Вести
Поголемиот дел од Скопје е без вода
Поголемиот дел од Скопје од раните утрински часови денеска (21 декември) е без вода поради најавената сложена санација на главниот цевковод. Затворен е еден од двата главни вентили, а вода нема во најголемиот дел од населбите од десната страна на реката Вардар.
Од јавното градско претријатие „Водовод и канализација“ уверуваат дека санацијата ќе трае најмногу 15 часа.
„Главна цел на овој Оперативен план е подобрување на водоснабдувањето и притисокот во Општина Ѓорче Петров и Карпош, со репарација на 6 сегменти каде во изминати децении се нотирани огромни загуби вода“, велат од „Водовод и канализација“.
Градоначалничката на Скопје, Данела Арсовска, во пресрет на оваа операција уверуваше дека прекинот на вода ќе биде како и при секоја редовна санација.
„Техничките лица на јавните скопски претпријатија се подготвени согласно планот да направат што е можно во пократок рок, така што за истото нема да има никаква потреба од дотур на вода, затоа што нема да трае ништо повеќе од една редовна санација на кој било дефект што го имаме во градот“, рече Арсовска.
Градоначалничката посочи дека ваква санација се случува една на 50-60 години и обвини дека претходните градски власти го одложувале овој зафат повеќе од една деценија.
Вода во Скопје има само во неколку населби: Чаир Бутел, Радишани, Визбегово, Бардовци, Железара, Сарај, Шуто Оризари, Топанско Поле, Новоселски пат, Даме Круев, Кисела Јабука, Стопански двор, Волково, Орман и делови од Ѓорче Петров.
Поради најавениот прекин, изминативе денови беше забележана зголемена продажба на вода во маркетите, а Институтот за јавно здравје (ИЈЗ) излезе и со препораки.
ИЈЗ им препорача на граѓаните да складираат вода најмногу по четири литри по лице на ден, да користат средства за дезинфекција на раце, да готват оброци кои не бараат многу вода за подготовка и миење…
На Клиниката за хируршки болести „Свети Наум Охридски“ и на ТОАРИЛУЦ, пак, непречено ќе се реализираат само најитните интервенции. Директорите на двете установи во изјава за државната агенција МИА информираа дека се преземени сите неопходни чекори за да нема застој кај итните интервенции.
Дел од угостителските објекти во Скопје, пак, обезбедуваа резерви на вода, а некои најавија и дека нема да работат.
види ги сите денешни вести
Мицкоски очекува царините од САД да паднат под 15 насто
Премиерот Христијан Мицкоски изјави дека очекува американските царини за македонските производи да паднат под 15 насто, истакнувајќи дека преговорите со САД ќе продолжат во следниот период после летните одмори.
„Од она што го видовте како соопштение од страна на Кабинетот на претседателот на САД, Доналд Трамп, ова е прва фаза, ова не е договор, бидејќи тој кажа дека до 1 август ќе ги објави новите царински стапки, не се ни царини, ова се трговски маржи. Преговорите продолжуваат. Во моментот се наоѓаме на една условно кажано пауза. Веднаш по годишните одмори коишто ќе ги користи и администрацијата и од Кабинетот на претседателот Трамп и канцеларијата на трговскиот претставник на САД, но и нашите луѓе во Министерството и институциите, очекуваме во втората половина на август да продолжиме со преговорите“, рече Мицкоски.
Мицкоски очекува тарифите на САД да одат уште подолу, изразувајќи благодарност кон САД што ја корегираа тарифата.
„Ние продолжуваме понатаму да преговараме и оптимист сум дека ќе одиме уште подолу“, рече Мицкоски.
Со новата извршна наредба што синоќа ја потпиша американскиот претседател Доналд Трамп за воведување царини за речиси сите земји кои досега немаат трговски договор со САД, царинската стапка за Северна Македонија од претходните 33 е намалена на 15 проценти.
Царина од 15 отсто САД ќе имаат и со Европската Унија, со која склучија трговски договор на 27 јули. Од земјите во регионот, со царинска стапка од 15 насто ќе бидат и Хрватска и Словенија, производите од Србија ќе се царинат со 35, од Босна и Херцеговина со 30 насто, а најниска царина ќе има Црна Гора 10 отсто.
Трамп во април годинава, првично објави царинска стапка за македонските производи од 33 отсто. Со новата извршна наредба на американскиот претседаел, се воведуваат нови царини помеѓу 10 и 50 проценти за речиси сите трговски партнери на САД. Новите американски царини, ќе стапат во сила на 7 август, а не на 1 август, со цел да се обезбеди повеќе време за нивно спроведување спроведување на новите царини.
Милорад Додик правосилно осуден за непочитување на одлуките на високиот претставник
Милорад Додик, претседателот на ентитетот Република Српска (РС) во Босна и Херцеговина, денеска (1 август) правосилно е осуден за непочитување на одлуките на високиот претставник, дознава Радио Слободна Европа (РСЕ).
Пресудата ја донесе тричлениот совет составен од Амела Хускиќ, Весна Јесенковиќ и Хилмо Вучиниќ, и со неа советот ја потврди првостепената пресуда од 26 февруари, со која Додик беше осуден на една година затвор и шестгодишна забрана за вршење политичка функција.
И адвокатскиот тим на Додик и Обвинителството поднесоа жалби на првостепената пресуда што беше донесена во февруари.
Обвинителството бараше зголемување на затворската казна и забраната за вршење политичка функција, додека одбраната побара пресудата да се поништи.
Додик беше прогласен за виновен за потпишување на указ за прогласување на закони што високиот претставник во Босна и Херцеговина, Кристијан Шмит, претходно ги поништи.
Со тие закони, законодавните тела во Република Српска се обидоа да го спречат спроведувањето на одлуките на Уставниот суд на БиХ и високиот претставник на територијата на овој ентитет во БиХ.
Вториот обвинет во судскиот процес, Милош Лукиќ, вршител на должноста директор на Службениот весник на РС, кој ги објави спорните закони, со првостепената пресуда беше ослободен.
Кратко по пресудата во февруари, Народното собрание на РС усвои сет закони со кои се укинува надлежноста на државните судски и полициски институции на БиХ на територијата на Република Српска. Потоа, кон средината на март судот на БиХ издаде централна потерница против Додик, под сомнение за напад врз уставниот поредок.
За истите сомневања беа издадени потерници и за Радован Вишковиќ и Ненад Стевандиќ – премиерот и претседателот на парламентот на Република Српска.
Иако централната потерница значи дека сите полициски агенции во земјата треба да ги уапсат и да ги предадат лицата во надлежност на државните судски органи, тоа не се случи.
На почетокот на јули, Додик доброволно се појави пред Обвинителството на БиХ, во придружба на неговиот адвокат Горан Бубиќ, по што неговиот притвор беше прекинат, а му беше наредено периодично да се пријавува кај државен орган.
Неколку дена подоцна, и Вишковиќ и Стевандиќ доброволно се појавија пред судот, по што и нивниот притвор беше прекинат.
Приведени две лица од Косово за криумчарење мигранти од Кина
Ноќта на 31 јули македонската полиција привела две лица од Косово на возраст од 18 и 24 години поради сомнение за криумчарење мигранти, соопшти Министерството за внатрешни работи (МВР) на Северна Македонија.
Во возилото „фолксваген кеди“ - во кое еден од приведените косовски државјани бил возач, а другиот совозач - биле пронајдени осум мигранти од Кина.
Како што соопшти полицијата, околу 21:40 часот возилото било забележано на автопатот од Градско кон Скопје и не застанало на даден знак за стопирање од полицијата. Бегајќи, возачот од Косово удрил и ја оштетил наплатната станица на патарината кај Градско во Катланово, удрил во автомобил со странски регистрации, а оштетил и мотоцикл со македонски регистрации.
Потоа ја оштетил и рамката на патарината Петровец.
„Откако продолжил со движење, кај клучка ’Приштина‘ на обиколница кај Скопје возачот изгубил контрола и со возилото излетал од патот, по што и физички нападнал полициски службеник во обид да избега, но бил совладан и лишен од слобода“, соопшти МВР.
Двете лица од Косово биле задржани во полициска страница и против нив ќе се поднесе кривична пријава.
Мигрантите од Кина, пак, биле сместени во транзитен центар.
Експерти бараат итно стопирање на хидроцентралите на Дошница
Група експерти од областа на биологијата, геологијата, хидрологијата и географијата денеска упатија јавен апел до Министерството за животна средина и просторно планирање, барајќи итно запирање на сите активности поврзани со изградбата на мали хидроелектрани во сливот на реката Дошница.
Во своето писмо, потпишано од 13 еминентни научници, меѓу кои академик Владо Матевски и професорите Митко Караделев, Ивица Милевски, Златко Левков и Рената Ќуштереска, тие предупредуваат дека овие интервенции се планираат токму во време кога тече валоризација на Демиркаписката Клисура со цел нејзино прогласување за заштитено подрачје.
Дошница, која се наоѓа во рамки на ова подрачје, е идентификувана како една од најчистите и највредните водотеци во земјава, велат тие.
„Секоја интервенција пред завршување на валоризацијата може да предизвика неповратна штета врз екосистемите и водниот режим“, се вели во дописот, во кој експертите бараат Министерството да го стави текот на реката Дошница и нејзиниот предел под привремена заштита, согласно член 97 од Законот за заштита на природата.
Во нивниот јавен повик се предлага итен мораториум на сите инфраструктурни зафати, вклучително и изградбата на хидроцентралите МХЕЦ Баров Дол и МХЕЦ Папрад, сè додека не заврши научната проценка, не се дефинираат границите на идното заштитено подрачје и не се изработи план за управување со него.
Бидејќи сè уште не се утврдени степенот на заштита и просторните граници на потенцијалното заштитено подрачје, експертите сметаат дека секоја интервенција која може да предизвика неповратна деградација или девастација на природните вредности – како што е изградбата на мали хидроцентрали – мора итно да се стопира“, велат експертите.
Дозволи за две хидроцентрали се издадени на приватната фирма „Хидро Дошница“. Градежните активности се планирани во горниот тек на реката, на територијата на Општина Кавадарци, а граѓански активисти повеќе од еден месец ја блокираат пристапната патека.
Активистите предупредуваат дека за проектите не е изготвена Студија за оцена на влијанието врз животната средина, туку само Елаборат, иако Архуската конвенција и Поглавје 27 од европското законодавство бараат поинаков пристап за вакви интервенции кои зафаќаат јавни природни ресурси.
Советот за безбедност на седница кај Сиљановска-Давкова
Претседателката Гордана Сиљановска-Давкова за денеска (1 август) на пладне свика седница на Советот за безбедност.
Ова ќе биде втора седница на Советот откако Сиљановска-Давкова е на чело на државата. Таа ќе се одржи во претседателската вила „Водно“.
Покрај редовните членови, на покана на претседателката на седницата ќе присуствуваат и директорите на Агенцијата за национална безбедност и на Агенцијата за разузнавање, Бојан Христовски и Габриела Јаковлева, како и директорот на Дирекцијата за заштита и спасување, Стојанче Ангелов.
Редовни членови на Советот за безбедност по функција се: претседателот на Собранието Африм Гаши, премиерот Христијан Мицкоски, министерот за внатрешни работи Панче Тошковски, министерот за одбрана Тимчо Муцунски, министерот за надворешни работи и надворешна трговија Тимчо Муцунски.
Дел од ова тело се и тројца членови што ги именува претседателката на државата: Џевдет Хајредини, Малинка Ристевска-Јорданова и Владо Спиридонов.
Советот за безбедност е највисокото советодавно тело во државата коешто ги разгледува прашањата сврзани со безбедноста и одбраната на Републиката и дава предлози на Собранието и на Владата.
Русија: Соработката со НАСА во вселената ќе продолжи до 2028 година
Шефот на руската вселенска агенција Роскосмос изјави дека тој и неговиот колега од НАСА за време на разговорите во САД се согласиле да го продолжат работењето на Меѓународната вселенска станица (МВС) до 2028 година.
Вселената останува една од последните области каде има соработка меѓу САД и Русија, во време кога односите меѓу Москва и Вашингтон се речиси целосно нарушени поради конфликтот во Украина.
Претходно оваа недела, Роскосмос објави дека директорот на агенцијата, Дмитриј Баканов, отпатувал во Соединетите Американски Држави на разговори со вршителот на должноста администратор на НАСА, Шон Дафи.
Ова беше првата средба меѓу шефовите на вселенските агенции на двете земји од 2018 година.
„Дијалогот помина добро. Се согласивме МВС да остане оперативна до 2028 година … и ќе работиме на нејзино деорбитирање до 2030 година“, рече Баканов, според руската новинска агенција ТАСС.
Се очекуваше Баканов да се сретне и со тимот на мисијата Crew-11 на НАСА, вклучувајќи го и рускиот космонаут Олег Платонов, пред лансирањето на вселенскиот брод Crew Dragon на SpaceX.
МВС е заеднички потфат меѓу Русија, САД, Европа и Јапонија, а нејзината изградба започна во 1998 година.
Станицата беше планирана да биде оперативна до 2024 година, но Националната вселенска администрација на САД (НАСА) соопшти дека МВС ќе остане оперативна до 2030 година.
Како дел од широките санкции наметнати врз Русија по нејзината агресија во Украина, многу западни земји ја прекинаа соработката со Роскосмос.
Вселенската програма на Русија, извор на гордост за земјата со децении, со години се соочува со хронично недоволно финансирање и корупциски скандали.
САД ја намалија царината за македонски производи од 33 на 15 проценти
Северна Македонија од новата американска извршна наредба ќе биде погодена со царинска стапка од 15 отсто при извоз на производи во САД, што претставува значително намалување од претходно најавените 33 проценти. Одлуката е дел од поширока мерка на американскиот претседател Доналд Трамп, со која се воведуваат нови трговски правила за земјите што немаат билатерален договор со САД.
Трамп, потпиша извршна наредба со која се воведуваат повисоки царини за десетици земји низ целиот свет за „реструктуирање на глобалната трговија во корист на американските работници“, соопшти Белата куќа.
Новите царини се движат од 10 до 41 процент, со највисока царина за Сирија.
Европската Унија, Јапонија и Јужна Кореја ќе имаат царини од 15 проценти. Србија ќе се соочи со царини од 35 проценти, а Босна и Херцеговина со 30 проценти.
Белата куќа во документот наведува дека царините ќе стапат во сила на 7 август, а не на 1 август како што беше претходно најавено.
Царините за канадските стоки се зголемуваат од 25 на 35 проценти, но ќе стапат во сила од петок.
„Како одговор на континуираната неактивност и одмазда на Канада, претседателот Трамп сметаше дека е потребно да ги зголеми царините за Канада од 25 на 35 проценти за ефикасно справување со моменталната вонредна состојба“, соопшти Белата куќа, наведувајќи го неуспехот на Канада да соработува во борбата против фентанилот и другите нелегални дроги.
Канадските производи опфатени со Договорот меѓу САД, Мексико и Канада се ослободени од царините.
Канадскиот премиер Марк Карни во јуни изјави дека доколку не се постигне договор до почетокот на август, Канада веројатно ќе возврати со дополнителни царини за извоз на челик и алуминиум од САД.
Повисоките царини за канадските стоки се во остра спротивност со одлуката на Трамп да го одложи зголемувањето на царините за Мексико за 90 дена за да се овозможи повеќе време за преговори за поширок трговски договор.
Во меѓувреме, Кина има рок до 12 август да постигне долгорочен договор со администрацијата на Трамп, откако Пекинг и Вашингтон постигнаа првични договори во мај и јуни за прекин на зголемувањето на меѓусебните царини и укинување на забраната за увоз на ретки земни метали.
„Младински бунт“: Нов протест во Белград за несреќата во Нови Сад
Под мотото „Младински бунт“, студентите во блокада при Факултетот за драмски уметности, но и други граѓански собири, денеска (31 јули) протестираа во Белград. Граѓаните од 18 часот го блокираа сообраќајот, а како што јави репортерот на Радио Слободна Европа од терен, на протестот присуствувале околу илјада луѓе.
Пораки од учесниците
Вук, еден од учесниците на протестот, за РСЕ изјави дека дошол таму бидејќи сака системски промени во општеството.
„Прво, борба против корупцијата на највисоко ниво. Ни требаат слободни институции и правна држава“, изјави соговорникот.
На протестот присуствуваше и Зорка, како што вели, за да искаже бунт против „лагите и крадењето“.
„Итно да се смени претседателот на Србија затоа што владее според системот – државата, тоа сум јас“, изјави за РСЕ учесничката на протестот.
Протестот се одржа во пресрет на деветте месеци од загинувањето на 16 лица кои го загубија животот при падот на настрешницата на главната железничка станица во Нови Сад на 1. ноември.
Од тогаш во Србија се организираат студентски и граѓански демонстрации со барање за кривична и политичка одговорност на претставниците на владеачката СНС.
Директен повод за почетокот на континуираните протести во Србија беше физичкиот напад на студентите на Факултетот за драмски уметности кој се случи на 22. Ноември во Белград додека на улица во тишина им се оддаваше почит на агинатите во Нови Сад.
Студентите на ФДУ на 26 ноември соопштија дека бараат итно процесуирање на напаѓачите меѓу кои имаше и активни функционери на СНС и нивно разрешување од функциите.
Барањата на студентите се објавување на документацијата за реконструкцијата на железничката станица, процесуирање на напаѓачите на студентите на ФДУ, отфрлање на кривичните пријави против студентите уапсени на протестите и запирање на започнатите постапки, како и зголемување на буџетот на факултетите за 20 проценти.
Со овие барања, во Србија веќе девет месеци траат масовните студентски протести, граѓански демонстрации, блокади на факултетите и сообраќајниците.
За падот на настрешницата, на крајот на минатата година беа уапсени 13 лица.
Претседателката Сиљановска-Давкова за утре ја свика втората седница на Советот за безбедност
Претседателката Гордана Сиљановска-Давкова за утре напладне ја свика втората седница на Советот за безбедност.
Членови на Советот за безбедност по функција се: Африм Гаши, претседател на Собранието, Христијан Мицкоски, претседател на Владата, Панче Тошковски, министер за внатрешни работи, Владо Мисајловски, министер за одбрана, Тимчо Муцунски, министер за надворешни работи и надворешна трговија и тројцата членови, именувани од претседателката Џевдет Хајредини, Малинка Ристевска-Јорданова и Владо Спиридонов.
На втората седница на Советот за безбедност, на покана на претседателката Сиљановска-Давкова ќе присуствуваат и директорот на Агенцијата за национална безбедност, Бојан Христовски, директорката на Агенцијата за разузнавање, Габриела Јаковлева и директорот на Дирекцијата за заштита и спасување, Стојанче Ангелов.
Конститутивната седница на Советот за безбедност се одржа на 4 ноември 2024 година.
Пожарникарите од Словенија ќе останат овде уште седум дена
Регистриран е пожар во општината Берово кај планината Голем Готен кон Малешевските планини, и тој е под контрола – информираше денеска (31 јули) директорот на Центарот за управување со кризи, Мухамед Али.
Тој посочи дека интервенираат специјалните возила на Дирекцијата за заштита и спасување, хеликоптер од Чешка, припадници од противпожарната единица од Берово, припадници од противпожарната единица од Словенија, како и доброволци од „Национални шуми“.
Планот на надлежните е словенечките сили да останат овде седум дена.
Директорот на дирекцијата за заштита и спасување, Стојанче Ангелов на денешната заедничка прес конференција со Али, изјави дека уште најмалку седум дена овде ќе остане и чешкиот хеликоптер „блек хок“.
Во однос на состојбата на Готен, тој рече дека е смирена од беровска страна, но поради чадот и маглата немаат точен увид.
„Моментално се бараат жаришта под чадот. Доколку пожарот покажува активност, бидејќи сѐ уште го водиме како контролиран, гаснењето ќе продолжи во текот на раните утрински часови. Блек-хокот е на располагање, се повлече во Скопје, но исто така на располагање го имаме и полицискиот хеликоптер, како и двата ер-трактори на Дирекцијата. Тука се, се разбира и Словенците. Нашиот план е тие да се овде на седум дена, затоа што количината на дожд е многу мала“, изјави Ангелов.
Според него, иако температурите се во опаѓање, тие сепак се повисоки од 30 степени, а како што рече, тоа значи дека вегетацијата многу бргу ќе се исуши.
„Веќе утре, ако не продолжат овие поројни и краткотрајни дождови, повторно ќе имаме лоши услови од аспект на можност за палење на пожари“, додаде Ангелов.
Одговарајќи на новинарско прашање колку хектари шума изгореле на Готен, тој рече дека точната евиденција се води во „Национални шуми“. Но како што посочи, од она кое го видел на терен, не гори целата шума.
Ние имаме цели парчиња коишто се преживеани, а на многу места пожарот е низок. Горат лисјата и другата ниска вегетација – истакна Ангелов.
Претходно, од Центарот за управување со кризи преку писмено соопштение информираа дека денеска до 13:00 часот имало пет пожари на отворен простор на територија на цела држава, од кои четири се изгаснати.
Мултимедија
Најпосетени
Што треба да знаете