Десет лица од кои за деветмина се проценува дека имаат повреди опасни по живот се хоспитализирани по нападот со нож во возот на линијата Донкастер-Лондон Кингс Крос на 1 ноември.
Полицијата добила повици од патници во возот околу 19:40 часот, кои ги известиле за инцидентот, јавува Би-Би-Си.
Околу 21:45 часот, градоначалникот на Кембриџшир објави дека две лица се уапсени и се во притвор. Полицијата на Кембриџшир подоцна го потврди ова.
Британската транспортна полиција вели дека офицерите од антитерористичката служба учествуваат во истрагата додека „работат на утврдување на сите околности и мотивот за нападот“.
„Во оваа фаза, нема ништо што укажува дека станува збор за терористички инцидент“, изјави за медиумите во неделата надзорникот Џон Лавлес од Британската транспортна полиција.
Двајцата мажи уапсени под сомнение за обид за убиство се 32-годишен црнец, британски државјанин, и 35-годишен британски државјанин од карипско потекло, изјави Лавлес. Двајцата се родени во Обединетото Кралство, додаде тој.
„Продолжуваме да работиме на утврдување на сите околности и мотивот за инцидентот“, рече Лавлес, додавајќи дека „не би било соодветно да се шпекулира за причината“.
Наоружани полициски службеници влегле во возот и ги уапсиле двајцата осомничени во рок од осум минути по првите повици на патниците на бројот 999, кои алармирале околу 19:42 часот.
Сведок за Би-Би-Си изјави дека виделе човек со крвава рака како трча по вагонот викајќи „имаат нож“. Според друг очевидец полицијата го застрелала човекот на перонот со електрошок.
Премиерот Кир Стармер рече дека „ужасниот инцидент“ е „длабоко загрижувачки“ и ги повика луѓето да ги следат советите на локалните власти.
Железничката компанија LNER соопшти дека станува збор за нивен воз и ги предупреди патниците дека линиите се блокирани.
