Подобрувањето на хуманитарната ситуација на Газа на што постојано работиме, не зависи од признавањето на Државата Палестина, порача високата претставничка на ЕУ за надворешни работи и безбедносна политика Каја Кала,с по средбата на шефовите на дипломатиите на Унијата со нивните колеги од Бразил, Индија и Мексико, што се одржа синоќа (22 септември) во Њујорк.

„Сите европски земји го поддржуваат решението за две држави. Значи, за да имаме две рамноправни држави, преземени се чекори од некои земји членки во врска со признавањето, со цел да се испрати јасен сигнал дека европските земји ги поддржуваат и Палестинците во овој конфликт. Тоа значи безбеден и сигурен Израел и одржлива палестинска држава“, рече Калас.

Според неа, министрите биле јасни во своите ставови дека решението за две држави е најдобрата шанса за траен мир на Блискиот Исток, бидејќи поддршката на овој модел значи дека всушност постојат и Израел и Палестина.

Таа истакна дека актуелната ситуација во Газа претставува „катастрофален неуспех на човештвото“ и ја повика израелската Влада веднаш да ги отстрани сите хуманитарни ограничувања.

„Јасно е дека Хамас (САД и ЕУ ја прогласија за терористичка организација) мора да го положи оружјето и да ги ослободи сите заложници, но и проширувањето на доселеничките населбите и анексијата на територии се некомпатибилни со мирот. Во Европската Унија се обидуваме да го насочиме фокусот кон помагање на луѓето на терен и вистинско подобрување на хуманитарната ситуација. Ние сме најголемиот донатор на хуманитарна помош и силен поддржувач на Палестинската самоуправа“, рече Калас.

Високата претставничка на ЕУ додаде дека на состанокот станало збор и за војната во Украина, нагласувајќи дека со секој руски воздушен напад се намалуваат перспективите за мир.

„Русија покажува апсолутен презир кон секој обид за дипломатија. Постојаните нарушувања на воздушниот простор на Европската Унија од страна на Москва се неодговорни, опасни и ризични ситуации што можат да излезат од контрола, а ние треба да бидеме цврсти“, рече Калас, додавајќи дека во тој правец е и новиот пакет санкции кон Русија, што Европската комисија го предложи во петокот.

Калас истакна дека влијанието на војната на Русија се чувствува и надвор од Европа.

„Секој ден Русија ги крши основните принципи на Повелбата на ОН. Заедно со нашите колеги, денес разговаравме и за тоа дека мултилатералниот поредок е навистина нешто што сите треба да го браниме, а Повелбата на ОН е во неговата суштина“, додаде Калас.

Според извештаите на локалните медиуми во Косово, се очекува косовската претседателка Вјоса Османи да се сретне со лидерите на партиите за да разговара за датумот на новите избори.

Радио Слободна Европа побара потврда од претседателскиот кабинет дали состанокот ќе се одржи, но не доби одговор.

Извештаите за овој состанок доаѓаат откако потпретседателот на Движењето Самоопределување Глаук Коњуфца, не успеа да ги обезбеди потребните гласови за формирање нова влада на 19 ноември.

Исто како Коњуфца, лидерот на движењето Самоопределување Албин Курти, не успеа да формира нова влада на 26 октомври.

Затоа Косово сè уште има Влада со технички мандат од парламентарните избори одржани на 9 февруари 2025 година.

Видете и ова:

Самоопределување - од движење против власта до власт против сите

Главните политички партии на косовските Албанци не постигнаа консензус за голем број прашања, вклучително и за одржувањето на изборниот процес, па затоа процесите се одложуваат досега.

Според Уставот, доколку друг мандатар не успее да формира Влада, претседателот Османи мора да распише нови избори, кои мора да се одржат во рок од 40 дена од датумот на распишувањето.

Од претседателскиот кабинет не одговорија на прашањето на Радио Слободна Европа за можниот датум на распишување на изборите.

Досега, 28 декември се споменуваше како можен датум, поради големото присуство на дијаспората во Косово. Сепак, според познавачите на политичката ситуација, овој датум е предоцна, бидејќи постои можност меѓународниот фактор да не биде вклучен во следењето на изборите поради празниците.

Европската Унија се подготвува значително да ги прошири своите полициски и гранични мисии во Газа како дел од напорите за поддршка на мировниот план на Соединетите Држави, јави ДПА.

Се очекува министрите за надворешни работи на ЕУ во четврток во Брисел да се согласат за предлозите за подобрена улога на Европската Унија и, доколку е потребно, да ги прилагодат мандатите на постојните мисии, дознава ДПА.

Според планот, ЕУ би можела да ја користи својата полициска мисија со седиште на Западниот Брег, Еупол Копс, за да ја преземе водечката улога во изградбата на нови полициски сили за воено разорениот Појас Газа и да обучи околу 3000 палестински безбедносни службеници на среден рок.

На долг рок, целта е да се обучат сите 13 000 лица за кои се очекува дека ќе бидат потребни. На краток рок, Еупол Копс би помогнал во обновата на судските и безбедносните структури во Газа и би организирал програми за обука за палестински полициски инструктори во полициска академија во Ерихон, кофинансирана од Германија.

Досега, цивилната полиција во Газа работеше под контрола на палестинската милитантна група Хамас, која водеше двегодишна војна со Израел, која го остави поголемиот дел од територијата во урнатини. Хамас е прогласена за терористичка организација од САД и ЕУ.

Се очекува новите сили тесно да соработуваат со планираната меѓународна стабилизациска мисија, наложена со резолуција на Советот за безбедност на ООН претходно оваа недела. Министрите на ЕУ во Брисел, исто така, разговараат за проширување на мисијата на блокот за следење на границите за Газа.

Видете и ова:

Советот за безбедност на ОН усвои резолуција за планот на Трамп за Газа

Според информациите на ДПА, ЕУ во иднина би можела да помогне во преработката на стоки, не само на преминот Рафа, туку и на точки како што е Керем Шалом. Како почетен чекор, се очекува мисијата да продолжи да го поддржува движењето на луѓето низ Рафа откако преминот повторно ќе се отвори.

Франција е еден од најсилните застапници за пошироки мандати. Францускиот министер за надворешни работи Жан-Ноел Баро, на неодамнешниот состанок на ЕУ во Луксембург, изјави дека е важно да се обезбеди безбедно да стигне хуманитарната помош до Газа.

Проширената улога на „Еупол Копс“ би можела да го поддржи и планираниот процес на разоружување на Хамас во Појасот Газа, рече тој.

Се очекува најновите случувања во војната во Украина, исто така, да бидат во центарот на вниманието во разговорите во четврток, 20 ноември. Се очекува министрите да започнат со дискусија со украинскиот министер за надворешни работи Андриј Сибиха за најитните потреби на Киев.

Во ЕУ се преземаат напори за обезбедување дополнителна долгорочна финансиска поддршка, вклучително и евентуално ставање на располагање на Украина на замрзнатите руски државни средства.

Нов американски предлог за запирање на војната во Украина бара од Киев да се откаже од дел од својата територија и од дел од своето вооружување, јавуваат новинските агенции, додека украиннскиот претседател Володимир Зеленски престојува во Турција во обид да ја оживее мировните преговори.

Американските предлози исто така, како што јавуваат новинските агенции, вклучуваат намалување на големината на украинските вооружени сили и прифаќање на повлекување на американската воена помош, која била клучна за Украина во борбата против руските сили.

Дополнително, нема да бидат дозволени странски војници на украинска територија и Киев повеќе нема да добива оружје со долг дострел.

Предлозите, кои во детали ги објавија Фајненшл Тајмс (The Financial Times) и Ројтерс (Reuters), во голема мера се поклопуваат со цврстите барања кои Русија ги поставува од почетокот на годинава, кога американскиот претседател Доналд Трамп се обиде да отвори директни преговори со Москва за војната во Украина.

Немаше веднаш јавен одговор од украинските официјални лица на овие извештаи. Еден украински функционер со директно познавање на предлогот ги потврди неговите содржини, но немаше дополнителни коментари.

Непосредно по објавувањето на предлозите, Зеленски објави порака на социјалната платформа Телеграм во која му се заблагодари на турскиот претседател за организирањето на последните преговори.

Тој исто така го пофали „одлучувачкиот чекор и лидерството на претседателот Трамп [и] секој силен и праведен предлог за завршување на оваа војна. И само претседателот Трамп и Соединетите Американски Држави имаат доволно сила за војната конечно да заврши.“

Зеленски требаше да се сретне со високи официјални лица од американското Министерство за одбрана во Киев на 20 ноември.

Предлозите можат да го стават Зеленски во тешка позиција.

Видете и ова:

Зеленски во Турција, додека скандалот околу неговиот соработник се продлабочува

На бојното поле, украинските сили се борат да ги задржат руските сили кои се поголеми и подобро опремени, иако руските сили претрпуваат огромни загуби.

Русија се приближува кон клучниот град Покровск како дел од целта на Путин да ја контролира целата источна област на Донбас.

Русија исто така ги бомбардира украинските градови и енергетската инфраструктура, со цел да ги деморализира веќе исцрпените Украинци.

Синоќа, руски крстосувачки проектили погодиле два станбени објекти во западниот град Тернопил, при што загинале најмалку 25 лица, а десетици биле повредени.

Зеленски претходно ги одбиваше барања од Москва, Украина да се откаже од територија или да го намали својот арсенал, велејќи дека тоа само би ја ослабило Украина и би ја изложило на потенцијална нова инвазија во иднина.

Дома, Зеленски е политички ослабен поради голем скандал со корупција кој го опфаќа дел од неговите министри и долгорочни бизнис партнери.
Украинските законодавци повикаа Зеленски да го отпушти својот шеф на кабинетот, Андриј Јермак.

Истражувањето за корупција се однесува на наводи дека средства наменети за изградба на одбрана за заштита на ранливата енергетска инфраструктура од руски воздушни напади биле присвоени преку поткуп за политички внатрешни лица.

Најблискиот сојузник на Зеленски

Јермак имал значајна улога во претходните дипломатски средби за постигнување примирје или мировен договор за време на целосната инвазија на Русија.

Тоа што не е избран од народот, Јермак е можеби најверниот политички сојузник на украинскиот претседател.

Но, сега тој се соочува со растечки притисок за отпуштање или оставка додека истрагата за висока корупција се засилува.

„Ако Јермак не биде отпуштен во наредните неколку дена, се плашам дека можеме да влеземе во целосна политичка криза дома,“ изјави Олена Прокопенко, постар член на Германскиот Маршал Фонд за Радио Слободна Европа.

Скандалот со корупцијата кулминираше минатата недела кога двете водечки украински антикорупциски агенции објавија докази со детали од нивните наоди.

Проблемот е уште поголем затоа што Зеленски се обиде да ја укине автономијата на агенциите за време на летото, но се повлече поради најголемите протести на улица од почетокот на рускиот напад во февруари 2022.

Откритијата веќе доведоа до оставки на министерот за енергија и министерот за правда, додека близок сојузник на Зеленски, Тимур Миндич, ја напушти државата.

Али Баба

Тајни снимки објавени од истражителите покажаа дека осомничените користеле кодни имиња. На 18 ноември, еден украински пратеник изјави дека едно од тие имиња, Али Баба, всушност е Јермак.

Пратеникот Јарослав Железњак рече дека снимките покажуваат дека Јермак наводно упатувал ненаведени официјални лица да истражуваат функционери од Националното антикорупциско биро на Украина (NABU).

Јермак не одговори на прашањата на РСЕ. Зеленски објави дека ќе се сретне со законодавци од неговата партија на 20 ноември, што предизвикува шпекулации дали Јермак можеби ќе биде отпуштен.

Додека политичката температура во Киев расте,две опозициски партии побараа оставка на целата Влада.

Руските сопственици се согласиле да го продадат својот удел во Нафтената индустрија на Србија (НИС), кој изнесува 56,15 проценти, изјави српската министерка за рударство и енергетика на Србија, Дубравка Ѓедовиќ Хандановиќ. Нафтената индустрија на Србија е од 9 октомври под американски санкции поради мнозинското руско сопствеништво.

Но руската и српската страна засега не откриваат кои би можеле да бидат потенцијалните купувачи. НИС побара од САД лиценца за работа додека траат преговорите за сопственичката структура.

„САД нема да дозволат никој што може да биде поврзан со Русите да го купи НИС, како на пример Кина,“ вели за Радио Слободна Европа, Боже Драшковиќ, универзитетски професор во пензија.

Гаспром Нефт, рускиот мнозински сопственик на НИС, како и самата компанија, не одговорија на прашањата на Радио Слободна Европа со кого преговараат за предавање на контролата и управувањето.

Освен претходните информации дека руските мнозински сопственици на НИС преговараат со азиски и европски партнери за сопствеништвото, српските официјални лица не открија повеќе детали.

Професорот по економија Боже Драшковиќ смета дека е можно формален купувач на НИС да биде некој од арапските земји.

„Би им дозволиле на арапските земји, на пример на Емиратите, Кувајт, Саудиска Арабија, иако е прашање дали воопшто им е потребно тоа,“ оцени Драшковиќ.

„На можните европски купувачи – било Французи, Германци или кој било друг – нивните земји нема да им дозволат купување поради спречување на трансферот на купопродажната цена,“ додаде тој.

Американскиот OFAC не одговори на прашањето на РСЕ која опција за излез на руското сопствеништво од НИС би им била прифатлива.

Српската минисерка Ѓедовиќ Хандановиќ, изјави дека Србија е „многу вклучена и информирана“ за преговорите за продажба, но додаде дека не може да се зборува за третата страна сè додека не завршат преговорите за купување на рускиот удел.

„Тоа се деловни разговори на сериозни компании и додека не завршат или барем најважните детали не бидат дефинирани, не е ни сериозно да се зборува за тоа,“ додаде таа.

Видете и ова:

Што би значела национализацијата на српската нафтена индустрија?

Наскоро потоа, НИС ја информираше јавноста дека од Канцеларијата за контрола на странски средства (OFAC) при Министерството за финансии на САД била побарана посебна лиценца што би овозможила продолжување на работењето.

„Во согласност со статусот на преговорите меѓу акционерите и заинтересираните страни, до OFAC е испратено барање за добивање нова лиценца што би овозможила работа додека траат преговорите за одржливо решение за НИС,“ беше наведено.

Во тоа соопштение беше истакнато дека претходната лиценца дозволувала преговорите меѓу акционерите и други заинтересирани страни за промената на сопственичката структура на НИС да траат до 13 февруари.

Со последната лиценца беа одобрени преговорите за промена на сопствеништвото, но не и понатамошното работење на НИС.
Санкциите за НИС стапија во сила на 9 октомври, во обид американската администрација да спречи Русија приходите од енергетиката да ги користи за војната во Украина.

Претходно санкциите беа одложувани осум пати, а во меѓувреме сопственичката структура на компанијата повеќепати се менуваше, но и понатаму мнозинството остана во рацете на руските компании, додека Србија има 29,87 проценти удел.

Украинскиот претседател Володимир Зеленски пристигна во Турција на 19 ноември во обид да ги оживее застојаните мировни преговори, додека расте притисокот врз украинскиот лидер и неговиот шеф на кабинет Андриј Јермак поради корупциски скандал.

Зеленски се состана со турскиот претседател Реџеп Таип Ердоган, но дипломатски извор за Радио Слободна Европа изјави дека, Зеленски нема да се сретне со специјалниот пратеник на САД, Стив Виткоф, кој исто престојува во Анкара.

Претходно, Јермак, кој патува со Зеленски, објави на социјалните мрежи дека „сите планирани средби се одвиваат според распоредот“ и дека тој е „во постојан контакт со претставници на администрацијата на Доналд Трамп, особено со специјалниот претставник на претседателот на САД, Стив Виткоф.“

Корупциската истрага што ѝ создава проблеми на украинската власт се однесува на наводи дека средствата наменети за изградба на одбрана, која треба да ја заштити ранливата енергетска инфраструктура на Украина од руски воздушни напади, биле пренасочени во форма на мито за политички инсајдери.

Јермак одигра значајна улога во претходните дипломатски средби насочени кон барање пат до примирје или мировен договор во услови на целосната руска инвазија врз Украина, која трае речиси четири години.

Видете и ова:

Зеленски продолжува со патувањата среде корупциската афера во Украина

Како неизбран функционер, назначен директно на позицијата, Јермак можеби е најдоверливиот политички сојузник на украинскиот претседател. Но, сега тој се соочува со сè поголем притисок за разрешување или оставка, додека истрагата за високо ниво на корупција забрзува.

„Ако Јермак не биде отпуштен во следните неколку дена, се плашам дека може да влеземе во целосна домашна политичка криза,“ изјави Олeна Прокопенко, виша соработничка во Германскиот Маршалов Фонд, за РСЕ на 19 ноември.

Корупциските обвиненија кулминираа минатата недела кога двете водечки антикорупциски агенции во Украина објавија докази со кои ги детализираа своите наоди.

Проблемот е уште поголем поради тоа што Зеленски летово се обиде да ја намали автономијата на овие агенции, но беше принуден да се повлече од законските измени откако таа ги поттикна најголемите улични протести од почетокот на целосната руска офанзива во февруари 2022 година.

Тајни снимки објавени од истражителите покажаа дека осомничените работеле под кодни имиња. На 18 ноември, украински пратеник тврдеше дека едно од тие имиња – Али Баба – всушност било Јермак.

Пратеникот, Јарослав Железњак, рече дека записите покажуваат како наводно Јермак им наредувал на неименувани функционери да истражуваат претставници на Националното биро за борба против корупцијата на Украина (НАБУ).

Јермак, кој на 21 ноември полни 54 години, не одговорил на барањата за коментар од украинската редакција на РСЕ.

Зеленски објави дека ќе се сретне со пратениците од неговата партија „Слуга на народот“ на 20 ноември, што поттикна шпекулации дали Јермак може да биде отпуштен.

Рускиот „Лукоил“ на 19 ноември соопшти дека го задржува правото да побара судска заштита на своите права и, како што вели, легитимните интереси во Бугарија, откако таму беше назначен надворешен управител за управување со неговите средства, јавува новинската агенција Ројтерс.

„Лукоил ги презема сите неопходни чекори за да ја заврши продажбата на рафинеријата, мрежата на бензински пумпи и другите средства во Бугарија на нов сопственик и очекува дека активностите на надворешниот администратор нема да го попречат овој процес“, соопшти компанијата.

Минатата недела, бугарската влада назначи специјален управител кој ќе го надгледува работењето на рафинеријата на „Лукоил“ во Бургас по 21 ноември, кога треба да стапат на сила санкциите на САД, и да ја продаде компанијата доколку е потребно. Вашингтон ги воведе санкциите поради војната на Русија против Украина.

Законските измени му даваат на идниот специјален управител (назначен од државата) широки овластувања, вклучително и можност за продажба на средствата на компаниите, а неговите дејства се исклучени од судска контрола.

Видете и ова:

Зошто бугарските служби ја чуваат рафинеријата Лукоил во Бургас?

Минатата недела, претседателот на Бугарија Румен Радев стави вето на измените, кои беа поништени од парламентарната комисија за енергетика само неколку часа подоцна.

Во среда на 13 ноември, лидерот на владејачката ГЕРБ, Бојко Борисов изјави дека веќе е избрано лице за позицијата специјален управител, без да го прецизира неговото име.

Британската влада испрати предупредување до Кремљ откако соопшти дека руски воен брод влегол во британски води и насочил ласери кон британските пилоти.

Министерот за одбрана Џон Хили денеска (19 ноември)изјави дека бродот „влегол“ во британските води по втор пат оваа година, по претходниот упад во јануари.

„Јантар“ е на работ на британските води, северно од Шкотска, откако влезе во пошироките води на Велика Британија во последните неколку недели“, рече тој за време на прес-конференцијата на Даунинг стрит.

Британската војска распореди фрегата на Кралската морнарица и авиони на Кралските воздухопловни сили за „да го следат и следат секое движење на овој брод, при што Јантар насочувал ласери кон нашите пилоти“, додаде тој.

Тој ја нарече употребата на ласерите „длабоко опасна“ и му испрати порака на рускиот претседател Владимир Путин.

„Ве гледаме. Знаеме што правите. Ако Јантар патува на југ оваа недела, ние сме подготвени“.

Видете и ова:

Русија изврши масовни напади низ Украина, а Полска и Романија ја активираа воздушната одбрана

Хили рече дека Јантар е „дел од руска флота дизајнирана да ја стави и држи во опасност нашата подморска инфраструктура и онаа на нашите сојузници“.

Велика Британија и сојузниците на НАТО изразија растечка загриженост за ризикот што Москва го претставува за офшор инфраструктурата по саботажата во последните месеци на неколку подводни телекомуникациски и енергетски кабли.

Експертите и политичарите ја обвинија Русија за оркестрирање хибридна војна против Западот, додека двете страни се судираат околу Украина.

Романија, членка на НАТО, која се граничи со Украина, испрати борбени авиони рано во среда по нов упад со беспилотни летала на нејзина територија, соопшти Министерството за одбрана.

Романија постојано забележува нарушувања на својот воздушен простор, вклучително и фрагменти од беспилотни летала што паѓаат на нејзина територија, по руската инвазија на Украина во 2022 година.

„Во најновиот инцидент, два германски борбени авиони на НАТО ја следеа ситуацијата во воздухот веднаш по полноќ на границата со Украина, по руските воздушни напади“, соопшти романското Министерство за одбрана во соопштение за медиумите.

До жителите на југоисточниот округ Тулча било испратено телефонско предупредување и „неколку минути бил откриен сигнал од беспилотно летало, кое влегло приближно осум километри (пет милји) во националниот воздушен простор“ пред да исчезне од радарот.

Видете и ова:

Русија изврши масовни напади низ Украина, а Полска и Романија ја активираа воздушната одбрана

Потоа беспилотното летало „повторно се појавуваше на радарот приближно 12 минути“, соопшти Министерството, а предупредување беше испратено и до жителите на југоисточниот округ Галац.

„Уште два авиони, Ф-16 на романските воздухопловни сили, беа испратени“, додаде министерството, велејќи дека „не се пријавени случаи на удар на авион со земјата“.

„Тимови специјалисти се подготвени да започнат со пребарувања на терен“, се додава во соопштението.

Во понеделник, Романија нареди евакуација на две села (прва таква евакуација во земјата како резултат на војната во Украина) откако руски напад со беспилотни летала преку реката Дунав во соседна Украина запали брод што превезувал течен нафтен гас.

Наредбата за евакуација беше укината во вторник.

Најмалку 19 лица биле убиени, а десетици повредени во Украина во масовниот бран руски напади со беспилотни летала и ракети, што претседателот Володимир Зеленски го нарече „дрзок напад врз обичниот живот“.

Украинските медиуми објавија дека експлозии се слушнале рано наутро на 19 ноември низ регионите Тернопол, Хмелницки, Ивано-Франкивск, Ривно, Лвив и Дњепропетровск, додека нападите биле насочени кон источна и западна Украина.

Градоначалникот на западноукраинскиот град Лвов, Андриј Садови, во објава на Телеграм, ги повика жителите да побараат засолниште, предупредувајќи: „Непријателот ја напаѓа западна Украина со беспилотни летала. Не го игнорирајте алармот!“

Министерството за енергетика на Украина соопшти дека нападите предизвикале итни прекини на електричната енергија во неколку региони, а екипите за поправка работеле на враќање на електричната енергија каде што е можно.

Русија ги интензивираше нападите врз украинските енергетски објекти како што се приближуваат зимските месеци, што доведе до страв од недостиг на електрична енергија поради веројатното замрзнување. Москва, исто така, редовно напаѓаше украински цивилни области, иако негира дека ги таргетира таквите локации.

Активирана воздушна одбрана во Полска и Романија

Рускиот напад врз западните региони на Украина предизвика брз одговор од соседна Полска.

Оперативната команда на полските вооружени сили потврди дека борбени авиони и авиони за рано предупредување полетале поради нападите на Русија во близина на полската граница.

Полската агенција за воздушна навигација објави кратко затворање на аеродромите во Жешов и Лублин во југоисточна Полска „за да се обезбедат операциите на военото воздухопловство“.

Видете и ова:

Полска се сомнева на руска саботажа за експлозијата на железничката пруга

Романија, исто така, накратко ја крена својата воздушна одбрана откако радарот детектира дрон кој продирал околу 8 километри во националниот воздушен простор, предизвикувајќи јавна тревога во окрузите Тулча и Галац во источниот дел од земјата.

Авионите „Еурофајтер“ и „Ф-16“ полетаа, иако не беа пронајдени остатоци или места на удар, според соопштението на романското Министерство за одбрана.

Руски беспилотни летала го нападнаа Харков

Во украинскиот регион Харков, десетици беа ранети преку ноќта кога руски беспилотни летала нападнаа по трет пат за три дена, соопштија официјални лица на 19 ноември.

Полицијата во Харков соопшти дека најмалку 36 лица се повредени во последниот напад во текот на ноќта, во кој беа оштетени повеќе од 10 станбени згради, училиште, супермаркет и станица за брза помош.

Две деца на возраст од девет и 13 години се меѓу повредените, соопшти полицијата, додавајќи дека „лекарите кај децата дијагностицирале акутни реакции на стрес“.

На 18 ноември, Генералштабот на вооружените сили на Украина потврди дека извршил напади во Русија користејќи ракети ATACMS со краток дострел.

Руското Министерство за одбрана соопшти дека украинските сили истрелале четири ракети ATACMS кон градот Воронеж, кој се наоѓа во јужна Русија.

Полска се сомнева дека руските разузнавачки служби стојат зад експлозијата на железничката пруга во земјата што се користи за транспорт на воени материјали и помош за Украина, што премиерот Доналд Туск претходно го нарече и „невиден чин на саботажа“.

Во првите коментари со кои полски претставник сугерира дека Москва стои зад нападот што се случи за време на викендот, портпаролот на министерот за специјални служби на Полска, Јацек Добжински, денеска (18 ноември) изјави дека експлозијата е обид за „дестабилизација“ и „ширење страв“.

Во обраќање пред полските пратеници, Туск рече дека Полска идентификувала две лица одговорни за саботажата на железничката пруга.

Тој додаде дека осомничените се украински државјани кои соработувале со руското разузнавање и избегале во Белорусија.

„Најважната информација е дека ги идентификувавме лицата одговорни за саботажата“, им рече Туск на пратениците во Варшава.

Видете и ова:

Туск: Експлозијата на железницата е „чин на саботажа“

„Во двата случаи, сигурни сме дека обидот за бомбардирање на пругите и нарушувањето на железничката инфраструктура биле намерни и имале за цел да предизвикаат катастрофа во железничкиот сообраќај“, рече тој.

Туск додаде дека Полска го зголемува нивото на безбедносна тревога во некои делови од земјата и работи на планови за армијата да ја заштити клучната инфраструктура, вклучително и железниците.

Експлозијата во понеделник се случи на линијата што води од Варшава до градот Лублин во источна Полска, на околу 100 километри од границата со Украина.

Полските обвинители ја класифицираа саботажата како тероризам, велејќи дека можеби била извршена по наредба на странска сила.

Кремљ во вторник соопшти дека Полска е погодена од бран на „русофобија“ којшто „се шири“ низ цела Европа.

„Русија е обвинета за сите манифестации на хибридната и директна војна што се води“, изјави портпаролот на Кремљ, Дмитриј Песков, за руската државна телевизија.

„Во Полска, на пример, сите се обидуваат да бидат пред европската локомотива во овој поглед. А русофобијата, се разбира, е широко распространета таму“, додаде тој.

Полскиот министер за одбрана Владислав Косињак-Камијш објави дека безбедносните сили ги засилуваат патролите за следење на критичните области на железничката мрежа на истокот од земјата, како што се мостови, вијадукти, тунели, станици и контролни системи.

Службениците во Полска и други европски земји долго време ја обвинуваат Москва дека води „хибридна“ кампања на саботажа и шпионажа против државите кои ѝ помагаат на Украина откако Русија ја започна својата инвазија во февруари 2022 година.

Видете и ова:

Полска планира воена обука на 400.000 луѓе до 2026

Минатиот месец, полските власти уапсија осум лица осомничени за шпионажа или планирање напади во име на Русија.

Во јануари, Туск ја обвини Русија дека планира терористички напади врз неодредени цели со употреба на авиони, бидејќи бројот на сомнителни, алармантни и необјаснети инциденти се зголеми.

Во некои се вклучени меѓународни авиокомпании и обвинувања дека Русија се обидела да постави експлозиви на товарни летови, додека во други се вклучени бродови кои ги прекинуваат подводните кабли.

Москва ги негира обвинувањата на Западот за терористички напади, вклучувајќи палење, кражби, труења и напади врз поединци на Запад.