Вести
Кос: Вратите на ЕУ се отворени за тие што ќе ги исполнат Копенхашките критериуми
Копенхашките критериуми во минатото овозможија многу успешно проширување на ЕУ и процесот на прием на нови членки треба да продолжи да се гради врз нив, бидејќи владеењето на правото и демократската отпорност се клучни за кредибилен процес на проширување, порача еврокомесарката за проширување Марта Кос.
„Нашата Унија е отворена и тие врати ќе останат отворени за оние кои целосно, праведно и транспарентно ќе ги исполнат Копенхашките критериуми“, истакна Кос на заедничката прес-конференција со данската министерка за европски прашања Мари Бјере и еврокомесарот за демократија, правда и владеење на правото Мајкл Мекграт по завршувањето на неформалниот состанок на министрите за европски прашања на членките на ЕУ и на кандидатите за членство во Копенхаген.
Кос додаде дека ако ЕУ сака да стане посилна ќе мора процесот на проширување да го базира на заслуги и на објективниот напредок постигнат од секоја земја кандидатка, при што приемот на секоја од нив ќе зависи од темпото на спроведување на реформите.
Еврокомесарката истакна дека во случајот на Северна Македонија „штом Владата ќе го промени Уставот“ ќе може да продолжи нејзиниот пристапен процес.
Таа нагласи дека на средбата разговорите се фокусирале на тоа како проширувањето ја зајакнува безбедноста на Европа и на условите за успешно спроведување на реформи за членство, со цел граѓаните на идните земји членки да ги почувствуваат придобивките од ЕУ уште пред зачленувањето на нивните земји во Унијата.
„Проширувањето некако се вплетка во геополитичкиот натпревар помеѓу слободните демократски општества, од една и авторитарните режими, од друга страна“, изјави Кос.
Еврокомесарката Кос истакна дека на состанокот се разговарало и за начините за напредок во преговорите за пристапување и покрај „билатералните загрижености на некои земји членки околу преговарачките рамки и одлуките на Советот“.
„Во овој поглед, Комисијата веќе поедностави одредени чекори во пристапните преговори во рамките на ограничувањата на методологијата за пристапување, но секако е отворена и за понатамошни подобрувања, под услов за тоа да се добие согласност од Советот“, рече Кос.
Таа се осврна и на објавените резултати од истражувањето на Евробарометар за проширувањето, нагласувајќи дека загриженост околу безбедноста по избувнувањето на војната во Украина резултирала со растечкиот тренд на јавна поддршка за пристапниот процес.
Сепак, според неа, паралелно со проширувањето мора да се работи и на подготовка на ЕУ за приемот на нови членки.
види ги сите денешни вести
Протест во Белград - „Индексот е посилен од палката“
Протестот во Белград, „Индексот е појак од палката“, кој се одржува на повик на студентите кои учествуваат во блокадата, се бара кривично гонење на полицајците за кои се тврди дека го прекршиле законот за време на антивладините протести во Србија, кои влегоа во својот десетти месец.
Скалите на Палатата на правдата беа испрскани со црвена боја со пораката „Вашите раце се крвави“, а потоа демонстрантите се упатија кон седиштето на Секторот за внатрешна контрола на Министерството за внатрешни работи (МВР) во Нов Белград, што е последната точка на протестот.
По патот кон Министерството беше блокиран мостот Газела, еден од најголемите во Белград.
Собирот следеше по протестот во Нови Сад во петокот на 5 септември, каде што полицијата ги растера демонстрантите од универзитетскиот кампус.
„Државата и институциите не функционираат ако селективно ја вршат својата работа“, рече Алексанадра Николиќ, студентка на Правниот факултет во Белград, која додаде дека претрпела полициско насилство.
Како што изјави таа, припадник на жандармеријата ја удрил со палка во главата за време на протестот во Белград, нанесувајќи ѝ повреди на главата и лицето.
Таа рече дека владата сака да им испрати порака на граѓаните: „бидете послушни, плашете се, молчете“.
„Ги молам и ги охрабрувам сите оние кои преживеаја насилство да пријават што им се случило и да се борат за своите права. Ова е единствениот начин да ја отстраниме анонимноста на полицајците“, им рече таа на демонстрантите потсетувајќи ги дека фотографиите од неа со крвава глава сè уште циркулираат на социјалните мрежи.
Демонстрантите се упатија од српската Влада кон Палатата на правдата, зградата на Единицата за обезбедување на одредени лица и предмети (ЈЗО), а протестот заврши во Нов Белград кај Секторот за внатрешна контрола на Министерството за внатрешни работи.
Адвокатката Јелена Стојиќ праша на протестот пред Палатата на правдата зошто полицајците кои го прекршиле законот и ги пречекориле своите овластувања не се гонети.
„Каде е внатрешната контрола на Министерството за внатрешни работи и каде е Јавното обвинителство и што прави“, рече таа.
Полициските службеници претходно ги отфрлија обвинувањата за полициска бруталност, тврдејќи дека постапиле во согласност со законот.
Пред седиштето на Единицата за обезбедување на одредени лица и предмети (ЈЗО), зборуваше студентката Николина Синѓелиќ, обвинувајќи го командантот на единицата, Марко Кричек, за насилство и закани за силување откако беше приведена на антивладиниот протест на 14 август во Белград. Полицијата го негираше ова.
Немири и судири со полицијата во Нови Сад низ фотографии
Таа рече пред зградата на ЈЗО дека „целиот државен апарат е насочен против нејзините граѓани“.
„Нè погоди секоја тупаница што удри граѓанин на Република Србија, наместо криминалците. Нè погоди секоја палка што падна врз студент наместо врз член на мафијата, нè погоди солзавец, гумени куршуми и кордони што ги штитат моќните од сопствениот народ“, рече таа.
За време на говорот на студентката, учесниците извикуваа навреди кон српскиот претседател Александар Вучиќ и пораки како „Апсеете го Кричек“.
Антивладините протести во Србија бараат одговорност за смртта на 16 лица при уривањето на бетонска настрешница на железничката станица во Нови Сад.
Најновото барање е распишување предвремени парламентарни избори.
Во последните недели се одржаа контра-протести „Граѓаните против блокадите“, во кои учествуваа поддржувачи на владата.
Српскиот претседател Александар Вучиќ присуствуваше на еден од овие собири на 7 септември во белградската населба Борча.
Поддржувачите на владата се собраа еден ден по антивладините студентско-граѓански протести во Белград, Крагуевац, Чачак, Ниш, Сремска Митровица и Суботица, одржани поради употребата на полициска сила против демонстрантите во Нови Сад на 5 септември.
На протестот во Нови Сад во петокот вечерта, голем број полицајци употребија палки, оклопни возила, солзавец и топовски удари за да ја растераат толпата, откако мала група маскирани демонстранти нападнаа полицајци во кордон пред зградата на Филозофскиот факултет.
Мицкоски: Аферата со прислушувањето нема да се стави под тепих
Премиерот Христијан Мицкоски на свеченост по повод 8 Септември се осврна и на аферата со наводното незаконско прислушување, нагласувајќи дека институциите мора да обезбедат одговорност.
Тој рече дека сите материјали се предадени на обвинителството и оти случајот ќе се следи внимателно.
„Вистинското прашање е како да се спречат злоупотребите и да не се повторат. Тоа е можно само ако има одговорност. Знам дека довербата во институциите е ниска, но овој случај нема да се стави под тепих – тоа е прашање на опстојување на државата,“ порача Мицкоски.
Аферата изби минатата недела, а премиерот Мицкоски тврдеше дека бил следен додека бил опозициски лидер, велејќи дека очекува виновниците да одговараат.
Основното јавно обвинителство за гонење организиран криминал и корупција соопшти дека започнало предистрага за наводите за незаконско следење, со увид во документацијата на Агенцијата за национална безбедност (АНБ).
Истовремено, Собраниската комисија за надзор над АНБ најави седница и надзорна посета на агенцијата.
Директорот на АНБ, Бојан Христовски, потврди дека случајот е пријавен до обвинителството и посочи на можни злоупотреби од страна на поранешен директор и група вработени.
Лидерот на опозициската СДСМ, Венко Филипче, коментираше дека јавноста заслужува транспарентност и барање одговорност, со цел да се избегне „лов на вештерки“ и шпекулации.
Франција во нова политичка криза, премиерот се соочува со гласање за доверба
Франција ризикува да го изгуби својот трет премиер за 12 месеци, бидејќи сегашниот премиер Франсоа Бајру побара гласање за доверба во парламентот, кое се очекува да го изгуби за време на седницата попладне на 8 септември.
Се очекува овој потег да предизвика дополнителна нестабилност за втората по големина економија во Европската Унија.
74-годишниот центристички премиер - назначен од претседателот Емануел Макрон пред помалку од девет месеци - го презема ризикот со надеж дека гласањето ќе ги обедини длабоко поделените членови на Националното собрание, по неговите барања за намалување на јавните трошоци.
Бајру верува дека намалувањата се неопходни за да се контролира растечкиот дефицит и долг на Франција.
Но, пратениците од опозицијата ветија дека ќе ја искористат можноста да го соборат Бајру и неговата малцинска влада од центристички и десничарски министри. Неговото разрешување би го принудило Макрон да се впушти во уште една исцрпувачка потрага по наследник.
Националното собрание со 577 места го прекина летниот одмор за да одржи вонредна седница побарана од Бајру, која започнува во 15 часот во понеделник.
По говорот на Бајру, во кој се очекува да објасни како мерките за штедење се во национален интерес, пратениците ќе дебатираат, а потоа ќе гласаат за или против неговата влада. Пратениците можат да се воздржат и од гласање.
На Бајру му е потребно мнозинство гласови „за“ за да преживее. Ако мнозинството гласа против него, тогаш, според францускиот устав, Бајру мора да му поднесе оставка на Макрон, со што Франција ќе се најде во нова криза.
Пратениците од крајната десница и крајната левица кои рекоа дека ќе гласаат против владата на Бајру имаат повеќе од 320 места во Националното собрание, додека центристичките и конзервативните сојузници имаат 210, што прави речиси невозможно за премиерот да го преживее гласањето за доверба.
Бајру изрази разочарување во неделата, велејќи дека горчливите противници од двата краја на политичкиот спектар се обединети против него.
„Која е поентата да се собори владата? Ова се политички групи кои не се согласуваат за ништо и, уште полошо, водат отворена граѓанска војна едни против други“, рече тој во интервју за онлајн медиумот Brut.
Доколку Бајру изгуби, Макрон повторно ќе биде принуден да најде наследник кој ќе работи во истата кревка средина и ќе се соочи со истите буџетски проблеми што ги мачеа Бајру и неговите претходници.
Дури и самиот Макрон вети дека ќе остане на функцијата до крајот на својот мандат, но ризикува да стане претседател без влијание врз внатрешните работи доколку политичката парализа продолжи.
Според францускиот политички систем, премиерот го назначува претседателот, одговара пред парламентот и е одговорен за спроведување на домашните политики, особено економските.
Претседателот има широки овластувања во однос на надворешната политика и европските работи, како и улогата на врховен командант на вооружените сили.
Бајру, тврдејќи дека се потребни големи заштеди за да се средат јавните финансии, предложи ограничување на трошењето од 44 милијарди евра во 2026 година, откако дефицитот на Франција достигна 5,8 проценти од БДП минатата година, што е далеку над официјалната граница на ЕУ од 3 проценти.
Франција се соочува и со голема должничка криза. На крајот од првиот квартал од 2025 година, јавниот долг на Франција изнесуваше 3,346 трилиони евра, или 114 проценти од БДП.
Планот на Бајру, кој вклучува укинување на два државни празника, беше остро критикуван од неговите политички противници, кои сега имаат златна можност да го попречат.
Петмина мртви во пукотница во Ерусалим
Пет лица биле убиени, а повеќе од десетина повредени во пукотница во окупираниот Источен Ерусалим денеска наутро (8 септември), потврдија израелските власти.
Израелската полиција соопшти дека двајца „терористи“ отвориле оган врз автобуска станица на раскрсницата Рамот на северната периферија на градот.
Според израелските служби за итни случаи, Маген Давид Адом, најмалку 15 лица се повредени.
Петмина од нив се во критична состојба, додека неколку други се здобиле со полесни повреди од скршено стакло.
Израелската полиција соопшти дека „двајцата напаѓачи се неутрализирани“ и дека инцидентот се третира како „терористички напад“.
Безбедносните сили ги затворија пристапните патишта и распоредија дополнителни единици на местото на настанот.
Израелските медиуми објавија дека нападот се случил додека возилата се движеле по една од главните сообраќајници во Ерусалим.
Ситуацијата останува под полициска истрага.
Трамп најави можен договор за Газа
Американскиот претседател Доналд Трамп најави дека наскоро би можел да биде постигнат договор за Појасот Газа, за да се обезбеди ослободување на сите заложници што ги држи Хамас - палестинска група која е прогласена за терористичка организација од страна на САД и Европската Унија.
Трамп претходно изјави дека му дава „последно“ предупредување на Хамас да ги прифати условите на договорот.
Во разговор со новинарите во Вашингтон во неделата вечерта, Трамп рече дека разговарал за договорот во текот на летото.
„Работиме на решение кое би можело да биде многу добро“, рече тој.
Тој одби да даде дополнителни детали, но додаде: „Наскоро ќе слушнете повеќе за тоа“.
„Се обидуваме да го завршиме ова, да ги вратиме заложниците“, нагласи тој.
Претходно истиот ден, Трамп го предупреди Хамас да ги прифати условите на договорот, без да даде дополнителни објаснувања.
„Израелците ги прифатија моите услови. Време е и Хамас да ги прифати“, напиша Трамп на својата платформа Truth Social.
„Го предупредив Хамас за последиците од одбивањето. Ова е моето последно предупредување, нема да има второ!“
Хамас подоцна соопшти дека прифатил некои предлози од американската страна преку медијатори, со цел постигнување договор за прекин на огнот во Газа, и дека разгледува начини за нивно понатамошно развивање.
Хамас исто така не даде детали за евентуален договор.
Во својата изјава, Хамас ја повтори својата подготвеност да преговара за ослободување на сите заложници во замена за „јасно прогласување на крајот на војната“ и целосно повлекување на израелските сили од палестинската територија.
Трамп им рече на новинарите дека верува оти сите заложници ќе бидат вратени.
„Мислам дека ќе ги вратиме сите“, рече тој.
Тој нагласи дека некои можеби веќе починале, но дека целта е да се вратат нивните тела.
Во саботата, израелската телевизија N12 News објави дека Трамп му презентирал на Хамас нов предлог за прекин на огнот.
Според предлогот, Хамас ќе ги ослободи сите 48 преостанати заложници првиот ден од прекинот на огнот во замена за илјадници палестински затвореници кои се наоѓаат во израелските затвори, а за време на примирјето, ќе се водат преговори во енклавата за да се стави крај на војната, објави N12.
Израелски функционер изјави дека Израел „сериозно го разгледува“ предлогот на Трамп, но не даде дополнителни детали.
Војната во Газа започна на 7 октомври 2023 година, кога Хамас уби 1.200 луѓе во јужен Израел и зеде околу 250 заложници, според израелските бројки.
Оттогаш, според Министерството за здравство на Газа - кое е дел од администрацијата на Хамас и е составено од медицински експерти - повеќе од 64.000 Палестинци загинале за време на израелската воена кампања.
Израел предупредува дека признавањето на палестинската држава охрабрува „еднострани дејствија“
Израелскиот министер за надворешни работи, Гидеон Саар, ја нарече одлуката на неколку држави да ја признаат палестинската државност „грешка“ и предупреди дека таков потег би можел да предизвика неодреден едностран одговор, по извештаите дека Израел планира да анектира делови од Западниот Брег.
Неколку земји, вклучувајќи ги Франција и Велика Британија, ветија дека ќе ја признаат палестинската држава на маргините на Генералното собрание на Обединетите нации, кое се одржува овој месец.
Француско-израелските односи се значително затегнати во последните недели, откако францускиот претседател Емануел Макрон објави дека неговата земја планира да биде домаќин на конференција организирана заедно со Саудиска Арабија за да се разговара за решението за две држави во ОН.
Британскиот премиер Кир Стармер минатиот месец изјави дека Велика Британија ќе ја признае палестинската државност доколку Израел не постигне прекин на огнот во војната во Газа, предизвикана од нападите на Хамас на израелска територија, до октомври 2023 година.
Хамас е прогласен за терористичка организација од страна на САД и други сили.
„Земји како Франција и Велика Британија, кои напредуваа со таканареченото признавање, направија голема грешка“, рече Сар на прес-конференција со неговиот дански колега, Ларс Локе Расмусен.
Според него, продолжувањето со овие планови го отежнува постигнувањето мир.
„Регионот ќе биде дестабилизиран. Израел ќе биде принуден да донесува еднострани одлуки.“
Неговите изјави доаѓаат откако Израел одобри план за изградба на нови населби на Западниот Брег, вклучувајќи и голем проект во источен Ерусалим.
Меѓународната заедница, од друга страна, изјави дека таквата акција ја загрозува идната палестинска држава.
Сите израелски населби на окупирана палестинска територија се сметаат за нелегални според меѓународното право.
Во меѓувреме, Израел ја продолжува офанзивата започната во Газа, по нападите на Хамас во 2023 година, во кои загинаа околу 1.200 луѓе, претежно цивили.
Од приближно 240 заложници земени во нападот, 49 сè уште се држат во Газа, вклучувајќи 27 за кои израелската војска верува дека се мртви.
Израелските одмазднички напади убија над 62.000 луѓе во Газа, повеќето од нив цивили, според податоците од палестинските здравствени власти, кои Обединетите нации ги сметаат за веродостојни.
Еден ден претходно, израелската војска ги повика Палестинците да го напуштат градот Газа - најголемата урбана област во Газа - бидејќи армијата дејствува во градот.
Јапонскиот премиер поднесе оставка
Јапонскиот премиер Шигеру Ишиба поднесе оставка по една година на функцијата и по два големи изборни порази.
Одлуката доаѓа еден ден откако се очекуваше неговата Либерално-демократска партија да гласа дали да се одржи внатрешно гласање за негово отстранување од челната позиција во партијата.
Оваа партија владееше со Јапонија речиси седум децении, но под водство на Ишиба го загуби мнозинството во Долниот дом на парламентот за прв пат по 15 години, а потоа го загуби мнозинството и во Горниот дом на парламентот во јули.
Јапонија, четвртата најголема економија во светот и близок сојузник на Соединетите Американски Држави, сега се соочува со период на политичка неизвесност, бидејќи тензиите со Кина и регионалните неизвесности растат.
„Сега кога е постигнат заклучок во преговорите во врска со американските царини, верувам дека е вистинско време“, рече Ишиба, осврнувајќи се на договорот потпишан минатата недела за намалување на царините воведени од американскиот претседател Доналд Трамп за јапонски автомобили и друг извоз.
Тој се спротивстави на повиците за негова оставка до недела, велејќи дека негова одговорност е да ги реши разликите со Вашингтон.
„Длабоко верував дека преговорите во врска со американските тарифи, кои би можеле да се опишат како национална криза, требаше да завршат како одговорност на нашата администрација“, рече тој, меѓу другото.
Ишиба изјави дека ќе продолжи да ги извршува своите одговорности „пред народот“ сè додека не се избере нов премиер.
Тој ја презеде функцијата во октомври 2024 година, ветувајќи дека ќе се бори против зголемувањето на цените, но инфлацијата, која ги удвои цените на оризот минатата година, имаше длабоко штетно влијание врз неговото лидерство.
Причини за падот на јавната поддршка се и неговите одлуки да назначи само две жени во кабинетот, како и да купи скапи подароци за членовите на партијата.
Норвежаните гласаат на парламентарните избори помеѓу лабуристите и десницата
Норвежаните излегуваат на гласачките места во недела, 7 и понеделник, 8 септември, во тесна трка за да одлучат дали ќе продолжат со влада предводена од лабуристите или ќе се свртат кон централно-десничарската.
Земјата-членка на НАТО, која ја дели арктичката граница со Русија и е дел од единствениот пазар на Европската унија, но не е земја-членка, има само четири милиони гласачи.
И покрај малубројното население, Норвешка долго време игра важна улога на меѓународната сцена, а војните во Газа и Украина, како и трговските тарифи на САД, одиграа значајна улога во изборната кампања.
Сепак, во последната фаза од трката, фокусот се префрли на растечките трошоци за живот и нееднаквоста.
Се очекува најмалку девет политички партии да освојат места на парламентарните избори што завршуваат во понеделник вечерта, но само лидерите на трите главни партии се кандидати за премиер.
Геополитичките прашања станаа многу важни за гласачите, а аналитичарите велат дека тоа би можело да им користи на лабуристите и на нивниот лидер, премиерот Јонас Гар Стере, поранешен министер за надворешни работи кој се претставува како безбеден партнер.
Според неодамнешните анкети на јавното мислење, Лабуристичката партија и четири помали партии ќе освојат 88 места во норвешкиот парламент, три повеќе од минимумот потребен за мнозинство.
„Најверојатното сценарио е дека Стехре ќе биде реизбран, но тоа ќе биде коалиција „тути фрути“, која ќе оди во многу различни насоки“, рече Јонас Штајн, вонреден професор по политички науки на Универзитетот во Тромсе, пишува Ројтерс.
Враќањето на власт на американскиот претседател Доналд Трамп и војната на Русија во Украина беа посебен извор на загриженост во Норвешка, земја со 5,6 милиони луѓе со извозно ориентирана економија која граничи со Русија на Арктикот.
Во десничарскиот табор, конзервативците на поранешната премиерка Ерна Солберг водеа кампања за реформа на јавниот сектор и укинување на данокот на богатство во Норвешка, за кој велат дека неправедно го таргетира сопствеништвото на бизниси.
Но, како и во другите западни земји, гласачите сè повеќе се свртуваат кон попопулистички десничарски опции. Силви Листхауг од антиимиграциската Партија на напредокот моментално освојува околу 21 процент од гласовите на анкетите, што е убедливо пред конзервативците со 14 проценти.
Десничарите Солберг и Листхауг отворено не се согласуваат околу тоа кој треба да биде следниот премиер во случај на победа на десницата, што ги прави некои гласачи претпазливи во поддршката на која било од опциите.
Доверба, поддршка и заемно почитување да се темел врз кој ќе се гради евроинтегративниот процес, бара Муцунски
Министерот за надворешни работи Тимчо Муцунски смета дека интеграцијата на Северна Македонија во Европската Унија (ЕУ) останува врвен приоритет на надворешната политика и дека Владата остануваат на ставот дека тој процес мора да се води исклучиво според Копенхашките критериуми.
Овој став на Муцунски следува по изјавата на претседателот на Европскиот совет, Антонио Кошта, од Софија, во која тој истакна дека е разумно на Северна Македонија да и се гарантира дека по уставните измени нема да има други барања на нејзиниот пат кон Европската Унија.
„ Македонија веќе покажа дека е кредибилен и доверлив партнер на Унијата – целосно усогласена со заедничката надворешна и безбедносна политика, прва во регионот што го потпиша Партнерството за безбедност и одбрана со Европската Унија, и држава која активно придонесува кон мирот и стабилноста во регионот и пошироко“, рече Муцунски во изјава за ТВ Сител.
Инаку Кошта одговарајќи на новинарско прашање, рече дека ги разбира позициите на Скопје и оти смета дека е разумно на Северна Македонија да ѝ се дадат гаранции дека нема да има нови барања на патот кон Европската Унија.
„Тие очекуваат дека пристапувањето сега може да се прецизира, но она што е одобрено е одобрено, она што е договорено е договорено и тие мора да го спроведат. Во исто време, многу е важно да се изгради доверба. И да се гарантира на Северна Македонија дека она што го очекуваме и сакаме во моментов не е само нешто што го сакаме сега и го очекуваме подоцна. Нема да сакаме ништо повеќе да се прави подоцна. Ова е разумно“, рече Кошта, претседател на Европскиот совет.
Бугарскиот премиер Росен Жељазков рече дека Софија досега повеќе пати ја потврдила својата позиција дека нема да поставува други барања за обврски што треба да ги исполни Северна Македонија.
Инаку Уставниот суд на 13 август информираше дека е формиран предмет во кој е оспорен Протоколот од вториот состанок на Заедничката меѓувладина комисија со Бугарија донесен на 17.07.2022 година во Софија, за кој во тек е претходна постапка во која се испитуваат податоците и известувањата потребни за донесување на одлука.
Подносителка на иницијативата, поранешната пратеничка Поповска во иницијативата наведува дека со оспорениот Протокол е прекршен Уставот и тврди дека има несоодветна форма и содржина, дека излегува надвор од рамките на правен акт кој обработува еден член од Договор меѓу две земји и произведува штетни дејствија врз идентитетските прашања за македонскиот народ, јазик и држава.
Претседателката Гордана Сиљановска Давкова изјави дека уставните судови не се под јурисдикција на соседни политичари, а одлуките на овој суд се конечни и не се коментираат.
На темата потсети дека нема потреба од нова декларација за „црвените линии“ на државата за евроинтеграциите, рече претседателката на државата, Гордана Сиљановска-Давкова, откако претседателот на СДСМ, Венко Филипче најави дека ќе поднесе декларација со „црвени линии“ која треба да помогне во поместувањето на преговарачките позиции на Северна Македонија на патот кон Европската унија.
Поддржувачите на Болсонаро излегуваат на улиците пред пресудата во случајот за државен удар во Бразил
Поранешниот претседател на Бразил, Жаир Болсонаро, ќе ја тестира својата политичка сила во недела, 7 септември, со демонстрации во главните градови на земјата, неколку дена пред Врховниот суд да одлучи дали е виновен за обидот за државен удар.
Лидерот на крајната десница, исто така поранешен капетан на армијата, се соочува со казна затвор до 43 години доколку биде осуден за обид да ја задржи власта по поразот на изборите во 2022 година од неговиот левичарски ривал Луиз Инасио Лула да Силва.
Судот треба да донесе пресуда следната недела во случајот што го предизвика гневот на американскиот претседател Доналд Трамп, сојузник на Болсонаро.
Болсонаро, кој е во домашен притвор од август, ќе биде отсутен протагонист на настаните за Денот на независноста, повикувајќи на амнестија за стотици негови поддржувачи кои беа осудени за упадот во Врховниот суд, претседателската палата и Конгресот на 8 јануари 2023 година.
„Болсонистите“ се надеваат дека Конгресот ќе гласа за амнестија, која би можела да се прошири на поранешниот претседател дури и ако биде осуден.
Болсонаро во тоа време беше во Соединетите Американски Држави, но беше обвинет за поттикнување на немирите, кои ја повикаа армијата да го собори Лула една недела по неговото враќање на власт.
Сојузниците на Болсонаро организираат собири за недела под слоганот „Бразил одговара“, а настаните започнуваат во Рио де Жанеиро пред главните демонстрации во недела попладне во Сао Паоло на авенијата Паулиста.
Ултраконзервативниот евангелистички пастор Силас Малафаја, спонзор на настанот, ќе присуствува, заедно со неколку десничарски претседателски кандидати, вклучувајќи го и гувернерот на Сао Паоло, Тарцисио де Фреитас, кој се смета за потенцијален наследник на Болсонаро и клучен поборник за амнестија.
Болсонаро, на кого му е забрането да се кандидира до 2030 година поради сомневања за изборниот систем на Бразил без докази, тврди дека е невин и дека е политички прогонуван.
На Денот на независноста, претседателот Лула ќе ја предводи традиционалната официјална парада во Бразилија под овогодинешното мото „Суверен Бразил“, по казнените американски царини од 50 проценти што ги наметна Трамп, кој тврдеше дека Болсонаро страда од „лов на вештерки“.
Властите ја засилија безбедноста за парадата со распоредени 2.000 полицајци и дополнителни војници во готовност, потврди воената полиција на Бразилија.
Лула, 79, кој планира да се кандидира за реизбор во 2026 година, оваа недела предупреди на ризиците од амнестија ако прашањето стигне до Конгресот.
„Тоа е битка што мора да ја води народот“, рече тој.
Претседателот на Претставничкиот дом, Уго Мота, рече дека „сè уште нема одлука“ за амнестијата, но призна дека преговорите се интензивирале во последните денови за да се изнесе прашањето пред Конгресот.
Мултимедија
Најпосетени
Што треба да знаете