Вести
Тројца Украинци затворени во Полска за саботажа поврзана со Русија
Тројца Украинци се затворени во Полска поради припадност на банда обвинета за извршување и подготовка на „акти на саботажа и тероризам“ во Европа во име на Русија, соопштија обвинителите, јави агенцијата АФП.
Осудата за тројцата мажи е дел од поширока истрага, особено за пожарите во два трговски центри во Варшава и во продавница на ИКЕА во Вилнус, главниот град на соседна Литванија, минатата година.
Пожарот во Варшава во мај 2024 година беше „резултат на чин на саботажа, извршен од членови на организирана криминална група што дејствувала во име на разузнавачките агенции на руската Федерација“, пишува во соопштението.
Групата дејствувала во Полска, Литванија, Латвија, Украина и Русија, според обвинителите.
Тројцата мажи беа осудени на една година и четири месеци, 2,5 години и 5,5 години затвор на суд во Варшава.
Нивните дејствија се состоеле од „палење големи малопродажни центри лоцирани во земјите-членки на Европската Унија, со намера да предизвикаат сериозно заплашување на голем број луѓе и следствено, да влијаат врз јавното мислење“, рекоа обвинителите.
Пред неколку дена полските власти соопштија дека 55 лица осомничени дека дејствувале во име на Москва се приведени од почетокот на целосната инвазија на Русија врз Украина во февруари 2022 година.
Полска постојано ја обвинува Русија дека стои зад голем број акти и обиди за саботажа, вклучително и пожари низ целата земја и во главниот град.
Русија постојано ги отфрла овие тврдења.
Како одмазда, Полска воведе ограничувања за движењето на руските дипломати на нејзина територија и нареди затворање на два руски конзулати во западниот град Познањ и на југ во Краков.
Полска, членка на ЕУ и на НАТО, се граничи со Украина, како и со сојузникот на Кремљ, Белорусија, и руската енклава Калининград и е една од главните земји преку кои западните сили испорачуваат оружје и муниција во Киев.
види ги сите денешни вести
Бројот на жртви од пожарот во Тузла се искачи на 12
Полициската управа на кантонот Тузла во Босна и Херцеговина објави дека уште едно лице починало во тузланскиот Клинички центар, со што бројот на жртви во пожарот што избувна во Домот за стари лица на 4 ноември се искачи на 12.
Според прелиминарните резултати од досега спроведените обдукции, 11 лица починале поради задушување, односно труење со јаглерод моноксид.
„Телото на една жртва беше изгорено. Обдукцијата на жената што почина денес ќе биде извршена во блиска иднина“, посочија од Обвинителството на кантонот Тузла на 6 ноември.
Исто така, оттаму наведоа дека истрагата на лице место е завршена и оти во наредниот период ќе бидат доставени извештаи до Секторот за криминалистичка полиција на Министерството за внатрешни работи.
„Ќе ја информираме јавноста за причините за пожарот кога ќе бидат анализирани извештаите и наодите од мислењата на експертите и истражителите“, соопшти Обвинителството.
Универзитетскиот клинички центар (УКЦ) Тузла на 6 ноември објави дека во моментов таму се хоспитализирани 14 пациенти. Четири пациенти се на Клиниката за анестезиологија и реанимација, од кои двајца се на апарати за механичка вентилација.
Шест пациенти, кои биле сместени во Домот за стари лица во Тузла, пак, се хоспитализирани на Клиниката за белодробни заболувања.
„Сите пациенти имаат стабилни витални параметри. Во моментов има еден полицаец во амбулантата на оваа клиника, кој се јавил денес во текот на денот и е под надзор. Тројца пациенти се хоспитализирани на Клиниката за интерни болести, а здравствената состојба на пациентите во моментов е стабилна. Еден пациент е хоспитализиран на Клиниката за урологија и моменталната здравствена состојба му е стабилна“, соопшти УКЦ Тузла.
Во Федерацијата на Босна и Херцеговина и Брчко, 6 ноември беше прогласен за Ден на жалост поради жртвите од пожарот во домот. Во Тузла, пак, е прогласен четириднева жалост.
Ден на жалост прогласи и Црна Гора.
Директорот Домот за стари лица во Тузла, Мирсад Бакаловиќ, поднесе оставка на 5 ноември.
Оваа институција се самофинансира од приходите што ги генерира и, според изјавата на директорот за Н1 ТВ во јануари, не е корисник на пари од ниту еден буџет.
Градот Тузла е сопственик на зградата и го назначува раководството на домот, но институцијата не добива субвенции или пари од буџетот.
Федералниот премиер Нермин Никшиќ вети владина помош за згрижување на лицата кои престојувале во овој дом.
За четири дена шест жртви на македонските патишта
Првите четири дена од ноември, во сообраќајќи на патиштата низ Северна Македонија, загинале шест лица, а од почетокот на 2025 вкупниот број на жртви изнесува 115.
Оваа статистика ја објави Министерството за внатрешни работи (МВР) нарекувајќи ја „поразителна“ и побара од граѓаните да бидат внимателни и поодговорни учесници во сообраќајот.
„Апелираме до граѓаните: оставете го мобилниот телефон додека управувате со возилото, не возете со брзина поголема од дозволената, не седнувајте зад воланот доколку сте консумирале алкохол. Почитувајте ги сообраќајните правила и прописи не го ставајте во ризик вашиот и животот на вашите најмили, како и на останатите учесници во сообраќајот“, порачаа од МВР.
Посебен апел оттаму упатуваат и до родителите да не дозволуваат на децата да управуваат какво било возило без соодветна обука и дозвола.
Во текот на 2024 година во сообраќајќи во Северна Македонија животот го загубиле 142 лица.
Според статистиката на полицијата, најчестите причинители кои доведуваат до сообраќајни несреќи со фатални последици се непочитувањето на сообраќајните правила, односно користењето на мобилен телефон при возење, возењето со брзина поголема од дозволената, возењето под дејство на алкохол, итн.
Од МВР најавуваат дека ќе продолжат со засилени контроли на терен.
Ѓорѓиевски ја презеде функцијата од Арсовска, најави чистење на Скопје и брз ребаланс на буџетот
Новиот градоначалник на Скопје, Орце Ѓорѓиевски, од ВМРО-ДПМНЕ, на 6 ноември ја презеде функцијата од досегашната градоначалничка, Данела Арсовска.
Ѓорѓиевски на позицијата доаѓа откако во вториот круг од локалните избори на 2 ноември го победи противкандидатот од Левица, Амар Мециновиќ.
Претходно во текот на денот, тој го доби уверението за градоначалнички мандат откако Државната изборна комисија ги објави конечните резултати за најголемиот дел од општините и градовите каде се одржа втор круг од изборите.
По преземањето на функцијата, новиот градоначалник рече дека ќе го „врати достоинството на градот“ и оти меѓу првите чекори што ќе ги направи веднаш е да ги тргне рампите пред бараките каде се сместени административните простории на градските власти.
Ѓорѓиевски посочи дека вечерта, во 20:30 часот на 6 ноември, ќе ја започне најавената акција за чистење на Скопје во рок од 72 часа.
„Вечерва од 20:30 започнуваме со темелна активност за чистење на главниот град. Појдовната точна ќе ни биде пред паркингот на спортската сала 'Борис Трајковски' и во наредните 72 часа ќе дадеме се од себе да блесне градот Скопје како што ветив на моите сограѓани“, рече Ѓорѓиевски.
Скопје изминатиот период се соочи со комунален колапс. Контејнерите беа преполни, јавното претпријатие „Комунална хигиена“ не го чистеше ѓубрето, а Јавното обвинителство отвори истрага во рамки на која во притвор се поранешниот директор на претпријатието и еден од раководителите.
Чистењето на градот за 72 часа беше едно од најгласните ветувања на Ѓорѓиевски во текот на кампањата. Арсовска и дел од опозицијата, пак, ја обвинуваа партијата ВМРО-ДПМНЕ дека со нејзините членови во Управниот одбор на „Комунална хигиена“ намерно го кочат собирањето на ѓубрето во главниот град.
Покрај чистењето на Скопје, новиот градоначалник најави и брз ребаланс на градскиот буџет со цел да се обезбедат пари за почнување на нови проекти, но и за откочување на некои што се закочени повеќе години, како што е клучката кај Момин поток за решавање на сообраќајниот хаос во тој дел од градот, но и пуштање во функција на двата нови моста на реката Вардар - едниот во Карпош, другиот меѓу Аеродром и Гази Баба.
За средбата со Арсовска, со која си разменија низа обвинувања изминатиот период, Ѓорѓиевски рече дека била протоколарна.
„Нормално е во примопредавање да имаме една протоколарна средба“, рече новиот градоначалник на Скопје.
Арсовска, пак, се огласи на социјалните мрежи посакувајќи му среќа, а на скопјани им се заблагодари за поддршката.
„Ви благодарам на сите за континуираната поддршка, особено во мојата борба против организираниот криминал и корупцијата во градот, мисија во која ќе продолжам за да победи правдата, да понесе одговорност Висар Ганиу (ексградоначалник на Чаир) кој со својата организирана криминална банда до денес загрозува животи на илјадници наши сограѓани“, рече Арсовска.
Таа, пред четири години стана градоначалничка со поддршка токму од ВМРО-ДПМНЕ, но нивните патишта се разделија уште во првата година од мандатот со меѓусебни обвинувања за злоупотреби.
На овие локални избори, покрај во Скопје, ВМРО-ДПМНЕ освои градоначалнички места во уште во 54 општини.
Коалицијата ВРЕДИ во девет, плус Струга каде го поддржа независниот кандидат Менди Ќура.
СДСМ освои шест градоначалници, коалицијата НАИ предводена од ДУИ четири, а по еден освоија ЗНАМ и Унијата на Роми.
Во четири општини ќе има нови избори бидејќи не беше исполнет цензусот на гласање да излезат една третина од гласачите.
Полска планира воена обука на 400.000 луѓе до 2026
Полска месецов започнува нова програма за воена обука како дел од нејзиниот поширок план за обука на околу 400.000 луѓе до 2026 година, соопшти полското Министерство за одбрана.
Поттикната од руската инвазија на Украина, Полска троши најголем дел од својот буџет за одбрана меѓу членките на НАТО. Таа стана трета најголема армија во Алијансата, со 216.000 војници, и планира да го зголеми бројот за речиси една третина во текот на следната деценија, пишува Ројтерс.
Министерот за одбрана Владислав Косињак-Камиш ја опиша програмата, наречена „Подготвеност“, како „најголемата воена обука во историјата на Полска“.
Програмата ќе биде доброволна и отворена за сите граѓани – од студенти и вработени до компании и пензионери.
Таа вклучува основни курсеви за безбедност, обука за преживување, медицинско образование и часови за сајбер хигиена.
„Само во ноември и декември ќе обучиме околу 20.000 луѓе преку индивидуална обука, но вкупниот број, вклучувајќи ги сите форми на обука, е околу 100.000 луѓе“, изјави за новинарите заменик-министерот за одбрана Чезари Томчик.
Министерството планира следната година да обучи околу 400.000 луѓе „индивидуално и во групи, како дел од програмата ’Образование со армијата‘“, преку обука на резервисти и доброволна воена служба, рече Томчик.
Началникот на Генералштабот, Вислав Кукула, изјави дека програмата има две основни цели – зајакнување на отпорноста на граѓаните и заедниците и зголемување на достапноста, подготвеноста и капацитетот на воените резервисти.
Програмата првпат ја најави премиерот Доналд Туск во март велејќи дека целта е „изградба на армија од резервисти“ поради зголемените безбедносни грижи по руската инвазија на Украина.
Украина и Русија разменија воздушни напади врз клучна инфраструктура
Руските воздушни напади повторно ја таргетираа цивилната инфраструктура на Украина преку ноќ, откако Киев возврати, погодувајќи рафинерија за нафта во рускиот Волгоград и енергетски објекти во окупираната од Русија, Украина.
Украинските воени претставници на 6 ноември соопштија дека нападот што зафати дел од рафинеријата во Волгоград во пламен бил дел од бран од 75 беспилотни летала лансирани кон Русија.
Руските претставници изјавија дека едно лице загинало во областа Красноармејск, во градот порано познат како Сталинград. Во областа се наоѓа голема рафинерија во Волгоград која постојано е цел на Украина.
Украинските сили, исто така, ги таргетираа енергетските и индустриските објекти во Русија, погодувајќи ја електраната на државниот округ во регионот Кострома и рафинеријата за нафта во Волгоград.
Електраната Кострома, која се наоѓа во Волгореченск, е трета по големина термоелектрана во Русија. Гувернерот на регионот, Сергеј Ситников, потврди дека имало „неколку експлозии“ во градот.
Регионалниот гувернер Александар Богомаз изјави дека украински беспилотни летала го погодиле и рускиот Брјанск, при што биле повредени најмалку едно лице.
Руското Министерство за одбрана тврди дека неговите воздушни одбранбени сили уништиле 261 украински беспилотни летала над руска територија преку ноќ.
Портпаролот на руската Федерална агенција за воздушен транспорт, Артјом Коренјако, изјави дека неколку аеродроми во Владикавказ, Грозни, Иваново, Јарослав, Саратов и Волгоград привремено го ограничиле воздушниот сообраќај „за да се обезбеди безбедност на летовите“.
Украина ги засили нападите врз клучни објекти како што се рафинерии за нафта, складишта за гас и други логистички инсталации, обидувајќи се да ја забави руската воена машинерија.
Киев бара од САД оружје со долг дострел, како што се ракетите Томахавк, за кои вели дека се клучни за возврат на ударите од Русија, додека Кремљ ги интензивира воздушните напади врз украинските градови.
Руски напади на Украина
И Русија продолжи со нападите врз украинската инфраструктура, а регионалниот гувернер на Дњепропетровск, Владислав Хајваненко, изјави дека руски беспилотни летала го погодиле градот Камјанск, при што биле повредени осум лица.
Нападот предизвика повеќе пожари низ градот и делумно ги уништи покривот и таванот на четирикатна станбена зграда.
„Имаше голема паника. Немав поим што да правам следно“, изјави Валентина, жителка на Камјанске, за украинскиот сервис на Радио Слободна Европа.
„Го гледам мојот стан. Изгледа како да е скршен прозорец таму, но никој не знае како изгледа внатре. Забрането ни е да одиме таму,“ вели Ина, жителка на Камјанске.
Хајваненко рече дека беспилотни летала ја погодиле и заедницата Петропавливка во округот Синелник, предизвикувајќи пожар во „општинско претпријатие“.
Во регионот Харкив, руските напади повредиле шест лица, вклучувајќи и 10-годишно девојче во градот Боходухив во текот на изминатите 24 часа, соопшти регионалниот гувернер Олех Синехубов.
Украинските воздухопловни сили објавија дека Русија лансирала 135 беспилотни летала преку ноќ од пет насоки, вклучувајќи околу 50 беспилотни летала од типот Шахед.
Новата стратегија за образование до крајот на годината
Остануваат уште неколку чекори до усвојувањето на конечната Стратегија за образование 2026-2032, која пет месеци е во процес на креирање, соопшти министерката за образование и наука Весна Јаневска на втората работилница за изработка на новиот документ, на која учествуваа претставници од институции и од домашни и меѓународни партнерски организации – УНИЦЕФ, ГИЗ, УНДП и Светска банка.
Стратегијата за насоката на македонското образование во наредните шест години, посочи Јаневска, треба да ја засили поддршката за наставниците и да го поттикне развојот на нивните компетенции за современа настава според глобалните образовни трендови и стандарди.
Се очекува таа да донесе подобар квалитет во високото и во средното стручно образование, поголема инклузивност, едносменска настава, дигиталната писменост, грижа за менталното и физичкото здравје на младите итн.
„Владата останува фокусирана на сите промени што мора да се случат до конечната цел, затоа што алтернатива за нас не постои“, рече министерката Јаневска во своето обраќање.
Во изминатите месеци откако е почнато креирањето на стратегијата слушала, како што рече, сугестии, предлози и решенија на актуелни предизвици. Укажа и дека по усвојувањето на документот „ќе следува потешкиот дел -почитување на пишаното, односно имплементација и мерење на постигнувањата“.
„За нешто попуштав, некаде не отстапував од личните убедувања и визијата што ја имав кога почнав да раководам со ресорот. Останува конечно да ја привршиме стратегијата, да ја донесеме до крајот на годината и од следната година да почнеме со забрзана, тешка работа за која резултатте треба да ги очекуваме на среден рок“, изјави Јаневска.
Претставничката на УНИЦЕФ во земјава, Лесли Милер, посочи дека новата стратегија е можност да се обликува она што е следно, „но не само како еден убав документ, туку и во училниците, заедниците и во животот на децата“.
За директорот на Германското друштво за интернационална соработка (ГИЗ) Давид Оберхубер е многу важно стратегијата што ќе се усвои да биде применета и да не заврши во фиока.
Бојана Нацева, претставничката на Светска банка, исто така укажа на потребата да се одговори на барањата на новото време и да се креираат продуктивни работни места за кои се смета дека најмногу ќе доведат до намалување на сиромаштијата и ќе го зголемат просперитетот на луѓето.
Образовниот систем во земјата е тема на чести јавни критики. Неколку министри за образование и во минатото воведуваа реформи за подобрување на квалитетот на образованието, но меѓународните релевантни тестирања во последните неколку години покажуваат пад на квалитетот на образовниот процес и слаби резултати на учениците.
Мицкоски за Извештајот на ЕК: Да ги донесеме уставните измени за петка и повторно ново вето
Да ги направиме уставните измени, најдобри ќе бидеме и потоа да добиеме ново вето и повторно нови проблеми и тогаш сигурно ќе добиеме петка и ќе бидеме шампиони. Вака премиерот Христијан Мицкоски го коментираше најновиот извештај на ЕК за напредокот на Северна Македонија, во кој комисијата повика на усвојување на уставните измени за вклучување на Бугарите во Уставот.
Во извештајот меѓудругото се потенцира дека иако „властите продолжија да работат на патоказите за владеење на правото, реформата на јавната администрација и функционирањето на демократските институции, како и на акцискиот план за заштита на малцинствата, Северна Македонија треба да ги интензивира напорите за почитување на владеењето на правото, особено преку заштита на независноста и интегритетот на судството и засилување на борбата против корупцијата“.
Премиерот вели дека е задоволен од содржината на извештајот, иако потенцираше дека има стагнација во некои области.
„Од она кое што е таму напишано јас сум исклучително задоволен, бидејќи нема назадување. И тоа е владеењето на правото, борбата против криминалот и корупцијата и затоа нон стоп зборувам дека се потребни промени во Судскиот совет, во Обвинителството итн. Сега веќе по завршувањето на изборите многу посериозно ќе се занимаваме со таа тема, додека, пак, во сите други области има одреден мал напредок или значлителен напредок“.
Мицкоски додаде дека не се согласува со констатацијата дека има некои други земји кои што се пред нас.
„На пример ние сме многу пред Албанија. Иако некои од еврокомесарите даваат такви изјави какви што даваа така што кога ќе се анализира состојбата на државите кој е подготвен, кој не е подготвен, објективна оценка е дека Црна Гора е прва, второто место сме ние и Србија, па потоа доаѓаат Албанија, БиХ, Косово, итн од земјите во регионот“, рече Мицкоски.
Премиерот потенцираше дека Владата ќе продолжи да работи и дека тој е фокусиран на спроведување на реформите.
„Јас апсолутно сум фокусиран на реформите. Оваа Влада е реформска и во таа насока ќе продолжи. Ме охрабруваат пораките за реформите во делот на економијата, во делот на борбата против перењето пари, воведувањето на заедничкиот платежен систем односно СЕПА, Царината, деловите како што се бесплатен роаминг што ќе се имплементираат“, рече премиерот.
Мицкоски попладнево во Владата ќе го прими Извештајот од евроамбасадорот Михалис Рокас, а потоа е предвидена заедничка прес-конференција.
ЕК и ЕП не постигнаа договор за следната буџетска рамка на Европската Унија
Без договор заврши средбата меѓу претставници на Европската комисија и Европскиот парламент посветена на усогласување на ставовите околу Повеќегодишната финансиска рамка на ЕУ за периодот 2028-2034 година, вредна 2.000 милијарди евра.
Главната забелешка на европратениците се однесува на предлогот на Комисијата за спојување на фондовите за субвенционирање на регионалниот развој и земјоделството во единствени „национални и регионални планови за партнерство“ во вредност од 865 милијарди евра.
Средбата се одржи откако минатата недела пратеничките групи на Европската народна партија (ЕПП), Прогресивната алијанса на социјалистите и демократите (СД), либералната Да ја обновиме Европа (РЕ) и Зелените со заедничко писмо се заканија дека ќе ги блокираат преговорите за следната буџетска рамка, доколку во неа не бидат извршат значајни промени.
„Европскиот парламент не може да го прифати ваквиот предлог како основа за започнување преговори“, беше наведено во писмото на четирите групи упатено до претседателката на Европската комисија, Урсула фон дер Лајен, во кое тие поставија рок бараните измени да бидат извршени најдоцна до 12 ноември, кога Предлог-финансиската рамка треба да се најде на дебата во Европскиот парламент.
Дополнително, свое писмо со забелешки и барања за измени на Предлог-буџетската рамка до Еврокомисијата упати и групата Европски конзервативци и реформисти (ЕЦР).
По синоќешната средба (5 ноември), на која присуствуваа лидерите на пратеничките групи во ЕП и главните парламентарни преговарачи за буџетот, еврокомесарот за буџет Пјотр Серафин рече дека Европската комисија ќе разгледа некои „законски измени за да се одговори на загриженоста на пратениците“, но не прецизира дали тоа значи и дека е подготвена да прифати измени во предложениот буџет.
Од друга страна, претставници на ЕП изјавија дека „има напредок“ и дека би можело да биде постигнат некаков договор до следната недела.
Главниот преговарач на ЕП за буџетот, европратеникот од редовите на ЕПП, Зигфрид Мурешан изјави дека од ЕК добиле „изјави за намери“ да се приспособи предлогот на барањата на Парламентот, но дека тоа сепак не е доволно.
Со цел да се излезе од ќорсокакот Данското претседателство со ЕУ, според дипломатски извори, подготвува предлог со кој се предвидува за „најчувствителните прашања“ од буџетот да се преговара на највисоко политичко ниво меѓу трите главни институции на блокот - Советот, ЕК и ЕП, додека за останатите прашања решение да се најде преку преговори на техничко ниво.
Се очекува ваквиот предлог да се најде на следното заседание на Комитетот на постојаните претставници на владите на земјите членки на ЕУ (Корепер).
ДИК ги објави конечните резулати за градоначалници во 29 општини и Град Скопје
Државната изборна комисија (ДИК) на денешната 155 седница ги објави официјалните резултати од вториот круг на Локалните избори 2025 за избор на градоначалник во 29 општини и град Скопје, додека за три општини - Брвеница, Карпош и Шуто Оризари има приговори.
„Во врска со овие приговори Државната изборна комисија ја известува јавноста дека ќе постапува на јавна седница во законскиот рок денеска со почеток во 14 часот“, рече претседателот на ДИК, Борис Кондарко.
Тој додаде дека до ДИК има поднесено и три приговори за гласањето за избор на членови на Советот во Општина Шуто Оризари, каде што имаше прегласување спроведено на 2 ноември 2025 година и тоа на трите избирачки места.
„Поради тоа објавувањето на конечните резултати од гласањето за Советот на Општина Шуто Оризари нема да бидат објавени денеска, ќе се чека по постапувањето на приговорите на седницата на Државната изборна комисија, а потоа и по одлучување на евентуални тужби пред Управниот суд“, рече Кондарко.
Локалните избори се одржаа на 19 октомври и 2 ноември. Според резултатите од двата круга на локалните избори, Коалицијата предводена од ВМРО-ДПМНЕ победи во 54 општини и Град Скопје.
Втора по бројот на освоени градоначалнички места е коалицијата ВРЕДИ со девет. Коалицијата на СДСМ ќе има шест градоначалници, НАИ 4, а Движење ЗНАМ и Унијата на Ромите, по еден градоначалник.
Две општини ќе ги водат независни кандидати.
Полска преговара за зголемување на увозот на американски природен гас
Полска преговара за зголемување на увозот на природен гас од Содинетите Држави за снабдување на Украина и Словачка, што дополнително би ги зајакнало врските на Европската Унија со американските производители на енергија, изјавија два извори запознаени со преговорите.
„Соработуваме со нашите партнери - Американците, Словаците, Украинците - за можноста за увоз на американски гас со цел да се зголеми енергетската безбедност на нашиот регион“, наведе за Ројтерс, Министерството за енергетика на Полска.
Се очекува официјалните лица да објават заедничка декларација за зголемување на увозот откако вклучените страни ќе се сретнат на трансатлантската конференција за енергија во Атина подоцна оваа недела.
„После тоа, ќе има разговори за условите за испорака до Словачка“, изјави изворот за Ројтерс.
Потенцијалните количини што ќе се испорачуваат на југ преку Полска би можеле да достигнат и до четири до пет милијарди кубни метри гас годишно, приближно еквивалентно на годишната потрошувачка на гас во Словачка, рекоа изворите.
Се очекува ова да биде најновиот во серијата енергетски договори постигнати меѓу европските и американските владини претставници и компании по притисокот од Вашингтон за зголемување на извозот на американски гас и нуклеарна технологија.
Во октомври, Европската Унија презентираше нови планови за прекин на снабдувањето со руска нафта и гас, со нов пакет санкции со кои се забранува увозот на руски течен природен гас (ЛНГ) до 2027 година.
Некои членки на ЕУ сè уште купуваат руска енергија, а во исто време ја поддржуваат Украина во војната. Словачка и Унгарија се обидуваат да балансираат помеѓу статусот на сојузници на Вашингтон и увозот на руска енергија, што предизвика критики од американскиот претседател Доналд Трамп.
Во септември, американскиот министер за енергетика Крис Рајт им испрати на европските министри „многу силна порака за сигурноста на САД како енергетски партнер и интересот на Америка за поголема соработка со Европа“.
Истиот месец, американскиот министер за внатрешни работи Даг Бургум се сретна со италијанскиот министер за енергетика и вети дека ќе ги продлабочи врските со зголемување на продажбата на американски природен гас. Наскоро италијанската компанија Едисон потпиша 15-годишен договор за снабдување со природен гас.
Потоа Рајт се сретна со полски и словачки претставници во Виена. На 7 октомври, Словачка потпиша договор со САД за нова нуклеарна централа.
Потрошувачката на природен гас во ЕУ достигна историски нивоа оваа година, при што САД моментално обезбедуваат околу 55 проценти од европската потрошувачка, во споредба со 27 проценти во 2021 година.
Како што објави Ројтерс, целосната замена на увозот на руски гас со американски течен природен гас (LNG) би го зголемила тој удел на повеќе од 80 проценти.
Мултимедија
Најпосетени
Што треба да знаете