Вести
ЕУ очекува брза потврда на резултатите и пренос на власта по изборите на Косово
Европската унија го поздрави мирниот изборен процес на Косово и фактот што првиот круг од локалните избори на 12 октомври беше конкурентен со учество на сите заедници.
„За општините каде што градоначалниците беа избрани во првиот круг, повикуваме на брза сертификација и спроведување на резултатите од изборите преку уредна транзиција на локалната власт. За останатите општини, каде што ќе се одржи втор круг избори за градоначалник, повикуваме на слично мирно, конкурентно и инклузивно спроведување на 9 ноември“, изјави за Радио Слободна Европа портпаролката на ЕУ, Анита Хипер.
Од ЕУ напоменуваат дека во моментов на Косово престојува нивна мисија на експерти на покана од претседателката Вјоса Османи, која го набљудува изборниот процес и која на крајот ќе даде оцена за истиот.
„Извештајот на Мисијата на ЕУ за набљудување на изборите (EOM) на Косово од мај 2025 година истакна неколку случаи на мешање за време на општите избори одржани во февруари 2025 година. Очекуваме сите страни да се воздржат од такви постапки за време на изборниот период“, посочи Хипер.
Претседателката на Косово, Вјоса Османи, и вршителот на должност премиер, Албин Курти, ја обвинија Србија дека се меша во изборниот процес на Косово преку „подмитување“ на српската заедница да гласа за Српската листа, и упатија повик до ЕУ да реагира.
Официјален Белград ги негираше овие обвинувања.
ЕУ не одговори конкретно на прашањето на Радио Слободна Европа дали има сознанија дека Србија се меша во изборниот процес на Косово.
Сепак, набљудувачката мисија на ЕУ за парламентарните избори во февруари констатирала дека руските државни медиуми RT Балкан и Спутник Србија, поддржани од Кремљ, објавиле десетици содржини за изборите на Косово за време на предизборната кампања со „манипулативна содржина“ насочена кон српската заедница.
На изборите на 12 октомври гласале 39,58 отсто од над два милиони граѓани со право на глас.
Според податоците на Централната изборна комисија, на локалните избори во неделата во 21 општина е избран градоначалник во првиот круг, додека во останатите 17, вклучувајќи ја и Приштина, ќе се одржи втор круг.
Од општините со српско мнозинство, само во Клокот ќе има втор круг, додека во останатите девет победи Српската листа – најголемата партија на косовските Срби која ја има поддршката од Белград.
види ги сите денешни вести
За 44 општини изборите завршија во првиот круг
Првиот круг од локалните избори заврши за 44 четири општини во кои кандидатите ги освоија потребното мнозинство за победа. Според првичните неофицијални резултати во најголем дел од нив победија кандидатите на владејачката ВМРО-ДПМНЕ.
Според обработени 99,94 отсто од гласовите на избирачите на 3472 од вкупно 3474 избирачки места, ВМРО-ДПМНЕ ќе има градоначалници во 32 општини избрани уште во првиот круг.
Кандидатите на ВМРО-ДПМНЕ и коалицијата во првиот круг имаат градоначалници во: Берово, Битола, Босилово, Бутел, Василево, Вевчани, Велес, Гази Баба, Гевгелија, Ѓорче Петров, Градско, Делчево, Демир Хисар, Зелениково, Илинден, Јегуновце, Кавадарци, Карбинци, Кисела Вода, Кратово, Новаци, Ново Село, Охрид, Петровец, Пехчево, Прилеп, Радовиш, Ресен, Свети Николе, Сопиште, Струмица и Штип.
Специфична е ситуацијата во општината Старо Нагоричане бидејќи таму кандидатот на ВМРО-ДПМНЕ е на границата со 50 отсто освоени гласови.
Обработените податоци покажуваат дека во првиот круг Социјалдемократскиот сојуз на Македонија (СДСМ) победил во три општини Крива Паланка, Богданци и Кривогаштани, коалицијата ВЛЕН во пет- Арачиново, Желино, Сарај, Чаир и Теарце.
Коалицијата „Национална алијанса за интеграција“ (НАИ) предводена од ДУИ ќе има градоначалници во шетири општини-Гостивар, Липково, Пласница и општина Чашка.
Изборте се неуспешни во три општини – Центар Жупа, Врапчиште и Маврово Ростуше, бидејќи таму не излегоа најмалку една третина од бројот на запишаните избирачи иво Избирачкиот список.
Зеленски е „подготвен“ да се сретне со Трамп и Путин во Будимпешта на мировни преговори
Украинскиот претседател Володимир Зеленски изјави дека е подготвен да седне на преговарачка маса во Будимпешта за да се постигне мир, нагласувајќи дека се сомнева во подготвеноста на рускиот претседател Владимир Путин да ја заврши војната во Украина, која започна пред повеќе од три години.
„Не сум сигурен дека Путин е сè уште подготвен да ја заврши оваа војна. Мислам дека можеби ќе сака да се врати со агресија“, рече Зеленски во интервју за Ен-Би-Си (NBC) емитувано на 19 октомври.
Зеленски верува дека Путин ги одложува вистинските мировни преговори и ја избегнува средбата затоа што тоа би подразбирало конкретни договори и можни отстапки за завршување на војната.
Тој, исто така, повика на дополнителен притисок врз рускиот лидер, велејќи дека Путин „се плаши од санкции“ и мерки што би можеле дополнително да ја притиснат руската економија.
Овие изјави следеа откако американскиот претседател Доналд Трамп го угости Зеленски во Вашингтон на 17 октомври на разговори за идните мировни преговори.
На овој, трет состанок во Белата куќа оваа година, Зеленски планира да разговара за можен договор според кој Украина би им понудила на САД технологија за беспилотни летала во замена за ракети со долг дострел Томахавк.
Сепак, Трамп изрази резерви во врска со идејата за испорака на ова оружје во Украина и ги повика Русија и Украина веднаш да престанат со борбите, велејќи дека „доволно крв е пролеана“.
Зеленски рече дека прашањето за „Томахавк“ е многу чувствително за Русите и дека Путин „се плаши дека САД би можеле да го испорачаат ова оружје во Украина“, бидејќи тоа би му дозволило на Киев да погоди стратешки воени цели и инфраструктура во Русија.
Трамп, исто така, објави дека планира да се сретне со рускиот претседател Владимир Путин во Будимпешта во наредните недели.
Во интервју за NBC, Зеленски ја повтори својата подготвеност да учествува во мировните преговори, со учество на САД и Русија.
Тој додаде дека прекинот на огнот би бил предуслов за почеток на преговорите.
„Ако сакаме да ја запреме оваа војна и да започнеме мировни преговори, мора да останеме таму каде што сме и да не му даваме на Путин ништо дополнително само затоа што тој го бара тоа“, рече тој.
Што е следно додека преговарачите го разгледуваат самитот во Будимпешта?
„Вашингтон пост“ на 18 октомври објави дека за време на телефонскиот разговор со Трамп на 16 октомври, Путин побарал Украина да се откаже од целосна контрола врз регионот Донецк - стратешки важен дел од источна Украина кој е делумно под руска окупација - како услов за завршување на војната.
Во коментарите доцна на 19 октомври, Трамп рече дека регионот треба „да остане поделен каков што е сега“, при што Русија контролира околу 78 проценти од територијата на Донецк.
„Тие треба да престанат таму каде што се. Нека двете страни прогласат победа - историјата ќе одлучи“, напиша Трамп на социјалните медиуми на 17 октомври.
Тој ги повтори тие коментари на 19 октомври, велејќи:
„Оставете како што е сега. Тие можат да преговараат подоцна“.
Според „Фајненшл тајмс“ од 19 октомври, повикувајќи се на извори запознаени со ситуацијата, Трамп му рекол на Зеленски за време на состанокот во Белата куќа да ги прифати условите на Русија за завршување на војната, вклучително и предавањето на регионот Донецк.
Сепак, во изјава за новинарите на 19 октомври, Трамп негираше дека разговарал за предавање на Донецк од Украина на Русија.
Трамп го предупредил Зеленски дека Путин му се заканил дека ќе ја „уништи“ Украина ако не ги прифати неговите услови.
На прашањето во интервју за Fox News дали Путин ќе прифати мировен договор без да земе големи делови од украинската територија, Трамп рече:
„Мислам, тие се бореа и ах, тој Путин има многу украинска територија. Мислам, знаете тој освои одредени територии“, рече Трамп во интервју кое беше емитувано на 19 октомври, но беше снимено пред неговата средба со Зеленски и телефонскиот разговор со Путин.
Се очекуваат територијални отстапки како дел од евентуалниот мировен договор за Украина, но не е сигурно што би можел да прифати Путин - или што би можел законски да понуди Киев. Уставот на Украина бара национален референдум за одобрување на каква било промена на територијата, а такво гласање не може да се одржи во рамките на вонредната состојба што е во сила од руската инвазија во 2022 година.
Зеленски отпатува во Вашингтон првенствено поради можноста Украина да добие ракети „Томахавк“, кои можат да погодат цели на растојание до 2500 километри.
Трамп со недели размислуваше за испраќање ракети „Томахавк“ во Киев, бидејќи стануваше сè пофрустриран од одбивањето на Путин да преговара за крај на војната, но по разговорите со рускиот претседател, се чини дека се откажал од можноста - барем засега.
Зеленски рече дека прашањето за ракетите „Томахавк“ е „многу чувствително за Русите“ и дека Путин „се плаши дека Соединетите Држави ќе испорачаат ракети на Украина“ затоа што тоа би му овозможило на Киев да таргетира стратешки воени локации и инфраструктура, што би можело да ги ослабне воените напори на Русија.
„Добро е што претседателот Трамп не рече „не“, но засега не рече ниту „да“, изјави Зеленски.
Пред евентуалниот самит во Будимпешта, американските и руските претставници наводно планираат повеќе средби на ниско ниво отколку што имаше во пресрет на средбата на Трамп и Путин во Алјаска во август.
Обвинителство и МВР: Изборен ден без инциденти
Обвинителството и Министерството за внатрешни работи вечерва, по затворањето на гласачките места соопштија дека изборниот ден поминал во мирна атмиосфера, без ниту еден инциеент, но со изолирани случаи на пријави за обиди за поткуп или фотографирање и уништуивање на гласачко ливче.
Бројот на информации кои упатуваат на сомненија за сторени кривични дела е мал во целата држава, соопшти Јавното обвинителство на Северна Македонија откако јавни обвинители во текот на целиот цел го следеа изборниот процес во рамки на локалните избори.
„Станува збор за изолирани настани, а обвинителствата даваат приоритет на нивно итно расчистување“, изјави обвинителот Џељаљ Бајрами, кој е претседател на привремената Комисија на Јавното обвинителство за следење на постапувањето по евентуални кривични дела поврзани со изборите.
Тој информираше за поединечни случаи по кои постапуваат обвинителствата низ градовите.
Во Велес се испитува наводен поткуп при избори и гласање од страна на две лица. Сличен предмет има и во Крива Паланка и во Крушево.
„ОЈО Скопје е известено од МВР за две задржани лица на гласачко место во Општина Чаир кои одбивале да се легитимираат, како и за 2 фотографирања на гласачко ливче во Гази Баба што во суштина е прекршок. ОЈО Охрид постапува за настан во Охрид, каде три лица во возило, по оперативни сознанија на МВР биле запрени и во возилото биле пронајдени банкноти од по 2.000 денари и наводни списоци на гласачи. По наредба на јавен обвинител се испитуваат сите околности на случаите“, рече Бајрами.
Во Штип и Кочани, исто така се постапува по индиции за потпкуп, но и за притисок врз гласачи.
„ОЈО Тетово и ОЈО Кичево, по објавени информации на медиуми оформија предмети по допрен глас и испитуваат евентуални прекршувања на изборниот молк во Кичево и во Желино. Исто така, ОЈО Кичево постапува и по информација за нерегуларности при гласањето на едно болно и изнемоштено лице во Македонски Брод“, посочи обвинителот.
Ова беа „едни од најмирните и најбезбедните избори во државата“, изјави министерот за внатрешни работи Панче Тошковски по завршувањето на гласањето на локалните избори.
Тој информираше дека на 84 гласачки места имало задоцнување во стартот на гласањето од максимум 2 часа. Регистрирани се 28 прекини на гласањето од 15 до 30 минути, заради технички проблеми со уредите за идентификација, а најмногу биле во Тетово и Охрид.
Пријавени биле 91 настан , од кои најголем дел за агитирање и можен поткуп, а дел на фотографирање на гласачкото ливче, лепење плакати и упатени закани.
За 42 од пријавените случаи постапките се завршени, а во најголем дел наодите не се потврдени. Лишени од слобода се 11 лица, главно заради сомневања за поткуп, фотографирање или уништување на гласачко ливче, од кои четворица се ослободени, а седум се задржани за понатамошна постапка. Пријавени се и седум настани во кои наводно биле инволвирани полицајци, од кои само за еден се преземаат мерки за расчистување.
Секторот за компјутерски криминал регистрирал 19 објави на социјални мрежи коисе предмет на натамошна проверка.
Според првиот човек на МВР, Тошковски, сите податоци потврдуваат дека изборниот процес поминал во мирна и демократска атмосфера без ниту еден инцидент.
Денешните локални избори се осми по ред од осамостојувањето на државата. Во текот на ноќта се очекуваат и првичните резултати.
ДИК- До 18.30 часот излезност од 46,65 отсто, во три општини повторени избори
Одзивот на гласачи до 18.30 часот изнесува 46,65 проценти соопшти Државната изборна комисија (ДИК) на прес-конференцијата половина час по затворањето на гласачките места. Овој процент е добиен од обработени 94,62 отсто од избирачките места на кои гласале 827.020 граѓани, од вкупно запишани 1.780.168 избирачи, соопшти претседателот на Државната изборна комисија, Борис Кондарко.
„Во споредба на локалните избори во 2021 година, вкупниот одзив изнесувал 49,98%“, додаде Кондарко. Конечната бројка за излезност во првиот круг од локалните избори тој најави дека ќе биде соопштена на последната прес-конференицја вечерва околу полноќ.
Во градот Скопје вкупната излезеност до 18. 30 часот изнесувала 46,64 %.
Најголема излезност е регистрирана во општината Чашка од 71,63%, потоа во Могила 69, 04% во Вевчани со 69,78, а над 65 отсто гласачи имало и во Демир Капија и Конче.
Претседателот на ДИК, Кондарко кажа и дека во општините Центар Жупа излезноста била 21 отсто, во Маврово и Ростуше 28,58 % и во Врапчиште 24,42%, што знали дека имало помалку од една третина излезност од вкупниот број на запишани гласачи. ДИК појаснува дека за избран кандидат во првиот круг за градоначалник се смета оној кој добил мнозинство од гласовите од граѓаните кои излегле да гласаат, а тие треба да се најмалку една третина од запишаните гласачи.
Тоа значи дека во овие три општини за две недели ќе има повторено гласање во прв круг од изборите.
Изборите се одбивале законито гласање и без проблеми. До 19 часот нема пристигнато приговори за евентуални неправилности.
После полноќ Државната изборна комисија најави дека ќе ги објави првичните неофицијални резултати од гласањето во првиот круг од локалните избори на кои се гласаше за градоначалници и треба да бидат избрани совети на 80 општини и на Градот Скопје.
ДИК: До 17 часот правото на глас го оствариле 39,61 отсто од гласачите
Одзивот на гласачи до 17 часот изнесува 39,61 процент соопшти Државната изборна комисија (ДИК) на попладневната прес-конференција. Податоците се добиени од 3221 избирачки места каде што гласале 1.699 296 гласачи од запишаните во избирачкиот список.
Од ДИК велат дека изборниот процес се одвива непречено и без проблеми. До овој момент нема пристигнато приговори за евентуални неправилности.
Најголема излезност е регистрирана во општините Вевчани- 61,84, Дебарца- 53,41, Демир Капија- 57,65, Дојран-60, 91 отсто.
Најмал оздив има во општините Шуто Оризари- 30,38, Радовиш-31,57, Маврово Ростуше- 32,87, Врапчиште- 20, 94 проценти.
Од скопските општини најголема излезност е регистрирана во Сарај- 47,94 отсто , а најмала во Шуто Оризари-30,38 проценти.
Во споредба со локалните избори пред 4 години, одзивот на гласачи до 17 часот е помал. Во 2021 година до 17 часот имало излезност од 41,38 отсто.
Пакистан и Авганистан договорија моментален прекин на огнот
Пакистан и Авганистан се согласија на моментален прекин на огнот за време на преговорите одржани во Доха, со посредство на Катар и Турција, објави Министерството за надворешни работи на Катар на 19 октомври.
„За време на преговорите, беше договорено моментален прекин на огнот и воспоставување механизми што ќе го зајакнат трајниот мир и стабилност меѓу двете земји“, се вели во соопштението.
Преговорите меѓу Авганистан и Пакистан започнаа на 18 октомври во главниот град на Катар, Доха, по граничните судири и напади што предизвикаа страв од можно избувнување на отворена војна меѓу двете земји.
Портпаролот на владата предводена од Талибанците, Забихулах Муџахид, претходно објави дека преговорите се започнати и дека авганистанскиот премиер Хасан Акхунд разговарал со малезискиот премиер Анвар Ибрахим.
Според Муџахид, пакистанскиот премиер Шехбаз Шариф разговарал и со Ибрахим, кој очигледно одиграл посредничка улога и ја нагласил потребата од дипломатско решавање на проблемот.
Министерството за надворешни работи на Пакистан објави дека разговорите имале за цел „да се стави крај на прекуграничниот тероризам што произлегува од Авганистан и да се врати мирот и стабилноста по должината на пакистанско-авганистанската граница“.
Пакистан ги повика талибанските власти во Авганистан да ги исполнат своите обврски кон Меѓународната заедница и да преземат „мерки против терористичките организации“.
Неодамнешните судири меѓу Пакистан и Авганистан се најжестоките откако Талибанците ја презедоа власта во Кабул во 2021 година.
Борбите меѓу поранешните сојузници избувнаа откако Исламабад побара од Кабул да преземе мерки против милитантите кои ги засилија нападите во Пакистан, велејќи дека тие дејствуваат од скривниците во Авганистан.
Талибанците ги отфрлаат обвинувањата дека ги засолнуваат милитантите кои го напаѓаат Пакистан и ја обвинуваат пакистанската војска за ширење дезинформации за Авганистан и за засолнување на милитанти поврзани со Исламска држава. Исламабад ги негира обвинувањата.
Одзивот на локалните избори до 15 часот е 31 отсто
Одзивот на гласачи до 15 часот изнесува 31 процент, соопшти попладнево Државната изборна комисија (ДИК). Податоците се добиени од 91,16 проценти од избирачки места на кои досега гласале 515.069 граѓани.
Оттаму посочија дека до Комисијата нема пристигнато приговори за евентуални неправилности на гласачки места и дека изборниот процес поминува во мирна и демократска атмосфера.
Најголема излезност има во општините Берово 40,14%, Богданци 39,57%, Валандово 35,88%, Гевгелија 35,78%, Градско 37,12%, Дебарца 43,43%, Демир Капија 46,65%, Дојран 48,88%, Зелениково 41,34%, Кратово 42,35%, Крушево 47,47%, Лозово 47,32%, Македонски Брод 48,21%, Новаци 52,84%, Пробиштип 45,12%, Росоман 46,46% и Чашка 53,19%.
Најмала излезност има во општините Центар Жупа 17,12%, Радовиш 24,24%, Маврово и Ростуше 20,14%, Гостивар 20,95% и Врапчиште 14,94%.
Во Град Скопје одзивот е 31,16 проценти, односно во општина Аеродром излезноста е 31,50%, Бутел 30,10%, Гази Баба 27,82%, Карпош 33,37%, Кисела Вода 31,58 %, Центар 34,40, Чаир 35,30 %, Ѓорче Петров 30,11%, Сарај 36,33% и Шуто Оризари 21,99 проценти.
ЗНМ: Да се обезбеди непречена работа на медиумските работници на гласачките места
Здружението на новинарите на Македонија (ЗНМ) апелира до Државната изборна комисија (ДИК), општинските изборни комисии и Министерството за внатрешни работи да продолжат да обезбедуваат непречен пристап и услови за работа за новинарите и медиумските работници на сите избирачки места. Професионалното, навремено и точно информирање на јавноста за текот на изборниот процес, како што велат, е од суштинско значење за довербата во изборите.
До ЗНМ, како што се наведува во нивното соопштение, изутрината биле пријавени неколку случаи на попречување на работата на новинарските екипи.
Во Скопје, во општина Карпош, (ИМ 2626) имало обид за одземање на мобилниот телефон и непристоен однос од страна на заменик претседателот на комисијата кон новинарката Елида Зулбеари, по што имало интервенција од МВР, за што ќе побараме од ДИК да преземе санкции за службеникот.
Во Охрид (ИМ 1270) на екипа од јавниот сервис ѝ било оневозможен пристап во раните утрински часови со образложение дека, покрај новинарската легитимација, треба да поседува и „акредитација од ДИК“. По реакција на колегите и интервенција на лице место, пристапот беше овозможен и работата продолжи.
Во Тетово новинар бил попречен да земе изјава од страна на членови на избирачкиот одбор, со упатување на „недостиг на акредитација“.
ЗНМ апелира до ДИК и МВР итно да ги известат сите избирачки одбори и службени лица дека не е потребна акредитација од ДИК за новинарите, со цел да се избегнат нови недоразбирања во текот на денот.
Оттаму го повикувааат избирачките одбори од сите изборни места да овозможат непречен влез на новинарските екипи со видлива новинарска легитимација, да дозволат снимање и изјави во просторот каде што не се загрозува тајноста на гласањето и при недоразбирања прво да побараат насоки од ОИК/ДИК, наместо да го ограничат пристапот.
Две лица во Прилеп лишени од слобода поради „поткуп при избори и гласање“
Локалните избори 2025 се одвиваат во мирна, фер и демократска атмосфера на територијата на целата држава. Досега не се регистрирани посериозни нарушувања на јавниот ред и мир, изјави на прес-конференција портпаролот на МВР, Гоце Андреевски.
Сепак тој додаде дека во Прилеп од слобода биле лишени две лица поради „поткуп при избори и гласање“.
Во 09:00 часот на улица „Дабничка“ во Прилеп, полициски службеници од ОВР Прилеп, во врска со кривично дело „поткуп при избори и гласање“, ги лишија од слобода Б.Х.(72) и Д.С.(36), двајцата од Крушево. Во врска со истиот настан, во Полициската станица Прилеп повикани се С.А.(28), М.А.(31), Ш.А.(40), Д.А.(22) и Џ.А.(36) од Крушево, со престој во Прилеп. По целосно документирање на случајот ќе следува соодветна пријава.
Регистрирани се неколку пријави за агитирање при гласање на повеќе места, но по преземени мерки до овој момент не се потврдени наводите од пријавите.
МВР апелира до сите граѓани и до политичките партии, да придонесат за мирна и демократска атмосфера. Доколку има било какво нарушување на изборниот процес граѓаните да пријават во најблиската полициска станица или на телефонски броеви 192 или 112.
Израел изврши воздушни напади во Газа, го обвини Хамас за прекршување на примирјето
Израелски воен претставник за Би-Би-Си потврди дека се случиле воздушни напади во Рафа, јужна Газа, обвинувајќи го Хамас(кој е прогласен за терористичка организација од САД и ЕУ) за нападите, кои претставуваат „дрско кршење на прекинот на огнот“.
Воен портпарол вели дека Хамас извршил „повеќекратни напади врз израелските сили зад жолтата линија“, за која вели дека е областа каде што израелските трупи се повлекле според првата фаза од договорот постигнат со посредство на САД.
Хамас наведува дека е посветен на прекинот на огнот и го обвини Израел дека го крши.
Израелските напади во неделата, 19 октомври беа најсериозниот тест за веќе кревкото прекин на огнот, кое стапи на сила на 11 октомври.
Палестинците во Газа за Ројтерс изјавија дека слушнале експлозии и пукање во Рафа во јужниот појас, а сведоци одделно пријавиле силен оган од израелски тенкови во источниот град Абасан во близина на Кан Јунис, исто така во јужна Газа.
Сведоци во Кан Јунис слушнале бран воздушни напади во Рафа рано попладне во неделата.
Локалните здравствени власти во Газа објавија дека двајца Палестинци се убиени во израелски воздушен напад во источната област Џабалија во северна Газа.
„Тајмс оф Израел“ објави дека армијата спроведува воздушни напади во областа Рафа откако милитантите ги нападнаа силите таму, иако не наведе извор за информацијата.
Израелската влада и Хамас со денови се обвинуваат меѓусебно за кршење на прекинот на огнот, а Израел вели дека граничниот премин Рафах помеѓу Газа и Египет ќе остане затворен до понатамошно известување.
Рафа е во голема мера затворен од мај 2024 година. Договорот за прекин на огнот, исто така, вклучува зголемување на помошта за Газа, каде што стотици илјади луѓе беа погодени од глад во август, според IPC Global Hunger Monitor.
Израел и Хамас се во спор околу враќањето на телата на починатите заложници. Израел побара Хамас да ги исполни своите обврски со предавањето на преостанатите тела на сите 28 заложници.
Хамас ги врати сите 20 живи заложници и 12 починати и рече дека нема интерес да ги задржи телата на преостанатите заложници. Групата соопшти дека процесот бара напор и специјална опрема за извлекување на труповите закопани под урнатините.
Мултимедија
Најпосетени
Што треба да знаете