Две лица во Прилеп лишени од слобода поради „поткуп при избори и гласање“
Локалните избори 2025 се одвиваат во мирна, фер и демократска атмосфера на територијата на целата држава. Досега не се регистрирани посериозни нарушувања на јавниот ред и мир, изјави на прес-конференција портпаролот на МВР, Гоце Андреевски.
Сепак тој додаде дека во Прилеп од слобода биле лишени две лица поради „поткуп при избори и гласање“.
Регистрирани се неколку пријави за агитирање при гласање на повеќе места, но по преземени мерки до овој момент не се потврдени наводите од пријавите.
ОБСЕ/ОДИХР: Не е важен само изборниот ден, туку и предизборните и постизборните процеси
Шефот на Мисијата за набљудување на изборите на ОБСЕ/ОДИХР за локалните избори во земјава, Матео Мекачи изјави дека набљудувачите ги следат сите аспекти поврзани со изборите и истакна дека не е битен само денот на изборите, туку и предизборните процеси, како и процесите по самиот ден на изборите.
Мисијата се состои од 250 меѓународни набљудувачи, кои набљудуваат на територијата на целата држава.
Одзивот до 13 часот изнесува 20, 17 отсто
Излезноста на локалните избори до 13:00 часот изнесува 20,17%, соопшти Државната изборна комисија (ДИК) на редовната прес-конференција.
Податоците, како што појаснија од Комисијата, се добиени од вкупно 3.387 избирачки места низ државата.
Најголема излезност е регистрирана во општините Богданци, Вевчани и Градско, а најмал одзив на гласачките места има во општините Босилово, Врапчишта и Гази Баба.
Гласањето засега без посериозни проблеми, граѓаните очекуваат функционални општини
Навреме беа отворени сите гласачки места и гласањето засега е без проблеми. Граѓаните очекуваат поуредени и посредени општини. Некои, пак, се скептични дека нешто ќе се смени.
