Вести
Лидерите на парламентарните партии денеска на средба во Собранието
Почна лидерската средба во Собранието која ја свика премиерот Димитар Ковачевски, на која како што беше најавено од Владата, претседателите на парламентарните партии ќе разговараат за одлуките кои треба да се носат со широк консензус, односно за внесувањето на Бугарите и другите народи во Преамбулата на Уставот за да продолжи европскиот пат на земјава.
На средбата дојдоа лидерот на ВМРО-ДПМНЕ Христијан Мицкоски, лидерот на ДУИ Али Ахмети, на Алтернатива Африм Гаши, на Алијанса за Албанците Арбен Таравари, на Демократскиот сојуз Павле Трајанов, на ДПА Мендух Тачи и лидерката на ДОМ Маја Морачанин. Поканата ја одбија партиите Левица и Беса.
Пред почнувањето на средбата изјави дадоа Морчанин, Трајанов, Тачи и Гаши.
Морачани изјави дека очекува конструктивна дискусија и одговорност од сите партии што ќе бидат претставени на средбата. Таа рече дека сите треба да бидат фокусирани само на прашањето што се однесува на преамбулата на Уставот и спроведувањето на реформите за влез во ЕУ, но посочи дека не очекува денеска да има договор.
„Не очекувам дека денеска ќе се постигне договор имајќи ги предвид нели најавите, изјавите од опозицијата дека се уште се против, бараат дополнителни гаранции за промена на Уставот, но е добро да разговараме заеднички, бидејќи тоа е најдобриот начин за стратешки прашања кои се стратешка важност и за државата и за граѓаните, рече Морачанин.
Трајанов, пак, рече дека во името на Демократскито сојуз ќе барам прва точка на средбата да биде да упатат силна заедничка порака до Бугарија да ги признае Македонците како национална припадност и да ги остваруваат сите свои права.
Претседателот на ДПА Мендух Тачи изјави дека „со добар дијалог треба да се постигне договор за уставните измени и дека нема друг пат да се деблокира интеграцискиот процес.
За тоа дали и тие имаат услови како другите партии на Албанците, Тачи рече дека тргањето на 20 проценти од Уставот е нивен предлог, но оти исто така сега не е време за уцени.
„Јас разговарав со господинот Ахемти за оваа тема, ќе продолжиме да разговараме, но ние немаме никаков услов. И тоа треба многу јасно да се кажува. После ќе раговараме исто како што разговаравме со господинот Ахмети и со нашиот коалиционен партнер и со македонската опозиција. Имаме јаки аргументи, но не е моментот да се воспоставуват услови или рокови. Ова е многу поголем процес од оваа другото“, изјави Тачи.
Претседателот на Алтерватива, Африм Гаши истакна дека доаѓа да ја искаже целосната поддршка на неговата партија кон евроинтеграцискиот процес.
„Алтернатива стои сто проценти во овој процес евроинтеграциски. Направи се да даде поддршка да што побргу ги отвориме поглавјата“, рече Гаши.
Инаку, како што деновиве наведе премиерот Ковачевски, лидерската средба ја свикавл со цел сите политички партии кои се застапени во Парламентот да разговараат за европската иднина на државата и за сите одлуки коишто треба да ги носат со широк политички консензус.
Лидерот на опозицијата Христијан Мицкоски по повикот на премиерот објави дека ќе присуствува на средбата, иако претходно посочи дека смета оти на неа треба да се разговара за прашања како економијата, сиромаштијата и енергетската криза, а не за уставните промени. Тој додаде дека е подготвен на средбата да ги брани ставовите на партијата.
„Народот од нас очекува да зборуваме за инфлацијата, за енергетската криза, за зголемената сиромаштија, за затворените рудници и фабрики, за нискиот стандард. Ова се темите за кои мора алармантно да се бараат решение, а не за уставни измени или една генерална тема без никакви појаснувања“, изјави Мицкоски на 5 ноември.
Од парламентрните партии кои исто така претходно потврдија дека ќе учествуваат на лидерската средба е Алијанса за Албанците (АА). В.д. претседателот на партијата Арбен Таравари изјави дека ќе присуствуваат во Парламентот за да разговараат за идната европска перспектива на државата, но како што рече и за „евентуалните промени кои треба да се направат во Уставот“.
„Одлука на комисијата за организирање на конгресот на АА, која се состои од градоначалниците и пратениците од АА, донесе конечна одлука дека во понеделник во 12 часот ќе бидеме во парламентот“, рече Таравари.
Алијанса за Албанците е дел од албанските парламентарни партии кои, пак, отворањето на Уставот го условуваат со барање при внесувањето на Бугарите и другите народи, да биде избришана и формулацијата „20 проценти“ за да биде заменета со албански народ, албански јазик.
Истото барање го изнесе и партијата Беса, која пак на час пред одржувањето на средбата соопшти дека ја одбива поканата на премиерот. Претседателот на Беса Биљал Касами образложи дека нема да учествува на средбата, бидејќи смета дека таа е „формалност за да се спаси ДУИ од обврската да седне на маса со претставниците на албанските партии.“
Беса претходно соопшти дека за случајот со дефиницијата „20 проценти“ и дефинирањето на албански јазик ќе испрати покана до партиите од албанскиот блок за одржување на состанок со цел обединување на „албанскиот политички фактор за да се отстранат погрдните поими како што е согласно нашите заеднички определби“.
Но, од ДУИ која е дел од владејачката коалиција со СДСМ, за иницијативата на Беса рекоа дека сега не е момент за овие промени, односно дека оваа промена на Уставот спред нив треба да се случи во нормален политички процес.
Потпретседателот на ДУИ Арбер Адеми потврди дека претставници на партијата ќе присуствуваат на денешната лидерската средба иницирана од премиерот Ковачевски.
„Со оглед на важноста на моментот низ кој поминуваме, како општество и како држава, сметам дека е правилно да се одржи ваква средба, бидејќи ситуацијата е сериозна и заслужува сериозен одговор и одговорност од сите политички партии, а особено уште повеќе кога имаме предвид дека за европската агенда, уставните измени за кои се потребни двотретинско на пратеници импонира неопходно седнување на една маса, соработка и заедничко одлучување на парламентарните политички партии“, рече Адеми.
Владејачката коалиција во Собранието која е составена од СДСМ, ДУИ, ДПА и Алтернатива имаат вкупно 64 пратеници. Опозициската ВМРО-ДПМНЕ има 38 пратеници, Алијанса за Албанците 8 пратенци, Беса има 4, Левица 2. Левица исто така соопшти дека нема да присуствува на лидерската средба.
За отворањето на Уставот е потребно да гласаат 80 пратеници и е услов којшто го прифатија Бугарија и Македонија како дел од францускиот предлог за кревање на бугарското вето и одблокирање на почетокот на пристапните преговори на Македонија со Европската унија.
Бугарија пред неколку месеци го укина ветото за почеток на преговорите со ЕУ откако го прифати францускиот предлог, кој меѓу другото, предвидува бугарските услови да станат дел од обврските на Македонија кон ЕУ. Во јули годинава документот го одобри и македонскиот Парламент, кој значи внесување на Бугарите во Преамбулата, но и борба против говорот на омраза, ревизија на учебниците по историја и гаранции дека земјава нема територијални претензии.
види ги сите денешни вести
Израел ги предаде телата на 45 Палестинци
Израел ги префрли телата на 45 Палестинци во Појасот Газа, во вторник (4 ноември)потврди портпаролката на Меѓународниот комитет на Црвениот крст (МКЦК), велејќи дека тие помогнале во предавањето на вработените во властите контролирани од Хамас. Хамас е прогласена за терористичка организација од САД и ЕУ.
Портпаролката рече дека ова следува еден ден по предавањето на останките на тројца израелски заложници. Израел и Хамас се согласиле за предавање на телата како дел од договорот за прекин на огнот во октомври.
Според договорот, за секој израелски заложник чии останки се ослободени, Израел мора да ги предаде останките на 15 починати жители на Газа. Точните околности на смртта на Палестинците не се познати. Се сомнева дека Израел ги чувал нивните тела во воен логор.
Хамас претходно ги ослободи сите преостанати живи заложници на 13 октомври како дел од прекинот на огнот во Газа во замена за стотици палестински затвореници. Предавањето на починатите заложници се одвива побавно од договореното.
Според израелски извори, телата на осум заложници сè уште се во Појасот Газа. Седум од нив беа киднапирани за време на нападот на Хамас врз Израел на 7 октомври 2023 година. Меѓу нив се петмина Израелци - од кои едниот има и германско државјанство - како и двајца странци од Тајланд и Танзанија.
Дополнително, Израел се обидува да ги пронајде останките на еден израелски војник. Телото на војникот беше киднапирано во 2014 година.
Руската противвоздушна одбрана пресретнала 85 украински дронови
Руското Министерство за одбрана соопшти дека противвоздушната одбрана синоќа пресретна и уништи 85 украински дронови.
Во соопштението се наведува дека 40 беспилотни летала се пресретнати над територијата на Воронежската област, 20 над областа Нижни Новгородската, 10 над Белгородската област, шест над Курската област, четири над Липецката област, по два дрона биле соборени над Волгоградската област и над територијата на Република Башкортостан, како и еден дрон над Саратовската област.
Регионалните власти соопштија дека при напад со два дрона оштетена е петрохемиска фабрика во градот Стерлитамак во Република Башкортостан.
Фабриката, која се наоѓа на 1500 километри од границата со Украина, сè уште работи, изјави гувернерот на Башкортостан, Радиј Хабиров, додавајќи оти нема повредени работници во фабриката.
Комплексот „Стерлитамак“ беше цел минатиот месец кога беспилотни летала нападнаа дел од областа каде што се наоѓаше фабрика специјализирана за развој и производство на опрема, делови и алатки за нафтената и гасната индустрија.
Фабриката е вклучена и во производство на експлозиви.
Евроамбасадорот Рокас ќе го презнтира извештајот на ЕК пред пратениците
Во Собранието денеска (4 ноември) ќе се одржи Презентација на Извештајот за напредок на Република Северна Македонија од Европската Комисија.
Извештајот ќе биде презентиран од страна на амбасадорот на Европската Унија, Михалис Рокас.
Северна Македонија постигна значителниот напредок во спроведувањето на реформите предвидени со Реформската агенда, за што доказ е и исплатата на две транши на средства во рамки на Планот за раст на Западен Балкан, се наведува во Извештајт з анапредокот на земјата на европскиот пат, што Европската комисија официјално ќе го објави денеска.
„Македонските власти продолжија да работат на имплементација на патоказите за владеење на правото, на реформата на јавната администрација и на функционирањето на демократските институции, како и на Акцискиот план за заштита на малцинствата“, се вели во извештајот.
Сепак, во него се забележува дека земјата треба да ги интензивира напорите за почитување на владеењето на правото, особено заштитата на независноста и интегритетот на судството и да ја засили борбата против корупцијата, при што се оценува дека е постигнат „ограничен напредок“ во областа на судските реформи.
Како позитивен развој на настаните во извештајот се наведува формирањето на Советот за соработка меѓу Владата и граѓанското општество и се оценува дека земјата постигнала одреден напредок во однос на плурализмот и слободата на медиумите и на слободата на изразување.
Исто така, се нотира и дека се уште не се усвоени уставните амандмани насочени кон вклучување во Уставот на граѓани кои не претставуваат мнозинство, како што се Бугарите, за што земјата презела обврска.
Европската комисија во документот посочува и дека земјата е целосно усогласена со надворешната и безбедносната политика на ЕУ, како и дека една од државите што се приклучи на Конвенцијата за заеднички транзит, чија цел е забрзување на движењето на стоките преку границите.
Во извештајот се повторува и претходно изнесениот став за потребата од спроведување „со добра волја од сите страни“ на склучените билатерални договори, вклучувајќи го и Преспанскиот договор со Грција и Договорот за пријателство, добрососедство и соработка со Бугарија.
Прекината програмата на Денот на српската култура во Сплит, премиерот бара итна реакција
Сплитската полиција бара млади луѓе кои ја прекинале програмата „Ден на српската култура“ во просториите на Градскиот округ Блатина на 3 ноември, објави Хрватска радио телевизија за случајот, што предизвика бурни реакции во јавноста.
Како што неофицијално објави ХРТ, за време на рацијата, на учесниците им било кажано дека програмата не може да се одржи за време на одбележувањето на окупацијата на Вуковар во 1990-тите од страна на српските сили и побарале членовите на Културно-уметничкото друштво (КУД) од Нови Сад, кои дошле од Србија, да го напуштат просторот.
Во случајот, немало физичко насилство и нема повредени лица, изјави полицијата, која ја спроведува истрагата.
Програмата во Сплит ја организирало Српското културно друштво „Просвјета“. Сплитската полиција потврдила дека инцидентот се случил околу 18:30 часот.
Неофицијално, се вели дека станува збор за членови на „Торцида“, навивачката група на клубот „Хајдук“, а како што објавува ХРТ, полицијата спроведува интензивна кривична истрага со цел да ги открие лицата кои учествувале во инцидентот.
Хрватскиот премиер Андреј Пленковиќ го осуди инцидентот во Сплит и рече дека „ексклузивноста или која било форма на нетолеранција кон националните малцинства нема место во хрватското општество“.
„Остро го осудуваме инцидентот во Сплит за време на културната манифестација на претставниците на српското национално малцинство. Очекуваме надлежните органи што е можно поскоро да ги гонат одговорните“, напиша Пленковиќ во објава на мрежата X.
Претседателот на Српскиот национален совет, Борис Милошевиќ, за ХРТ изјави дека „смета дека е ужасно што еден бениген културен настан е прекинат од група хулигани од некоја непозната причина“.
„На полицијата ѝ препуштам да утврди што точно се случило, но мислам дека сите, како општество и политика, мора да се вклучат бидејќи ова не може да продолжи вака. Имаме културни настани и работилници со деца. Кој ќе го испрати своето дете на настан што го обезбедува полицијата“, рече тој.
Ден на сеќавање на жртвите во Вуковар
И градоначалникот на Сплит и неколку партии во Сплит го осудија инцидентот. Градоначалникот Томислав Шута рече дека Сплит мора да биде град на безбедност, толеранција и почитување за сите граѓани и гости, без оглед на нивната национална, верска или која било друга припадност.
„Во месецот на тага и сеќавање на жртвите од Вуковар, ни треба единство, достоинство и мир, а не поделба и нетолеранција“, рече градоначалникот на Сплит.
Вуковар и Сплит во деведесеттите години
Во Хрватска, Вуковар е симбол на отпорот кон окупацијата од страна на српските сили. Во есента 1991 година, градот беше нападнат од силни сили на тогашната Југословенска народна армија (ЈНА), припадници на армијата на самопрогласената Република Српска Краина и волонтери од Србија.
По неколкумесечни напади со тенкови, артилерија и пешадија и ракетни напади од воздух, хрватската одбрана на градот беше пробиена на 18 ноември 1991 година, а поголемиот дел од несрпското цивилно население беше протерано од градот, прво во логори и затвори во Србија, а потоа во Хрватска.
Дел од хрватските војници и полицајци беа ликвидирани на имотот Овчара во близина на градот, а останатите беа држени во логори и затвори во Србија до таканаречените големи размени во 1992 година.
Со договорот од есента 1995 година беше договорена мирна реинтеграција на поранешниот Сектор на ОН Север и уставно-правна положба на Република Хрватска со тригодишен преоден период.
Во Сплит, за време на војната, по распадот на поранешната Социјалистичка Федеративна Република Југославија, воената полиција организираше воен истражен центар во военото пристаниште Лора на северозапад од Сплитскиот полуостров, а по заминувањето на Југословенската морнарица на почетокот на 1992 година.
Во претходните години, неколку хрватски државјани беа гонети во случаите „Лора 1“ и „Лора 2“ за тортура и страдање на цивили и воени затвореници во тој логор во 1990-тите.
Украински напад на петрохемиска фабрика во Русија
Украински беспилотни летала погодија петрохемиска фабрика речиси 1500 км (932 милји) во Русија рано наутро на 4 ноември, додека Киев продолжува да ги засилува воздушните напади со долг дострел насочени кон клучната руска инфраструктура.
Шефот на регионот Башкортостан, Радиј Хабиров, на Телеграм соопшти дека две украински беспилотни летала го погодиле индустрискиот комплекс Стерлитамак откако биле соборени. Властите изјавија дека беспилотните летала делумно уништиле инсталација за третман на вода во комплексот.
Хабиров рече дека немало жртви во нападот.
Украинските власти не го коментираа нападот, кој се случува во време кога Киев продолжува да напаѓа клучни објекти како што се рафинерии за нафта, складишта за гас и други логистички инсталации, додека се обидува да ја забави воената машина на Русија.
Киев апелираше до Соединетите Држави за да добие оружје со долг дострел, како што се ракетите Томахавк, за кои вели дека се клучни за возврат на ударот врз Русија, додека Кремљ ги интензивира воздушните напади врз украинските градови.
Претседателот Доналд Трамп повремено сугерираше дека САД би можеле да и обезбедат Томахавки на Украина, иако неодамна изјави дека засега нема намера да го направи тоа.
Трамп - кој се обидува да посредува во мировен договор меѓу Украина и Русија - им рече на новинарите дека се надева дека конфликтот ќе заврши „без да размислува за Томахавките“.
Тој, исто така, изрази загриженост во врска со откажувањето од Томахавките кои имаат дострел од 1.600-2.500 километри, кои можеби ќе бидат потребни за потребите на американската војска.
Москва претходно го предупреди Вашингтон да не ѝ испорачува на Украина ракети „Томахавк“, а рускиот претседател Владимир Путин изјави дека таквите испораки би претставувале „сосема нова фаза на ескалација“ меѓу САД и Русија.
Комплексот „Стерлитамак“ беше цел минатиот месец кога беспилотни летала нападнаа дел од областа каде што се наоѓаше фабрика специјализирана за развој и производство на опрема, делови и алатки за нафтената и гасната индустрија.
Фабриката е вклучена и во производство на експлозиви.
Шведска делумно ја запира помошта за Србија поради корупција
Шведската влада соопшти во понеделникот дека, поради развојот на настаните во Србија „во погрешна насока“, ќе ја прекине делумно поддршката за државните органи во Србија, а повеќе ќе ја насочи кон зајакнување на граѓанското општество.
Во соопштението објавено на веб-страницата на владата на скандинавската земја се наведува дека „веќе извесно време се забележуваат недостатоци во волјата на српската влада за спроведување реформи“, особено во однос на почитувањето на принципите на владеењето на правото, борбата против корупцијата и заштитата на основните слободи и права, како што се слободата на изразување и слободата на медиумите.
„Развојот во Србија оди во погрешна насока. Тоа се однесува на сè — од порастот на корупцијата до непочитувањето на принципите на владеењето на правото. Земјите не можат да очекуваат шведска поддршка ако не спроведуваат реформи и развој какви што очекуваме. Затоа сега ги правиме овие промени“, се наведува во соопштението на шведскиот министер за развојна соработка и надворешна трговија, Бенјамин Дуса (Дуса).
Соопштението на шведската влада за намалување на помошта за српските државни органи следуваше по објавувањето на нацрт-извештајот на Европската комисија, во кој се оценува дека во Србија темпото на спроведување реформи е значително забавено, додека во земјата веќе една година траат масовни протести предводени од студенти во блокада, кои бараат одговорност за загинувањето на 16 лица при уривањето на настрешницата на реконструираната Железничка станица во Нови Сад.
Владата на Шведска, која ѝ пружа поддршка на Србија во рамките на Стратегијата за реформска соработка со Западен Балкан и Турција, наведе дека одлучила да ја преиспита поддршката кон Белград, во согласност со принципите на проширувањето на ЕУ засновано на заслуги.
Тоа, како што се додава, значи дека се наградуваат земјите кои напредуваат и покажуваат подготвеност за реформи, додека поддршката може да се намали или замрзне за земјите кои не ги почитуваат основните права или имаат недостатоци во својот демократски развој.
Европската комисија во нацрт-извештајот за напредокот на земјите кандидати оцени дека „Србија треба да спроведе кредибилни реформи во сите области“, особено во полето на усогласување со надворешната и безбедносната политика на ЕУ.
Во документот се наведува дека дошло до продлабочување на „поларизацијата во српското општество“ поради „масовните студентски и граѓански протести кои се одржуваат низ цела Србија од ноември 2024 година“.
Тоа, според нацрт-документот, ја одразува разочараноста на граѓаните поради корупцијата и воочениот недостаток на одговорност и транспарентност, заедно со случаи на прекумерна употреба на сила против демонстрантите и притисоци врз граѓанското општество.
Претходно, во октомври, Европскиот парламент усвои резолуција за „Поларизацијата и зголемената репресија во Србија, една година по трагедијата во Нови Сад“, во која беше оценето дека српското раководство е политички одговорно за ескалацијата на репресијата, нормализацијата на насилството и ослабувањето на демократските институции во земјата.
ДИК ги соопшти првичните официјални резултати од гласањето во вториот круг
Државната изборна комисија (ДИК) попладнево ги соопшти првичните официјални резултати од гласањето во вториот круг на локалните избори што се одржа вчера.
Како што истакна претседателот на ДИК Борис Кондарко, се гласаше во 32 општини и во градот Скопје. Вкупниот бројот избирачи изнесуваше 1 013 357.
Бројот на избирачки места на кои се спроведе гласањето беше 1 777, вкупниот број избирачи кои гласале е 424 923 или 41,93 отсто.
Бројот на неважечки гласачки ливчиња е 23 930, а на важечки 404 464.
За градоначалник на Скопје во десетте скопски општини гласале 474 304 избирачи, а на територијата на Скопје 167 575 гласачи.
Вкупниот број неупотребени ливчиња е 306 729, бројот на важечки гласачки ливчиња е 157 047, а на неважечки 10 528.
Коалицијата предводена од ВМРО-ДПМНЕ во вториот круг освои градоначалнички места во Град Скопје и во 21 општина, коалицијата ВРЕДИ во четири, коалицијата предводнеа од СДСМ во три, Унијата на Роми, Движењето ЗНАМ и НАИ во по една општина, а во една општина ќе раководи независен кандидат за градоначалник.
За кандидатот на ВМРО-ДПМНЕ и коалицијата, Орце Ѓорѓиевски гласале 95 572 избирачи или 57,03 отсто, додека за кандидатот на Левица, Амар Мециновиќ гласале 61 475 или 36,69 проценти од вкупниот број избирачи.
Кондарко информира дека од моментот на објавување на овие резултати, почнува да тече рокот за поднесување приговори.
„Од денеска, од 16:30 часот, од објавувањето на првичните официјални резултати, во наредните 48 часа, до среда, до 16:30 минути, течат роковите за евентуални приговори врз основа на објавените првични официјални резултати, а за спроведување на постапката на утврдување на резултатите од гласањето. Приговорите се доставуваат директно до ДИК, електронско поднесување не е дозволено“, истакна Кондарко на денешната прес конференција (3 ноември).
Според него, ако има приговори, крајниот рок за објавување на конечните резултати од локалните избори ќе биде понеделник или најдоцна вторник.
„Ако до среда, до истекот на рокот за поднесување приговори во некоја од 32-те општини не бидат поднесени приговори, за тие места каде нема приговори ДИК во четврток ќе објави конечни резултати“, истакна Кондарко.
Тој додаде и дека доколку бидат поднесени приговори, ДИК има рок од 72 часа да одлучува по приговорите.
„Потоа, по одлуките на ДИК, има рок од 24 часа за поднесување тужби до Управниот суд. Тоа би било најдоцна до недела. Управниот суд има рок од 48 часа за одлучување по тужбите. Значи, крајните рокови за одлучување на Управниот суд би биле до понеделник. Понеделник или најдоцна вторник, по конечните одлуки на Управниот суд, би бил крајниот рок за објавување на конечните резултати“, посочи Кондарко.
Тој најави дека конечните резултати ќе бидат соопштени на седница на ДИК за што јавноста ќе биде навреме иозвестена, истакна Кондарко.
Од 19:00 часот вчера течат роковите за приговори по основ на постапката за спроведување на гласањето.
Психолошката траума во Газа го зголеми бројот на луѓе кои бараат помош
Жителите на Газа страдаат од „вулкан“ на психолошка траума предизвикана од разорната воена кампања на Израел, што стана очигледно по примирјето минатиот месец, според палестински стручњаци за ментално здравје. Двегодишното интензивно израелско бомбардирање и повторените воени напади, за кои локалните здравствени власти велат дека убиле повеќе од 68.000 луѓе, заедно со масовната бездомност и глад, влијаеја врз сите 2,3 милиони жители на Газа.
Кризата е очигледна по големиот број луѓе кои сега бараат третман од тимот на Болницата за ментално здравје во Градот Газа, кој во моментов работи во блиска клиника затоа што нивната зграда е оштетена, изјави нејзиниот директор Абдала ал-Џамал.
„Дури и стигмата што постоеше порано, стравот да се посети психолог, веќе не постои,“ рече тој, опишувајќи „многу големо зголемување“ на бројот на пациенти во споредба со периодот пред конфликтот.
Џамал и неговиот колега работат колку што можат, но поради сериозните оштетувања на болницата нивните ресурси се ограничени, а мораат и да ја делат истата просторија, што ги лишува пациентите од приватност при консултациите.
„Тоа, искрено, е понижувачки начин на обезбедување услуги, но се обидуваме колку што можеме да најдеме алтернативи,“ рече тој додавајќи дека секој ден имаат по повеќе од 100 пациенти.
Кај децата, стручњаците за ментално здравје од палестинското здружение „Црвена полумесечина“ пријавуваат чести случаи на ноќни кошмари, мокрење во кревет и други симптоми, вклучувајќи неможност за концентрација.
„Децата во Газа сега страдаат од недостиг на храна, вода, засолниште и облека“, рече Нивин Абделхади, специјалистка од организацијата, која организира активности за децата што вклучуваат игри и приказни.
Примирјето стапи на сила на 10 октомври, иако од тогаш имаше повеќе избувнувања на насилство. Тоа го прекина големиот вооружен конфликт што започна со нападот на Хамас врз Израел на 7 октомври 2023 година, во кој, според израелските податоци, беа убиени околу 1.200 луѓе.
Ројтерс
ОБСЕ /ОДИХР: Кандидатите немаа еднакви услови за кампања
Вториот круг од изборите за градоначалници им понуди на гласачите избор меѓу политичките алтернативи и кампањата беше конкурентна во поголемиот дел од општините. Сепак, не сите кандидати имаа еднакви услови за кампања, беше посочено на прес-конференцијата на меѓународната набљудувачка мисија од ОБСЕ /ОДИХР за вториот круг од локалните избори во земјава.
Набљудувачите оценија дека како и во првиот круг, основните слободи на изразување како и слободата на здружување и собири биле почитувани и учесниците во изборите имале можност слободно да водат кампања. Но, според нив, тонот на кампањата бил повоздржан од првиот круг, со одделни случаи на лични напади од страна на кандидати и партиски лидери едни кон други.
„Вториот круг од изборите за градоначалници се одвиваше уредно и кампањата во целина остана конкурентна, но не сите имаа еднакви услови“, изјави денеска (3 ноември) Матео Мекачи, шеф на набљудувачката мисија на ОБСЕ/ОДИХР.
Меѓународните набљудувачи оценија и дека продолжила вклученоста на владини претставници во изборниот процес, како и, како што наведоа, постојаните притисоци врз избирачите, заедно со бројните обвинувања за купување гласови, што претставува загриженост.
Мекачи истакна дека го набљудуваат изборниот процес од почетокот на септември и посочи дека иако правната рамка обезбедува техничка основа за одржување демократски избори и понатаму постојат бројни недоследности и слабости, особено во однос на изборната администрација, пристапот до медиумите и системот за решавање изборни спорови.
За вториот круг на локалните избори, според податоците на ДИК, акредитирани беа 1622 набљудувачи од кои 957 домашни и 651 меѓународни и 14 странски новинари.
Според податоците од официјалната веб страна на ДИК, најмногу меѓународни набљудувачи на Локалните избори 2025 има акредитирано ОДИХР - Канцеларија за демократски институции и човекови права - 500.
Руски воздушни напади врз Покровск, погодена цивилната инфраструктура
Руските воздушни напади погодија цивилни цели во Украина, соопштија украинските власти на 3 ноември, при што неколку лица загинаа, а станбени згради беа сериозно оштетени. Москва истовремено соопшти дека извела масовни напади додека нејзините трупи продолжуваат да напредуваат кон клучниот град Покровск.
На источните и јужните приоди кон Покровск, руските сили во последните недели полека напредуваат, заземајќи патишта, постепено прекинувајќи линии на снабдување и вршејќи притисок врз украинската одбрана.
Руското Министерство за одбрана соопшти дека во текот на ноќта на 3 ноември нападнало воени и индустриски објекти, вклучително и украински воен аеродром, база за поправка на воена опрема, воено-индустриски капацитети, како и гасна инфраструктура што ги поддржува.
Тврдењата не можат независно да се потврдат, додека украинскиот 7. корпус за брз одговор соопшти дека операциите за чистење на градот од руските трупи продолжуваат, при што украинските сили спречиле обид за пресекување на линијата на снабдување од Родинске кон север.
Покровск се наоѓа на раскрсница на два главни автопати — едниот што води западно кон Дњепропетровската област и градот Дњепро, и другиот што води североисточно кон градот Костјантивка, кој претставуваше клучна точка на украинската одбрана на централните и јужните делови од фронтот долг 1.100 километри.
Во меѓувреме, гувернерот на украинската Доњецка област, Вадим Филашкин, изјави дека во текот на ноќта загинале три лица, додека локалните власти во североисточната област Суми соопштија дека едно лице загинало во посебен напад.
Олександр Прокудин, гувернерот на областа Херсон, рече дека руската војска во текот на ноќта напаѓала повеќе градови и населени места во таа област.
„Поради руската агресија, едно лице загина, а осум се повредени“, рече Прокудин.
Гувернерот на Дњепропетровската област, Владислав Хајваненко изјави дека руските ракети предизвикале пожар во деловна зграда и повредиле едно лице, додека гувернерот на регионот Харков, Олег Синехубов, рече дека 13 градови и населени места, вклучувајќи го и главниот град на областа Харков, биле цел на руски дронови и ракети во текот на ноќта. Пет лица се повредени.
Првиот заменик-началник на Ингулскиот округ во градот Миколаив, Антон Ужва, изјави за Радио Слободна Европа дека руски воздушен напад утрото погодил и оштетил локален хипермаркет за градежен материјал.
„Оштетени се и пет повеќекатници, најчесто се скршени прозорците. За среќа, никој не е сериозно повреден“, рече Ужва.
Новинарите на Радио Слободна Европа известија од лице место дека зградата на хипермаркетот е сериозно оштетена, вклучувајќи го покривот и неколку уништени ѕидови.
Локалната жителка Наталија изјави за Радио Слободна Европа дека тоа подрачје редовно е изложено на руски воздушни напади.
Официјалните претставници на украинската противвоздушна одбрана соопштија дека руската војска во текот на ноќта користела 150 дронови и ракети во нападот.
Мултимедија
Најпосетени
Што треба да знаете