Вести
Медведев: Ќе се бориме против секоја држава што ќе ни ги одземе средствата
Русија ги предупреди европските држави дека ќе се обиде да си ги земе нејзините средства по извештаите дека Европската Унија ја предлага идејата за трошење милијарди долари замрзнати руски средства за да ѝ помогне на Украина.
Откако претседателот Владимир Путин ја испрати својата војска во Украина во 2022 година, Соединетите Држави и нивните сојузници забранија трансакции со руската централна банка и Министерството за финансии и блокираа 300-350 милијарди долари суверени руски средства, претежно европски, американски и британски државни обврзници што се чуваат во европски депозитар за хартии од вредност.
Ројтерс објави дека претседателката на Европската комисија, Урсула фон дер Лајен, сака Европската Унија да најде нов начин за финансирање на одбраната на Украина од Русија користејќи ги паричните салда поврзани со руските средства замрзнати во Европа.
Политико објави дека Европската Комисија ја разгледува идејата за користење на руските парични депозити во Европската централна банка од доспеани обврзници во сопственост на Русија за финансирање на „Заем за репарација“ за Украина.
„Доколку ова се случи, Русија ќе ги гони државите од ЕУ, како и европските дегенерици од Брисел и поединечните земји од ЕУ кои се обидуваат да ни го запленат имотот, до крајот на векот“, напиша поранешниот руски претседател Дмитриј Медведев на Телеграм.
Русија ќе ги гони европските држави на „сите можни начини“ и во „сите можни меѓународни и национални судови“, како и „вонсудски“, рече Медведев, кој е заменик-претседател на Советот за безбедност на Русија.
Русија вели дека секое запленување на нејзините средства претставува кражба од страна на Западот и ќе ја поткопа довербата во обврзниците и валутите на Соединетите Држави и Европа.
види ги сите денешни вести
Родителите на настраданите во пожарот во Кочани од утре на собири и блокади сѐ додека не започне судењето
Од утре, ќе има мирни јавни собири и блокади на кружниот тек кај двојниот мостот на улицата „Стево Теодосиевски“ во Кочани. Блокадите ќе траат по еден час секој ден, во периодот од 15:15 до 16:15 часот, сѐ додека не започне судењето за пожарот кој се случи во кочанската дискотека „Пулс“.
Ова го најавија родителите на загинатите во пожарот во „Пулс“ кој се случи на 16 март годинава.
Тие денеска (11 октомври) го одржаа 26-от „Марш за ангелите“пред Основниот суд во Кочани, испровоцирани од тоа што, според нив, адвокати на осомничените изјавиле дека судењето ќе трае 10 до 15 години.
- Оваа изјава е срамна и понижувачка за семејствата чии деца ги загубија животите во трагедијата. Таквите зборови звучат како обид да се подготви јавноста за бавно одолговлекување и заборавање. Ние тоа нема да го дозволиме - рече мајка на загинато девоче пред новинарите.
Родителите на настраданите бараат да се зголеми капацитетот на судскиот состав со дополнителни судии и судски соработници за да не се одолговлекува процесот поради недостаток на ресурси. Исто така, нагласија дека рочиштата „мораат да добијат приоритет и постојано темпо, со цел постапката да тече непречено и без непотребни одложувања“.
Тие се сомневаат во манипулации или скриено забавување на судскиот процес, бараат јавно и транспарентно следење на сите процесни активности.
-Правдата не смее да се влече. Ќе бидеме тука - на кружниот тек, се додека не почне судењето, а за понатаму зависи како ќе се одвиваат работите. Животот на едно дете вреди повеќе од нечии интереси и адвокатски игри - порачаа членови на семејства што загубија свои блиски во мартовскиот пожар во „Пулс“.
Денешниот 26-ти „Марш за ангелите“ во Кочани, вообичаено започна од „Паркот на Револуцијата“ каде и заврши. Попатно, петнаесетина минути беше блокиран сообраќајот на кружниот тек пред двојниот мост, токму на местото каде што од утре па натаму се најавуваат јавни собири и блокади.
Во пожарот во „Пулс“, ноќта помеѓу 15 и 16 март, загинаа 62 лица и над 200 беа повредени.
Османи му го додели мандатот на Курти за составување нова влада
Претседателката на Косово, Вјоса Османи, во саботата му го додели мандатот на лидерот на движењето Самоопределување, Албин Курти, за составување нова влада, осум месеци по одржувањето на парламентарните избори.
Кабинетот на претседателката објави на Фејсбук дека Османи на 11 октомври ја потпишала уредбата за доделување на мандатот на Курти, кој во моментов ја извршува функцијата вршител на должност премиер.
Одлуката следува откако ден претходно беше конституирано Собранието на Косово со изборот на петтиот, последен потпретседател од редовите на српското малцинство.
„Оваа одлука е донесена по официјалниот предлог на партијата Движење Самоопределување, која освои најголем број пратенички места во Собранието врз основа на резултатите од изборите одржани на 9 февруари оваа година“, соопшти Кабинетот.
Според уставот, Курти има рок од 15 дена да му го претстави на Собранието составот и програмата на новата влада.
Сепак, Курти може да се соочи со потешкотии при обезбедувањето мнозинство од најмалку 61 глас во Собранието, кое брои вкупно 120 пратеници, за неговиот трет мандат, бидејќи неговата партија Самоопределување на изборите на 9 февруари освои само 48 места.
Потпретседателката на парламентот и пратеничка од Самоопределување, Албулена Хаџиу, изјави во петокот дека партијата е заинтересирана да најде коалициски партнер за управување со земјата.
Според неа, партијата е отворена за соработка со сите парламентарни партии, освен со Демократската партија на Косово (ПДК) и Српската листа.
„Отворени сме за разговори со пратеници од парламентарни групи или други политички субјекти. Имаше обиди со Демократскиот сојуз на Косово. Имаше контакти и со Социјалдемократската иницијатива, но тие не беа подготвени“, изјави Хаџиу.
Партијата на Курти исто така изрази подготвеност за соработка со претставниците на не-српските малцинства, кои имаат десет места во Собранието.
Ако не успее да обезбеди 61 глас, претседателката Османи мора во рок од десет дена да ги повика партиите на консултации и да го одреди кандидатот кој има најголеми шанси за формирање влада.
Во случај да не успее ниту вториот обид, според Уставот, претседателката мора да распише нови избори, кои треба да се одржат во рок од 40 дена.
Кандидатот на Демократската партија на Косово (ПДК) за премиер, Бедри Хамза, изјави во март дека неговата партија ќе ја преземе одговорноста за формирање влада ако Самоопределување не успее во законскиот рок.
ПДК, која има 24 пратеници, „нема црвени линии“ кон ниту една партија, изјави Хамза.
Демократскиот сојуз на Косово (ЛДК), кој има 20 места, и Алијансата за иднината на Косово (ААК), со пет места, ја исклучија можноста за коалиција со Движењето Самоопределување и изразија подготвеност за заедничко формирање влада.
Од друга страна, Социјалдемократската иницијатива (НИСМА) порача дека со своите три пратеници може да помогне во обезбедувањето на потребното мнозинство од 61 глас, заедно со Самоопределување и партиите од немнозинските заедници.
Студентите во блокада на протест за поддршка на Србите од Косово пред локалните избори
Во Белград се одржува протест во знак на поддршка на Србите од Косово, по повик на студентите кои се во блокада на факултетите.
Протестот беше најавен пред локалните избори на Косово, закажани за 12 октомври. Во повикот се критикува односот на власта, предводена од Српската напредна партија, кон српската заедница на Косово.
Собирот започна на платото кај Правниот факултет, по што следуваше прошетка до Канцеларијата на Владата на Србија за Косово, која се наоѓа во Палатата Србија.
На чело на колоната се наоѓа транспарент со натпис: „Земјата што ја купив од небото, некој им ја вети“, што е стих од песната „Косово Поље“ на Матија Беќковиќ, книжевник и академик познат по своите десничарски ставови.
Како што јавува новинарката на Радио Слободна Европа, присутните носат и знамиња на Србија, обележја од факултетите, православни икони и знамиња на кои се прикажани мапата на Косово и српското знаме.
Официјалниот став на Србија е дека не ја признава независноста на Косово прогласена во 2008 година и го смета за покраина Косово и Метохија во состав на Србија.
Собирот го обезбедуваат сообраќајната полиција и полиција во цивил.
На протестот беа забележани и поранешниот пратеник и десничар Срѓан Ного, лидерот на ултрадесничарската организација „Народни патроли“ Дамњан Кнежевиќ и Младен Обрадовиќ од екстремно десничарската организација Образ, чија работа беше забранета од Уставниот суд на Србија во 2012 година.
Собраните за време на прошетката извикуваат: „Косово е срцето на Србија“ и „Нема поделба, целиот Космет е дел од Србија“.
Скандираат и навреди на сметка на претседателот на Србија, Александар Вучиќ. Исто така, го нарекуваат и со навредлив, дискриминирачки збор за Албанците.
Еден од транспарентите гласи: „За Србите на Косово и Метохија, не за Српска листа“.
Поддршка од власта во Белград на претстојните избори има само Српска листа, најголемата партија на Србите во Косово.
Студентите во блокада, во пресрет на протестот, оценија дека Србите на Косово се „оставени без поддршка и помош од страна на актуелната власт, освен кога нивната мака се користи за медиумска и изборна пропаганда“.
Сметаат дека власта „го игнорира фактот дека помошта на нејзините државјани е морална и законска обврска“.
Студентите што ги блокираат белградските факултети исто така истакнуваат дека даваат поддршка на Универзитетот во Приштина, со седиште во Северна Митровица, кој функционира во рамки на образовниот систем на Србија.
Тие укажуваат и дека преку протестот сакаат да ја подигнат свеста за „репресијата и проблемите што секојдневно се случуваат на Косово“.
На Косово на 12 октомври се одржуваат локални избори во 38 општини.
Српска листа ја иницираше излезноста на Србите од косовските институции на северот на Косово во ноември 2022 година, и повика на бојкот на локалните избори во април 2023, поради што на власт во четири општини на северот дојдоа албански градоначалници.
Локалното српско население во тие четири општини на северно Косово не ги прифаќа албанските градоначалници, поради што претходно беа организирани и протести.
Сепак, албанските градоначалници останаа на своите позиции до крајот на мандатот, бидејќи Српска листа и во април 2024 повторно повика на бојкот на гласањето за нивна смена.
Во текот на целиот овој период, на северот владееја тензии, кои дополнително се зголемуваа со обидите на косовската влада да воспостави контрола на северот од Косово.
Ситуацијата кулминираше со вооружениот напад на Срби во Бањска во септември 2023 година, кој го предводеше тогашниот потпретседател на Српска листа, Милан Радојичиќ.
На претстојните локални избори на 12 октомври, Српска листа има кандидати за градоначалници во сите десет општини со српско мнозинство на Косово: Северна Митровица, Звечан, Лепосавиќ, Зубин Поток, Грачаница, Штрпце, Ново Брдо, Клокот, Партеш и Ранилуг, како и во Обилиќ.
Како алтернатива на Српска листа на претстојните локални избори во општините со српско мнозинство се партијата „За слободу, правду и опстанак“ на Ненад Рашиќ, Српска демократија на Александар Арсенијевиќ, Српски народен покрет на Милија Бишевац, Косовски сојуз на Горан Маринковиќ, како и неколку граѓански иницијативи кои имаат свои кандидати главно во по една општина.
Свечена академија, честитки и награди: Одбележани 84 години од Народното востание
По повод 11 Октомври, попладнево во „Кристалната сала“ на Собранието на Република Северна Македонија беше доделена истоимената награда - признание за животно дело во дејности од јавен интерес. Државната награда „11 Октомври“ се доделува како највисоко признание за животно дело во областа на науката, уметноста, стопанството и другите дејности од јавен интерес.
Наградата за животно дело во областа на културата и уметноста им беше врачена на актерката Теута Ајдини - Јегени, хорскиот диригент - проф. Летка Димовска - Полизова, како и на продуцентот - промотор на македонската уметност Иво Јанкоски, додека во областа на науката и образованието на машинскиот инженер - проф. д-р Константин Димитров и на хемичарот, академик Глигор Јовановски.
Наградите ги врачи претседателот на Одборот за доделување на наградата, проф. д-р Светозар Антовиќ.
Антовиќ: Патот кон ЕУ бара напори за реформи
Тој порача дека „ова не е само награда, туку и обврска“.
„Лауреатите на оваа награда се живи сведоци дека револуционерниот дух не згаснува, туку се преобразува во идеи, дела и вредности што се влог во нашата иднина“, истакна Антовиќ.
Тој нагласи дека денес нашата држава претставува „вистински пример за мозаик на традиции и се осврна на европеизацијата на земјата“
„Но, додека се навраќаме на храброста од 1941 година, не смееме да ги игнорираме предизвиците со што се соочуваме денес. Македонија гордо чекори по патот кон членство во Европската Унија. Но тој пат бара напори кон спроведување на системски и институционални реформи, што зависат од сите нас“, порача Антовиќ, деканот на Медицинскиот факултет .
Тој додаде дека за „да ѝ помогнеме на нашата татковина, сите заеднички треба да работиме кон зголемување на капацитетите на државните институции. Покрај ова, посочи и дека преку подобрување и негување на образовниот процес, ќе се овозможат уште подобри услови за работа на научниците и културните уметници кои како што рече, се наши вистински амбасадори во светот.
Од името на добитниците на наградата, пак, се заблагодари проф. д-р Константин Димитров.
„Оваа награда е патоказ дека со истрајна работа, со љубов кон татковината и со верба во иднината и ѕвездите се достижни. Нека биде ова поттик за сите идни генерации дека Македонија ќе расте и ќе се издигнува преку знаење, уметност и човечност“, рече Димитров.
Свечена академија во Прилеп
Во пресрет на денешното доделување на наградата, празникот го честитаа повеќе домашни политичари, но и дел од политичките партии.
Централното чествување пак, по повод 84-годишнината од почетокот на народното востание, се одржа во Прилеп на свечена академија под мотото „На вистинската патека, за татковина со иднина“
Од прилепскиот Центарот за култура „Марко Цепенков“, премиерот Христијан Мицкоски истакна дека „потребен е суштински дијалог со сите општествени фактори кои се важни за државата “.
Мицкоски рече дека е подготвен да го води тој процес и сите да се обединат околу платформа која нема да биде само политичка или економска, туку општествена „за целите што сакаме да ги постигнеме како држава“.
„Сакам да кажам дека никој од нас не е исклучен од свесноста за она што ѝ се случи на државата и сите овие работи ја уништуваа самодовербата и ја убиваа надежта. Многумина – тоа е причината поради која си заминаа и неповратно се иселија“, додаде премиерот.
Во денешниот говор исто така, тој се осврна и на системот на Југославија за кој рече дека многумина сметаат оти тој бил поорганизиран од сега.
„Не е тоа толку носталгија кон тој систем, нешто што било пред 30 и повеќе години, колку што е пред сè револт кон нефункционирањето на системот што се гради овие 30 години. А системот е трул и нефункционален, оптоварен со многу отстапки, неразумни компромиси, силувања, разочарувања. Затоа на граѓаните им се смачува од политика, од расправии за основните прашања“, додаде Мицкоски.
По повод 11 Октомври, честитка упати и претседателката Гордана Сиљановска-Давкова која повика на обединетост и слотеност.
„Живееме во тегобно време на војни и воени закани, срамни за 21 век“, наведува претседателката додавајќи:
„Битисуваме оптоварени со суштински проблеми во остварувањето на правото, правдата, хуманоста и солидарноста. Исправени сме пред нови предизвици, несвојствени за демократијата. Од нас се бараат илинденска и партизанска зрелост, мудрост и храброст во донесувањето клучни одлуки. Повторно мора да бидеме обединети и сплотени, ако сакаме да го сочуваме она што го наследивме од оние кои тргнаа во востанички марш, водени од јасна визија, спремни за жртвување во ослободителната мисија!“, порачува Сиљановска-Давкова.
Филипче на средба со претставници од Сојузот на борци на НОАВМ
Празникот го честиташе и лидерот на опозициската СДСМ, Венко Филипче кој се сретна со претставници од Сојузот на борци на НОАВМ. Тој честитајќи го големиот македонски празник, го истакна аманетот на борбата и го посочи значењето и придонесот на НОБ и на Сојузот на борци во поставувањето на темелите на нашата држава.
Филипче додаде дека борбата за подобро општество не е завршена, и треба уште многу да се работи за целосно да се исполни аманетот на нашите предци.
„Треба уште многу да работиме напорно, да ја зајакнеме оваа држава, да го завршиме евроинтегративниот пат, за Македонија да биде убаво место за живеење во кое што младите ќе ја гледаат иднината. Да го најдеме начинот да постигнеме национален консензус и да се бориме против најголемите непријатели на денешнината, а тоа е корупцијата, партизацијата и сиромаштијата“, порача претседателот на СДСМ, Венко Филипче.
Денешниот ден, согласно Законот за празници, е прогласен за неработен ден во земјава.
На 11 октомври 1941 година, Првиот прилепски партизански одред го нападна полицискиот участок и телефонско-телеграфската мрежа во Прилеп, а следниот ден, на 12 октомври, се огласија и партизаните од Кумановскиот одред.
Уништени повеќе од 1.500 парчиња оружје во Бања Лука
Во леарницата Јелшинград во Бања Лука во саботата беа уништени 1.536 парчиња оружје и делови од оружје.
Станува збор за оружје запленето од Граничната полиција на Босна и Херцеговина, Државната агенција за истраги и заштита (СИПА), Министерството за внатрешни работи на Република Српска, десет кантонални МВР-а, како и Полицијата на Брчко Дистриктот на БиХ.
Акцијата ја организираше Координацискиот одбор за контрола на мало и лесно оружје во БиХ, во соработка со Центарот за контрола на мало и лесно оружје во Источна и Југоисточна Европа (UNDP SEESAC).
Техничка поддршка беше обезбедена од Програмата за развој на Обединетите нации (UNDP) во БиХ, додека финансирањето беше обезбедено од Европската унија преку проектот „Поддршка за зајакнување на борбата против нелегалното поседување, злоупотреба и трговија со мало и лесно оружје на Западен Балкан“.
Целта на акцијата е да се привлече вниманието на јавноста на опасностите што ги претставува вишокот оружје, како и слабо обезбеденото или незаконски поседувано оружје за безбедноста на граѓаните во секојдневниот живот.
Како што беше соопштено од Министерството за безбедност на БиХ, проблемот со циркулацијата и нелегалната пролиферација на оружје во Југоисточна Европа не познава граници и бара координиран и заеднички регионален одговор.
Северна Кореја претстави нова интерконтинентална балистичка ракета
Севернокорејскиот лидер, Ким Џонг Ун присуствуваше на голема воена парада на која пред меѓународни претставници ја претстави новата интерконтинентална балистичка ракета - извести државната новинска агенција KCNA во саботата (11 октомври).
Парадата, која започна доцна во петокот, ја одбележа 80-годишнината од основањето на владејачката Работничка партија и следеше по прославата што се одржа во четвртокот.
Кинескиот премиер Ли Ќијанг, поранешниот руски претседател Дмитриј Медведев, како и лидерот на Комунистичката партија на Виетнам, То Лам беа забележани заедно со Ким на парадата.
На воената парада, Северна Кореја, која поседува нуклеарно оружје, ја претстави својата најнапредна интерконтинентална балистичка ракета Hwasong-20, која KCNA ја опиша како „најмоќниот нуклеарен стратешки систем на вооружување“.
Серијата интерконтинентални балистички ракети Hwasong ѝ овозможи на Северна Кореја да може да цели каде било на копното на САД, но и понатаму постојат прашања околу софистицираноста на нејзиниот систем за наведување и способноста на боевата глава што ја носи да издржи повторен влез во атмосферата.
„Треба да очекуваме дека системот ќе биде тестиран пред крајот на годинава,“ изјави за Ројтерс, Анкит Панда од американската фондација Карнеги за меѓународен мир.
„Останатото оружје што беше изложено вклучуваше хиперсонични балистички ракети, крстаречки ракети, нов тип повецевцев ракетен фрлач и лансер за самоубиствени дронови“, изјави Хонг Мин, севернокорејски аналитичар од Корејскиот институт за национално обединување.
Ким претходно во петокот разговарал со Медведев, кој изјавил дека жртвата на севернокорејските војници што се борат за Русија во нејзината воена кампања во Украина ја докажува довербата во односите меѓу двете земји.
Ким му рекол на Медведев дека се надева на продолжување на зајакнувањето на соработката со Русија и на блиско учество во разновидни разменувања за постигнување на заеднички цели, наведува KCNA.
Виетнам и Северна Кореја, исто така, потпишаа договори за соработка во различни области, вклучително и меѓу министерствата за одбрана, надворешни работи и здравство - соопшти KCNA без да наведе детали.
САД се закануваат со санкции на земјите кои се за оданочување на јаглеродот во бродарството
Соединетите Американски Држави на 10 октомври се заканија со воведување санкции и други казнени мерки против секоја земја што ќе гласа за воведување данок на јаглерод во поморскиот сообраќај преку агенцијата на Обединетите нации.
„Ќе се бориме силно за заштита на нашите економски интереси со наметнување трошоци на државите доколку го поддржат ‘Рамковниот договор за нето нула емисии’ (Net Zero Framework)“, се наведува во заедничката изјава на американскиот државен секретар Марко Рубио и неговите колеги од министерствата за енергетика и транспорт, пренесена од AFP.
Членките на Меѓународната поморска организација (IMO), со седиште во Лондон, следната недела ќе гласаат за усвојување на Рамковниот договор за нето нула емисии (NZF), насочен кон намалување на глобалните емисии на јаглерод од бродскиот сектор.
Вашингтон, сепак, предлогот го опиша како наметнување на „глобален данок на јаглерод на светот“.
Од враќањето на власт во јануари, американскиот претседател Доналд Трамп го смени курсот на Вашингтон кон климатските промени, осудувајќи ги како „измама“ и поттикнувајќи ја употребата на фосилни горива преку дерегулација.
Во изјавата, Рубио, министерот за енергетика Крис Рајт и министерот за транспорт Шон Дафи изјавија дека администрацијата на Трамп „недвосмислено го отфрла“ предлогот за Рамковниот договор за нето нула емисии (NZF).
Тие се заканија со низа казнени мерки против земјите што ќе гласаат за рамковниот договор, вклучително и ограничувања за визи, блокирање на влез на пловила регистрирани во тие земји во американските пристаништа, наметнување трговски казни и разгледување санкции за функционери.
„Соединетите Држави ќе преземат мерки за да ги наметнат овие мерки против земјите кои го спонзорираат овој европски неоколонијален извоз на глобални климатски регулативи“, се наведува во изјавата.
Повеќе загинати, 19 исчезнати по експлозија во фабрика за експлозив во САД
Деветнаесет лица се водат како исчезнати, а неопределен број лица загинале откако голема експлозија на 10 октомври ја погоди фабриката за американски воени експлозиви, соопштија властите.
Снимки од воздух емитувани од американските медиуми ги прикажуваат остатоците од фабриката во сојузната држава Тенеси, со изгорени и уништени возила расфрлани низ објектот.
„Во моментов можеме да потврдиме дека трагаме по 19 лица“, изјави за новинарите шерифот на округот Хамфрис, Крис Дејвис.
„Има жртви. Не сакам да наведам точен број... Можам веднаш да ви кажам дека бараме 19 лица“, додаде тој.
Експлозијата се случила во фабрика со која управува компанијата „Accurate Energetic Systems“ во областа Бакснорт, во округот Хикман.
Подоцна беа издадени официјални предупредувања да се избегнува тој регион поради страв од секундарни експлозии.
„Итните служби моментално се на лице место и работат на решавање на ситуацијата“, соопшти канцеларијата на шерифот на округот Хикман на Фејсбук.
На прашањето да ја опише состојбата во зградата каде што се случила експлозијата, шерифот на округот Хамфрис, Дејвис, беше кус и јасен.
„Дали можам да ја опишам зградата? Нема што да се опише. Ја нема. Тоа е најразорувачката сцена што сум ја видел во текот на мојата кариера“, им рече на новинарите.
„Accurate Energetic Systems“, производител на експлозиви основан 1980 година, не одговори веднаш на барањето на AFP за коментар.
На Фејсбук-страницата на компанијата се наведува дека произведува „разни високоексплозивни композиции и специјални производи“ за Министерството за одбрана на САД, сега преименувано во Министерство за војна, како и за американските индустриски пазари.
Извор: АФП
Битолското обвинителство поднесе жалба за домашниот притвор на Борче Марковски
Битолското обвинителство поднесе жалба за одлуката на Судот, со која се предвидува двајца од осумте осомничени во истрагата за злоупотреби со јавните набавки во РЕК „Битола“ да одат во куќен притвор. Од Обвинителството од Битола бараат мерка затворски притвор, а како причина за тоа се наведуваат ризици од бегство на осомничените.
Станува збор за еден од раководителите на рудници во РЕК „Битола“ и за Борче Марковски, сопственикот на фирмата „Марковски компани“, која претходно ги добивала тендерите во Комбинатот и која како правен субјект се сомничи во случајот.
Како што синоќа информираа од ОЈО Битола, надлежниот јавен обвинител не се согласи со одлуката на Судот, имајќи ги предвид ризиците од бегство на осомничените, посебно што еден од нив, Марковски, има значителен имот во друга држава. Од тие причини Обвинителството вложи жалба на одлуката на Судот и бара мерка затворски притвор.
На ваквата одлука на битолскиот суд реагирааше ВМРО-ДПМНЕ, од каде сметаат дека ваквиот потег е срамен, потенцирајќи дека нема да дозволат, како што велат, судството на СДСМ и ДУИ да ги ослободува криминалците.
Јавното обвинителство вчера донесе Наредба за спроведување истражна постапка против осум физички и едно правно лице за продолжени кривични дела поврзани со јавни набавки во РЕК Битола.
Петмина службени лица во РЕК Битола, меѓу кои тогашниот директор на Комбинатот и четворица раководители и директори во ПЕ Рудници во РЕК Битола, се сомничат дека во текот на 2023 година како соизвршители сториле продолжено кривично дело „злоупотреба на службената положба и овластување“, така што не ја извршиле својата службена положба и овластување со намера на друг да му прибават корист, а да го оштетат комбинатот, односно спротивно на основниот рударски проект и на потребите на рудникот „Живојно“ организирале и реализирале јавна набавка за дислокација на погонски станици од рудникот „Осломеј“ во ПЕ Рудници – РЕК Битола.
Правното лице, сопственикот/управител и уште едно лице вработено во правното лице „Марковски компани“ се сомничат дека иако биле свесни дека работите не се извршени, доставувале фактури врз основа на кои од РЕК Битола незаконски наплатиле 106.200.000 денари со вклучен ДДВ, со што сториле продолжено кривично дело „злоупотреба на постапката за јавен повик и јавно-приватно партнерство“.
Со предистражните дејствија кои, како што информираа од Обвинителството, по наредба на јавниот обвинител ги преземала Управата за финансиска полиција во изминатите неколку месеци, се обезбедени докази кои даваат основано сомнение дека петмина осомничени – службени лица во РЕК Битола, односно тогашниот директор на комбинатот и четворица раководители и директори во ПЕ Рудници во РЕК Битола, во текот на 2023 година како соизвршители сториле продолжено кривично дело – злоупотреба на службената положба и овластување.
Меланија Трамп вели дека има „отворен канал“ за комуникација со Путин во врска со украинските деца
Сопругата на американскиот претседател, Меланија Трамп, на 10 октомври изјави дека комуницирала со рускиот претседател, Владимир Путин, за судбината на децата киднапирани од Русија за време на војната во Украина.
Во обраќањето во Белата куќа, таа изјави дека осум деца се повторно обединети со своите семејства во последните 24 часа по преговорите меѓу неа и тимот на Путин.
Меланија Трамп рече дека Путин одговорил на писмото што го испратила преку нејзиниот сопруг, претседателот Доналд Трамп, на самитот во Алјаска во август, кое инаку не успеало да обезбеди пробив во прекинувањето на руската инвазија.
„Многу работи се случија откако претседателот Путин го прими моето писмо минатиот август. Тој одговори писмено сигнализирајќи ја својата подготвеност директно да се вклучи со мене и да даде детали во врска со украинските деца што живеат во Русија“, им рече таа на новинарите.
„Оттогаш, претседателот Путин и јас имавме отворен канал за комуникација во врска со благосостојбата на овие деца“, рече таа.
Меланија Трамп кажа дека двете страни имале и „неколку средби и повици преку тајни канали, сите со добра намера“.
„Мојот претставник соработува директно со тимот на претседателот Путин за да се обезбеди безбедно повторно обединување на децата со нивните семејства меѓу Русија и Украина“, рече таа.
Во извештај објавен на 3 декември 2024 година, истражителите на Универзитетот Јеил изјавија дека најмалку 314 деца од Украина биле подложени на „систематска програма за присилно посвојување и згрижувачко семејство“ од страна на семејства во Русија.
Во март 2023 година, Меѓународниот кривичен суд издаде налог за апсење на Путин за „воено злосторство нелегална депортација“ и „нелегален трансфер“ на деца од украинска територија во Русија. Руската комесарка за правата на децата, Марија Лвова-Белова, исто така беше обвинета.
Руските службеници често ги прикажуваат активностите со деца од Украина како хуманитарен гест на посвојување, хранење или заштита на децата од војната во окупираните региони.
Украинските службеници, новинарите и активистите на граѓанското општество претходно собраа значајни докази за улогата на руската држава во преместувањето и депортацијата на децата од Украина.
Мултимедија
Најпосетени
Што треба да знаете