Вести
Ново обвинение за Мерко за злоупотреби при осветлувањето на Црн Дрим
Основното јавно обвинителство Струга денеска поднесе обвинителен предлог против струшкиот градоначалник Рамис Мерко.
Тој е осомничен дека од 1 април 2021 година до 27 јуни 2022 година како градоначалник ги пречекорил службените овластувања и склучил договор за изведување на осветлувањето на дел од речното корито на Црн Дрим, без претходно да обезбеди водостопанска согласност од Министерството за животна средина и просторно планирање.
„Со тоа овозможил на избраната фирма-изведувач да постави светлосни тела во водите на реката во должина од по 900 метри од двете страни на коритото, иако обвинителството во текот на постапката презеде повеќе дејствија и обезбеди вештачење согласно кое таквата инсталација од 300 светлински арматури негативно влијаела на режимот на водите, морфологијата на водното тло и хидро-биолошкиот систем во реката“, соопшти Јавното обвинителство.
За изведба на проектот на правно лице од струшкото село Мислодежда му биле исплатени 6.763.722 денари и за тој износ бил оштетен буџетот на Општина Струга.
Во јуни 2023 година, градоначалникот Рамиз Мерко заврши на црната листа на САД, а како причина за одлуката беше наведена негова вмешаност во корупција, мешање во судски и други јавни постапки, со што ја наришил довербата во демократските институции на Северна Македонија.
Во јуни годинава, Мерко доби ослободителна пресуда во предметот што се водеше против него за наводна злоупотреба на службената положба при набавката на службен автомобил „ауди“ во вредност од 67 000 евра.
Мерко е обвинет и за незаконски поставување на директори на училишта и други институции, како и за поставување на спомен обележје – плоча на влезот на општинската зграда, со кое поттикнал етничка омраза и раздор меѓу жителите на Струга.
види ги сите денешни вести
Партиски препукувања за тендери од близу девет милиони евра
Тендери вредни речиси девет милиони евра се најдоа во фокусот на денешните препукувања меѓу власта и опозицијата.
Генералниот секретар на СДСМ, Александар Саша Димитријевиќ на прес конференција денеска (30 ноември) обвини дека фирмата „Дигитал оне“, формирана лани на крајот на август, со само двајца работници за една година има добиено тенеди од речиси девет милиони евра.
Според него, тие се со владини и државни институции, а се однесуваат на периодот од мај до ноември годинава.
Димитријевиќ посочи дека од шест државни тендери, четири се со Генералниот секретаријат на Владата. Последниот од нив, претставува рамковна спогодба за софтверски лиценци за виртуелна платформа во вредност од осум милиони евра.
„Основана е од извесен Кристијан Арсовски и има само двајца вработени. И секако, едно од прашањата е дали Кристијан е во роднински врски со поранешниот портпарол на ДПМНЕ, Димса Арсовски“, рече Димитријевиќ.
Тој ги повика Јавното обвинителство, Финансиската полиција и ДКСК веднаш да регираат, односно како што рече, да отворат истрага.
По неговата прес конференција, поранешниот портпарол на ВМРО-ДПМНЕ, Димче Арсовски се огласи преку социјалните мрежи наведувајќи дека СДСМ „измислува непостоечки случаи и интриги“.
„За да биде детално јасно, ниту го познавам човекот кој е сопственик на фирмата, ниту сум го сретнал, ниту знам како изгледа, ниту ми е роднина по било која основа. Единствено што е исто е презимето. Немам никаква врска со никаков тендер, ниту пак сум имал било каква врска со државни тендери“, пишува Аровски во објавата преку која побара и извинување.
Но, по неговата објава, СДСМ лиферуваше соопштение во кое наведе дека нема да се извини.
-Не баравме ниту роднинско стебло ниту извод од Димса Арсовски туку да одговори на прашање дали е роднински поврзан. И нема за што да му се извинуваме, велат меѓу другото, од СДСМ.
Владеачката партија пак, во соопштение поврзано со ваквиот случај, попладнево истакнува дека се работи за редовна јавна набавка.
„Да им објасниме дека за договорите за набавка на сервери, наместо да се плаќа хост на приватни правни лица, сега за првпат поседува сервери на кои самостојно се хостираат владините апликации. Третиот споменат договор исто така е склучен во транспарентен процес и набавени се компјутери по најниска понудена цена“, велат од ВМРО-ДПМНЕ.
Јаневска: Проблемот со „петките“ кај учениците го лоцираме кај родителите
Проблемот со „петките“ во земјата е навистина сериозен и од моето долгогодишно, веќе пет-шест години со контактите со наставниците, тој генерално се лоцира кај родителите – изјави денеска (30 ноември), министерката за образование и наука, Весна Јаневска.
Одговарајќи на новинарско прашање за надминување на проблемот со влијанието на родителите во оценувањето на децата, таа рече дека оние кои инсистираат на добивање високи оценки без соодветно знаење „им прават голема штета прво на своите деца, а потоа и на целото општество“.
Според министерката, послабата оценка не е казна, туку треба да биде мотив за постигнување на одредени компетенции, вештини и квантум на знаење кој ќе му помогнат во животот на детето.
„Ако тоа е задоволно од својот труд, од своите постигнувања ќе биде задоволно и целото општество, иако тоа е масовна појава. Има неколку мерки кои досега сме ги презеле-на пример со Е-дневникот, со разни програми со кои се обидуваме да влијаеме на разни стереотипи и предрасуди и ќе продолжиме во ист правец“, рече Јаневска.
На уште едно новинарско прашање за потребата од воведување на приемен испит на факултетите, министерката Јаневска рече дека не е забрането да се одржуваат приемни испити на факултетите и тие сами можат да донесат одлука за такви нешто.
„На пример, на Архиотектонскиот факултет се одвива некаква претквалификација, дури и обука за испит. Меѓутоа според ЕУ , а и нашиот систем кој сега ние го направивме, децата имаат матура и неправедно е да имаат две скалила на елиминација во нивното напредување во високото образование“, смета Јаневска.
Додаде дека е направена измена на матурата според барање на учениците и наставниците и е одвоена државната стручна матура од државната матура која фактички е гимназиска.
Јаневска појасни дека тоа е така бидејќи децата во стручните школи имаат помал обем на општо образовни предмети, а оние што се во гимназија имаат повеќе.
„Тие ќе бидат на исто ниво, двете ќе бидат државни матури и ќе имаат проодност кон високото образование, па и она што јас не сакам да го кажам, но има и такви случаи и за образование во странство. Но, материјалот од општо образовните предмети ги полагаат децата од стручното ќе биде прилагоден на нивните наставни планови и програми“, посочи Јаневска која денеска во Струмица се обрати на петтиот панел од националната кампања „Магијата е знаењето“ на Министерството за образование и наука.
Водечкиот опозиционер во Азербејџан исчезна по претресите на безбедносните служби
Азербејџанските власти го уапсија лидерот на главната опозициска партија на земјата по претрес во неговиот стан, изјавија партиски функционери.
На 30 ноември, еден ден по претресот на неговиот дом во Баку, не беше јасно каде се наоѓа Али Каримли, според Партијата на народниот фронт на Азербејџан.
Други партиски функционери од партијата, позната како AXCP, исто така пријавија дека нивните домови биле претресувани и исто така исчезнале.
Туран Ибрахим, чиј татко Мамад е член на претседателството на партијата, објави на Фејсбук дека повеќе од десетина безбедносни агенти го претресле домот на неговиот татко, му го одзеле телефонот и компјутерот и го однеле на неоткриени локации.
„Неколку други членови на партијата објавија на социјалните мрежи тврдења за вознемирување и следење.
Во меѓувреме, во Турција, безбедносните сили ја уапсија Гултекин Хаџибејли, друга азербејџанска активистка за демократија, која е членка на Координирачкиот центар на Националниот совет на демократските сили.
Хаџибејли изјави за Радио Слободна Европа доцна на 28 ноември дека била однесена во центар за притвор во Истанбул. Нејзините колеги подоцна рекоа дека не можат да ја лоцираат или да добијат повеќе информации за нејзината локација.
Други медиуми известија дека се очекува да биде депортирана во Азербејџан.
„Државната безбедносна служба и Министерството за внатрешни работи не одговорија на прашањата на азербејџанскиот сервис на Радио Слободна Европа.
„Апсењето на Каримли и претресот на неговиот стан беа поврзани со неименувано кривично дело“, известија провладините медиуми во Баку.
Ројтерс, повикувајќи се на ненаведен азербејџански владин службеник, соопшти дека притворот на Каримли е поврзан со тековна кривична постапка против Рамиз Мехдиев, долгогодишен сојузник на починатиот претседател Хејдар Алиев, кој ја водеше Азербејџан до кратко пред неговата смрт во 2003 година.
Синот на Хејдар, Илхам, ја презеде претседателската функција кратко пред смртта на својот татко. Оттогаш, тој систематски ги потиснува несогласувањата преку апсење независни новинари, опозициски фигури и активисти на граѓанското општество.
Властите во земјата инсистираат дека основните слободи се заштитени и дека луѓето не се прогонуваат поради критички ставови и политички активности.
AXCP објави соопштение во кое тврди дека интервјуата на Каримли со странските медиуми „го вознемириле режимот на Илхам Алиев“.
„Во ситуација каде политичката активност е речиси целосно забранета во земјата, а граѓанските слободи се сериозно ограничени, оваа операција е следниот чекор кон понатамошно интензивирање на политичкиот прогон“, се наведува во соопштението.
„Целта на поврзувањето на овие апсења со Рамиз Мехдиев е да се оштети угледот на Али Каримли. Тие самите соработуваа со Мехдиев речиси 30 години. Овие обвиненија не ни прилегаат“, рече Сејмур Хази, заменик-претседател на партијата, за Радио Слободна Европа.
Ројтерс
Алармантно загадување во Техеран додека Иран е погоден од еколошка криза
Загадувањето на воздухот достигна алармантни нивоа во иранската престолнина Техеран, што ги натера властите да затворат училишта и универзитети и да забранат патување со камиони во регионот, во најновата еколошка криза што ја погоди оваа блискоисточна земја.
Индексот на квалитет на воздухот во Техеран и околните градови на 29 ноември се искачи помеѓу 170 и 200 — што се смета за „нездраво“ за сите возрасни групи, известуваат иранските медиуми.
Според експертите, нивоата на квалитет на воздухот од 0-50 се сметаат за добри, додека оние од 151-200 се оценуваат како „нездрави“. Над 200 се смета за „многу нездраво“.
Мохамед Џафар Гајемпана, заменик на претседателот Масуд Пезешкијан изјави дека „загадувањето на воздухот ќе убива ако стане поголемо од ова“.
Техеранската управа за контрола на квалитетот на воздухот им советува на жителите да „избегнуваат непотребни патувања на отворено“.
„Постарите лица и децата, заедно со пациентите со кардиоваскуларни и респираторни заболувања, треба да останат во своите домови колку што е можно повеќе“, се додава во соопштението.
Воведени се и ограничувања за патување со автомобил, додека владини канцеларии, банки и други претпријатија работат со намален број вработени, а некои вработени добија наредба да работат од дома.
Оваа вонредна состојба е најновата еколошка криза што ја погоди Иран, кој исто така страда од сериозни економски проблеми поради финансиските санкции воведени поради неговата нуклеарна програма за која Западот тврди дека е наменета за изградба на бомба, додека Техеран инсистира дека е за цивилни цели.
Децениското лошо управување, влошено од продолжената суша, го доведоа Иран до работ на тоа што експертите го нарекуваат воден банкрот. Со празни резервоари и рекордно ниски врнежи, властите почнаа да рационализираат залихи на вода во Техеран, град со околу 10 милиони жители.
Пезешкијан предупреди дека водната криза може да доведе до евакуација на делови од Техеран и предложи можност главниот град да се пресели во друг град.
Неодамнешните предупредувања од властите не беа доволни, изјави Кавех Мадани, директор на Институтот за вода, животна средина и здравје при Универзитетот на ОН со седиште во Канада, за програмата Радио Фарда на Радио Слободна Европа.
„Нивото на нивните предупредувања е премалку во споредба со реалноста на теренот“, рече Мадани, кој претходно беше заменик-шеф на иранското Министерство за животна средина.
ДПА и Ројтерс
Поплави, излевања на реки и одрони во источниот регион
Обилните врнежи што изминатите денови го зафатија источниот регион на Северна Македонија предизвикаа поплави, излевање на реки и одрони на патишта, соопшти Центарот за управување со кризи (ЦУК).
Според информациите од ЦУК, утрото на 29 ноември биле поплавени простории и дворови на различни локации во Општината Чешиново-Облешево, како што се селата Чешиново, Облешево и Чифлик.
Во интервенциите за справување со последиците, на општинската служба и помагаат пожарникари од Кочани, од водостопанство „Брегалница“, како и од кочанскиот Регионален центар за управување со кризи (РЦУК).
„Побарана е и дополнителна материјално-техничка поддршка, особено за испумпување вода од поплавените објекти“, велат од ЦУК.
На територијата на Чешиново-Облешево, но и на локации во Општина Штип поради зголемен водостој на реките Брегалница и Кочанска забележано е и излевање од коритото
Одрони на патиштата, пак, настанале на регионалниот пат Радовиш-Штип и на патниот правец од Злетово кон браната Кнежево, а екипи од јавното претпријатие „Македонија пат“ се на терен.
Покрај во источниот регион, лизгање на земјиште денеска има и во кумановско, поточно во селото Липково каде поради ограничените ресурси на Општина Липково и ризикот од влошување на ситуацијата, побарана е помош и од државните институции.
Ден претходно, ЦУК информираше дека обилните дожнови предизвикале свлечиште во тетовско Шипковица при што загрозени биле четири куќи, а на населението му беа дадени насоки да ги напушти живеалиштата поради можни нови одрнони.
Проблеми со свлечишта деновиве имаат и дел од жителите на скопски Центар. На 27 ноември, по иницијатива на Општината, во ЦУК беше одржан итен координативен состанок поради појавено обрушување на земјиштето на Водно. Како што соопштија надлежните, било договорено да се направи итен план за стабилизирање на критичната состојба.
Обилните дождови минатиот викенд предизвикаа излевање и на реките Болнска и Источка при што беа поплавени 50-тина куќи на територијата на Општина Ресен, во југозападниот ден на Северна Македонија.
Поради поплавувањата, Агенцијата за храна и ветеринарство (АХВ) претходно во текот на неделата издаде препораки за безбедност на храната, водата за пиење и заштита на животните.
„Доколку во регионите каде веќе има излевање на реките и поплавување на домовите и земјоделските површини и водоснабдувањето се врши од индивидуални водоводни објекти, ако има видливо заматување на водата, истата да не се користи за пиење и за готвење, се до санирање на состојбата и до добивање на лабораториска потврда дека водата е безбедна“, препорача АХВ.
Од Агенцијата апелираа и редовно одржување на хигиената на рацете, готвената храна да не дојде во контакт со водата од поплавата, храната да се подготвува со безбедна вода и истата да се обработи термички (на температура повисока од 70 Целзиусови степени).
За поплавените домаќинства се препорача доколку има деца, да се хранат со индустриски обработена храна.
Во однос на заштитата на животните, АХВ потенцираше дека сопствениците имаат обврска да им обезбедат соодветна храна, вода и засолниште на безбедна локација.
ИЈЗ: Нема тешки метали во водата од училиштето „Димо Хаџи Димов“
Во мострите од водата од основното училиште „Димо Хаџи Димов“ во скопската населба Влае, Општина Карпош, не се пронајдени тешки метали, објави Институтот за јавно здравје (ИЈЗ) на 29 ноември.
Оваа здравствена институција соопшти и дека се завршени физичко-хемиската и микробиолошката анализа на водата и оти резултатите се во рамки на референтните вредности.
Голем број ученици во ова основно училиште во Карпош, на 26 ноември се пожалија на стомачни тегоби, а заклучно со вчерашниот ден седум беа задржани на болничко лекување. Сите, како што беше соопштено, имале исти симптоми – стомачни болки, повраќање, дијареја и зголемена телесна температура. Меѓу децата со симптоми, беше и помладиот син на премиерот Христијан Мицкоски.
Денешното соопштение за водата, следува откако ден претходно од ИЈЗ информираа дека во мостри од од три чешми, од мусаката што била давана на децата и од неколку работни површини во училиштето и кујната биле пронајдени фекални бактерии - Enterobacteriaceа.
Од седум примероци со биолошки материјали од деца, шест биле позитивни на норовирусот – вирус кој е проследен со повраќање и дијареја. Тој најчесто се пренесува преку вода или храна заразена со фекалии.
Од ИЈЗ велат дека во текот на викендот дежурни екипи сè уште анализираат други земени мостри и биолошки материјали добиени претходните денови и од други училишта, а дополнителни информации ќе објават в понеделник, 1 декември.
Ова не е првпат да има проблеми со храната во училишта во скопската општина Карпош. Во 2023 година, десетина деца беа заразени со салмонела во три основи училишта. Во 2024, пак, околу 140 ученици во училиште во Аеродром, исто така имаа симптоми со труење, по што кујната беше затворена.
Во Северна Македонија, дел од училиштата обезбедуваат само ужинка, други само топол оброк, а некои и двете. Не сите училишта во земјава имаат кујна каде може да се подготвува храната.
Според праксата што ја посочуваат и од училиштата и родителите, најчесто во оние школи каде не се готви, фирмата што ја доставува храната претходно ја подготвува во кујна во друго училиште каде истата го има добиено тендерот.
САД ги замрзнаа одлуките за азил по пукањето во Националната гарда
Службата за државјанство и имиграција на САД (USCIS) објави дека ќе ги замрзне сите одлуки за азил, два дена по пукањето во Вашингтон, во кое загина жена припадничка на Националната гарда.
„USCIS ги запре сите одлуки за азил сè додека не осигуриме дека секој странец е проверен и скениран во најголема можна мера“, објави директорот на USCIS, Џозеф Едлоу, на мрежата Икс на 29 ноември.
Еден ден претходно, американскиот претседател Доналд Трамп објави целосна суспензија на приемот во САД за сите лица од „земјите од третиот свет“, без да прецизира кои се тие држави или како ќе се спроведе мерката.
Неговата администрација претходно најави дека ќе ги разгледа зелените карти што биле издадени на сите странци што потекнуваат од „земјите кои предизвикуваат загриженост“.
Оваа мерка ги вклучува Авганистанци, како и луѓе од 18 други земји, меѓу кои и Иран, Либија, Сомалија, Јемен, Куба и Венецуела.
Зелената карта им овозможува на странските државјани трајно да живеат и работат во САД.
На 26 ноември, двајца припадници на Националната гарда беа застрелани на само неколку блока оддалеченост од Белата куќа.
Трамп рече дека жената припадничка на Националната гарда починала од повредите додека другиот војник е сè уште во критична состојба.
Осомничениот напаѓач, Авганистанец кој влегол во САД во 2021 година, е приведен.
Мотивот за нападот е сè уште непознат.
По инцидентот, Трамп ги обвини бегалците за социјалните проблеми во земјата.
Групите за човекови права предупредија дека нападот не треба да се експлоатира за политички цели.
Украина погодена од руски напади и корупциски скандал во пресрет на мировните преговори
Русија започна серија масовни воздушни напади врз Киев и други делови од Украина, со што стотици илјади луѓе останаа без струја, додека паралелно земјата ја тресе политички скандал што допира и до највисоките ешалони на власта.
Претседателот Володимир Зеленски на 29 ноември соопшти дека Москва лансирала „околу 36 ракети и речиси 600 дронови против обичниот живот“ во Украина, што е најновиот напад насочен кон уништување на енергетската инфраструктура на земјата додека температурите почнуваат да паѓаат.
Во нападите, кои се случуваат во време на интензивни разговори за контроверзниот мировен предлог предводен од САД, убиени се најмалку три лица, а десетици други се ранети, рече Зеленски.
„Мораме да работиме без да губиме ниту еден ден за да осигуриме дека има доволно ракети за нашите системи за воздушна одбрана и дека сè што е потребно за наша заштита и за притисок врз Русија е на место“, рече тој.
„Време е Европа да донесе одлука за замрзнатите средства доколку Москва одбие да ги прекине нападите со дронови и ракети. И секако мора да разговараме со сите партнери за потребните чекори да се стави крај на оваа војна“, додаде украинскиот претседател.
Масовниот напад доаѓа и по бурната недела што кулминираше со оставка на Андриј Јермак, влијателниот шеф на кабинетот на Зеленски, неколку часа откако Националното биро за борба против корупцијата (НАБУ) и Специјализираното обвинителство за борба против корупцијата (САПО) направија претреси во неговата канцеларија.
Рациите се спроведуваат во рамки на истрагата за корупциски скандал поврзан со наводната злоупотреба на десетици милиони долари наменети за ранливата енергетска инфраструктура на земјата.
Неколку влијателни лица поврзани со Зеленски се вмешани во шемата, иако самиот претседател не е директно инволвиран.
Откако избувна скандалот, неколку украински пратеници, вклучително и од политичката партија на Зеленски - Слуга на народот, побараа Јермак, кој е и шеф на делегацијата во преговорите со САД за прекин на војната, да си даде оставка.
Јермак, исто така, не е директно обвинет за прекршоци и за време на претресите изјави дека на истражителите им е овозможен „целосен пристап“ до неговите простории и оти тој нуди „целосна соработка“.
Пратеникот на Белата куќа, Стив Виткоф, пак, следната недела треба да отпатува во Москва, во обид на забрзување на напорите за зацврстување на мировниот предлог поддржан од САД, а за кој многу Украинци и европски лидери, се претпазливи.
Виткоф, инвеститор во недвижности без дипломатска заднина, кого Трамп го задолжи да ги води преговорите за ставање крај на војната во Русија, се очекува за време на патувањето во Москва да се сретне со Владимир Путин, што ќе биде негов шести состанок со рускиот претседател од јануари.
Се шпекулира дека зетот на Трамп, Џаред Кушнер, исто така е дел од делегацијата.
Патувањето следи по денови на преговори меѓу американски, украински и руски претставници во Киев, Женева и Абу Даби, кои беа предизвикани од протекувањето во јавност на американскиот план минатата недела.
Првичната верзија на предлогот од 28 точки ги одразува тврдокорните позиции што Русија ги зазеде од почетокот на нејзината целосна инвазија на Украина во февруари 2022 година.
Тоа ги вознемири украинските претставници, а наводно го налутило и Зеленски, кој потоа одржа билатерални разговори со американски претставници.
Тоа се рефлектираше во план од 19 точки, кој сè уште остава неколку клучни прашања на маса, вклучувајќи ја и судбината на дел од украинскиот регион Донецк, за кој Кремљ е решен да го заземе.
Други прашања го вклучуваат барањето на Кремљ на Украина да ѝ биде забрането членство во НАТО и потенцијално ограничување на големината на војската на Киев.
Шефот на кабинет на Зеленски поднесе оставка по претресот во неговата канцеларија
Андриј Јермак, влијателниот шеф на кабинетот на украинскиот претседател Володимир Зеленски, поднесе оставка неколку часа откако Националното биро за борба против корупцијата (НАБУ) и Специјализираното обвинителство за борба против корупцијата (САПО) извршија претрес во неговата канцеларија.
Зеленски ја потврди оставката во своето редовно видео обраќање до украинскиот народ на 28 ноември.
Зеленски рече дека е „благодарен“ на Јермак, кој минатата недела ја предводеше украинската делегација на разговорите со САД во Женева за можно решение на војната во Украина.
„Ставот на Украина во преговорите отсекогаш бил презентиран правилно. Тоа отсекогаш бил патриотски став. Но, сакам да нема гласини и шпекулации“, рече Зеленски.
Тој додаде дека денеска, 29 ноември, ќе одржи консултации со началникот на Генералштабот, секретарот на Советот за национална безбедност и одбрана и други функционери за тоа кој ќе го замени Јермак.
„Сто проценти од нашите сили ќе бидат фокусирани на одбраната на Украина. Сега секој мора да дејствува токму на тој начин, во интерес на нашата држава, и да ја брани нашата држава. Ова е непроменлив принцип. Средбите со американската страна ќе се одржат наскоро“, рече Зеленски.
Јермак се смета за еден од најмоќните функционери во Украина, но неговата позиција стана предмет на многу шпекулации откако корупциски скандал ја потресе земјата последните недели кога беше откриена проневера на средствата наменети за ранливата енергетска инфраструктура.
Во аферата се вмешани неколку влијателни личности поврзани со Зеленски. Откако избувна скандалот, бројни украински пратеници, вклучително и оние од политичката партија „Слуга на народот“ на Зеленски, побараа Јермак да поднесе оставка.
Зборувајќи пред Јермак да поднесе оставка, Володимир Фесенко, раководител на Центарот за политички студии „Пента“ во Киев, за Радио Слободна Европа (РСЕ) изјави дека Зеленски „има тежок избор. Особено затоа што Јермак е и шеф на делегацијата во преговорите со САД за завршување на војната“.
„Според мене, привременото отстранување би била најбалансираната компромисна опција – барем за времетраењето на истрагата“, заклучи Фесенко.
Одговарајќи на прашање од РСЕ, портпаролот на Европската комисија, Гијом Мерсие, рече дека „секоја истрага покажува дека агенции за борба против корупцијата постојат и дека им е дозволено да работат во Украина“.
„Борбата против корупцијата беше централен елемент на нашиот пакет за проширување, кој го дава нашиот општ став за ова прашање. Дозволете ми да нагласам дека борбата против корупцијата е клучна за пристапувањето на земјата во Европската Унија“, рече Мерсие.
Украина аплицираше за членство во ЕУ кратко време по почетокот на руската инвазија во февруари 2022 година и официјално стана кандидат, но сè уште не започнала формални преговори за пристапување.
Во меѓувреме, во неодамнешно интервју за „Атлантик“, Јермак рече дека откажувањето од суверени територии не е опција во мировните преговори на Украина.
Во интервјуто објавено на 27 ноември, тој рече дека сè додека Зеленски е претседател, никој не треба да очекува Украина да се откаже од која било територија.
„Ниту една разумна личност денес не би се согласила со документ што подразбира откажување од територија“, рече Јермак, според „Атлантик“.
Најдени фекални бактерии во мусаката и на три чешми во училиштето „Димо Хаџи Димов“, соопшти ИЈЗ
Во примерок од мусаката која се служела во прва смена во училиштето „Димо Хаџи Димов“ во населбата Влае се најдени грам негативни бактерии од групата на Enterobacteriaceae, фекални бактерии кои исто така се пронајдени и на три чешми во училиштето, информира Институт за јавно здравје (ИЈЗ).
Како што посочуваат од ИЈЗ, после денешната прес-конференција добиле нов резултат од примерокот од мусака која се служела во прва смена во училиштето и во неа се најдени грам негативни бактерии од групата на Enterobacteriaceae, фекални бактерии кои исто така се пронајдени и на 3 чешми во училиштето.
„Бројот на земени примероци и пристигнати материјали е екстензивен, и материјали за анализа се уште пристигнуваат“, велат од ИЈЗ.
Институтот во текот на денешниот ден одржа прес конференција и информираше за сите досега преземени активности од надлежните институции (Агенцијата за храна и ветеринарство, Државниот здравствен и санитарен инспекторат, Центарот за јавно здравје Скопје и детска Клиника) кои се во постојана комуникација и координација, како и за сите резултати од примероците и од доставените материјали за анализа.
Во основното училиште „Димо Хаџи Димов“ во Влае на 26 ноември голем број ученици се пожалија на стомачни тегоби.
Заклучно со денеска, седум деца се задржани за болничко лекување, а неколку се пратени на домашно лекување, поради симптоми поврзани со сомнеж за труење со храна. Сите примени во Клиниката имале исти симптоми - стомачни болки, повраќање, дијареа и зголемена телесна темература.
Надлежните институции соопштија дека од кујната на основното училиште се земени мостри од храна, вода, брисеви од површини и вработени.
Директорката на Институтот за јавно здравје, Марија Андоновска во изјава за медиумите попладнево истакна дека сè уште не може целосно да се заклучи од што точно е појавата на стомачни тегоби кај децата од „Димо Хаџи Димов“ во Општина Карпош, бидејќи се уште траат испитувањата.
Но досега, како што потенцира, кај носот на една вработена најдена е бактерија е Стафулококус ауреус. Кај едно од децата засега е најден норовирус.
Андоновска информира дека досега имаат 29 пријави и плус една наставничка која се пожалила на стомачни тегоби. Потенцира дека во Детската клиниката биле сместени пет дечиња, а денеска се донесени плус две деца. Информира дека сите деца се во добра здравствена состојба и се стабилни.
Мултимедија
Најпосетени
Што треба да знаете