Вести
Почна, па се одложи судењето против поранешниот директор на Онкологија, Васев и тројца онколози
Судскиот процес против четворица лекари онколози, меѓу кои и поранешниот директор на Клиниката за онкологија Нино Васев за несовесно лекување на пациенти, во предметот „Онкологија“, се одложи за 5 септември поради отсуство на второобвинетата Мери Пешевска.
Во Основниот кривичен суд Скопје денеска на обвинителна клупа седна првообвинетиот Никола Васев и двајца обвинети онколози Симонида Црвенковска и Драган Јакимовски, додека за Пешевска нејзиниот бранител, адвокат Јовица Страшевски до Судот достави медицинска документација од 10 јули и барање за одлагање на денешното рочиште.
Одбраната, пред почетокот на денешното рочиште, достави дополнение на докази со кои се спорат вештачењата на Обвинителството.
Адвокатот на Нино Васев, до Судот доставил дополнителен доказ, со кој, како што наведе, се докажува дека лицето Маја Радник, нема статус на лице судски вештак во Словенија.
„Сметам дека доказите обезбедени од Обвинителството кои се однесуваат на вештачење од Словенија треба да бидат издвоени и да не бидат ценети во постапката“, реагираше адвокатот.
Јавната обвинителка Ана Гоговска Јакимовска, на тоа наведе дека Обвинителниот акт ја поминал процедурата за оцена и нејасно е зошто ова не било акцентирано во тој дел.
„Во конкретниот случај е обезбедена замолница до Србија и Словенија со што е обезбедена законитост на доказите. Не се спори содржината на вештачењата туку процедурата. Сметам дека ваквите наводи на одбраната се беспредметни, дотолку што се поминати во фаза на оценка на обвинителен акт“, изјави обвинителката Гоговска Јакимовска.
Судијката Снежана Марковска, која го води случајот, го прифати барањето за одлагање на денешното рочиште поради отсуството на второобвинетата, а со цел, како што наведе и Судот да се запозна со барањата на одбраната за отфрлање на дел од доказите, прибавени од Обвинителството.
Инаку според обвинението, првообвинетиот Васев како директор на Клиниката, во соизвршителство со друг лекар на истот оддел, се товари дека извршил продолжени „тешки дела против здравјето на луѓето и несовесно лекување болни“.
Во обвинителниот акт стои дека со медицинските вештачења е утврдено дека кај 29 пациенти првообвинетиот применил очигледно неподобен начин на лекување и спротивно на тековните онколошки упатства, со отстапувања во дозирањето и во фазата на лекување, давал лекови од новите генерации на таргет и имунотерапија со што тешко го нарушил здравјето на пациентите. Во дел од случаите ова му било овозможено од втората обвинета која му ставила на располагање свој факсимил со кој одобрувал и препишувал терапија и свое корисничко име и лозинка со кои радолжувал терапија во ХИС системот на Јавна здравствена установа Универзитетска клиника за онкологија и радиотерапија.
Другите двајца лекари се товарат за основното кривично дело „несовесно лекување болни“, сторено како продолжено кривично дело.
Врз основа на медицинските истории за овие двајца обвинети лекари е утврдено дека одредувале терапија со лекови од новите генерации на таргет и имунотерапија во фаза на лекувањето кога било многу очигледно дека пациентите од таквиот лек воопшто нема да имаат корист поради лошиот перформанс статус и немањето време да се развие механизмот на дејство, без да биде наведена телесна тежина и висина на пациентите, со отстапувања во дозирањето, со што дополнително ја влошиле нивната состојба.
Во случајот „Онкологија“, обвинителство поднесе уште едно обвинение кое се уште е на оценување во Кривичниот суд, и се однесува за економското работење на Клиниката, во кое првообвинет, исто така, е поранешниот директор Васев, заедно со поранешниот економски директор на Клиниката. Двајцата директори се обвинети за злоупотреба на службена положба, измама и проневера во периодот од 2018 до 2022 година, при што со незаконски постапки за набавка на лекови му нанеле штета на државниот буџет од над 2,2 милијарди денари. На Васев и Нухи, за овој случај им беше определен 30 дневен притвор на 20 јуни годинава.
Во обвинителниот акт стои дека тие, спротивно на законите и без валидна документација, овозможувале исплати од Фондот за здравствено осигурување, со што добавувачите прибавиле корист од над 430 милиони денари. Дополнително, медицинскиот директор фиктивно раздолжувал лекови и присвоил дел од нив, со што лично прибавил имотна корист од најмалку 13 милиони денари.
Предметот „Онкологија“ беше оформен во јануари годинава по допрен глас врз основа на повеќе новинарски истражувања, кои укажуваа на определени неправилности, констатирани и во извештајот на Државниот завод за ревизија во врска со работењето на Универзитетска клиника за радиотерапија и онкологија – Скопје.
Истрагата ОЈО Скопје ја заврши на 22 мај годинава и до Кривичен поднесе две обвиненија за предметот „Онкологија“.
види ги сите денешни вести
Европската агенција за лекови: Парацетамолот е безбеден за употреба за време на бременост
Европската агенција за лекови (ЕМА) во вторник изјави дека нема нови научни докази за промена на сегашните препораки за употреба на парацетамол (познат како Тиленол во САД) за време на бременоста.
„Достапните докази не покажуваат врска помеѓу употребата на парацетамол за време на бременоста и аутизмот“, се вели во соопштението на ЕМА.
Еден ден претходно, американскиот претседател Доналд Трамп го поврза аутизмот со вакцините против деца и земањето Тиленол (paracetamol) за време на бременоста за време на прес-конференција, ставајќи ги тврдењата што не се поткрепени со научни докази во срцето на здравствената политика на САД.
Медицинските експерти и организациите ширум светот, вклучувајќи ја и Светската здравствена организација (СЗО), ги отфрлија овие тврдења како неосновани и потенцијално штетни.
„Достапните докази не пронајдоа никаква врска помеѓу употребата на парацетамол за време на бременоста и аутизмот“, се вели во соопштението за Ројтерс од Европската агенција за лекови (ЕМА).
Агенцијата додаде дека парацетамолот може да се користи за време на бременоста кога е потребно, но секогаш во најниската ефикасна доза и со најмала можна фреквенција.
Шпанија стави ембарго на извозот на оружје за Израел
Шпанската влада во вторник одобри „тотално“ ембарго за извозот на оружје кон Израел, дел од пакет мерки насочени кон запирање на она што премиерот Педро Санчез го нарече „геноцид во Газа“.
Со декретот се забранува целиот извоз во Израел на одбранбен материјал и производи или технологии со двојна употреба, како и увозот на таква опрема во Шпанија, изјави министерот за економија Карлос Куерпо на прес-конференција.
Со декретот, исто така, се блокираат барањата за транзит на гориво за авиони со потенцијални воени примени и се забранува увоз на производи што потекнуваат од израелски населби на окупираните палестински територии, вклучително и нивното рекламирање, рече Куерпо.
„Овој декрет е голем чекор напред и е пионерски на меѓународно ниво кога станува збор за целосно ембарго за оружје врз Израел“, изјави Куерпо на прес-конференција откако кабинетот ја одобри мерката.
Владата вели дека декретот „законски ја консолидира“ забраната за продажба или купување воена опрема со Израел што ја применуваше од почетокот на израелската офанзива во Газа.
Декретот ќе стапи на сила веднаш, но сепак мора да биде одобрен подоцна од парламентот, каде што левичарската влада на Санчез нема мнозинство и се бори да донесе закон.
Санчез го објави ембаргото за оружје овој месец како дел од пакет од девет мерки насочени кон запирање на она што тој го нарече „геноцид во Газа“.
Тој е еден од најгласните критичари во Европа на офанзивата во Газа, започната како одговор на нападите на Хамас од 7 октомври 2023 година.
„Верувам дека сме сведоци на еден од најмрачните и најстрашните настани на 21 век што се одвива пред нашите очи“, рече тој во понеделник на настан на Универзитетот Колумбија во Њујорк, на почетокот на Генералното собрание на ОН.
„И едноставно, меѓународната заедница не може да остане тивка и парализирана“, рече тој
Молдавската претседателка предупредува на руско мешање во изборите во недела
Молдавската претседателка Маја Санду во вторникот издаде предупредување за руското мешање во изборите во нејзината поделена земја овој викенд.
„Кремљ троши стотици милиони долари за да купи стотици илјади гласови од двете страни на Днестар и во странство“, рече Санду во видео обраќање.
Реката Днестар, која тече приближно север-југ низ источноевропската земја, ја означува границата на отцепениот источен регион Транснистрија.
„Парите се делеа на стотици агитатори „за да предизвикаат хаос, да сеат насилство и да го заплашат општеството“, рече прозападната претседателка од Кишињев.
Таа ги поврза овие загрижености со полициските рации на национално ниво во понеделникот, во кои беа приведени 74 лица под обвинение за подготовка на масовни немири во земјата.
Според истражителите, некои од приведените имале обука за оружје во Србија.
Санду предупреди дека ако Русија ја добие контролата врз Молдавија, нејзината интеграција во Европската унија ќе биде загрозена, а исто така изрази и стравувања за Украина, соседот на Молдавија на исток.
„Нашата земја ќе стане место-помошник за продирање во регионот Одеса“, рече таа во врска со украинскиот регион на Црното Море.
Молдавската проруска опозиција ги опиша полициските рации како обид за заплашување. Лидерот на Партијата на социјалистите на Молдавија, Игор Додон кој беше претседател помеѓу 2016 и 2020 година, рече дека Санду и нејзините поддржувачи имале за цел да ја воведат земјата во војна со Русија, јавува руската новинска агенција ТАСС.
Во меѓувреме, Руската служба за надворешно разузнавање (СВР) тврди дека ЕУ сака да ја окупира Молдавија и да распореди сили на НАТО во украинскиот регион Одеса, јавува германската новинска агенција ДПА.
НАТО ја предупреди Русија: „Ќе одговориме на сите провокации“
НАТО ја предупреди Русија дека ќе ги употреби „сите неопходни воени и невоени средства“ за да ги одбие заканите, откако во последните неколку недели имаше повеќе инциденти кога руски авиони или дронови влегоа во воздушниот простор на земји-членки на НАТО.
Членките на НАТО се состанаа на консултации во Брисел откако три руски борбени авиони влегоа во естонскиот воздушен простор минатата недела, а голем број руски дронови навлегоа во полскиот воздушен простор порано овој месец.
Романија, исто така, забележа руски дрон како влегува во нејзиниот воздушен простор овој месец, а полетувањата и слетувањата на аеродромот во Копенхаген во Данска привремено беа запрени откако доцна синоќа беа забележани два до три дрона во близина на аеродромот.
„Русија не треба да има сомнеж: НАТО и сојузниците, во согласност со меѓународното право, ќе ги употребат сите неопходни воени и невоени средства за да се одбраниме и да ги одвратиме сите закани од сите насоки. Ќе продолжиме да одговараме на начин, во време и во домен што ќе го избереме. Нашата посветеност на Член 5 е непоколеблива“, се наведува во заедничкото соопштение издадено по состанокот.
Членките на НАТО кои се предмет на вооружен напад можат да побараат воена помош според Член 5 од договорот на алијансата.
Тошковски: Факт е дека во изминатите неколку месеци имаме хибриден напад
Факт е дека во Македонија имаме хибриден напад во изминатите неколку месеци, од повеќе страни и на повеќе полиња имаме загрозување на одредени витални точки во државата, изјави министерот за внатрешни работи Панче Тошковски. Не кажа повеќе детали, но истакна дека МВР постапува по случаите.
„Факт е дека во Македонија имаме хибриден напад во изминатите неколку месеци, од повеќе страни, на повеќе полиња имаме загрозување на одредени витални точки во државата. Тоа сите го гледаме. Тоа го гледа македонскиот народ, тоа го гледате Вие новинарите, тоа го гледаат и институциите. Дали постапуваме? Постапуваме. Дали можам дополнително да изнесам информации во јавност во овој момент? Не“, изјави Тошковски, одговарајќи на новинарски прашања по 16-та меѓународна научна конференција „Системска корупција - најголемата безбедносна закана: Безбедносно-стратешки пристапи за решавање на сложените предизвици“, во организација на Факултетот за безбедност – Скопје.
Прашан дали има некоја нова трага или осомничени за „центрите на моќ“, за кои премиерот Христијан Мицкоски изјави дека се одговорни за пожарите, Тошковски, само кратко одговори „да, имаме“, без да даде повеќе детали.
Во последниот период, за кратко време се случија неколку пожари во скопскиот регион. Гореа депонии, сервиси за возила и фабрики со опасен отпад. Претставници на власта изјавија дека земјава е цел на хидридни напади и подметнувања пожари од центри на моќ во земјава и од надвор.
По тврдењата за хибридни напади, од Основното јавно обвинителство за гонење организиран криминал и корупција (ОЈО ГОКК) соопштија дека ја следат состојбата, но дека Министерството за внатрешни работи е тоа што треба да открие вакви кривични дела.
По пожарите во поранешната градска депонија Вардариште и во актуелната Дрисла, беше запалена фабрика за електронски и електричен отпад во Трубарево, а гореше и сервис за возила во близина на Пинтија.
Шведска повикува на „воена готовност“ во Европа
Шведскиот министер за одбрана, Пал Јонсон, денеска (23 септември) ја повика Европа да ги зголеми подготовките за можен вооружен конфликт, поради заканата што ја претставува Русија.
„Мораме да усвоиме нов европски начин на размислување - да преминеме од менталитет на мир кон подготвеност за војна“, рече Џонсон во Берлин, пред средбата со својот германски колега Борис Писториус, пренесува ДПА.
Џонсон предупреди дека Русија масовно се вооружува и гради армија што е „сè посмртоносна“ и дека постигнува голем напредок во оружјето со долг дострел и електронското војување.
Тој ги даде овие изјави за време на настан во Фондацијата Конрад Аденауер, нагласувајќи ја потребата од зајакнување на европската безбедносна политика.
Џонсон предупреди дека земјите-членки на НАТО мора потесно да соработуваат во областа на одбраната.
„Постои разновидност во рамките на алијансата кога станува збор за инвестиции во одбраната. Тоа не е добро. Не сакам да видам фрагментација во инвестициите во одбраната“, рече Џонсон.
Откако беше неутрална за време на Студената војна, Шведска се приклучи на НАТО минатата година како одговор на руската инвазија на Украина.
„Ја гледаме Украина како штит - или меч, ако сакате - против руската воена експанзија. Но, сега гледаме дека товарот на финансиската поддршка за Украина сè повеќе паѓа врз помал број сојузници во рамките на НАТО“, рече Џонсон.
Џонсон, исто така, повика на посилна билатерална одбранбена соработка со Германија, нагласувајќи дека двете влади треба да промовираат стандардизација и долгорочни договори.
Според него, Берлин и Стокхолм следат сличен пат кога станува збор за одбранбената стратегија.
Двете земји инвестираат рекордни суми во одбраната по долг период на недоволно инвестирање, додека се соочуваат со истите предизвици што ги претставува војната во Украина и руската закана во регионот на Балтичкото Море.
Утре и задутре скрининг за населението во Трубарево и околината
Министерството за здравство, во соработка со Универзитетската клиника за пулмологија и алергологија, организира дводневен скрининг на населението во Трубарево, што ќе се одржи утре и задутре, 24 и 25 септември, потврдија за МИА, министерот Азир Алиу и директорот на Клиниката, Оливер Зафировски.
„Скринингот ќе го вршат две екипи од Клиника за пулмологија со две амбулантни возила. Прегледите се наменети за сите заинтересирани од Трубарево и од околните населени места, а особено за лицата кои чувствуваат потешкотии при дишењето или имаат симптоми кои укажуваат на заболувања на дишните патишта, рече министерот Алиу.
Предвидено е скринингот да опфати комплетен клинички преглед, спирометрија, ЕКГ и други потребни прегледи.
„Доколку се појави потреба од дополнителни испитувања, тие ќе бидат извршени на лице место или пациентите ќе бидат упатени на Клиниката за пулмологија“, додава министерот Алиу.
Со оваа акција, како што посочи министерот, се овозможува навремено детектирање евентуални симптоми кај населението, со цел обезбедување на потребната здравствена заштита.
По неодамнешниот пожар во Трубарево каде што гореше складиште за електронски отпад, жителите се исплашени за последиците за нивното здравје.
Од Министерствот за животна средина информираа дека концентрациите на PM10 честички во зоната на Трубарево се безбедни и не ја надминуваат законската граница, додека испитувањата и на воздухот и на почвата продолжуваат и натаму.
И според резултатите од Индикативните мерења на суспендирани цврсти честички, во зоната на Трубарево, во периодот 14-18 септември 2025 година, што ги изврши Лабораторијата АМБИКОН при Факултетот за природни и технички науки на Универзитетот „Гоце Делчев“ Штип, воздухот во Трубарево не е загаден со ПМ 10 честички.
Министерството за здравство на 16 септември соопшти дека во примероците од вода и почва земени по пожарот не биле откриени радиоактивност ниту опасни концентрации на тешки метали. Анализите на Институтот за јавно здравје опфатиле 16 тешки метали и покажале дека резултатите се во рамки на референтните вредности.
Калас: Признавањето на Палестина нема да ја подобри хуманитарната состојба во Газа
Подобрувањето на хуманитарната ситуација на Газа на што постојано работиме, не зависи од признавањето на Државата Палестина, порача високата претставничка на ЕУ за надворешни работи и безбедносна политика Каја Кала,с по средбата на шефовите на дипломатиите на Унијата со нивните колеги од Бразил, Индија и Мексико, што се одржа синоќа (22 септември) во Њујорк.
„Сите европски земји го поддржуваат решението за две држави. Значи, за да имаме две рамноправни држави, преземени се чекори од некои земји членки во врска со признавањето, со цел да се испрати јасен сигнал дека европските земји ги поддржуваат и Палестинците во овој конфликт. Тоа значи безбеден и сигурен Израел и одржлива палестинска држава“, рече Калас.
Според неа, министрите биле јасни во своите ставови дека решението за две држави е најдобрата шанса за траен мир на Блискиот Исток, бидејќи поддршката на овој модел значи дека всушност постојат и Израел и Палестина.
Таа истакна дека актуелната ситуација во Газа претставува „катастрофален неуспех на човештвото“ и ја повика израелската Влада веднаш да ги отстрани сите хуманитарни ограничувања.
„Јасно е дека Хамас (САД и ЕУ ја прогласија за терористичка организација) мора да го положи оружјето и да ги ослободи сите заложници, но и проширувањето на доселеничките населбите и анексијата на територии се некомпатибилни со мирот. Во Европската Унија се обидуваме да го насочиме фокусот кон помагање на луѓето на терен и вистинско подобрување на хуманитарната ситуација. Ние сме најголемиот донатор на хуманитарна помош и силен поддржувач на Палестинската самоуправа“, рече Калас.
Високата претставничка на ЕУ додаде дека на состанокот станало збор и за војната во Украина, нагласувајќи дека со секој руски воздушен напад се намалуваат перспективите за мир.
„Русија покажува апсолутен презир кон секој обид за дипломатија. Постојаните нарушувања на воздушниот простор на Европската Унија од страна на Москва се неодговорни, опасни и ризични ситуации што можат да излезат од контрола, а ние треба да бидеме цврсти“, рече Калас, додавајќи дека во тој правец е и новиот пакет санкции кон Русија, што Европската комисија го предложи во петокот.
Калас истакна дека влијанието на војната на Русија се чувствува и надвор од Европа.
„Секој ден Русија ги крши основните принципи на Повелбата на ОН. Заедно со нашите колеги, денес разговаравме и за тоа дека мултилатералниот поредок е навистина нешто што сите треба да го браниме, а Повелбата на ОН е во неговата суштина“, додаде Калас.
Данска се соочува со „висока закана од саботажа“ откако беспилотни летала го затворија аеродромот
Данската разузнавачка служба на 23 септември соопшти дека Данска се соочува со „висока закана од саботажа“, откако големи беспилотни летала летале над аеродромот во Копенхаген со часови, предизвикувајќи негово затворање.
„Се соочуваме со висок ризик од саботажа во Данска. Некој можеби не сака нужно да нè нападне, туку да ни предизвика стрес и да види како ќе реагираме“, изјави на прес-конференција Флеминг Дрејер, директор за операции во данската разузнавачка служба ПЕТ.
Данската полиција претходно изјави дека не знае кој стои зад беспилотните летала, но дека доказите сугерираат дека станува збор за „способен актер“.
Данската премиерка Мете Фредериксен изјави дека дроновите кои ја попречија работата на аеродромот во Копенхаген претставуваат „најсериозен напад врз критичната инфраструктура на Данска досега“, пренесе денеска новинската агенција Рицау.
„Ова кажува нешто за времето во кое живееме и за тоа на што како општество треба да бидеме подготвени. Секако, не исклучуваме ниту една можност за тоа кој стои зад тоа“, додаде таа.
Фредериксен нагласи дека инцидентот е во согласност со неодамнешните појави на дронови, нарушувања на воздушниот простор и кибер напади врз европските аеродроми.
Полетувањата и слетувањата на аеродромот привремено беа запрени откако доцна синоќа беа забележани два до три дрона во близина на аеродромот. Неколку летови беа пренасочени.
Истражителот на Копенхагенската полиција, Јенс Јесперсен, изјави дека врз основа на бројот и големината на дроновите, како и времето на инцидентот, властите веруваат дека зад нападот веројатно стои „способен оператор“. Тој додаде дека таков оператор би поседувал вештини, намера и алатки за извршување на операцијата.
Трамп ќе разговара за Газа со претставници од земјите со муслиманско мнозинство
Претседателот на Соединетите Држави, Доналд Трамп, денеска (23 септември) ќе се сретне со лидери и претставници од неколку земји со муслиманско мнозинство за да разговараат за ситуацијата во Газа, која се соочува со зголемена офанзива од сојузникот на Вашингтон, Израел.
Портпаролката на Белата куќа, Каролин Ливит, изјави дека Трамп ќе одржи мултилатерален состанок со Саудиска Арабија, Обединетите Арапски Емирати, Катар, Египет, Јордан, Турција, Индонезија и Пакистан.
Лице запознаено со разговорите изјави дека темата ќе биде Газа, објави Ројтерс.
Според информативниот портал Аксиос, Трамп ќе ѝ презентира на групата предлог за мир и управување со Газа по војната.
Покрај ослободувањето на заложниците и завршувањето на војната, се очекува Трамп да разговара за американските планови за израелско повлекување и управување со Газа по војната, без вклучување на Хамас, кој Вашингтон и Европската Унија го сметаат за терористичка организација.
САД сакаат арапските и муслиманските земји да се согласат да испратат воени сили во Газа за да го олеснат повлекувањето на Израел и да обезбедат средства за програми за транзиција и реконструкција, пишува Аксиос.
Трамп ќе се обрати пред Генералното собрание на Обединетите Нации, еден ден откако десетици светски лидери се собраа во Њујорк за да го поддржат создавањето палестинска држава, што е голем дипломатски пресврт, речиси две години по војната во Газа, кој се соочува со жесток отпор од Израел и САД.
Некои земји рекоа дека решението за две држави е единствениот начин за постигнување мир, но Израел рече дека признавањето на палестинска држава би било награда за екстремизмот.
Израелската офанзива врз Газа, од октомври 2023 година, уби десетици илјади луѓе, го расели целото население на Газа во рамките на територијата и предизвика криза со глад. Многу експерти за човекови права, академици и истрагата на Обединетите Нации ја окарактеризираа оваа ситуација како геноцид.
Израел ги нарекува своите постапки самоодбрана, по нападот на Хамас во октомври 2023 година, во кој загинаа 1200 луѓе и беа земени повеќе од 250 заложници.
За време на војната во Газа, Израел, исто така, ги бомбардираше Иран, Либан, Јемен, Сирија и Катар. Трамп вети брз крај на војната во Газа, но решение сè уште не е постигнато, осум месеци по неговиот мандат.
Мандатот на Трамп започна со двомесечно примирје меѓу Израел и Хамас, кое заврши кога израелските воздушни напади убија 400 Палестинци на 18 март. Неодамна, сликите од гладни Палестинци, вклучувајќи и деца, предизвикаа глобален бес поради израелската офанзива.
Во февруари, Трамп предложи САД да ја преземат контролата врз Газа и трајно да ги отстранат Палестинците од областа.
Овој план е окарактеризиран од експерти за човекови права и Обединетите Нации како „етничко чистење“. Присилното преселување е нелегално според меѓународното право. Трамп го претстави планот како идеја за реконструкција на областа.
Мултимедија
Најпосетени
Што треба да знаете