Вести
Неселективната правда со „Рекет“ на тест
Додека обвинителите од СЈО одат на распит во Јавното обвинителство дел од правниците изразуваат сомнеж за капцитетот и интегритетот на институциите за неселективна борба против криминалот во случајот „Рекет“. За дел од аналитичарите ова е шанса да се докаже спротивното.
Обвинителот од тимот на Специјалното обвинителство Бурим Рустеми најверојатно утре ќе се јави на распит во Обвинителството за организиран криминал и корупција за случајот „Рекет“, затоа што денеска има закажано судско рочиште за предметот ТНТ. Рустеми за дел од медиумите потврди дека неговиот распит бил најавен пред неколку дена, но спорен беше датумот поради неговите обврски и закажани рочишта за предметите на СЈО кој што тој за застапува пред суд. Тој ја водеше истрагата за предметот „Поштенски банки“ за кој во една од изјавите на обвинителката Лиле Стефанова се спомнува дека изразиле несогласување со специјалната обвинителка Катица Јанева за спогодбено затворање на случајот. Неговиот исказ би требало да ги расветли и сомнежите за информациите кои се појавија во јавноста дека поранешниот директор на МЕПСО Сашо Василевски купил стан од фирма која е под истрага на СЈО во предметот „Поштенски банки“ непосредно пред замрзнување на имотот на осомничените.
Пред него во Јавното обвинителство на сведочење беа повикани обвинителката Стефанова која исказ даваше пет часа, како и нејзината колешка и заменичка на Јанева, Елизабета Јосифовска.Од Јавното обвинителство не соопштуваат кога на дневен ред ќе дојде распитот на Јанева.
Оттаму соопштија дека водат финансиска истрага со цел прибирање на доказен материјал со кој треба да се утврди фактичката состојба. Од Обвинителството додаваат дека одземените телефони и компјутери се вештачат и оти за оние телефони чија меморија е избришана се прават напори за декриптирање.
Опозицијата обвинува дека целиот правосуден систем е заробен од власта и дека истрагата за случајот „Рекет “ намерно не се проширува за да се добие на време со цел уништување на докази за кои опозицијата смета дека го поврзуваат премиерот Зоран Заев со овој скандал.
Во однос на неселктивноста адвокатот Звонко Давидовиќ смета дека институциите засега покажуваат дека немаат капацитет да се справат со настаната ситуација, затоа што оваа е ситуација која со години владее во земјава.
„Се повторува веќе видената приказна каде што се тактизира, се шпекулира, се формираат комисии и сето тоа трае, наместо институциите на системот да преземат мерки согласно законот и крај. Да се работеше за обичен граѓанин, досега тој веќе ќе беше во притвор. Проблемот овде е испуштената шанса и можност да се направат реформи во системот. Токму поради нефункционалноста на Обвинителството се формираше СЈО, и сега на удар поради сомневањата и шпекулациите за Катица Јанева и се очекува од Обвинителството кое не функционирало сега наеднаш да профункционира“ вели Звонко Давидовиќ.
Во ваква ситуација се наметнува прашањето дали до октомври кога се очекува можно доделување на датум за преговори со ЕУ, има доволно време за да се подобри имиџот за владеењето на правото пред земјите членки на ЕУ. Љупчо Петковски од Евротинк вели дека сите случувања околу „Рекет“ се шанса државата да покаже дека законот е слеп и дека правдата треба да ги стигне сите.
„Никој да не биде заштитен , со тоа ќе се прати порака до сите колебливи држави членки на ЕУ кои што постојат и кои се се повеќе, дека кај нас се направил решителен чекор во борбата против културата на неказнивост за која толку многу беа властите во минатото критикувани и од граѓаните и од меѓународните партнери. Со целосно расчистување на случаи како овој, каде има индиции дека се вмешани луѓе блиски од власта, најдобро се зајакнува досието за борба против корупцијата и организираниот криминач“ вели Петковски.
Според Давидовиќ институциите не се на висината на задачата и нема да бидат додека не се повикаат на одговорност сите луѓе. Ситуацијата нема да се подобри се додека наместо за криминал, еднаквост и неселективност во правда, зборуваме за правно делување кон власта или опозицијата ќе имаме ваква ситуација, додава Давидовиќ. Според него предметот „Рекет “ е само последица од она што со години се случува во правосудниот систем и кулминација на состојбите.
„Мислам дека сега го допревме дното. Со години ова се случува. Целокупната ситуација, немање на одговорност, селективна правда, вмешаност на политиката во институциите на судскиот систем, неповикување на одговорност и недопирливост на одредени луѓе доведоа до ваква ситуација. Не е овде проблем „рекет“ овде е проблем целокупниот систем и одговорноста на секој поединец. Мора да се прекине со сите шпекулации и политички препукувања затоа што ова е сериозен предмет кој покажува сериозни работи и слабости“, вели Давидовиќ.
За Петковски проблемот не е во капацитетот на институциите за справување со овој предмет, затоа што институциите имаат и луѓе, знаење, опрема и ресурси.
„Јас мислам дека капацитет имаат, но останува да видиме дали имаат интегритет. дали има луѓе со професионален и личен интегритет во институциите кои што би ја истуркале оваа работа до крај расчистувајќи го целосно овој конкретен случај, да застанат на патот на моќниците“, вели Петковски.
Досега единствени осомничени за случајот „Рекет“ се Бојан Јовановски познат како Боки 13 и Зоран Милески со прекар Кичеец кои по вчерашната одлука на Основниот суд Скопје 1 остануваат во притвор уште 30 дена. Тие се осомничени за „примање награда за противзаконско влијание “ и „перење пари и други приноси од казниво дело“.
види ги сите денешни вести
ДКСК со повеќе изборни пријави, дел проследени и до Обвинителството
Државната комисија за спречување на корупцијата (ДКСК) постапувала по повеќе пријави поврзани со изборниот процес. Од нив, дел се проследени до надлежни институции, а дел затворени поради утврдено непостоење на прекршувања – соопштија од Комисијата на денешната седница.
Една од пријавите се однесува на директорка на средно училиште, која во електронска комуникациска група споделила содржина креирана од политичка партија и изборен плакат, со молба за поддршка на кандидат преку споделување на објавата.
ДКСК утврдила дека надлежен орган за понатамошно постапување е Јавното обвинителство.
Во друг случај, пријавен е избор на професор за проректор на универзитет, за кој ДКСК утврдила дека не се прекршени законски одредби во изборниот процес, бидејќи избраното лице веќе имало работен однос во моментот на донесување на одлуката, што не се смета за започнување на нова постапка за вработување.
На денешната седница се реферираше и за пријава за одговорно лице на средно училиште, кое донело одлука за вработување, за која ДКСК утврдила дека е во рамките на дозволениот период, поради што не се утврдени прекршувања.
Во однос на пријава за наводна изјава на кандидат за градоначалник, кој ветувал парични средства во готово за ранливи категории и пензионери, ДКСК утврдила дека станува збор за изјава на кандидатот за дел од програма и промоција на активности кои би се реализирале во текот на мандатот, и не се работи за директно прекршување на изборниот процес.
-Се работи за изјава дадена пред медиуми за дел од програма на кандидат кој што е посветен на ранлива категорја на граѓани како и на пензионери. Се работи за проект којшто го промовира и мерка која подразбира дел од неговата програма и промоција на активностите кои што ќе бидат реализирани во текот на мандатот, посочија оттаму.
На денешната седница, Државната комисија за спречување на корупција претходно ги усвои Проценката на ризици од корупција за потребите на изработка на Националната стратегија за спречување на корупцијата и судирот на интереси 2026–2030 и Методологија за изготвување на Националната стратегија за спречување на корупцијата и судирот на интереси 2026–2030.
Државната комисија за спречување на корупција денеска на 24. седница го разгледа и усвои Извештајот од антикорупциска проверка на одредби од Изборниот законик, Глава VI, како и Изборна кампања со поднаслов „Медиумско претставување“ од член 75 до член 76- д. ДКСК.
Извештајот, како што изјави потпретседателката Цвета Ристовска, ќе го достави до институциите со цел да се направи усогласување на одредени членови за да се прецизира дефинирањето на учесник во изборна кампања, како и рамноправен пристап до платено политичко рекламирање за сите учесници.
Ристовска посочи дека ДКСК утврдила три регулаторни ризици со сегашното дефинирање на процесот на платено политичко рекламирање во Изборниот законик, поради двосмислена терминологија, која може да се толкува различно.
Обвинетиот за инцидентот во возот во Англија, обвинет за уште еден напад со нож во Лондон
Човекот за кој се тврди дека извршил серија напади со нож во брз воз во Англија е обвинет и за напад со нож на станица во Лондон претходно истиот ден, соопшти полицијата во понеделник, 3 ноември.
Триесет и двегодишниот осомничен треба да се појави пред Прекршочниот суд во Питерборо. Тој е обвинет за 10 обвиненија за обид за убиство, едно обвинение за телесна повреда и едно обвинение за поседување остри предмети по нападите во возот на линијата од Донкастер до Лондон во саботата на 1 ноември, соопшти Британската транспортна полиција.
Тој е обвинет и за уште едно обвинение за обид за убиство и поседување на остри предмети во врска со инцидент во воз на станицата Понтон Док DLR во источен Лондон во раните утрински часови истиот ден, каде што една жртва претрпела повреди на лицето откако била нападната со нож.
Член на персоналот на компанијата LNER е во критична, но стабилна состојба по нападите со нож на линијата Донкастер до Лондон, додека уште четири лица остануваат хоспитализирани.
Британската транспортна полиција прогласи голем инцидент кога возот застана во Хантингдон, Кембриџшир, откако патниците ги активираа алармите за итни случаи и двајца мажи беа уапсени осум минути откако полицијата беше повикана во 19:42 часот.
Еден од мажите подоцна беше ослободен без понатамошни мерки откако полицајците утврдија дека не бил вмешан. Се смета дека нападот започнал кратко откако возот ја напуштил станицата Питерборо.
Полицијата ги истражува сите околности, вклучително и дали менталното здравје било фактор за инцидентот, но не се верува дека станува збор за терористички акт.
Министерката за транспорт Хајди Александар рече дека осомничениот не им бил познат на полицијата за борба против тероризмот или на разузнавачката агенција MI5, но не сакаше да каже дали имал контакт со службите за ментално здравје.
Заменик-шефот на полицијата Стјуарт Канди, од BTP, изјави дека кривичната истрага и поддршката за жртвите се приоритет за Британската транспортна полиција.
„Нашата истрага, исто така, разгледува и други можни поврзани кривични дела.“
Главниот обвинител Трејси Истон изјави дека тим обвинители работел на утврдување дека има доволно докази за да се изнесе случајот на суд и дека е во јавен интерес да се покрене кривична постапка.
„Тесно соработувавме со Британската транспортна полиција за да разгледаме огромен број докази, вклучително и видео надзорот. Бројот на обвиненија ќе биде под надзор додека ова продолжува да напредува. „Знаеме какво разорно влијание имаа настаните во возот во саботата и како инцидентот ја шокираше целата земја. Нашите мисли се со сите засегнати“, изјави главниот обвинител.
Инаку десет лица од кои за деветмина беа повредени по нападот со нож во возот на линијата Донкастер-Лондон Кингс Крос на 1 ноември. Железничката компанија LNER соопшти дека станува збор за нивен воз. Наоружани полициски службеници влегле во возот и ги уапсиле двајцата осомничени во рок од осум минути по првите повици на патниците.
Мајката на загинат во Нови Сад го продолжи штрајкот со глад, полицијата приведе 37 лица
Пред зградата на српскиот парламент во Белград, ситуацијата е мирна на 3 ноември, по инцидентите на митингот претходната вечер, каде што полицијата приведе 37 лица.
На местото каде што Дијана Хрка, мајката на еден од 16-те луѓе кои загинаа при пад на настрешница во Нови Сад пред една година, штрајкува со глад пред парламентот, има неколку десетици граѓани кои ја поддржуваат.
Во знак на поддршка за Хрка, група средношколци го блокираа сообраќајот на аголот од улицата Таковска и булеварот Крал Александар и го развеаја транспарентот „Сметајте на нас“.
Претходниот ден, на протестот за поддршка на Хрка, имаше неколку инциденти во кои врз собраните граѓани беа фрлани петарди, топовски истрели и шишиња.
Од правец на шаторската населба лоцирана во паркот Пионирски и на улицата пред влезот во Народното собрание, каде што се собираат поддржувачи на владејачката Српска напредна партија (СНС), врз собраните на митингот за поддршка беа фрлани пиротехнички средства.
Вечерта, поголема група мажи од шаторската населба се упати кон луѓето собрани на протестот, па полицијата постави кордон меѓу двете групи и немаше директен контакт.
Министерството за внатрешни работи на Србија (МВР) објави дека полицијата довела 37 лица во службените простории кои, како што е наведено, учествувале во нарушување на јавниот ред и мир и предизвикување инциденти.
Вишото јавно обвинителство во Белград објави дека Владимир Штимац е уапсен под сомнение дека на протестот „повикал на насилна промена на уставниот поредок и ги поттикнал учесниците на ненајавениот собир да ги нападнат учесниците на вториот најавен собир одржан во паркот Пионирски, потоа врз полицајците, како и на насилно соборување на носителите на највисоките државни функции“.
Владимир Штимац е поранешен кошаркар на Црвена звезда Белград и член на националниот тим.
Обвинителството објави дека Штимац ги нарекол полицајците на протестот „криминалци кои дури немаат ни идентификациски броеви“.
Се додава дека Штимац е приведен на 48 часа.
Српскиот претседател Александар Вучиќ ги обвини граѓаните кои дојдоа да ја поддржат Дијана Хрка дека се обиделе да го нападнат „симболот на слободата - паркот Пионирски“, објави агенцијата Бета.
Во заедничко соопштение, Министерството за внатрешни работи на Србија и Безбедносната и информативна агенција (БИА) „остро ги осудија инцидентите во центарот на Белград“.
Во неделата, во близина на зградата на српскиот Парламент, на улицата до бетонската ограда што ја обезбедува шаторската населба на поддржувачите на СНС, голем број граѓани се собраа да ја поддржат Дијана Хрка.
Протести во поддршка на Дијана Хрка беа организирани и во Нови Сад, Чачак, Суботица, Бачка Топола, Лесковац.
Дијана Хрка претходно објави дека штрајкува со глад во шатор во близина на зградата на српскиот Парламент. Таа изјави дека лидерите на владејачката Српска напредна партија (СНС) ѝ ветиле дека одговорните за падот на настрешницата ќе бидат во затвор, но тоа не се случило една година по несреќата.
Таа го најави својот штрајк со глад на комеморативниот собир во Нови Сад на 1 ноември, кога десетици илјади луѓе им оддадоа почит на жртвите од трагедијата на железничката станица во Нови Сад.
Архивата на јавни собири објави дека 110.000 луѓе присуствувале на собирот во Нови Сад во саботата. Според Министерството за внатрешни работи на собирот имало 39.000 граѓани.
Извештај на Европската комисија: Северна Македонија сѐ уште не ги усвоила уставните измени
Северна Македонија сè уште не ги усвоила потребните уставни измени со цел вклучување на Бугарите во Уставот, наведени во Заклучоците на Советот од јули 2022 година, кои земјата се обврза да ги започне и постигне, се наведува во редовниот годишен извештај на Европската комисија за напредокот на земјите кандидати за членство во Европската унија (ЕУ).
„Властите продолжија да работат на патоказите за владеење на правото, реформата на јавната администрација и функционирањето на демократските институции, како и на акцискиот план за заштита на малцинствата. Северна Македонија треба да ги интензивира напорите за почитување на владеењето на правото, особено преку заштита на независноста и интегритетот на судството и засилување на борбата против корупцијата“, се наведува во нацрт-извештајот на ЕК во кој имаше увид Радио Слободна Европа (РСЕ).
Според извештајот на Европската комисија, Црна Гора е најнапредна во процесот на пристапување кон ЕУ бидејќи ги отвори сите 33 поглавја од преговорите. Таа земја ги започна преговорите за членство со ЕУ пред 13 години и досега затвори седум поглавја од преговорите.
„Континуираната политичка посветеност на црногорските власти кон стратешката цел за европска интеграција даде опипливи резултати во постигнувањето на потребните реформи и напредокот на земјата на патот кон пристапување кон ЕУ“, се вели во извештајот.
Дијалогот за нормализација на односите, кој е исто така дел од пристапните преговори за двете земји, е сè уште клучен за Србија и Косово, според извештајот што ги опфаќа земјите од Западен Балкан.
Србија сè уште заостанува кога станува збор за почитување на надворешната и безбедносната политика на ЕУ, бидејќи не воведе санкции кон Русија поради нејзината инвазија на Украина. Извештајот, исто така, посочи на зголемената поларизација во таа земја поради бранот масовни протести што траат веќе една година.
Босна и Херцеговина (БиХ), како што е оценето, заостанува во реформите поради „политичките тензии“, како и проблемите со усвојувањето на неуставни закони во ентитетот на БиХ Република Српска.
„Ентитетот Република Српска усвои закони што го поткопуваат уставниот и правниот поредок и функционалноста на државните институции. Овие закони беа укинати од Уставниот суд. По кривичната пресуда потврдена во жалбата, претседателот на ентитетот Република Српска беше отстранет од функцијата, а предвремените избори беа закажани за 23 ноември“, се вели во извештајот.
Во Србија и Босна и Херцеговина, како што е наведено, постојат различни ризици од „заробување на државата“ во контекст на борбата против корупцијата.
„Корупцијата продолжува да претставува значаен предизвик што земјите во процесот на проширување мора да го решат како приоритет“, се наведува во извештајот.
Србија отвори 22 од 35 преговарачки поглавја, од кои две се привремено затворени. Европската комисија оцени дека властите во Србија „продолжиле да го прогласуваат членството во ЕУ за своја стратешка цел, но вистинското темпо на спроведување на реформите значително се забавило“.
ЕУ посочува дека „Србија треба да спроведе кредибилни реформи во сите области“, особено во областа на хармонизација со надворешната и безбедносната политика на ЕУ.
Во однос на Косово се посочува дека напредокот е попречен од поделената домашна политика и политичкиот застој по парламентарните избори на 9 февруари, и покрај тоа што Косово е посветено на својот европски пат, со високо ниво на јавна поддршка.
Во документот се споменува дека Косово доброволно ја усогласило својата надворешна политика со онаа на Европската Унија, што сигнализира јасна посветеност на вредностите на ЕУ.
Меѓу другото, во нацрт-извештајот се споменува дека Европската комисија ги презела првите чекори кон постепено укинување на казнените мерки.
Косово, за разлика од другите земји од Западен Балкан, нема статус на земја-кандидат, иако аплицираше за членство во декември 2022 година.
Во извештајот се наведува и општа оценка за сите земји-кандидатки, а таа е дека „процесот на проширување сега оди побрзо отколку во последните 15 години“.
Европската Унија им понуди шест милијарди евра на земјите од регионот во 2024 година како дел од таканаречениот План за раст, со цел да се забрза нивниот развој и интеграција.
Ердоган вели дека Хамас ќе се држи до примирјето во Газа
Хамас е „решен“ да се држи до примирјето во Газа, изјави во понеделник (3 ноември) турскиот претседател Реџеп Таип Ердоган, додавајќи дека е клучно муслиманските нации да играат водечка улога во реконструкцијата на палестинската територија. Хамас е прогласена за терористичка организација од САД и ЕУ.
„Се чини дека Хамас е решен да се држи до договорот“, им рече Ердоган на делегатите од Организацијата на исламски држави (ОИК) собрани во Истанбул на нивниот годишен самит за економска соработка на COMCEC.
Неговите забелешки дојдоа во време кога Турција се подготвуваше да биде домаќин на министрите за надворешни работи на Саудиска Арабија, Катар, Обединетите Арапски Емирати, Јордан, Пакистан и Индонезија на разговори за реконструкцијата на Газа, бидејќи расте стравот од несигурното примирје од 10 октомври.
Разговорите треба да започнат околу 11:00 часот во хотел во Истанбул, а прес-конференцијата е закажана неколку часа подоцна.
„Во овој момент, треба да доставиме повеќе хуманитарна помош за луѓето во Газа, а потоа да започнеме со напорите за реконструкција. Израелската влада прави сè што е во нејзина моќ за да го спречи ова“, рече Ердоган.
Осврнувајќи се на планот објавен во март за реконструкција на разурнатата палестинска територија, Ердоган рече дека планот за реконструкција подготвен од Арапската лига и Организацијата за исламска соработка треба веднаш да се спроведе.
ВМРО-ДПМНЕ има 55 градоначалници, ВРЕДИ 9, СДСМ 6, НАИ 4, а ЗНАМ и УР по 1
Коалицијата предводена од ВМРО-ДПМНЕ, според резултати од двата круга на локалните избори, ќе има градоначалници во Скопје и во 54 општини.
Втора по бројот на освоени градоначалнички места е коалицијата ВРЕДИ со девет. Коалицијата на СДСМ ќе има шест градоначалници, НАИ 4, а Движење ЗНАМ и Унијата на Ромите, по еден градоначалник.
Две општини ќе ги водат независни кандидати.
На вториот изборен круг вчера се избираа градоначалници во 32 општини и во Градот Скопје. На 19 октомври, пак, во првиот круг, беа избрани 44 градоначалници.
Во четири општини – Гостивар, Врапчиште, Центар Жупа и Маврово и Ростуше вчера немаше гласање. Причината е недоволниот одѕив на гласачи во првиот круг, поради што ќе се спроведе нова изборна постапка во рок од 60 дена од објавувањето на конечните резултати од Локалните избори 2025.
Ова се осми Локални избори во земјата, а четврти на кои избираат градоначалници и советнички листи во 80 општини и Градот Скопје.
На Локалните избори 2025 учествуваа вкупно 22 партии, 19 коалиции и 119 групи на избирачи односно независни кандидатури.
Мециновиќ: Скопје само дополнително ќе се мобилизира
„Во изминатите два месеца постигнавме нешто што не можевме да го замислиме“, порача вечерва на прес конференција Амар Мециновиќ кој во трката за градоначалник на Град Скопје, влезе како кандидат на партијата Левица.
Од обработени 98,98 проценти од податоците за одѕивот на денешното гласање во рамките на вториот круг од локалните избори, Мециновиќ освои 60.303 гласови, односно 36,53% од гласовите - покажува статистиката објавена на веб страницата на Државната изборна комисија.
На кусата прес конференција, тој ја обвини владеачката ВМРО-ДПМНЕ за авторитарност.
„Скопје се разбуди и одлучи дека може да се гласа и да се избере поинаку. За жал, на крај видовме дека имаше обид од страна на владеачката авторитарна ВМРО-ДПМНЕ да го смени сето ова со нивни методи, но не успеа да ги обесхрабри скопјани кои во толку голем број покажаа дека не е толку јасна позицијата на владеачката партија како што мислеа. Во следните две и пол години, Скопје само дополнително ќе се мобилизира“, додаде Мециновиќ.
Претходно, претседателот на Левица, Димитар Апасиев посочи дека од неопределените гласачи, 66 отсто не излегле на гласање.
Според него, ова значи дека две третини од скопјани, не гласале.
„ВМРО стагнира, Левица дуплира. Ова само покажува дека опозициските тенденции веќе се престројуваат позади Левица. Од втора партија на ниво на цело Скопје, вечерва обзнанувам дека сме прва партија, дури и пред ВМРО-ДПМНЕ во Центар, во Карпош и во урбаниот дел од Аеродром“, изјави Апасиев.
На денешниот, втор круг од локалните избори, жителите на Град Скопје бираа меѓу Мециновиќ и Орце Ѓорѓиевски од Коалицијата „Твоја Македонија“ предводена од ВМРО-ДПМНЕ која прогласи победа.
Орце Ѓорѓиевски победи во Скопје, ВМРО-ДПМНЕ слави во уште 21 општина
ВМРО-ДПМНЕ прогласи победа на Орце Ѓорѓиевски за градоначалник на Градот Скопје, како и во уште 21 друга општина во вториот круг од локалните избори за градоначалник што се одржаа денеска, 2 ноември, во Северна Македонија.
Партискиот лидер и премиер, Христијан Мицкоски, на прес-конференција објави победа на владејачката партија и во: Карпош, Аеродром, Чучер Сандево, Брвеница, Валандово, Дојран, Крушево, Кочани, Лозово, Могила, Македонски Брод, Росоман, Ранковце, Неготино, Чешиново-Облешево, Виница, Дебарца, Конче, Демир Капија, Пробиштип и Кичево.
Мицкоски во обраќањето најмногу внимание посвети на победата во Кичево, каде нивниот кандидат Александар Јовановски го победи Фатмир Дехари од ДУИ, којашто на овие локални избори ја предводеше коалицијата НАИ.
„Таму соработувавме различни вери, различни припадности против оние кои ги влечеа народот надолу. Ова ја отвора вратата дека можеме да се обединиме, Македонци, Албанци, Турци, Роми, Срби, Власи, Бошњаци и останати. Муслимани и христијани, ВМРО-ДПМНЕ, СДСМ и другите околу вредностите и онаа политика што им е потребна на граѓаните. Победи соживотот и вербата во вредности. Ова е важен пример, колку можеме да постигнеме кога сме обединети. Победи идејата дека Македонија е дом за сите“, рече Мицкоски.
Претходно, владиниот партнер на ВМРО-ДПМНЕ, коалицијата ВРЕДИ (ВЛЕН) прогласи победа во четири општини. Тетово, Боговиње, Дебар, Долнени, како и Струга каде коалицијата ја поддржа независната кандидатура на бизнисменот Менди Ќура.
Опозицискиот СДСМ, пак, во вториот круг од изборите прогласи победа на неговите кандидати во Центар, Македонска Каменица и Зрновци.
По еден градоначалнички мандат во вториот круг освоија НАИ во Студеничани, ЗНАМ во Куманово и Унијата на Роми во Шуто Оризари.
СДСМ победи во Центар и во уште две општини, Филипче не поднесува оставка
Опозицискиот Социјалдемократски сојуз на Македонија (СДСМ) во вториот круг победи во три општини - во скопската општина Центар, во Македонска Каменица и во Зрновци, објави на прес-конференција претседателот на партијата, Венко Филипче.
Со тоа, СДСМ досега освои победа во вкупно шест општини, заедно со победата во првиот круг во Крива Паланка, Богданци и Кривогаштани.
Филипче рече дека се очекуваат конечни резултати од неколку општини каде разликата е мал број гласови и кажа дека согласно изборниот резултат на советничките листи, СДСМ е втора партија во земјата и прва во опозицискиот блок.
Тој обвини дека во изминатите две недели власта правела притисок на сите кандидати на СДСМ во 17 општини во кои партијата влезе во втор изборен круг и рече дека нема да поднесе оставка од лидерската позиција.
Согласно изборниот резултат на советничките листи, СДСМ е втора партија во земјата и прва во опозицискиот блок.
„Кажав и минатиот пат, јас сум претседател многу кратко, година и неколку месеци. Лани имавме една консолидација во партијата, но секако дека овие избори се дополнителен показател од кои ќе влечеме пораки и поуки во иднина. Процесот продолжува, сите да се бориме против оваа власт. Сметам дека тоа што власта изгуби 130-140.000 гласови за само година ипол е делумно и наша заслуга“, рече Филипче.
Тој најави дека СДСМ ќе одржи Конгрес на кој ќе се дискутира за изборниот резултат и ќе следат промени и во раководството на партијата.
Во првиот круг, СДСМ на советнички листи освои над 125.00 гласови.
ВРЕДИ прогласи победа во пет општини, меѓу нив и Тетово и Струга
Коалицијата ВРЕДИ (ВЛЕН) прогласи победа во пет во кои имаше кандидати во денешниот втор круг од локалните избори за градоначалници.
„До овој момент можам да потврдам убедлива победа во Тетово со над 5.000 гласови разлика. Убедлива победа во Боговиње со 1.400 гласови разлика. Убедлива победа во Дебар, Долнени, во Струга со над 1.500 гласа“, рече Башким Бакиу од ВРЕДИ.
Во Струга, ВРЕДИ немаше свој партиски кандидат, туку ја поддржа независната кандидатура на бизнисменот Менди Ќура.
Единствено каде коалицијата не прогласи победа, а имаше свој кандидат е во Брвеница. Таму кандидатот на ВРЕДИ, Хаким Рамадани губи од кандидатот на ВМРО-ДПМНЕ, Јовица Илиевски, со нешто повеќе од 100 гласа разлика на 99,96% обработени гласови, според податоците на ДИК.
„ВЛЕН со добиените општини е втора политичка сила во државата. Денеска конечно се заокружи промената кај Албанците. ВЛЕН постигна убедлива победа речиси во сите општини каде бевме во вториот круг“, рече Бакиу.
Тој го повика Али Ахмети, лидер на ДУИ која ја предводи коалицијата НАИ да поднесе оставка.
Ахмети, пак, на прес-конференција реагираше дека се правеле непринципиелни коалиции и тврдеше дека исходот од изборите не ја одразува волјата на граѓаните.
По првиот круг од локалните избори на 19 октомври, од ДУИ тврдеа дека на национално ниво нивната коалиција НАИ е победник во албанскиот блок бидејќи на советничките листи освоиле околу 20.000 гласа повеќе од оние на ВРЕДИ.
Мултимедија
Најпосетени
Што треба да знаете