Министерството за финансии на САД на 20 јули објави дека воведува санкции за речиси 120 поединци и компании за поддршка на руската инвазија на Украина.

Меѓу санкционираните е и фирма од Србија, МЦИ Трејдинг ДОО, со седиште во Белград.

Во соопштението на американското Министерство се наведува дека оваа компанија и помогнала на руската компанија АК Микротек да набави високотехнолошка опрема од производители од Азија, Европа и Блискиот Исток.

Руската фирма АК Микротех е обвинета за обезбедување на високотехнолошка опрема за руската одбранбена индустрија.

Во соопштението за печатот се наведува дека оваа фирма е специјализирана за трансфер на странска технологија на руските компании за производство на микроелектроника, вклучително и оние кои обезбедуваат микроелектроника на руската одбранбена индустрија.

„Голем број од овие крајни корисници се на списокот на блокирани лица и ентитети од САД“, се вели во соопштението, додавајќи дека „АК Микротек“ користи неруски посредници за да ги прикрие руските примачи.

Еден од таквите посредници е српската компанија МЦИ Трејдинг ДОО“, се вели во соопштението.

Како што е наведено понатаму, МЦИ Трејдинг испратил десетици пратки до руската фирма АК Микротех од почетокот на руската инвазија на Украина во февруари 2022 година.

Компанијата МЦИ Трејднг и нејзиниот директор Иван Цветиќ се најдоа на листата на санкции за, како што се наведува, материјална помош, спонзорирање или давање финансиска, материјална или технолошка поддршка на компанијата АК Микротек.

Покрај компанијата од Србија, САД ставија речиси 120 поединци и компании на листата на санкции.

„Овие санкции ќе го ограничат пристапот на Русија до критичните материјали, ќе го инхибираат нејзиното идно производство и извоз на енергија, ќе ја ограничат нејзината употреба на меѓународниот финансиски систем и ќе ги спречат соучесниците во затајувањето и заобиколувањето на санкциите“, се вели во соопштението.

Американскиот заменик-секретар за финансии Воли Адејемо рече дека новите санкции претставуваат уште еден чекор во напорите на САД да ги ограничат руските воени капацитети.

„Сè додека Русија продолжува да ја води својата неиспровоцирана и брутална војна против Украина, ние ќе воведуваме санкции за да ја лишиме Русија од технологијата што и е потребна и да ја нарушиме способноста на руската индустрија за оружје да се снабдува себеси“, рече Адејемо.

Меѓу санкционираните нема лица или компании од Република Северна Македонија.

Поради празникот Задушница, оваа сабота на 1 ноември, нема да се одржи „Марш на ангелите“, соопшти на Фејсбук Здружението на граѓани „16 март 2025 Кочани“.

„Овој ден е да им запалиме свеќа, да се помолиме за нивниот вечен мир и да им оддадеме достојна почит на сите наши најмили што не се меѓу нас. Следниот марш ќе биде најавен дополнително“, се вели во соопштението на Здружението.

Родителите на починатите во пожарот во т.н. дискотека „Пулс“ во Кочани изминатата сабота го одржаа 28. „Марш на ангелите“, барајќи правдата и вистината за овој случај да излезат на виделина.

Родителите остануваат на ставот дека блокадите ќе продолжат сѐ додека не почне судењето. Поради изјавите на дел од адвокатите на обвинетите дека судскиот процес може да трае и до 15 години, сметаат дека се подготвува јавноста за одолговлекување и заборавање на случајот.

Претходно, ги повикаа судиите од Кривичниот суд да се мобилизираат и што побргу да го закажат судењето за случајот и обвинетите да седнат на обвинителна клупа.

На почетокот на октомври, Кривичниот суд во целост го одобри обвинението за пожарот во дискотеката „Пулс“ во Кочани. За најголемата трагедија што се случила во Северна Македонија ќе има судски процес и на обвинителна клупа ќе седнат 34 лица, а обвинети се и три фирми.

Пожарот во „Пулс“ зеде 63 жртви.

Изградбата на гасниот интерконектор меѓу Северна Македонија и Србија, кој треба да придонесе за енергетската безбедност и диверзификација на снабдувањето со гас во регионот, беше во фокусот на денешната средба на министерката за енергетика, рударство и минерални суровини, Сања Божиновска, со помошничка министерка за рударство и енергетика на Србија, задолжена за меѓународна соработка и европска интеграција, Јована Јоксимовиќ.

Средбата се одржа во рамки на 14. Меѓународен форум за енергија и одржлив развој, кој веќе втор ден се одржува во Скопје.

И двете министерки го споделија ставот дека проектот треба да се реализира во забрзана динамика, за да се овозможи поврзување на гасните системи на двете земји и пристап до нови извори на гас, соопшти Министерството за енергетика, рударско и минерални суровини.

На маргините на форумот дополнително се одржа и работен состанок на кој се дискутираше координацијата на институциите и операторите во двете земји за реализација на проектот. Биле разгледани процедурите и техничките чекори за понатамошно убрзување на активностите.

„Гасниот интерконектор со Србија е еден од најважните регионални инфраструктурни проекти што ќе овозможи вистинска енергетска стабилност и сигурност. Овој проект не е важен само за Македонија и Србија – тој е значаен и за цела Европа. Со оваа нова енергетска врска, двете земји добиваат пристап до алтернативни извори и рути, а Европа добива посилен и подобро поврзан Балкан. Ова е чекор што ја позиционира нашата земја како активен и одговорен партнер во новата енергетска карта на Европа. Нашата заедничка цел е овој проект да се реализира во најкраток можен рок – затоа што секој ден е важен за нашата енергетска иднина. Со заеднички напори ќе го реализираме овој проект, во тесна координација и постојана комуникација со нашите партнери од Србија“, изјави Божиновска.

Јоксимовиќ порача дека заеднички ќе работат интерконекторот да стане реалност во најскоро време. Истакна дека гасниот интерконектор со државава е проект кој има значење, како што рече, подалеку од нашите граници.

„Тој е дел од визијата за регион кој е енергетски поврзан, сигурен и усогласен со европските цели. Србија и Северна Македонија заедно покажуваат дека со партнерство и заедничка стратегија можеме да обезбедиме стабилна и предвидлива енергетска иднина. Соработката меѓу нашите две земји во областа на енергетиката е пример како регионалното партнерство може да донесе конкретни резултати. Соработката со колешката Божиновска и со македонскиот тим е интензивна и исклучително конструктивна. Уверена сум дека со заедничка координација и поддршка на нашите оператори ‘Србијагас’ и ‘Номагас’, ќе создадеме нова енергетска оска на стабилност меѓу двете земји. Имаме јасна динамика, завршени студии и поддршка од европските институции. Следниот чекор е координирана акција за изградба“, изјави Јоксимовиќ.

Со гасниот интерконектор Србија – Македонија треба да се овозможи двонасочна врска за транспорт на природен гас меѓу двете држави, што ќе значи пристап до нови извори на снабдување.

По Меморандумот за разбирање за изградба на интерконекторот, што го потпишаа двете влади, таков документ потпишаа и националните оператори „Србијагас“ и „Номагас“, а со цел забрзување на реализацијата на проектот.

Гасоводот е во должина од 70 километри, од кои 47 во Србија, а 23 во државава.Кај нас ќе биде поврзан со постојниот гасовод кај Клечовце, а во Србија со гасоводот во Врање. Проектот претставува стратешка енергетска врска што треба да овозможи диверзификација на изворите на гас, поголема енергетска сигурност и регионална интеграција на гасните пазари.

Изградбата на интерконекторот повторно се актуелизира во македонската јавност, откако Европската унија воведе нови санкции кон Русија.

Советот на Европската Унија го поддржаа предлогот за укинување на увозот на рускиот природен гас од 1 јануари 2026 година, но дека ќе има преоден период за склучените договори од 1 јануари 2028година.

Северна Македонија има долгорочен договор за набавка и е целосно зависна од рускиот гас, кој доаѓа преку Бугарија. Претходно, Божиновска рече дека нема простор за паника и дека во случај и да не работи, нема да останеме без гас, бидејќи ќе има решение на ниво на ЕУ.

Канцеларијата за контрола на странски средства (ОФАК) на Министерството за финансии на САД ги отстрани Милорад Додик, претседателот на Алијансата на независни социјалдемократи и членката на Претседателството на Босна и Херцеговина, Жељка Цвијановиќ од листата на санкции.

Претходно санкционираните членови на семејството на Додик, нивните компании и блиски соработници, исто така, се отстранети од листата.

ОФАК веќе двапати го санкционираше Додик, за анти-Дејтонски активности.

Покрај Додик, од листата на санкции се отстранети и 48 физички и правни лица кои претходно беа санкционирани според Програмата за санкции за Западен Балкан.

Во одлуката е наведено дека од списокот на санкционирани се отстранети и децата на Милорад Додик, Игор и Горица, како и политичари од партијата на Додик и други блиски соработници: Ненад Стевандиќ, Сташа Кошарац, Радован Вишковиќ, Синиша Каран, Ален Шераниќре, Миланка Букетар. Голиќ, Драган Станковиќ, Душко Перовиќ, Душан Перовиќ, Бранислав Окука, Ѓорѓе Ѓуриќ, Владимир Перишиќ, Александар Добриќ, Мирко Добриќ, Влатко Вукотиќ, Марко Гујаниќиќ, Немања Рељин, Дажериќко Селјард Филиповиќ, Павле Ќоровиќ, Радмила Бојаниќ и Синиша Додик.

Исто така, компаниите поврзани со семејството Додик повеќе не се санкционирани: Алтернативна телевизија, Фруит Еко д.о.о. Агапе Горица Додик и Ивана Додик, Агапе Ресторан, Агро воќе д.о.о. Лакташи, Глобал Либерти, Инфинити Медиа, К-2 фирмс, УНА телевизија, Инфинити Интернешнл, Проинтер, Калдера Компани, Сириус, Елпринг д.о.о., Нимбус Иновејшнс д.о.о., Зелена јабука д.о.о., Ворто д.о.о., Бест Сервис д.о.о., Агапе Бест д.о.о., Сее медиа рисрч.

Пред десетина дена, ОФАК од списокот со санкции отстрани четири лица од босанскиот ентитет Република Српска, кои беа вклучени за организирање прослави на 9 јануари, неуставниот ден на Република Српска.

Во декември минатата година, властите на РС потпишаа договор со американската адвокатска фирма „Zell & Associates International Advocates“ за лобирање во САД за укинување на санкциите против Милорад Додик и Жељка Цвијановиќ, промовирање на дијалогот меѓу РС и администрацијата на Доналд Трамп и преиспитување на Дејтонскиот договор и улогата на високиот претставник во Босна и Херцеговина.

Според документот за регистрација што го виде Радио Слободна Европа, адвокатската фирма ќе ги постигне овие цели во САД преку комуникација со претставници на извршната и законодавната власт таму, како и со невладиниот сектор.

Досега, договорите на РС со лобистички и адвокатски фирми во САД главно се однесуваа на промоција на инвестиции и правни совети, а овие услуги чинат десетици илјади долари месечно.

Претседателката на Северна Македонија, Гордана Сиљановска-Давкова во рамки на учеството на осмиот Париски мировен форум, се обрати на сесијата посветена на младите и европската перспектива на Балканот. Таа укажа на суштинската важност на регионалната соработка и повика на разбирање и дијалог, потенцирајќи дека евроинтеграцијата не може да биде диктат, туку е дијалог.

„Регионалната соработка за мене е неверојатно важна. Не може да избегаме од регионот, тој ни е судбина, ова важи не само за нас кои се уште чекаме да станеме кандидати или да ги завршат некои држави преговорите со ЕУ, но и за оние коишто веќе се во ЕУ, а припаѓаат на нашиот регион“, изјави Сиљановска-Давкова по завршувањето на сесијата, со која модерираше Мишел Дикло од „Институтот Монтејн“.

На сесијата претседателаката зборуваше и за безбедносната состојба во Европа поради која, како што рече, „не смееме да бидеме оставени во геополитички вакуум и го реафирмираше ставот дека проширувањето на Унијата е безбедносно, а не само прашање на проширување“.

„Она што е чудно е што во 2019 година беа сменети правилата на играта среде игра, што е невообичаено ни за спортски натпревари, ниту пак во политички преговори, бидејќи беше воведена нова методологија“, истакна Сиљановска-Давкова во изјавата.

Според неа, од интерес за регионалната стабилност и демократија, но и за Европската Унија е да гледа на регионот како на систем на врзани садови и да направи храбар чекор како оној во 2004 година, односно да покаже иновативност во креирањето на конечни решенија за т.н. Западен Балкан, како неразделен дел од Европа.

Северна Македонија сè уште нема отворено кластери од преговорите со ЕУ бидејќи услов за тоа да се случи е вметнување на бугарската заедница во Преамбулата во Уставот, на што Владата не се согласува без гаранции дека ќе нема други условувања и нови вета од Бугарија.

Речиси една година по почетокот на масовните протести поради смртта на 16 лица во трагедијата во Нови Сад, Србија доживеа рекорден број напади врз новинари кои ги известуваат настаните, соопшти во среда меѓународната организација „Репортери без граници“.

„Од 1 ноември 2024 година, според податоците на РСФ, медиумските работници во Србија биле жртви на најмалку 89 физички напади. Вкупниот број за 2025 година е 82 случаи - највисок годишен број од 2008 година, според споредбените податоци од РСФ и нејзиниот локален партнер, Независното здружение на новинари на Србија“, соопшти РСФ.

Организацијата им оддаде почит на новинарите во Србија кои „херојски известуваат за протестите и покрај институционализираното насилство на режимот на претседателот Александар Вучиќ“.

Тие ја повикаа меѓународната заедница да им помогне на новинарите да работат безбедно преку финансиска, правна и политичка поддршка и да се осигура дека нивните напаѓачи ќе бидат гонети.

„Слободата на медиумите во Србија е под закана, како и нашето право да бидеме информирани за настаните во оваа земја-кандидат за членство во Европската Унија (ЕУ), вклучително и почитувањето на правото на собирање од страна на властите“, рече Павол Салаи од РСФ.

Организацијата соопшти дека од последната проценка на РСФ во август 2025 година, два дена биле особено насилни за новинарите што ги известувале протестите во Нови Сад.

Тие потсетуваат дека на 5 септември, полицајци ги нападнале Емир Кахримановиќ од порталот 021.rs, Катарина Стевановиќ од неделникот Време, Немања Шаровиќ од каналот КТВ, како и Ксенија Павков и нејзиниот снимател од телевизијата Н1.

Истиот ден, потсетува организацијата, за време на рација на Универзитетот во Нови Сад, полицијата привела неколку членови на студентскиот уреднички тим на информативниот портал Блокада и им ја конфискувала опремата.

Нешто повеќе од еден месец подоцна, на 11 октомври, полицајци употребиле прекумерна сила против Дарија Матиќ од порталот Машина.рс, Бранкица Матиќ од порталот Сторителер, како и Миљко Стојановиќ и Анѓела Рисантијевиќ од порталот Глас Зајечара, според Репортери без граници.

„Истиот ден, еден човек ја заканил и ја следел новинарката на телевизијата Н1, Леа Апро, пред да ја зграби за рака и да ѝ го земе телефонот - по што бил приведен од полицијата, што е ретка појава“, соопшти организацијата.

„Репортери без граници“ потсетува дека на 22 октомври, Европскиот парламент усвои резолуција во која остро ја критикува српската влада за слободата на медиумите.

„Документот потврдува дека „неколку новинари биле нападнати или им била одбиена заштита додека известувале за протестите“ и го осудува поттикнувањето на омраза од страна на српскиот претседател Александар Вучиќ кон демонстрантите и новинарите“, потсетува РСФ.

Една недела пред Европскиот парламент да ја усвои резолуцијата, претседателката на Европската комисија, Урсула фон дер Лајен, за време на состанокот во Белград со Александар Вучиќ, се ограничи на порака за потребата од „напредок во однос на слободата на медиумите“.

Сепак, девет меѓународни организации за заштита на слободата на печатот и правата на новинарите, вклучувајќи ја и РСФ, ја предупредија за опасниот преседан што неактивноста на Европската Унија во Србија може да го постави во регионот на Западен Балкан.

„Инструментите што ѝ се достапни на Комисијата, вклучително и суспензијата на средствата од ЕУ, треба да се применат за да се испрати јасна порака за посветеноста на Европската Унија на независно новинарство и слобода на медиумите во регионот“, рекоа деветте организации во заедничка изјава на 13 октомври.

Од 180 земји и територии во Индексот на слобода на печатот во светот на „Репортери без граници“ за 2025 година, Србија е на 96-то место.

Речиси 27.000 домаќинства во јужниот регион Одеса во Украина се без електрична енергија по синоќешниот руски воздушен напад врз енергетски објект, соопшти денеска (29 октомври) енергетската компанија ДТЕК.

Нападот ја оштетил и транспортната инфраструктура, напиша воениот гувернер на црноморскиот регион, Олег Кипер, на Телеграм.

Украинското Министерство за енергетика пријави нови руски напади врз енергетските системи во регионите Одеса, Дњепропетровск и Доњецк, пренесе ДПА.

Со оглед на тоа што електричната мрежа е веќе ослабена од претходните напади, некои области се соочуваат со повеќечасовни прекини на електричната енергија, што влијае и на индустријата и на приватните домаќинства.

Властите соопштија дека едно лице е убиено во синоќешните напади.

Украинското воено воздухопловство информираше дека руската војска лансирала 126 дронови, од кои 93 биле соборени.

Холанѓаните се враќаат на гласачките места во среда, 29 октомври, само 23 месеци откако Партијата за слобода (ПВВ), предводена од Герт Вилдерс, постигна најголем успех на изборите во ноември 2023 година.

Крајнодесничарската партија освои 37 од 150 места во долниот дом на парламентот.

Коалиција предводена од високиот државен службеник Дик Шуф беше формирана во јули 2024 година, по интензивни преговори. Таа влада траеше помалку од една година, бидејќи Вилдерс го забрза нејзиниот пад во јуни, предизвикувајќи предвремени избори.

На денешните избори кои се оценуваат како најнеизвесни во последниве неколку децении до 10: 30 часот гласале околу 12 отсто од регистрираните гласачи.

Како што јавуваат холандските медиуми, оваа излезност е пониска во споредба со претходните избори во ноември 2023, кога до 10:30 часот одзивот беше 14 проценти.

Своето гласачко право уште претпладнево го остварија лидерите на водечките политички партии.

За да се олесни гласањето на граѓаните, поставени се гласачки места и на 50 железнички станици ширум Холандија, на кои, според централната Изборна комисија, засега нема поголеми гужви и гласачкиот процес тече непречено.

Последните анкети на јавното мислење, спроведени вчера (28 октомври), покажуваат неизвесна борба за победа меѓу Партијата на слободата (ПВВ) на Герт Вилдерс, блокот на Лабуристичката партија (ПВДА) и Зелената левица (ГЛ) на Франс Тимерманс и партијата Демократи 66 (Д66) на Роб Јетен, кои се очекува да освојат по околу 15 отсто од гласовите и по 23 пратенички места.

Околу 10.000 гласачки места за денешните избори ќе бидат отворени до вечерва до 21 часот.

Американскиот претседател Доналд Трамп изјави дека е постигнат трговски договор со јужнокорејскиот претседател Ли Џе Мјунг, пред да додаде дека договорот е „речиси“ финализиран.

„Го направивме тоа“, им рече Трамп на новинарите кога беше прашан дали е постигнат договор, без да даде дополнителни детали.

„Постигнавме договор. Направивме многу различни работи. Имавме одлична сесија“, рече американскиот лидер.

Но, подоцна го смени тврдењето, велејќи на вечера на која беше и Ли дека договорот е „скоро финализиран“.

„Дојдовме до заклучок за многу многу различни точки“, истакна Трамп.

Во јули, Трамп рече дека Вашингтон се согласил да ги намали царините за јужнокорејскиот увоз на 15 проценти во замена за инвестициски залог од 350 милијарди долари.

Но, високите царини за автомобили останаа на сила, а двете влади беа поделени околу структурата на инвестицискиот залог.

Во разговор со новинарите, главниот помошник на претседателот во Сеул, Ким Јонг-Беом, потврди дека е постигнат широк договор.

Сеул и Вашингтон „постигнаа договор за деталите од преговорите за царините“, потврди Ким.

Тој рече дека двете страни се согласиле да ги одржат реципрочните царини на 15 проценти по прелиминарниот договор постигнат во јули.

„Пакетот за финансиски инвестиции на Јужна Кореја за Соединетите Држави, вреден 350 милијарди долари, се состои од 200 милијарди долари во готовински инвестиции и 150 милијарди долари во соработка во бродоградбата“, додаде Ким.

Двете страни, исто така, се согласиле да ги „намалат царините за автомобили и автоделови на 15 од 25 проценти, соопштија од Кабинетот на Мјунг.

Вашингтон им соопшти на Романија и на сојузниците дека ќе намали дел од американските трупи распоредени на источното крило на НАТО, соопшти романското Министерство за одбрана во среда, 29 октомври.

Одлуката не е „повлекување“, изјави романскиот министер за одбрана Јонут Мостеану за новинарите кратко по објавувањето на соопштението.

„Тоа е прекинување на ротацијата на бригада што имаше елементи во неколку земји на НАТО, вклучувајќи ги Бугарија, Романија, Словачка и Унгарија“, истакна министерот.

Во соопштението на министерството се наведува дека 1000 американски војници ќе останат распоредени во Романија.

Тие ќе помогнат „да се одврати каква било закана“ и претставуваат „гаранција за посветеноста на Соединетите Држави кон регионалната безбедност“, рече Мостеану.

Функционер на НАТО за АФП изјави биле однапред информирани од администрацијата на американскиот претседател Доналд Трамп и го минимизираше овој потег.

„Дури и со ова прилагодување, позицијата на американските сили во Европа останува поголема отколку што беше со години, со многу повеќе американски сили на континентот отколку пред 2022 година“, рече функционерот, додавајќи дека посветеноста на Вашингтон кон алијансата останува „јасна“.

Мостеану рече дека стратешките капацитети се „непроменети“, прецизирајќи дека „системот за ракетна одбрана во Девеселу останува целосно оперативен.

„Воздухопловната база Кампија Турзи продолжува да биде клучна точка за воздушни операции и сојузничка соработка, базата Михаил Когалничеану продолжува да се развива, а американското знаме ќе остане присутно на сите три локации“, продолжи тој.

„Воздухопловната борбена група ќе остане во воздухопловната база Когзлничеану, како што беше случај пред избувнувањето на конфликтот во Украина“, додаде тој.

Неговото министерство, исто така, рече дека „одлуката била очекувана“ и дека е „резултат на новите приоритети на (американската) администрација, објавени во февруари“.

Билал Касами, еден од лидерите на ВРЕДИ и кандидат за нов мандат за градоначалник на Тетово, вели дека неговата изјава за поддршка на кандидатот на НАИ во Кичево, Фатмир Дехари била погрешно протолкувана бидејќи, како што нагласува, противниците на ВРЕДИ се обиделе да ја отворат етничката карта на овие избори. Тој објаснува дека неговата изјава за Кичево е извадена од контекст, а реакцијата на премиерот Христијан Мицкоски не ја гледа како „опомена“.

„Изјавата, во моментот кога беше дадена, беше во контекст на тоа што нашите политички опоненти во овие избори се обидоа максимално да ја отворат етничката карта. Целата таа изјава, би рекол, беше искрена, но политички беше погрешно протолкувана“, изјави Касами.

Тој во интервју на Алсат, потенцира дека неговите ставови се јасни и во согласност со оние на коалицијата ВРЕДИ, објаснувајќи дека намерата не била да се поддржи ниту еден кандидат поради етничка припадност, туку врз основа на морални вредности и политички перформанси.

„Фатмир Дехари е најслабиот кандидат на ДУИ, кој за време на неговото владеење не донесе ништо добро во Кичево. Напротив, им наштети на градот и на луѓето од Кичево. Поради оваа причина, не можеме да застанеме зад него само затоа што е Албанец“, рече Касами.

Тетовскиот градоначалник додава дека Движењето Беса отсекогаш ги поддржувало кандидатите кои ги претставуваат интересите на граѓаните, без оглед на етничката припадност. Потсетува дека Движењето Беса имало свој кандидат во Кичево и дека граѓаните сега знаат „кого треба да поддржат во вториот круг“.

Касами се осврна и на коментарите на премиерот Христијан Мицкоски во врска со неговата изјава за поддршка на кандидатот на НАИ во Кичево, Дехари.

Во интервјуто тој нагласува дека не ја гледа реакцијата на Мицкоски како „опомена“, објаснувајќи дека неговата изјава е извадена од контекст.

По завршувањето на првиот круг од локалните избори, Касами повика на национално, а не на коалициско мобилизирање за вториот круг од локалните избори. Касами, кој победи во првиот круг на градоначалничката трка во Тетово благодарение на гласовите на коалицискиот партнер во владата, ВМРО-ДПМНЕ, во ТВ дебата изјави дека Вреди во вториот круг во Кичево ќе го поддржи кандидатот на ДУИ, Фатмир Дехари, а не кандидатот на ВМРО-ДПМНЕ, Александар Јовановски.

Иако не го спомена со име, премиерот Мицкоски одговори дека „некои политичари мора да разберат дека за да бидеме коалициони партнери треба да сме подготвени да се обединиме и да поддржиме вредности, а не да се поделиме на етнички теми и прашања, низ призмата на шовинизмот и слични етнички процедурални разлики“.