Вести
Нема неправилности во работењето, велат од Стоматолошката комора по сомнежите за пропусти во лиценците
Имавме неколку контроли и не беа констатирани неправилности - изјави денеска (11 август), претседателот на Стоматолошката комора, Маријан Денковски.
Тој се обрати на прес конференција откако министерот за здравство, Азир Алиу во саботата информираше дека Министерството за здравство ги презема надлежностите за лиценцирање на Стоматолошката комора.
- Прво, бидејќи јавните овластувања согласно Законот за здравствена заштита, член 262, се многу широк поим и за поголемиот дел од страна на комисијата формирана од министерот за здравство воопшто нема ни вршено надзор, ниту пак која било комисија или кој било министер се имаат произнесено на кој било начин, Комора не може да знае зошто и во кој обем е т.н. времено одземање до исправање на неправилностите, односно да ги цитираме неговите зборови „до стишување на работите во Комората" - истакна Денковски.
Тој посочи и дека минатата недела имале интензивна комуникација со министерот за здравство, Алиу.
„Заклучокот беше дека, доколку има неправилности, Комората секако ќе ги вложи сите напори да се исправат“, додаде Денковски.
На денешната прес конференција, од Комората информираа дека во меѓувреме, за нивното работење се направени неколку надзори и контроли од страна на Министерството за здравство, ДСЗИ, Управа за јавни приходи, разни државни инспекторати и агенции.
Оттука, „согласно записниците од направените надзори и контроли кои ги поседува Комората, нема утврдени неправилности во кој било сегмент во работењето на Комората, па ниту во делот на јавните овластувања кои се доделени со закон“, наведоа од Комората.
Средби и со Лекарската комора
Денковски ги демантираше наводите дека на Комората ѝ биле дадени насоки од министер, а дека таа не постапила.
-Информираме дека нема вистина во тоа и не е точно дека Комората не постапила, изјави тој на прес конференцијата и најави дека ќе ги повика на разговор и консултација претходните претседатели.
- За да го слушнеме и нивното мислење, зошто по она што знаеме засега, се работи за некои „незаконски" постапки на Комората уште од 2016 година, па дури и порано, односно од 2006 година – рече Денковски.
Тој информираше дека ќе има средба и со Лекарската комора.
-Ако кај нас, во стоматологија, т.н. „незаконска" едукација вршеле околу 15-ина, како што беа наречени, нерегистрирани здруженија, во Лекарската комора, во системот на Континуирана медицинска едукација учествуваат или учествувале над 80 такви здруженија - меѓу кои доминираат членки на Македонско лекарско друштво, истакнаа од Комората.
Понатаму, посочија и дека планирааат свикувања на вонредни седници на Извршниот одбор и на Собранието на Комората.
- Сите ние во Комората сме спремни на сите последици доколку имаме згрешено, но исто така доколку се потврди дека Комората нема финасиски или други криминали, сосема реално е да бараме и очекуваме јавно извинување до целокупната македонска јавност и целокупното членство на Комората – истакнаа претставниците на Стоматолошката комора.
Реакција на Министерството за здравство
По нивната прес конференција, од Министерството за здравство се огласија преку писмено соопштение во кое наведуваат дека „одлуката е донесена врз основа на факти“.
-Потсетуваме дека на овој процес претходеше времена мерка изречена од Уставен суд, а потоа и конечна одлука од истата институција со која се запира извршувањето на поединечните акти и дејствија, а дополнително покрај времената мерка, Комората продолжила со континуираната едукација. Паралелно, во прилог на оваа одлука е и извештајот од Државната комисија за спречување на корупција, пишува во соопштението.
Министерството за здравство, како што се додава, за оваа цел имаше формирано две комисии за надзор над законитоста на работата на Комората и „во двата случаи се констатирани неправилности на кои е укажано со законски рок за отстранување на истите, но, во законските рокови не е постапено од страна на Стоматолошката комора“.
- Потенцираме дека по извршениот надзор на првата комисија, формирана во 2024 година, воопшто не е постапено по препораките, односно во целост се неточни тврдењата дека комисиите „немаат утврдени неправилности во кој било сегмент од работењето во Комората“, додека втората комисија веќе дава јасни насоки до МЗ за утврдените неправилности, недостатоци и предлог за дејствија што треба да се преземат, истакнуваат од Министерството за здравство.
Претходно, во саботата министерот Алиу соопшти дека Министерството за здравство ги презема надлежностите за лиценцирање на Стоматолошката комора.
Тој тогаш изјави дека „одземањето на надлежностите, односно на јавното овластување на Стоматолошката комора се сѐ додека не се воспостави систем преку кој Комората ќе работи законито, транспарентно и професионално“.
види ги сите денешни вести
ДИК: Гласањето на болните и затворениците се одвива без проблеми
Гласањето на болните и изнемоштени лица, затвореници и лица сместени во установи за вонсемејна грижа денеска се одвива непречено и без пријавени потешкотии, информира Државната изборна комисија (ДИК).
„Гласањето е спроведено навреме, немаме никаков проблем ниту со изборен материјал, ниту со изборни органи. Нема забелешки, приговори или поплаки,“ изјави претседателот на ДИК, Борис Кондарко, на продолжението на 151. седница на Комисијата.
Тој појасни дека гласовите од денешното гласање нема да се бројат одделно, туку ќе бидат запечатени и приклучени кон утрешното гласање, а потоа ќе бидат објавени како дел од вкупните резултати. По завршувањето на гласањето, ДИК ќе објави дополнително соопштение за одѕивот.
На денешната седница, ДИК разгледа и неколку приговори поврзани со избирачкото право. Четири приговори беа усвоени, со што подносителите добија можност да гласаат, бидејќи ги исполнуваат законските услови, додека три приговори беа одбиени како неосновани.
Според податоците на Комисијата, своето избирачко право денеска го остваруваат 4.826 болни или немоќни лица, 1.256 лица во 14 казнено-поправни установи и 214 лица сместени во 13 центри за вонсемејна грижа.
Во вториот круг од локалните избори, што ќе се одржи утре, граѓаните ќе избираат градоначалници во 32 општини и во Градот Скопје, како и советници во Шуто Оризари. Право на глас имаат 1.013.375 граѓани.
ДИК потврди дека изборниот процес ќе го следат 1.622 набљудувачи, од кои 957 домашни, 651 меѓународни и 14 странски новинари.
Фронтекс ја започна првата целосна операција во БиХ
Европската агенција за гранична и крајбрежна стража Фронтекс ја започнува својата прва целосна операција во Босна и Херцеговина, отворајќи ново поглавје во соработката на Западен Балкан, објави агенцијата.
„Повеќе од 100 службеници на Фронтекс од цела Европа наскоро ќе работат рамо до рамо со граничните полицајци од Босна и Херцеговина на границите на земјата“, соопшти агенцијата.
Заедничките тимови ќе помогнат во зајакнувањето на управувањето со границите, борбата против прекуграничниот криминал и подобрувањето на размената на информации, а операцијата ќе донесе и дополнителна опрема, обука и европска експертиза за поддршка на секојдневната работа на границите на Босна и Херцеговина.
„Заедничката работа прави вистинска разлика“, рече Ханс Лајтенс, извршен директор на Фронтекс. „Нашите службеници ќе стојат рамо до рамо со своите босански колеги, помагајќи во безбедното и законско управување со границите. Вака изгледа европската соработка во пракса.“
Почнувањето на операцијата е по години подготовка и тесно партнерство меѓу Фронтекс и босанските власти, соопшти Фронтекс.
Извршниот директор Лајтенс присуствуваше на церемонијата во Сараево по повод почетокот на оперативното присуство на Фронтекс во Босна и Херцеговина, заедно со Магнус Брунер, европски комесар за внатрешни работи и миграција, и Дубравка Бошњак, министерка за граѓански работи на Босна и Херцеговина.
„Безбедноста на Западен Балкан е безбедност на Европа - нашите предизвици во овие области се заеднички. Врз основа на Договорот со Босна и Херцеговина, Фронтекс сега ја поддржува граничната полиција во сите земји од Западен Балкан, придонесувајќи за намалување на нелегалните гранични преминувања за над 90 проценти во последните три години. Заедно, ја правиме Европа побезбеден континент“, рече директорот Лајтенс.
Вршителот на должноста министер за безбедност на Босна и Херцеговина, Ивица Бошњак, рече дека ова е „значаен чекор напред и дел од поширокиот процес на европска интеграција на Босна и Херцеговина и нејзиниот придонес кон колективната европска безбедност“.
„Денес, нашите членови на Граничната полиција на Босна и Херцеговина стојат рамо до рамо со членовите на Европската агенција за гранична и крајбрежна стража (Фронтекс), а оваа соработка во управувањето со границите и заедничките операции е видлива и на Меѓународниот аеродром во Сараево и на одредени гранични премини“, истакна Бошњак.
Фронтекс веќе го поддржува управувањето со границите надвор од ЕУ во Албанија, Молдавија, Црна Гора, Северна Македонија и Србија, тесно соработувајќи со националните власти за борба против прекуграничниот криминал и управување со миграцијата на ефикасен и хуман начин. Новата операција во Босна и Херцеговина дополнително ја проширува оваа регионална соработка, вели агенцијата.
Спогодбата за статус меѓу Европската Унија и Босна и Херцеговина му обезбедува на Фронтекс правна рамка за распоредување членови на Постојаниот корпус и спроведување заеднички операции на територијата на Босна и Херцеговина под команда на земјата домаќин.
Босна и Херцеговина стана петти партнер во Западен Балкан каде што Фронтекс работи во рамките на таква правна рамка, заедно со Албанија, Црна Гора, Северна Македонија и Србија, зајакнувајќи ја регионалната оперативна покриеност на Агенцијата.
Овој чекор се надоградува на долгогодишна соработка што веќе вклучуваше заедничка анализа на ризик, обука и размена на ситуациски информации, како и експертска поддршка на националните капацитети, кои сега станаа видливи и оперативни преку теренски распоредувања, соопшти Фронтекс.
Десетици илјади оддаваат почит на жртвите на железничката станица во Нови Сад
Комеморативен собир во Нови Сад во спомен на 16-те жртви од уривањето на настрешницата на железничката станица. Неколку групи студенти и граѓани пристигнаа во градот пешачејќи со денови. Една година по трагедијата, никој не е прогласен за виновен. Српската влада прогласи Ден на жалост.
Пораки од говорниците: „Нивните раце се крвави“
Наѓа, студентка на Филозофскиот факултет во Нови Сад, која се обрати пред толпата, рече дека Нови Сад сè уште е обвиен во црно.
„Пролетта никогаш не дошла овде. Семејствата на жртвите заслужуваат да знаат кој ги убил нивните најблиски и дека виновниците ќе бидат одговорни. Затоа сме на улица една година. Ви благодариме што сте со нас“, рече таа.
Таа додаде дека пораката е сè уште иста - „нивните раце се крвави“.
До каде стигна истрагата за кривична одговорност и корупција?
Обвинението во истрагата за кривична одговорност, кое треба да утврди што довело до уривањето на настрешницата, а во кое е вклучен, меѓу другите, и поранешниот министер за инфраструктура Горан Весиќ, е во Вишиот суд во Нови Сад, кој треба да го потврди или отфрли. Судењето може да следи дури потоа.
Обвинението го поднесе Вишото јавно обвинителство во Нови Сад на 30 декември 2024 година, а меѓу обвинетите, покрај Весиќ, се и неговата поранешна помошничка Анита Димоски, поранешната директорка на Инфраструктурата на српските железници Јелена Танасковиќ и нејзиниот претходник на чело на тоа јавно претпријатие, Небојша Шурлан.
Со одлука на Вишиот суд во Нови Сад, ниту еден од обвинетите во моментов не е во притвор.
Весиќ, заедно со уште еден поранешен министер за инфраструктура, Томислав Момировиќ, е вклучен и во истрагата за можна корупција за време на реконструкцијата на железничката пруга Белград-Будимпешта, во која е вклучена и железничката станица во Нови Сад. Истрагата против 14 лица ја води Јавното обвинителство за организиран криминал во Белград од август.
Сè уште не е познато дали кинескиот конзорциум кој беше изведувач е исто така под истрага.
Пицула: Граѓаните имаат право на вистината
Известувачот на Европскиот парламент (ЕП) за Србија, хрватскиот европратеник Тонино Пицула, изјави дека ваквите настани, кога умираат 16 лица, „мора да бидат повик за одговорност и правда“.
„Ваквите настани не смеат да останат само во нашето сеќавање - тие мора да бидат повик за одговорност и правда. Граѓаните имаат право на вистината и систем кој е способен да спречи таква трагедија да се случи повторно“, напиша тој на веб-страницата на Икс.
Српската дијаспора ја одбележува и годишнината од трагедијата во Нови Сад
Српската дијаспора се собра во центарот на Мадрид на плоштадот Пуерта дел Сол во центарот на градот, организирана од студенти, каде што беше одржано 16-минутно молчење за 16-те жртви од уривањето на крошната.
Вучиќ: Најважно е Србија да биде достоинствена и обединета
Српскиот претседател Александар Вучиќ присуствуваше на комеморацијата за жртвите во Нови Сад во храмот Свети Сава.
Тој напиша на Инстаграм дека помина една година од денот што ја промени Србија засекогаш.
„Шеснаесет животи беа изгубени поради уривањето на настрешницата на железничката станица во Нови Сад. Денес, палиме свеќа за секој од нив, молејќи се во тишина и верувајќи дека нивните имиња и спомени ќе останат засекогаш во нашите срца“, рече тој.
Додаде дека во овој тажен момент „најважно е Србија да биде достоинствена и обединета“.
„Денес е денот кога треба, без груби зборови и поделби, тивко да се молиме за жртвите“, додаде тој.
Една година од трагедијата со падот на бетонската настрешница во Нови Сад
Во Србија денеска се одбележува една година од трагедијата на железничката станица во Нови Сад, кога загинаа 16 лица, а неколку беа тешко повредени при уривање на бетонска настрешница.
Денеска е прогласен државен Ден на жалост, а илјадници граѓани од целата земја пристигнаа во Нови Сад за да им оддадат почит на жртвите.
Во ноќните часови, пред големиот комеморативен собир, новосаѓани и граѓани од повеќе градови одржаа 16-минутен молк и во тишина палеа свеќи пред железничката станица.
На чело на колоната, студенти носеа 16 венци со имињата на загинатите. Меѓу нив беше и македонскиот истражувач Васко Саздовски (46), кој работеше во Институтот „Биосенс“ во Нови Сад.
Трагедијата се случи на 1 ноември минатата година во 11:52 часот, кога се урна бетонска конструкција на реновирана железничка станица. Загинаа 14 лица на лице место, меѓу нив и четири деца, а уште две починаа подоцна од повредите.
Една година подоцна, одговорност за несреќата сè уште не е утврдена. Истрагата на Обвинителството за организиран криминал опфаќа 15 лица, меѓу кои и поранешни високи функционери од железничкиот сектор, но обвиненија сè уште нема. Дел од експертите обвинија дека постапките се одвиваат бавно и дека има обиди за опструкција.
По несреќата, во Србија започнаа масовни протести и студентски блокади со барања за одговорност и транспарентност во реконструкцијата на станицата.
Претседателот на Србија, Александар Вучиќ, вчера им се извини на студентите и граѓаните за „тешките зборови“ што им ги упатил во минатото, изрази жалење за трагедијата и најави дека ќе се моли за жртвите.
Тој порача дека први ноември треба да помине во тишина, без политички злоупотреби, и повторно повика на дијалог во општеството.
Железничкиот сообраќај меѓу Белград и Нови Сад денеска е прекинат без официјално објаснување, а дел од патните правци кон градот се затворени поради реконструкции.
„Целата омраза што врие во нашето општество не носи ништо добро, само води кон поголемо уништување“, рече Вучиќ во синоќешното обраќање.
Аеродромот во Берлин повторно работи нормално по прекин предизвикан од дрон
По привремената пауза поради забележан дрон во петокот навечер, аеродромот Берлин-Бранденбург (BER) денеска продолжи со нормалното работење.
Портпаролот на аеродромот за ДПА потврди дека во моментов нема ограничувања. Операциите за летање беа суспендирани за нешто помалку од два часа во петокот навечер, а голем број летови беа пренасочени.
Редовното работно време на аеродромот беше продолжено за да им се овозможи на авионите да полетуваат до 2 часот наутро (01:00 GMT) и да слетуваат во текот на ноќта со цел да се надоместат доцнењата.
Пет авиони што заминуваа го искористија исклучокот. Бројот на инциденти со дронови од непознато потекло се зголемува.
Операциите на вториот по големина аеродром во Германија, Минхен, беа нарушени поради забележани дронови на почетокот на октомври.
Киев ја обвини Русија за „нуклеарен тероризам“ со напади врз трафостаници
Киев и меѓународните власти ги осудија руските напади врз украинскиот цивилен енергетски сектор, а Украина ја обвини Москва за „нуклеарен тероризам“ поради нападот врз трафостаниците кои се клучни за снабдување со енергија на нуклеарните постројки во земјата.
„Намерните напади врз цивилните енергетски постројки кои директно влијаат на безбедното работење на нуклеарните инсталации носат обележја на нуклеарен тероризам и претставуваат сериозно кршење на меѓународното хуманитарно право“, објави украинското Министерство за надворешни работи на 31 октомври.
Министерството се повика на соопштението на Меѓународната агенција за атомска енергија (МААЕ) издадено еден ден претходно, во кое се споменуваат воени напади кои „доведоа до оштетување на трафостаниците кои се критични за нуклеарната безбедност и сигурност во Украина“.
Нуклеарното надзорно тело на ОН објави дека инцидентите во близина на нуклеарните централи Јужна Украина и Хмелницки предизвикале централите да го изгубат пристапот до надворешните далноводи.
Во соопштението на МААЕ се вели дека третата централа, во Ривно, била принудена да ја намали моќноста во два од своите четири реактори поради нападот.
„Опасностите за нуклеарната безбедност остануваат многу реални и сеприсутни, повторно повикувам на максимална воена воздржаност во близина на нуклеарните постројки“, рече шефот на МААЕ, Рафаел Гроси.
Високи тензии околу нуклеарната централа Запорожје
Големо внимание е насочено кон нуклеарната централа Запорожје на југоистокот на Украина, каде што се во тек акции за санирање на штетите предизвикани од претходните напади.
„Продолжуваме интензивно да работиме на создавање услови потребни за започнување на овие дополнителни поправки. Реставрацијата на овој далновод е од суштинско значење за подобрување на кревката нуклеарна безбедносна ситуација на локацијата“, рече Гроси.
Нуклеарната централа - најголемата во Европа - е под руска контрола откако Москва ја започна својата целосна инвазија на Украина во февруари 2022 година. Се потпира на дизел генератори за итни случаи од 23 септември, кога беа прекинати надворешните далноводи.
Шесте реактори на централата Запорожје се затворени повеќе од три години и не произведуваат електрична енергија. Но, им е потребна енергија за да работат безбедносните системи - како што се пумпи за ладење - за да се спречи нуклеарна несреќа.
Одделно, Групата седум (Г7) издаде заедничка изјава на 31 октомври „со која ја осудува војната на Русија против Украина и нејзиното влијание врз нејзината енергетска безбедност“.
„Ја потврдуваме нашата непоколеблива поддршка за Украина во одбраната на нејзиниот територијален интегритет и правото на постоење, како и нејзината слобода, суверенитет и независност“, се вели во соопштението на министрите за енергија на Г7.
„Неодамнешните руски напади врз украинската инфраструктура за природен гас создадоа ризици за заедниците и човечките животи, поткопувајќи ја цивилната инфраструктура и енергетската безбедност на украинскиот народ“, додадоа тие.
Русија негира дека таргетирала цивилна инфраструктура и покрај изобилството докази за такви напади. Украина возврати со напади врз воена инфраструктура, честопати длабоко во Русија.
Киев на 31 октомври соопшти дека досега во 2025 година извршил околу 160 напади врз руски нафтени објекти, таргетирајќи го клучниот извор на финансирање што Москва го користи за водење војна. Западните земји, исто така, воведоа санкции врз енергетскиот сектор на Русија, дополнително прекинувајќи го протокот на пари кон Кремљ.
На фронтот, украинските сили продолжија да се борат да ја одржат контролата врз стратешки важниот град Покровск, цел на повеќемесечна руска офанзива.
Украинскиот претседател Володимир Зеленски изјави дека Русија распоредила околу 170.000 војници во регионот, повторно нарекувајќи ја ситуацијата таму „тешка“.
Ројтерс цитираше два украински воени извори кои велат дека Киев испратил специјални сили да помогнат во одбраната на Покровск, по извештаите дека мали групи руски војници - проценети на 200-400 - се инфилтрирале во градот за да се подготват за поголем напад. Немаше официјален коментар.
Десетици илјади луѓе ги дочекуваат студентите кои пешачејќи стигнуваат во Нови Сад
Десетици илјади луѓе во Нови Сад вечерва (31 октомври) ги пречекуваат студентите, средношколците и другите граѓани кои пеш пристигнуваат во градот за одбележување на годишнината од загинувањето на 16 лица при падот на настрешницата на Железничката станица на 1 ноември.
Прва пристигна групата студенти од Нови Пазар, на југозападот на Србија, која го помина и најдолгиот пат, а беа пречекани со огномет, факели, аплаузи и овации.
Колегите од Нови Сад им врачија благодарници „за секој изминат чекор во борбата за слобода“.
Минувајќи и стотици километри, кон Нови Сад маршираат групи студенти, средношколци и граѓани од различни делови на Србија.
Ден пред годишнината од несреќата, пристигнаа и велосипедисти од Белград, Ниш и други градови.
На комеморативниот собир на 1 ноември повикаа студентите кои една година ги предводат антивладините протести, со кои се бара кривична и политичка одговорност за несреќата.
„Солидарноста не можат да ни ја одземат“
На марш долг 400 километри, студентите од Нови Пазар тргнаа пред 16 дена, пешачејќи симболично за секоја жртва на несреќата.
„Кога тргнавме, сите мислеа дека сме луди и дека нема да успееме. А успеавме благодарение на вас и на целиот народ на Србија“, им порача на присутните студентот на Универзитетот во Нови Пазар, Енес Џоговиќ, додавајќи дека солидарноста „никогаш нема да можат да ни ја одземат“.
„Моите колеги се моето ново семејство, и како што не можат нас да нè поделат, така не можат да ја поделат ни Србија. Секој наш чекор е чекор кон подобра иднина за сите нас. Заедно ќе победиме“, рече тој.
Од Белград од 30 октомври пешачи група од околу четири илјади студенти.
Група студенти од Суботица, на северот на Србија, застанаа на патот кон Нови Сад пред куќата на Теодора Мартинко, која беше тешко повредена при падот на покривната конструкција, и ја поздравија со аплауз.
Во местата и градовите низ кои минуваа студентите, граѓаните им организираа пречек.
Најголемиот пречек беше во Белград, кога студентите од Нови Пазар во центарот на градот ги поздравија илјадници луѓе со црвен тепих, факели и огномет.
Владата на Србија го прогласи 1 ноември за Ден на жалост, а претседателот на Србија, Александар Вучиќ, на 31 октомври упати апел за мирно одбележување на годишнината од несреќата и повторно повика на дијалог.
Бетонската настрешница се урна само неколку месеци по свеченото отворање по реконструкцијата.
Трамп потврди дека САД ќе извршуваат нуклеарни проби
Претседателот, Доналд Трамп повторно потврди в петок дека САД ќе го обноват нуклеарното тестирање, но не одговори директно кога беше прашан дали тоа ќе вклучува подземни нуклеарни тестови кои беа чести за време на Студената војна.
„Ќе дознаете многу скоро, но ќе направиме некои тестирања“, им рече Трамп на новинарите одговарајќи на прашање за подземни нуклеарни тестови.
„Другите земји го прават тоа. Ако тие ќе го направат, и ние ќе го направиме, во ред?“, додаде тој.
Трамп во четвртокот рече дека ѝ наредил на американската војска веднаш да го започне процесот за тестирање нуклеарно оружје по прекин од 33 години, потег кој изгледаше како порака до ривалските нуклеарни сили Кина и Русија.
Трамп ја направи оваа изненадувачка објава на социјалните мрежи додека леташе кон Пусан, Јужна Кореја за да се сретне со кинескиот претседател Си Џинпинг за трговски преговори.
Сепак, не е јасно дали Трамп алудираше на тестирање со нуклеарни експлозиви, кое би го спровела Националната администрација за нуклеарна безбедност, или на тестирање на лансирање ракети со нуклеарен капацитет.
За време на патувањето во Малезија, пак, американскиот секретар за одбрана Пит Хегсет рече дека повторното тестирање е „одговорен начин“ за одржување на нуклеарната одбрана и дека Пентагон ќе соработува со Министерството за енергија.
„Се движиме брзо“, рече Хегсет.
Во последните 25 години, освен Северна Кореја во 2017, ниту една нуклеарна сила нема спроведено експлозивни нуклеарни тестови.
Ројтерс
Вучиќ повика на мирно одбележување на годишнината од трагедијата во Нови Сад
Претседателот на Србија, Александар Вучиќ повика на мирно одбележување на годишнината од загинувањето на 16 лица при падот на настрешницата на Железничката станица во Нови Сад.
Во обраќањето до јавноста тој изјави дека ќе отиде во црква и ќе запали свеќи за настраданите, повикувајќи ги и граѓаните да го сторат истото.
„Знам дека во тага некои луѓе бараат утеха во собири, секој тагува на начин на кој смета дека е најдобро, сè додека тоа се прави во мир, јас целосно го поддржувам тоа“, порача тој.
Пред една година, на 1 ноември 2024 година, при падот на бетонската настрешница на реконструираната Железничка станица во Нови Сад загинаа 16 лица, а едно лице беше тешко повредено.
За време на обраќањето, Вучиќ изјави дека многумина во изминатата година направиле грешки, вклучувајќи го и него самиот.
„Во некои моменти и јас кажав нешта за кои ми е жал што сум ги изговорил — за студентите, демонстрантите и другите луѓе. Се извинувам поради тоа“, рече Вучиќ, без да наведе на кои изјави мисли.
Тој истакна и дека знае оти некои луѓе сè уште се лути затоа што „сè уште не се утврдени виновниците, а камоли казнети“ за падот на настрешницата.
„И за мене тоа е разочарувачки, иако таквите процеси се сложени и траат долго и во други земји. Можам да го разберам гневот на семејствата. Искрено се надевам дека на тие прашања наскоро ќе биде даден одговор“, изјави претседателот на Србија.
Повторно ги повика на дијалог граѓаните кои протестираат барајќи кривична и политичка одговорност за падот на настрешницата.
„Вистинската правда мора да биде задоволена, но не на улиците“, порача тој и изрази сочувство до семејствата на настраданите.
Одговор на студентите: Повик за дијалог и помирување поради странските новинари
Студентите кои го блокираат Факултетот за технички науки во Нови Сад, набргу по обраќањето на претседателот на Србија, одговорија на неговиот повик за дијалог.
„Ако се прашувате зошто повторно нуди дијалог и помирување, а пред еден месец нареди сите да нè претепаат и уапсат, утре во Нови Сад се очекува пристигнување на 47 екипи странски новинари, претежно од Европа, но и од целиот свет. Ете затоа“, стои во нивната објава на Инстаграм.
Во Србија веќе една година траат протестите, предводени од студентите кои се во блокада, поради трагедијата во Нови Сад. На тие протести се бара одговорност за падот на настрешницата и распишување на вонредни парламентарни избори, што власта го одбива.
Во Нови Сад, во сабота на 1 ноември, ќе биде одбележана годишнината од трагедијата.
Кон големиот комеморативен собир денови наназад пешачат бројни студенти и граѓани од сите делови на Србија.
„Инклузива“: Да се подобри пристапноста на гласачките места за лицата со попреченост
Напредокот е видлив, но потребно е дополнително да се подобри пристапноста на гласачките места за лицата со попреченост, оценија денеска (31 октомври) од Здружението за промоција и развој на инклузивно општество „Инклузива“ Куманово.
Дел од гласачките места во првиот круг од локалните избори останаа непристапни за лицата со попреченост.
Од здружението „Инклузива“ укажаа дека параваните за гласање не биле соодветно поставени, а во некои објекти гласањето се одвивало на вториот кат, без функционални лифтови.
„Сѐ уште има гласачки места во тесен простор каде што лице со помагало или со придружник не може да помине. Во првиот круг имавме случаи каде што се гласа на втор кат, иако постојат слободни простории на приземје“, изјави претседателката на здружението, Благица Димитровска.
Таа напомена дека недостигот од пристапност претставува системска пречка за остварување на основното избирачко право на оваа категорија граѓани.
И покрај забелешките, од здружението посочуваат дека има и позитивни примери. На овие избори на листите за советници се најдоа десет лица со попреченост, а имаше една кандидатка за градоначалник.
Политичките партии, според здружението, ги приспособиле дел од програмите за потребите на лицата со попреченост.
„Напредокот е видлив, затоа што алатките што ги развивме во соработка со Државната изборна комисија веќе се дел од Изборниот законик и се користат на гласачките места“, додаде Димитровска.
Од „Инклузива“ очекуваат идните локални власти да вложат поголеми напори во подобрување на пристапноста на јавните простори и институции.
Како што и претходно објави Радио Слободна Европа, ова здружение во 2020 година нотираше дека 76 проценти од избирачките места не биле пристапни, а и во пресрет на првиот круг од годинашните локални избори на 19 октомври, изјавија дека ситуацијата не е променета.
В недела пак, македонските граѓани ќе гласаат на вториот круг за градоначалници во 33 општини, откако во првиот круг ниту еден од кандидатите таму не обезбеди мнозинство.
Мултимедија
Најпосетени
Што треба да знаете