, се вели во соопштението на Претседателството.

Видете и ова:

Самоопределување - од движење против власта до власт против сите

Лидерот на Демократската партија на Косово, Бедри Хамза, изјави дека за време на средбата со Османи побарал изборите да се одржат на 21 декември, тврдејќи дека на земјата „ѝ се потребни институции што е можно поскоро“.

Тој додаде дека втората опција што се споменува за одржување предвремени избори е 28 декември.

Лидерот на Алијансата за иднината на Косово, Рамуш Харадинај, исто така, изјави дека бара изборите да се одржат на 21 декември и неговата партија да оди на нови избори самостојно.

Од друга страна, лидерот на партијата Гуксо, Фатон Пеци, изјави дека неговата партија бара изборите да се одржат на 28 декември, за да Централната изборна комисија (ЦИК) има доволно време да се подготви за изборниот процес.

Лидерот на Социјалдемократската иницијатива, Фатмир Лимај, го опиша одржувањето предвремени избори како „лоша вест“.

Тој рече дека партиите не успеале да изградат соработка девет месеци, додавајќи дека тоа покажува „неспособност и незрелост во начинот на градење на државата“.

Во врска со датумот на изборите, тој рече дека 21 декември е најпосакуваниот.

Средбата се одржа еден ден откако потпретседателот на Движењето Самоопределување, Глаук Коњуфца, не успеа да ги обезбеди потребните гласови за формирање нова влада на 19 ноември.

Како и Коњуфца, лидерот на Движењето Самоопределување, Албин Курти, не успеа да формира нова влада на 26 октомври. Како резултат на тоа, Косово сè уште има привремена влада од парламентарните избори одржани на 9 февруари 2025 година.

Најголемите политички партии на косовските Албанци не постигнаа консензус за голем број прашања, вклучително и за одржувањето на изборниот процес, а процесите се одложени до сега.

Според Уставот, доколку ниту еден друг мандатар не успее да формира влада, претседателот Османи мора да распише нови избори, кои мора да се одржат во рок од 40 дена од датумот на распишувањето.

Претседателскиот кабинет не одговори на прашањето на РСЕ/РЛ за можен датум на изборите.

Европската Унија се подготвува значително да ги прошири своите полициски и гранични мисии во Газа како дел од напорите за поддршка на мировниот план на Соединетите Држави, јави ДПА.

Се очекува министрите за надворешни работи на ЕУ во четврток во Брисел да се согласат за предлозите за подобрена улога на Европската Унија и, доколку е потребно, да ги прилагодат мандатите на постојните мисии, дознава ДПА.

Според планот, ЕУ би можела да ја користи својата полициска мисија со седиште на Западниот Брег, Еупол Копс, за да ја преземе водечката улога во изградбата на нови полициски сили за воено разорениот Појас Газа и да обучи околу 3000 палестински безбедносни службеници на среден рок.

На долг рок, целта е да се обучат сите 13 000 лица за кои се очекува дека ќе бидат потребни. На краток рок, Еупол Копс би помогнал во обновата на судските и безбедносните структури во Газа и би организирал програми за обука за палестински полициски инструктори во полициска академија во Ерихон, кофинансирана од Германија.

Досега, цивилната полиција во Газа работеше под контрола на палестинската милитантна група Хамас, која водеше двегодишна војна со Израел, која го остави поголемиот дел од територијата во урнатини. Хамас е прогласена за терористичка организација од САД и ЕУ.

Се очекува новите сили тесно да соработуваат со планираната меѓународна стабилизациска мисија, наложена со резолуција на Советот за безбедност на ООН претходно оваа недела. Министрите на ЕУ во Брисел, исто така, разговараат за проширување на мисијата на блокот за следење на границите за Газа.

Видете и ова:

Советот за безбедност на ОН усвои резолуција за планот на Трамп за Газа

Според информациите на ДПА, ЕУ во иднина би можела да помогне во преработката на стоки, не само на преминот Рафа, туку и на точки како што е Керем Шалом. Како почетен чекор, се очекува мисијата да продолжи да го поддржува движењето на луѓето низ Рафа откако преминот повторно ќе се отвори.

Франција е еден од најсилните застапници за пошироки мандати. Францускиот министер за надворешни работи Жан-Ноел Баро, на неодамнешниот состанок на ЕУ во Луксембург, изјави дека е важно да се обезбеди безбедно да стигне хуманитарната помош до Газа.

Проширената улога на „Еупол Копс“ би можела да го поддржи и планираниот процес на разоружување на Хамас во Појасот Газа, рече тој.

Се очекува најновите случувања во војната во Украина, исто така, да бидат во центарот на вниманието во разговорите во четврток, 20 ноември. Се очекува министрите да започнат со дискусија со украинскиот министер за надворешни работи Андриј Сибиха за најитните потреби на Киев.

Во ЕУ се преземаат напори за обезбедување дополнителна долгорочна финансиска поддршка, вклучително и евентуално ставање на располагање на Украина на замрзнатите руски државни средства.

Нов американски предлог за запирање на војната во Украина бара од Киев да се откаже од дел од својата територија и од дел од своето вооружување, јавуваат новинските агенции, додека украиннскиот претседател Володимир Зеленски престојува во Турција во обид да ја оживее мировните преговори.

Американските предлози исто така, како што јавуваат новинските агенции, вклучуваат намалување на големината на украинските вооружени сили и прифаќање на повлекување на американската воена помош, која била клучна за Украина во борбата против руските сили.

Дополнително, нема да бидат дозволени странски војници на украинска територија и Киев повеќе нема да добива оружје со долг дострел.

Предлозите, кои во детали ги објавија Фајненшл Тајмс (The Financial Times) и Ројтерс (Reuters), во голема мера се поклопуваат со цврстите барања кои Русија ги поставува од почетокот на годинава, кога американскиот претседател Доналд Трамп се обиде да отвори директни преговори со Москва за војната во Украина.

Немаше веднаш јавен одговор од украинските официјални лица на овие извештаи. Еден украински функционер со директно познавање на предлогот ги потврди неговите содржини, но немаше дополнителни коментари.

Непосредно по објавувањето на предлозите, Зеленски објави порака на социјалната платформа Телеграм во која му се заблагодари на турскиот претседател за организирањето на последните преговори.

Тој исто така го пофали „одлучувачкиот чекор и лидерството на претседателот Трамп [и] секој силен и праведен предлог за завршување на оваа војна. И само претседателот Трамп и Соединетите Американски Држави имаат доволно сила за војната конечно да заврши.“

Зеленски требаше да се сретне со високи официјални лица од американското Министерство за одбрана во Киев на 20 ноември.

Предлозите можат да го стават Зеленски во тешка позиција.

Видете и ова:

Зеленски во Турција, додека скандалот околу неговиот соработник се продлабочува

На бојното поле, украинските сили се борат да ги задржат руските сили кои се поголеми и подобро опремени, иако руските сили претрпуваат огромни загуби.

Русија се приближува кон клучниот град Покровск како дел од целта на Путин да ја контролира целата источна област на Донбас.

Русија исто така ги бомбардира украинските градови и енергетската инфраструктура, со цел да ги деморализира веќе исцрпените Украинци.

Синоќа, руски крстосувачки проектили погодиле два станбени објекти во западниот град Тернопил, при што загинале најмалку 25 лица, а десетици биле повредени.

Зеленски претходно ги одбиваше барања од Москва, Украина да се откаже од територија или да го намали својот арсенал, велејќи дека тоа само би ја ослабило Украина и би ја изложило на потенцијална нова инвазија во иднина.

Дома, Зеленски е политички ослабен поради голем скандал со корупција кој го опфаќа дел од неговите министри и долгорочни бизнис партнери.
Украинските законодавци повикаа Зеленски да го отпушти својот шеф на кабинетот, Андриј Јермак.

Истражувањето за корупција се однесува на наводи дека средства наменети за изградба на одбрана за заштита на ранливата енергетска инфраструктура од руски воздушни напади биле присвоени преку поткуп за политички внатрешни лица.

Најблискиот сојузник на Зеленски

Јермак имал значајна улога во претходните дипломатски средби за постигнување примирје или мировен договор за време на целосната инвазија на Русија.

Тоа што не е избран од народот, Јермак е можеби најверниот политички сојузник на украинскиот претседател.

Но, сега тој се соочува со растечки притисок за отпуштање или оставка додека истрагата за висока корупција се засилува.

„Ако Јермак не биде отпуштен во наредните неколку дена, се плашам дека можеме да влеземе во целосна политичка криза дома,“ изјави Олена Прокопенко, постар член на Германскиот Маршал Фонд за Радио Слободна Европа.

Скандалот со корупцијата кулминираше минатата недела кога двете водечки украински антикорупциски агенции објавија докази со детали од нивните наоди.

Проблемот е уште поголем затоа што Зеленски се обиде да ја укине автономијата на агенциите за време на летото, но се повлече поради најголемите протести на улица од почетокот на рускиот напад во февруари 2022.

Откритијата веќе доведоа до оставки на министерот за енергија и министерот за правда, додека близок сојузник на Зеленски, Тимур Миндич, ја напушти државата.

Али Баба

Тајни снимки објавени од истражителите покажаа дека осомничените користеле кодни имиња. На 18 ноември, еден украински пратеник изјави дека едно од тие имиња, Али Баба, всушност е Јермак.

Пратеникот Јарослав Железњак рече дека снимките покажуваат дека Јермак наводно упатувал ненаведени официјални лица да истражуваат функционери од Националното антикорупциско биро на Украина (NABU).

Јермак не одговори на прашањата на РСЕ. Зеленски објави дека ќе се сретне со законодавци од неговата партија на 20 ноември, што предизвикува шпекулации дали Јермак можеби ќе биде отпуштен.

Додека политичката температура во Киев расте,две опозициски партии побараа оставка на целата Влада.

Руските сопственици се согласиле да го продадат својот удел во Нафтената индустрија на Србија (НИС), кој изнесува 56,15 проценти, изјави српската министерка за рударство и енергетика на Србија, Дубравка Ѓедовиќ Хандановиќ. Нафтената индустрија на Србија е од 9 октомври под американски санкции поради мнозинското руско сопствеништво.

Но руската и српската страна засега не откриваат кои би можеле да бидат потенцијалните купувачи. НИС побара од САД лиценца за работа додека траат преговорите за сопственичката структура.

„САД нема да дозволат никој што може да биде поврзан со Русите да го купи НИС, како на пример Кина,“ вели за Радио Слободна Европа, Боже Драшковиќ, универзитетски професор во пензија.

Гаспром Нефт, рускиот мнозински сопственик на НИС, како и самата компанија, не одговорија на прашањата на Радио Слободна Европа со кого преговараат за предавање на контролата и управувањето.

Освен претходните информации дека руските мнозински сопственици на НИС преговараат со азиски и европски партнери за сопствеништвото, српските официјални лица не открија повеќе детали.

Професорот по економија Боже Драшковиќ смета дека е можно формален купувач на НИС да биде некој од арапските земји.

„Би им дозволиле на арапските земји, на пример на Емиратите, Кувајт, Саудиска Арабија, иако е прашање дали воопшто им е потребно тоа,“ оцени Драшковиќ.

„На можните европски купувачи – било Французи, Германци или кој било друг – нивните земји нема да им дозволат купување поради спречување на трансферот на купопродажната цена,“ додаде тој.

Американскиот OFAC не одговори на прашањето на РСЕ која опција за излез на руското сопствеништво од НИС би им била прифатлива.

Српската минисерка Ѓедовиќ Хандановиќ, изјави дека Србија е „многу вклучена и информирана“ за преговорите за продажба, но додаде дека не може да се зборува за третата страна сè додека не завршат преговорите за купување на рускиот удел.

„Тоа се деловни разговори на сериозни компании и додека не завршат или барем најважните детали не бидат дефинирани, не е ни сериозно да се зборува за тоа,“ додаде таа.

Видете и ова:

Што би значела национализацијата на српската нафтена индустрија?

Наскоро потоа, НИС ја информираше јавноста дека од Канцеларијата за контрола на странски средства (OFAC) при Министерството за финансии на САД била побарана посебна лиценца што би овозможила продолжување на работењето.

„Во согласност со статусот на преговорите меѓу акционерите и заинтересираните страни, до OFAC е испратено барање за добивање нова лиценца што би овозможила работа додека траат преговорите за одржливо решение за НИС,“ беше наведено.

Во тоа соопштение беше истакнато дека претходната лиценца дозволувала преговорите меѓу акционерите и други заинтересирани страни за промената на сопственичката структура на НИС да траат до 13 февруари.

Со последната лиценца беа одобрени преговорите за промена на сопствеништвото, но не и понатамошното работење на НИС.
Санкциите за НИС стапија во сила на 9 октомври, во обид американската администрација да спречи Русија приходите од енергетиката да ги користи за војната во Украина.

Претходно санкциите беа одложувани осум пати, а во меѓувреме сопственичката структура на компанијата повеќепати се менуваше, но и понатаму мнозинството остана во рацете на руските компании, додека Србија има 29,87 проценти удел.