Втор круг локални избори за градоначалници во 33 општини
Во вкупно 33 општини, вклучително и Градот Скопје, денеска (2 ноември) се одржува вториот круг од локалните избори во кој треба да се изберат градоначалници за следниот четиригодишен мандат.
Гласачките места се отворија во 7 часот наутро, а ќе се затворат во 19 по што се очекува ДИК да почне со пребројување и објавување на гласовите.
Право на глас имаат 1 013 375 граѓани.
Втор круг се одржува онаму каде што ниту еден од кандидатите не освои 50% плус еден глас од вкупниот број гласови. На гласачките ливчиња се наоѓаат двајцата најдобропласирани од првиот круг. Целиот текст прочитајте го ТУКА
Во Скопје се гласа за градоначалник на градот, како и за градоначалници на 4 општини
Во вториот круг, право на глас за Градот Скопје имаат 474 304 избирачи регистрирани во избирачкиот список кои ќе гласаат на 685 гласачки места.
Треба да бидат избрани градоначалник на Градот Скопје и на четири од десетте градски општини – Аеродром, Карпош, Центар и Шуто Оризари.
Во првиот круг од локалните избори, што се одржа на 19 октомври, беа избрани градоначалници во шест скопски општини – Бутел, Гази Баба, Ѓорче Петров, Чаир, Сарај и Кисела Вода.
ДИК: Вчера без проблеми заврши гласањето на болните, немоќните и затворениците
Гласањето за болни и немоќни лица, затвореници и лица сместени во установи за вонсемејна грижа заврши непречено и без забелешки, соопшти вечерва Државната изборна комисија (ДИК).
До 20 часот своето право на глас го оствариле 3.327 од вкупно 4.826 болни и немоќни лица, 588 од 1.256 лица во 14 казнено-поправни установи, како и 125 од 214 лица во установи за вонсемејна грижа.