Вести
Казни за пешаците и возачите кои користат мобилни и други електронски уреди во сообраќајот
Пешаците кои преминуваат коловоз и разговараат на мобилен телефон, користат слушалки за разговор во двете уши, смарт часовник или таблет од денеска (26 септември) ќе бидат санкционирани. Истите законски мерки важат и за возачи на велосипед, мопед, мотоцикл, трицикл, и четирицикл кои, според законот, за време на управувањето не смеат да користат електронски уреди.
Републичкиот совет за безбедност на сообраќајот на патиштата известува дека од денеска стапуваат на сила новите измени на ЗБСП кои се усвоени со цел да се унапреди безбедноста на најранливите категории на учесници во сообраќајот и да се намали бројот на случени сообраќајни незгоди како последица на невнимателно однесување во сообраќајот.
„Новите законски решенија се воведуваат во насока на елиминирање на одредени навики кај пешаците и возачите од определени категории возила. Со новиот закон меѓу другото е предвидено и дека возачот на електричен тротинет за време на управувањето со возилото не смее да користи електронски уреди, како што се слушалки во двете уши, мобилен телефон, таблет, смарт часовник или друг вид на електронски уред со кој би му се намалила стабилноста и можноста за реагирање и сигурно управување со возилото, освен специјализираните уреди за комуникација кои се вградени во заштитните шлемови“, посочуваат од РСБСП.
Ова, според РСБСП, подразбира поставување нови стандарди за одговорно однесување во сообраќајот, при што, пешаците, велосипедистите, возачите на електрични тротинети и останатите учесници во сообраќајот предвидени со законското решение, се обврзуваат да учествуваат во сообраќајот без да користат електронски уреди кои им го одвлекуваат вниманието.
Републичкиот совет за безбедност на сообраќајот на патиштата нагласува дека целта на ваквите законски измени е создавање на услови за поголема безбедност, намалување на ризиците и заштита на човечките животи.
Советот упатува апел до сите учесници во сообраќајот да ги почитуваат сообраќајните правила и прописи бидејќи Безбедноста на патиштата е заедничка одговорност.
Обвинет поранешниот директор на ФБИ, Џејмс Коми
Поранешниот директор на Федералното истражно биро на САД (ФБИ), Џејмс Коми, е обвинет за давање лажни изјави и попречување на конгресната истрага.
Доколку биде обвинет, Коми може да се соочи со затворска казна до пет години.
Во видео објавено на Инстаграм, поранешниот директор на ФБИ рече дека срцето му е скршено поради Министерството за правда, но дека има доверба во правосудниот систем.
„Невин сум. Затоа, ајде да го одржиме судењето и да ја задржиме верата.“
Коми, кој долго време беше цел на критики од американскиот претседател Доналд Трамп, беше обвинет дека лажел пред Конгресот за време на сведочењето во септември 2020 година. Тој е првиот поранешен директор на ФБИ обвинет за кривично дело.
Трамп го отпушти Коми во 2017 година, на почетокот на неговиот прв мандат. Оттогаш, пишува Ројтерс, тој редовно го критикуваше начинот на кој Коми ја спроведе истрагата на ФБИ, во која беа детално опишани контактите меѓу Русите и кампањата на Трамп во 2016 година.
Откако Трамп се врати на функцијата во јануари, Министерството за правда го испитуваше сведочењето на Коми од 2020 година, кога тој се осврна на критиките на републиканците за истрагата за Русија и негираше дека овластил објавување на чувствителни информации во медиумите.
Во обвинението се тврди дека Коми го довел во заблуда Конгресот тврдејќи дека не овластил никого друг да биде анонимен извор во известувањето за истрагата на ФБИ.
Советот за безбедност на ОН повторно ќе гласа за нуклеарната програма на Иран
Советот за безбедност на ОН денеска (26 септември) повторно ќе гласа за иранското нуклеарно прашање пред планираното повторно воведување на санкциите против Техеран, додека Русија и Кина бараат повеќе време за преговори, дознаваат западните агенции од дипломатски извори.
Нацрт-резолуцијата поднесена од Русија и Кина има за цел да ја продолжи за шест месеци, до 18 април 2026 година, резолуцијата на Советот за безбедност на ОН со која се регулира нуклеарниот договор со Иран од 2015 година. Тој договор истекува на 18 октомври.
Нацрт-резолуцијата ги повикува земјите-потписнички на договорот од 2015 година веднаш да ги продолжат преговорите.
САД, инаку, еднострано го напуштија договорот во 2018 година за време на првиот мандат на Доналд Трамп.
Според неколку дипломатски извори, малку е веројатно дека руско-кинескиот текст ќе ги добие потребните девет од 15 гласови во Советот за безбедност за да биде усвоен.
Пекинг и Москва веќе го осудија и прогласија за нелегален процесот на „враќање на санкциите“, што беше инициран кон крајот на август од групата Е3 (Германија, Франција и Велика Британија) со цел повторно да се воведат санкциите што беа укинати во 2015 година.
По гласањето во Советот за безбедност минатата недела, кое даде зелено светло за „повторно воведување на санкциите“, тие санкции треба да бидат повторно воведени против Иран од сабота на полноќ.
Договорот од 2015 година, потпишан од ЕУ, САД, Кина, Русија и Иран, предвидуваше намалување на нуклеарните активности на Техеран.
Меѓутоа, во 2018 година, за време на неговиот прв мандат, Трамп еднострано ги повлече САД од договорот и повторно воведе санкции врз Иран. Потоа Техеран се откажа од одредени обврски, особено во врска со збогатувањето на ураниум.
Западните земји се сомневаат дека Иран се обидува да се здобие со нуклеарно оружје. Техеран го негира ова и го брани своето право да развива цивилна нуклеарна програма.
Гори депонијата над Арачиново, пожарникари на терен
Од Центарот за управување со кризи вечерва информираа дека депонијата над Арачиново е повторно распалена.
„На терен за нејзино локализирање дејствува екипа на Бригадата за противпожарна заштита“ посочуваат од ЦУК.
Ова е само уште еден во низата пожари на скопските депонии во последниот период.
Претходно гореше електронски отпад, акомулатори и батерии во Трубарево - пожар по кој беа измерени тешки метали во воздухот од страна на Министерството за животна средина.
Гореше и отпад во просторот кај Вардариште, како и депонијата „Дрисла“, при што во воздухот беа ослободени големи количества штетни материи.
Граѓаните неколкупати излегоа на протести, предупредувајќи дека ваквите пожари го загрозуваат нивното здравје и дополнително го влошуваат квалитетот на воздухот во Скопје.
„Ниту една повеќе“: Нов протест во Скопје за правда на жените
Со една минута молк за почит кон Росица Коцева која беше убиена од нејзиниот поранешен партнер, но и за „сите жртви на системот на нееднаквост“, почна денешниот протест на движењето „Ниту една повеќе“.
Ова движење, кое се формираше по убиството на 31-годишната Росица, денеска (25 септември) го организираше вториот протест во Скопје реагирајќи дека системот не ги штити жртвите.
„Се чини дека и по смртта, крикот на Росица не се слуша“, порачаа активистките кои ја блокираа раскрсницата кај паркот „Жена борец“.
Тие побараа промени во кривичниот законик кои ќе дозволат семејното насилство да се гони по службена должност. Овие измени веќе се поднесени, но организаторите на протестот, апелираа тие да бидат приоритет и за Владата и за Собранието.
„Иако денеска се закажа јавна расправа, бараме повеќе од симболични расправи. Бараме конкретни решенија кои ќе ја разрушат културата на силување и на насилство. Бараме целосен увид во тоа како институциите и полицијата се справуваат со ситуации на пријави, да се даде јасна отчетност зошто сѐ уште се случуваат фемициди иако жртвите пријавуваат и пријавуваат“, порача во говорот пред Собранието, активистката Сара Миленковска.
Таа и останатите меѓу другото, побараа и да се ревидира процедурата преку која се пријавува родово базираното насилство, а жртвата да знае дека „има различни сервиси кои може да ѝ помогнат“.
Од движењето „Ниту една повеќе“, обвинија дека системот ги игнорира жртвите дури и кога тие одново го пријавуваат насилството.
Посочија и дека нивните блокади, веќе стануваат „општонародно движење во државата“ и најавија дека ќе продолжат и понатаму.
„Би сакала одново да го вратиме нашиот колективен дух, со што ќе можеме колективно да тагуваме и да се разбесниме на овој систем кој не само што ни го сврте грбот, туку и овозможи уште една жртва, уште една жена што очајно барала помош, да не биде слушната. И тоа да заврши со нејзината смрт. Наместо да се плашиме која ќе биде следна, тука сме да кажеме дека нема да има ниту една повеќе. Овој систем не нѐ штити. Не постои правда, само смрт“, додаде една од активистките која се обрати за време на денешниот протест.
Протестите за заштита на жртвите на семејно насилство, почнаа минатата недела по последниот случај на фемицид, во кој животот го загуби велешанката, Росица Коцева, по што беше убиен и нејзиниот татко.
Сторителот на двете убиства, поранешниот партнер на Росица, Илија, веднаш потоа си го одзеде и сопствениот живот.
Според статистичките податоци на Министерството за внатрешни работи, во првите шест месеци од годинава, извршени се вкупно 512 кривични дела во врска со семејното насилство, од кои најголемиот број од случаите се извршени од страна на мажите – вкупно 474 и кои повеќето завршиле со телесни повреди.
Најголем дел од кривичните дела во семејното насилство се извршени од страна на сопругот – 223 случаи, потоа следуваат случаите кои се извршени од сопругите, од децата, од родителите и од поранешните партнери.
Вучиќ разговарал за Косово со генералниот секретар на ОН Гутереш
Српскиот претседател Александар Вучиќ се сретна со генералниот секретар на Обединетите нации (ОН) Антонио Гутереш на 25 септември, со кого рече дека имал „добар и отворен разговор“.
Вучиќ на својот Инстаграм профил изјави дека разговарале за ситуацијата во Косово и „можните чекори за надминување на предизвиците“.
„Секогаш добар и отворен разговор со Гутереш, со кого разменив мислења за најважните глобални теми и клучни прашања за иднината на светот што ќе им ги оставиме на идните генерации“, рече Вучиќ.
Вучиќ е во Њујорк, каде што учествува на генералната дебата на 80-тата седница на Генералното собрание на ОН.
Во своето обраќање пред оваа меѓународна организација на 24 септември, за време на кое зборуваше и за ситуацијата во Босна и Херцеговина и ентитетот на БиХ Република Српска, антивладините протести во Србија, конфликтот во Појасот Газа и убиството на американскиот конзервативен активист Чарли Кирк, Вучиќ рече дека Косово е „неразделен дел“ од Србија.
Тој изјави дека Србите на Косово живеат во „драматични услови“.
Косово прогласи независност во 2008 година, која Србија не ја признава.
Повеќе од 100 земји ја признаваат независноста на Косово, а од 27-те членки на Европската Унија, кон чие членство се стремат и Србија и Косово, Косово е признато од 22 земји-членки.
Дијалогот за нормализација на односите меѓу Србија и Косово се одвива од 2011 година под покровителство на Европската Унија.
Мицкоски најавува „македонска резолуција“ за заштита на националните интереси
Претседателот на Владата и лидер на ВМРО-ДПМНЕ, Христијан Мицкоски, вечерва најави дека по завршувањето на локалните избори неговата партија ќе предложи „македонска резолуција“ која ќе има за цел да ги штити македонските национални интереси.
Мицкоски изнесе критики за предложената Резолуција на СДСМ денеска од претседателот на опозициската партија Венко Филипче, посочувајќи дека во неговиот предлог за преамбулата се содржани неточни факти и, како што рече, „монструозни лаги“.
„И ние како ВМРО-ДПМНЕ, како одговорна државотворна партија ќе направиме една вистинска резолуција. Еве како подлога ќе ја искористиме оваа резолуција и преку собраниските комисии после завршувањето на локалните избори ќе формираме т.н. македонска резолуција која што ќе има за цел да ги штити македонските национални интереси. Нешто што, за жал, за СДСМ видовме дека во минатото не постои, а мене ми е жал што и овој претседател на СДСМ како и неговите двајца претходници продолжува по таа патека“, изјави Мицкоски.
Премиерот посочи дека немал доволно време да навлезе во детали за документот на СДСМ, но дека му паднале во очи точките во преамбулата, кои според него, не се точни.
„Да речеме, се обидува да се негира историски факт дека македонскиот јазик бил официјален јазик во ОН во 2019 година. Тоа е монструозна лага, особено во годината кога славиме 80 години од кодификацијата на македонскиот јазик и неговото примање во ОН“, рече Мицкоски.
Тој додаде дека има и други неточности, вклучувајќи ги датумите за почеток на преговорите со ЕУ, како и конфузијата во однос на копенхашките критериуми и билатералните договори со Грција и Бугарија.
Денеска лидерот на СДСМ, Венко Филипче, презентираше предлог Резолуција за продолжување на европскиот пат на Северна Македонија, која предвидува национален консензус за уставните измени и временска рамка за одблокирање на преговорите со ЕУ.
Естонија му забрани влез на Милорад Додик
Естонија воведе санкции врз Милорад Додик, поранешниот претседател на босанскиот ентитет Република Српска, како и врз Ирина Влах - проруска политичарка од Молдавија.
Како што објави естонското Министерство за надворешни работи на 25 септември, на Додик и Влах им е забранет влез во балтичката држава.
Во соопштението се вели дека министерот за надворешни работи Маргуш Цакна вовел санкции врз две лица кои „го поткопуваат суверенитетот и територијалниот интегритет на државите и поттикнуваат сепаратизам“.
„Новата санкција дозволува примена на забрана за влез врз лица за кои постојат докази за учество или активна поддршка на активности во странство што ги кршат нормите и принципите на меѓународното право“, рече Цакна.
Со тоа, Естонија им се придружува на Германија, Австрија и Словенија, кои му забранија на Додик влез оваа година поради неговите сепаратистички тенденции.
Додик претходно беше под санкции од САД, како и од Велика Британија, поради неговите антидејтонски активности.
На Додик му беше одземен мандатот како претседател на РС откако беше потврдена првостепената пресуда на Судот на Босна и Херцеговина за непочитување на одлуките на високиот претставник.
Тој беше осуден на една година затвор - која ја откупи, во согласност со законот - и шестгодишна забрана за вршење јавна функција.
По ова, во РС беа распишани предвремени претседателски избори, кои се закажани за 23 ноември.
Санкциите за молдавската политичарка Влах, поранешна гувернерка на автономниот регион Гагаузија во Молдавија, доаѓаат истата недела кога земјата одржува парламентарни избори, на кои ќе се одлучи дали земјата ќе се приближи кон Европската Унија или кон Русија.
Зеленски: Трамп ја поддржува Украина да возврати на руските напади врз енергетската инфраструктура
Украинскиот претседател Володимир Зеленски изјави дека претседателот на САД, Доналд Трамп, му рекол дека Украина може да одговори на руските напади врз енергетската инфраструктура на ист начин, како што Украина продолжува да ги напаѓа руските рафинерии.
„Доколку ја нападнат нашата енергија, претседателот Трамп поддржува дека можеме да возвратиме со напаѓање на нивната“, рече Зеленски во интервју за Аксиос објавено на 25 септември.
Тој додаде дека Трамп, исто така, дал зелено светло за одмазднички напади врз руски воени објекти, но нагласи дека до нив може да биде потежок пристапот поради високото ниво на заштита на тие објекти.
Коментарите на Зеленски дојдоа неколку дена по разговорите со Трамп на маргините на Генералното собрание на ОН во Њујорк на 23 септември.
Средбата беше проследена со ненадејна промена во реториката од Доналд Трамп, кој рече дека Украина може да ја врати контролата врз своите граници со „време, трпение и финансиска поддршка од Европа, а особено од НАТО“.
„[Рускиот претседател Владимир] Путин и Русија се во големи економски проблеми“, напиша Трамп на својата страница Truth Social, сугерирајќи дека финансиските проблеми на земјата се главна причина за неговата новооткриена доверба во можностите на Украина.
Кремљ го негираше ова тврдење на 24 септември, иако призна дека „да, Русија има одредени тензии и проблематични области во различни сектори на економијата“.
Додека Зеленски рече дека му објаснил на Трамп дека Украина има дронови што можат да стигнат длабоко на руска територија, Киев продолжи да ја напаѓа руската инфраструктура за рафинирање на нафта, што е клучно за воените напори.
Денот по средбата на американските и украинските лидери во Њујорк, украинските дронови го нападнаа петрохемискиот комплекс Салават, еден од најголемите во Русија, кој се наоѓа во регионот Башкортостан.
Салават, кој се наоѓа на околу 1.500 километри од украинските линии на фронтот, произведува 150 видови производи, вклучувајќи бензин, дизел гориво, масло за греење, битумен и полиетилен.
По бранот украински напади, за кои беа пријавени и руските објекти за дистрибуција на нафта во регионите Брјанск и Самара, Русија се соочува со зголемен недостиг на одредени видови гориво поради намален капацитет за рафинирање.
Платформата Crime.Realities на РСЕ објави дека бензинските пумпи во Крим, кој Русија нелегално го анектираше од Украина во 2014 година, речиси целосно останале без гориво.
Во интервјуто, Зеленски вели дека побарал од Трамп дополнителни системи за оружје за кои верува дека ќе извршат „дополнителен притисок врз Путин да седне и да разговара“.
Украинскиот политиколог Володимир Фесенко за Current Time изјави дека продажбата на офанзивно американско оружје на Украина ја гледа како силна алтернатива на можните европски и американски санкции врз Русија.
„Нема да биде бесплатно... Но, тоа е алатка што би можела да изврши притисок врз Путин“, додаде Фесенко.
М-НАВ: Радарот на скопскиот аеродром повторно во функција
М-НАВ АД Скопје соопшти дека радарот на Меѓународниот аеродром Скопје повторно е ставен во функција по тридневна работа на отстранување на дефектот на радарската глава Бањски рид.
Според соопштението, дефектот бил успешно отстранет на 24 септември во 16:40 часот, а радарската глава до денеска, 25 септември до 12 часот, подлежела на неопходни тестирања пред да биде вклучена во системот за контрола на воздушниот сообраќај.
М-НАВ потврдува дека за време на нефункционалноста на радарот, безбедноста на воздушниот сообраќај не била загрозена. Единствено бил намален протокот на аеродромот за да се почитуваат меѓународните стандарди.
Во соопштението, М-НАВ се оградува од неточните информации што беа споделени во јавноста, кои според нив биле користени за политички цели и создавање погрешна слика за работењето на друштвото.
Компанијата се заблагодарува на поддршката од Владата, особено од вицепремиерот и министер за транспорт Александар Николоски.
Мултимедија
Најпосетени
Што треба да знаете