Вести
Гаши:Тие што посакуваат дестабилизација, не и сакаа добро на државата
Претседателот на Собранието Африм Гаши ги осуди постапките поврзани со вчерашните настани кога, како што рече, беа палени и газени државни знамиња. Тој во одговор на новинарско прашање истакна дека таквите настани се во спротивност со државните и националните интереси на секоја етничка заедница.
Прославите за албанското знаме низ Северна Македонија предизвикаа инциденти и сквернавење на македонското знаме, што доведе до политички тензии и апсења. На одбележувањето на денот на албанското, имаше сквернавење на македонското знаме што предизвика стравувања за подгревање на меѓуетничките тензии во државата.
„Патриоти се тие кои го почитуваат своето знаме, но и знамето на другите“ изјави Гаши и посочи дека не верува дека зад ова има политичка заднина. Според него треба да одговараат несовесните граѓани кои го сториле делото.
„Сите кои сакаат дестабилизација во државата, не им посакуваат добро на својата нација и својот народ, а потоа и на државата. И затоа повикувам на освестување“, рече Гаши.
Според него, потребно е унапредување на државата со зачленување во Европската унија, подигање на степенот на меѓусебна толеранција и унапредување на меѓуетничките односи.
На прашањето дали наративот на политичарите во изминатиов период има влијание за појавата на вакви настани, тој посочи дека тоа треба да го кажат органите чија надлежност е да ги расветлат последните случувања и откријат мотивите.
Премиерот Христијан Мицкоски и министерот за внатрешни работи, Панче Тошковски синоќешните настани ги посочија како обиди за дестабилизација, нешто за што, велат, предупредувале досега.
Засега, како што соопшти министерот Тошковски, уапсени се осум лица од кои четири МВР ги гони за кривично дело предизвикување национална, расна и верска омраза, раздор и нетрпеливост. За ова дело предвидена е казна од најмалку една година затвор. Осомничените се млади лица на возраст од 18 до 21 година, а има и еден малолетник.
види ги сите денешни вести
Вкупно 13 кандидати се пријавиле за претседател на Антикорупциската комисија
Заврши рокот за пријавување за претседател на Државната комисија за спречување на корупцијата (ДКСК) – соопштија денеска (18 август) од собраниската прес служба, додавајќи дека се пријавиле вкупно 13 кандидати.
-Со оглед на тоа што постапката е прекината, прекината е и административната селекција. Имињата ќе бидат познати откако ќе заврши процесот на административна селекција на пријавените кандидати. Засега може да го потврдиме само вкупниот број на пријавите, велат од Собранието.
До 15 август, кога заврши рокот, десетина кандидатури биле пристигнати до Собранието за јавниот оглас за претседател на Државната комисија за спречување на корупција (ДКСК).
Претседателот на Комисијата за прашања на избори и именувања, Ѓорѓија Сајкоски тогаш посочи дека конечната бројка би се знаела денеска откако ќе пристигнат и оние што се пратени по пошта. Нагласи дека постапката по овој оглас ќе продолжи по 3 ноември, односно по завршување на локалните избори – пренесе новинската агенција МИА.
Во средата пак, на 13 август, собраниската Комисија за прашања на изборите и именувањата одржа седница на која ја формираше Комисијата за селекција на кандидати за претседател на ДКСК.
Како членови на ова тело беа избрани заменикот народен правобранител Илбер Руфати, двајца претставници на здруженија кои се дел од советите за соработка на Владата и граѓанскиот сектор – Дарко Аврамовски и Бардил Јашари, како и четворица пратеници – Бојан Стојаноски од ВМРО-ДПМНЕ, Саранда Имери Стафаи од ВРЕДИ, Митко Трајчулески од СДСМ и Арбана Пашоли од Европскиот фронт.
Членовите на Комисијата за селекција се овластуваат да вршат обработка на личните податоци, при што се должни да обезбедат тајност и заштита на податоците согласно Законот за заштита на лични податоци, за што до Комисијата за прашања на изборите и именувањата ќе достават изјави.
Собранието на 1 август донесе Одлука за објавување на јавен оглас за избор на претседател на ДКСК, откако сега веќе поранешната претседателка, Татјана Димитровска поднесе оставка.
Нејзината оставка следуваше по обвинувањата на Обвинителството за гонење организиран криминал и обвиненијата за две кривични дела и тоа за оддавање службена тајна на поранешниот директор на ТЕЦ Неготино Небојша Стојановиќ, обвинет во „Адитив“, и за компјутерски фалсификат затоа што ревизор од ДЗР во нејзино име и го положил тестот за сертификат за државна тајна.
Иницијативата „Шанса за Центар“ продолжува со собирањето потписи за формирање партија во пресрет на изборите
Граѓанската иницијатива Шанса за Центар сепак ќе продолжи со собирањето потписи за да ја основа политичката платформа „Независни заедно“.
Одлуката следува иако Државната изборна комисија го донесе новиот Правилник со кој на независните кандидати за советници и градоначалници ќе им бидат потребни само два потписи за учество на претстојните локални избори.
И покрај ова, Иницијативата „Шанса за Центар“ ќе продолжи да собира потписи за да прерасне во партија бидејќи како што велат оттаму „овој Правилник ќе важи сами за овие избори“.
-Не сакаме повеќе неизвесност „пет до дванаесет“. Ќе продолжи примената на членот од законот според кој независните групи ќе бидат претставени само со имињата на носителите на листите, наместо со називот на групата, односно ќе стои „група избирачи“ и името и презимето на носителот на листата. Ова отвора можност да се појават слични имиња со цел да се создаде забуна кај гласачите. Пример: Билјана Ивановска и Биљана Ивановска. Ова веќе се случувало на претходни избори – објавија од оваа Иницијатива на социјалната мрежа Фејсбук денеска (18 август).
Од „Шанса за Центар“ обвинуваат и за нерамноправност:
-Постои можност наместо јасна листа за гласање, да добиеме тетратка со голем број имиња, каде партиите ќе бидат најгоре, а под нив ќе следат долги списоци со имиња – се додава во нивната денешна објава.
Минатата недела, оваа Иницијатива заедно со иницијативите „Зелените за Гази Баба“ и „Групација 398“ застанаа зад кандидатурата на Билјана Ивановска за градоначалничка на Општина Центар.
Ивановска, која беше претседателка на Антикорупциската комисија од 2019 до 2024 година, во изјава за медиумите посочи дека нема да дозволи „детални урбанистички планови кои не се усогласени со Генералниот урбанистички план“.
Собирањето потписи продолжува иако Државната изборна комисија (ДИК) вчера го усвои новиот Правилник за регулирање на постапка за собирање потписи за поддршка на кандидатски листи поднесени од група избирачи и за начинот на определување на нотарите за локалните избори 2025 година.
Првиот круг од изборите е закажан за 19 октомври, а вториот за 2 ноември.
Иран ќе ги продолжи разговорите со Меѓународната агенција за атомска енергија
Иран ќе ги продолжи разговорите со нуклеарниот надзорник на ОН, а двете страни веројатно ќе одржат уште една рунда разговори во наредните денови, изјави денеска (18 август) портпаролот на иранското Министерство за надворешни работи, Есмаил Багаи, за државните медиуми.
Инспекторите од Меѓународната агенција за атомска енергија (МААЕ) не беа во можност да пристапат до нуклеарните постројки на Иран откако Израел и САД ги бомбардираа за време на 12-дневната војна во јуни, и покрај тоа што генералниот директор Рафаел Гроси рече дека инспекциите остануваат главен приоритет на агенцијата.
„Имавме разговори минатата недела. Уште една рунда разговори меѓу Иран и агенцијата веројатно ќе се одржи во наредните денови“, рече Багаи.
Техеран ја обвини агенцијата за олеснување на израелско-американските напади со извештај од 35-члениот одбор на инспектори на агенцијата, во кој се тврди дека Иран ги крши своите обврски поврзани со нуклеарното оружје.
Исламската Република долго време ги негираше западните сомневања за таен обид за развој на нуклеарно оружје, велејќи дека останува посветена на Договорот за неширење, кој ја пропишува мирната употреба на атомската енергија за потписниците.
„Нивото на нашите односи (со МААЕ) се промени по настаните што се случија, ние не го негираме тоа, но нашата комуникација останува директна“, рече Багаи за време на телевизиската неделна прес-конференција.
Минатиот месец, Иран донесе закон со кој се суспендира соработката со агенцијата. Законот предвидува дека сите идни инспекции на иранските нуклеарни локалитети мора да бидат одобрени од Врховниот совет за национална безбедност на Техеран.
Сиљановска-Давкова: Блокадата на евроинтеграциите е сериозен безбедносен ризик за Западен Балкан и ЕУ
Блокадата на евроинтеграциите, вклучувајќи ја нашата, добива димензија и карактер на сериозен безбедносен ризик за регионот на Западен Балкан, но и за ЕУ, оцени денеска претседателката и врховен командант на вооружените сили Гордана Сиљановска-Давкова.
Во обраќањето на Централната свеченост по повод Денот на Армијата, 18 август, Сиљановска-Давкова порача дека природата на војната брзо се менува, а трката во вооружувањето диктира поголеми инвестиции во одбраната.
„Во ова невреме треба час поскоро да почнеме, како што и почнавме, стратешки да ги планираме стредствата и нивната употреба. Надлежните институции треба да размислуваат за долгорочни проекти кои ќе гарантираат самоодржливост и развој на одбраната не само во мирни услови, туку и во амбинет на воена закана и потенцијален конфликт“, порача претседателката.
Како што истакна, „преку три децении Армијата ја пишува својата приказна како вистински чувар на татковината“.
„По прогласувањето на независноста во 1991 година, македонската Армија се стави на располагање на државата и граѓаните како гарант на мирот и одбраната, преку континуирана сестрана реформа, помош во справување со кризните и вонредните состојби, поддршка на цивилните институции во справување со елеменатарните непогоди како пожарите и поплавите. Тоа се уште го прави професионално, одговорно и пожртвувано, а доказ за ова е континуираното уживање највисока доверба кај народот“, рече Сиљановска-Давкова во обраќањето.
Министерот за одбрана Владо Мисајловски најави дека е во финална фаза приемот на 300 нови професионални војници.
„Денес можам да потврдам дека столбовите на кои ја градиме Армијата и одбранбените сили стојат цврсто. Буџетирањето на одбраната е на високо ниво, а така и ќе продолжиме. Силно сме посветени да ја зајакнеме нашата одбрана со исполнување на заложбите за инвестиции во одбранбените ресурси согласно одлуките на Самитот на НАТО во Хаг“, рече во своето обраќање, министерот Мисајловски.
На свеченоста присуствуваа премиерот Христијан Мицкоски, претседателот на Собранието Африм Гаши, пратеници, министри, поранешни министри за одбрана и началници на ГШ, претставници од Сојузот на борците и од дипломатскиот кор.
Построени беа и новопромовираните 26 потпоручници и 149 подофицери кои неодамна ги завршија школувањето и обуката, а претседателката Сиљановска-Давкова го одликува Центарот за обука на питомци и офицери со Орден за воени заслуги.
Радован Вишковиќ поднесе оставка од функцијата премиер на Република Српска
Радован Вишковиќ, премиер на ентитетот Република Српска во Босна и Херцеговина, денеска (18 август) поднесе оставка од својата функција.
Вишковиќ е член на Алијансата на независни социјалдемократи (СНСД) на Милорад Додик.
„Одлучивме да избереме нова Влада на РС“, рече Вишковиќ на прес-конференцијата, по состанокот во седиштето на претседателот на ентитетот, и додаде дека „останува член на тимот на СНСД“ и дека ќе работи „некоја друга работа“.
Вишковиќ е на чело на Владата на Република Српска од 2018 година, а неговиот мандат често беше критикуван од опозицијата поради начинот на кој се управува со ресурсите на ентитетот и неговиот однос со институциите на Босна и Херцеговина.
Исто така, од јули 2023 година, Вишковиќ е на списокот на санкционирани лица на Соединетите Држави поради закани за Дејтонскиот мировен договор и закани за суверенитетот на Босна и Херцеговина.
Вишковиќ, како што тогаш објави Министерството за финансии на САД, е еден од лидерите во РС, одговорен „за поттикнување на донесување закон во Народното собрание на Република Српска со кој одлуките на Уставниот суд на Босна и Херцеговина се прогласуваат за неприменливи во РС, со што се попречува и загрозува спроведувањето на Дејтонскиот мировен договор“.
Овие санкции вклучуваат забрана за влез во САД и замрзнување на средствата под нејзина надлежност.
Вишковиќ е исто така еден од осомничените во истрагата на Обвинителството на Босна и Херцеговина за кривично дело напад врз уставниот поредок.
Покрај Вишковиќ, за истото кривично дело се обвинети и Милорад Додик, претседателот на РС, и Ненад Стевандиќ, претседателот на Парламентот на Ентитетот.
Германскиот министер за надворешни работи Вадефул скептичен за распоредување војници во Украина
Германскиот министер за надворешни работи Јохан Вадефул изрази скептицизам во врска со идејата за испраќање германски војници во Украина како дел од западните безбедносни гаранции против руските напади.
Тој ја опиша перспективата како „далечно прашање“. Рече дека Германија се фокусира на заштита на територијата на НАТО, истакнувајќи дека е единствената европска земја што стационира борбено подготвена бригада во Литванија.
„Тоа не значи дека не можеме да ја поддржиме Украина на други воени и технички начини“, додаде Вадефул.
Вадефул ја потврди позицијата на Германија дека само Украина може да одлучи дали и под кои услови може да отстапи територија.
„Може да прифати таков чекор само ако може да биде сигурна дека видот на руски напад со кој се соочила нема да се случи повторно - и тоа значи безбедносни гаранции“, рече тој.
Вадефул, исто така, нагласи дека водечката улога на Германија во конфликтот е првенствено политичка.
Канцеларот Фридрих Мерц, рече тој, успеал да ги обедини Европејците зад Украина и покрај различните национални интереси.
Палестински функционер тврди дека Хамас добил нов план за примирје во Газа
Преговарачите на Хамас во Каиро добија нов предлог за прекин на огнот во Газа, со кој се бара почетно 60-дневно примирје и ослободување на заложниците во две групи, изјави во понеделник (18 август)палестински функционер.
„Предлогот е рамковен договор за започнување преговори за траен прекин на огнот“, изјави функционерот за АФП под услов да остане анонимен.
Функционерот рече дека „Хамас ќе одржи внатрешни консултации меѓу своето раководство“ и со лидерите на другите палестински фракции за да го разгледаат предлогот од медијаторите.
Минатата недела, палестинската група соопшти дека висока делегација била во Каиро на разговори со египетски функционери за напорите за обезбедување неостварлив прекин на огнот во војната, која сега е во нејзиниот 23-ти месец.
Заедно со Катар и САД, Египет е вклучен во медијацијата меѓу Израел и милитантната група Хамас, која не успеа да обезбеди пробив по краткотрајното примирје претходно оваа година.
Египетскиот министер за надворешни работи, Бадр Абделати, кој го посети граничниот премин Рафа со Газа во понеделник, рече дека „додека зборуваме сега, на египетска почва се присутни палестински и катарски делегации кои работат на интензивирање на напорите за ставање крај на систематското убивање и гладување“.
Минатата недела, Абделати изјави дека Каиро соработува со Катар и САД за да посредува во 60-дневно примирје „со ослободување на некои заложници и некои палестински притвореници и проток на хуманитарна и медицинска помош во Газа без ограничувања“.
Повеќе од двенеделните преговори во главниот град на Катар, Доха, завршија минатиот месец, без никаков пробив.
Петмина загинати, меѓу кои две деца, во руски напад на Харкив
Гувернерот на источноукраинскиот регион Харкив изјави дека најмалку пет лица, меѓу кои и едно мало дете, се убиени во ноќен руски воздушен напад врз станбена област.
Едногодишно девојче и 16-годишно момче се убиени во напад со беспилотно летало во вториот по големина град во Украина, изјави Олех Синехубов во објава на Телеграм на 18 август.
Тој додаде дека бројот на повредени лица во нападот „континуирано расте“.
Градоначалникот Ихор Терехов изјави дека 20 лица се повредени, меѓу кои и шест деца.
Властите во регионот Харкив објавија дека руската војска започнала масовен напад во зори, целејќи петкатна станбена зграда во индустриска зона со четири беспилотни летала Геран-2.
Руската војска редовно ги напаѓа украинските региони со различни видови оружје - дронови за напад, ракети, антитерористички ракетни системи и системи за повеќекратно лансирање ракети (MLRS).
Руското раководство негира дека руската војска, за време на војна од големи размери, спроведува целни напади врз цивилната инфраструктура на украинските градови и села, убивајќи цивили и уништувајќи болници, училишта, градинки, енергетски и водоводни објекти.
Украинските власти и меѓународните организации ги квалификуваат овие напади како воени злосторства од страна на Руската Федерација и нагласуваат дека тие се целни по природа.
Во исто време, украинскиот претседател Володимир Зеленски, поддржан од присуството на клучните европски сојузници, ќе разговара со американскиот претседател Доналд Трамп на 18 август.
Средбата би можела да помогне во одлучувањето за иднината на Украина, бидејќи Трамп го префрла товарот за завршување на војната со Русија на Зеленски.
Претходно, Зеленски рече дека една од клучните точки на неговата агенда е обезбедување силни безбедносни гаранции од американскиот лидер против понатамошна руска агресија, нешто што американските претставници го посочија како реална можност.
Средбата доаѓа откако Трамп го угости Путин на самит во Алјаска, кој се чинеше дека не даде никакви резултати, но ги загрижи Киев и неговите сојузници поради она што критичарите го оценија како наклонетост на Трамп кон ставот на Кремљ за прекин на конфликтот, кој прерасна во тотална војна со руската инвазија на Украина во февруари 2022 година.
Судир меѓу демонстрантите и полицијата пред просториите на владејачката партија во Израел
По синоќешниот масовен митинг во Тел Авив за поддршка на заложниците стотици демонстранти се упатија кон блиското седиште на партијата Ликуд на премиерот Бенјамин Нетанјаху, каде што запалија логорски оган и се судрија со полицијата.
Снимките објавени на социјалните мрежи покажуваат како полицијата насилно ги потиснува демонстрантите кои удираат тапани и извикуваат антивладини пароли, објавува „Тајмс оф Израел“.
Претходно, израелската полиција соопшти дека синоќа околу 220.000 луѓе се собрале на Плоштадот на заложниците во Тел Авив и околните улици на протест организиран од Форумот на семејства на заложници и исчезнати.
Околу 150 000 луѓе се собраа на плоштадот, додека уште 70.000 се придружија на маршот, кој, заедно со членовите на семејствата на заложниците, започна од железничката станица Савидор до местото на собирање, објавува „Тајмс оф Израел“.
Во исто време, Форумот соопшти дека речиси 500.000 луѓе се собрале на Плоштадот на заложниците во Тел Авив и околните улици, барајќи владата да постигне договор за ослободување на заложниците што ги држат палестинските милитантни групи во Појасот Газа.
Во соопштението на Форумот се наведува дека „скоро 500 000 луѓе дојдоа да испратат јасна порака - целиот израелски народ сака ослободување на сите заложници и крај на војната“.
Форумот, исто така, објави дека околу еден милион луѓе учествувале во десетици протести низ целиот Израел во текот на денот.
„Семејствата на заложниците сакаат да му кажат на народот на Израел - ви благодариме! Отсега, ние ќе ја продолжиме нашата борба уште посилно. Останете со нас додека не се врати последниот заложник!“, соопштија од Форумот.
Собирот претставува завршница на масовните протести и штрајкови низ целата земја, со кои се изразува противење на одлуката на владата да ја прошири војната во Појасот Газа.
ДИК: Само два потписа доволни за учество на независните кандидати на локалните избори
Два потписи од двајца избирачи ќе бидат потребни за да можат независните кандидати за советници и градоначалници да учествуваат на претстојните локални избори кои треба да се одржат во октомври.
Ова го предвидува новиот Правилник за регулирање на постапка за собирање потписи за поддршка на кандидатски листи поднесени од група избирачи и за начинот на определување на нотарите за локалните избори 2025 година, кој Државната изборна комисија го донесе вечерва на седница. Правилникот без усвоен со шет гласа за, а единствена против беше Дитмире Шеху.
Правилникот го предложи членот на ДИК, Александар Даштевски повикувајќи членот 63 од Изборниот законик кој како што рече не е укинат, а ја регулира постапката за собирање потписи за предлагање кандидати, иако членот 62 кој се однесува на локалните избори Уставниот суд го укина.
„Врз основа на член 63 став 3 собирањето потписи во постапката на кандидирање согласно одредбите на Избирниот законик почнуваат 10 дена од денот на распишувањето на изборите и трае 15 дена. Кога подносител на листа на кандидати за членови на совет, односно листа на кандидат за градоначалник е група избирачи потребно е предлогот на кандидатската листа да го потврдат пред подрачните одделенија или регионални канцеларии на ДИК со важечки документи за личен идентификација, со адреса на живеење на соодветна општина за која се поднесува соодветна кандидатска листа и притоа за поддршка на истата на приопишан образец да бидат потпишани најмалку два избирачи“, рече Дашевски образложувајќи одредби од новиот Правилник, откако стариот беше ставен вон сила бидејќи Уставниот суд укина два члена од Изборниот законик.
Даштевски нагласи дека потписите за поддршка на предлогот на кандидатските листи за кандидат на членови на совет, односно листа на кандидат за градоначалник се врши во временски период утврден согласно членот 63 став 3 од Изборниот законик во период на редовно работно време на подрачните одделенија и канцеларии од 8:30 и 16:30.
„Овие се специфичните работи кои ќе важат само за овие избори, па затоа и предлагам на ДИК овој Предлог правилник да го усвои“, рече Даштевски.
Претседателот на ДИК, Борис Кондарко истакна дека има спротивно мислење од Даштевски од процедурално правен карактер, но оти сепак тој и неговиот колега Оливер Ристовски ќе гласаат за Правилникот.
Со предложениот Правилник за собирање потписи кој предвидува да се евидентираат најмалку два потиси во подрачните одделенија за кандидирање на група избирачи. Членот 60 од Изборниот законик дирекно го утврдува, предвидува и дава правото на учество на група избирачи да поднесат листа и да учествуваат на изборите, но, без собирање потписи.
„Уставен суд ги укина одредбите за бројот на собрани потпис предвидени во членот 62. Во таа насока не го прифаќам образложението на овој правилник, кој се повикува на член 63 кој ја предвидува постапката за собирање потписи, не може да се спроведува постапка без да постои цензус за предвиден број потписи кои треба да се соберат. Во случајот членот 63 членот е неприменлив бидејќи е поврзан со член 62 од Законот, а кој е укинат од Уставниот суд“, рече Кондарко, кој иако не се согласи со Правилникот, кажа дека со членот Оливер Ристовски ќе гласаме за и ќе го поддржиме овој Правилник, бидејќи сметам дека тоа е во интерес на изборниот процес.
Изборите се распишани, изборните дејства се во тек, додаде и ДИК нема право и можност да ги одложи или сопре изборните дејства. Во оваа состојба додаде претседателот на Комисијата, ДИК се нашла не по своја вина.
„Во два наврати Собранието не успеа да го регулира ова прашање за бројот на потребни потписи за предлагање кандидатска листа на група избирачи, и поради тоа ДИК, не по своја вина, е доведена во ситуација да ги применува одредбите од Изборниот законик онакви какви се, а во интерес на успешно организирање на изборниот процес. Суштински без собирање требаше да биде односно со нула потписи, но со Правилникот се предлага најмалку два потписа од најмалку два избирачи, а тоа во суштина не менува ништо“, рече Кондарко.
На ова реплицираше Даштевски, кој како што рече, смета оти со предложениот Правилник не се излегува надвор од законските рамки.
„На почетокот на образложувањето на Правилникот кажав дека членот 62 од ИЗ е укинат и оти на сила е членот 63 особено ставовите 1, 2, 3. Така што, во таа смисла сметам дека постапката за собрање потписи ќе треба да постои на некаков можеби симболичен начин бидејќи тоа е предвидена постапка“, рече Даштевски.
ДИК на седница минатата сабота на 9 август усвои заклучок вон сила да се стави Упатството на ДИК од 2024 за регулирање на постапката за собирање потписи и начинот на определување на нотарите согласно Изборниот законик. Како што рече претседателот на ДИК Борис Кондарко, тоа упатство за регулирање на постапката за собирање потписи се става вон сила поради одлуката на Уставниот суд со која се укинати членови 61 и 62 од Изборниот законик каде што е предвиден број/процент на потписи за предлагање листи на група избирачи.
Вчера Собранието имаше обид да донесе измени на Изборниот законик кои го регулираат бројот на потребни потписи за независните кандидати за локалните избори, но иако го доби потребното мнозинство немаше доволен број гласови по Бадентер и тие не беа донесени. Предложените измени предвидуваа независните кандидати да треба да соберат 0,5 проценти потписи од запишаните избирачи во изводот на Избирачкиот список на изборната единица (ИЕ).
Членовите на ДИК со шест гласови „за“ и еден против го усвоија и Упатството за начинот и постапката за поднесување/прием на кандидатските листи за локалните избори. Ова Упатство, како што рече Кондарко, ги систематизира сите одредби од законот во кои се определени процедурите, условите и критериумите за поднесување на кандидатските листи од формално - правен аспект.
На денешната седница, меѓу другите точки беа усвоени и Програмата за едукација на општински избирачки одбори, Програмата за едукација и информирање на гласачите, како и Јавниот повик за проверка на податоци во Избирачкиот список од страна на граѓаните.
Мултимедија
Најпосетени
Што треба да знаете