Вести
Регистрирани 10 сериозни инциденти против новинари на српските протести
Медиумските организации од Србија и регионот денеска (14 август) објавија дека за време на демонстрациите претходниот ден, регистрирани се 10 сериозни инциденти против новинари кои известуваат од терен - од физички напади и навреди до уништување на опрема.
Според соопштението, издадено ден по уличните немири и судирите меѓу антивладините демонстранти и поддржувачите на владејачката Српска напредна странка (СНС), нападите врз медиумските работници дошле „и од граѓани и од полицајци, кои не само што не успеале да го спречат насилството, туку во многу случаи и самите го извршиле“.
„Претходната ноќ, дури шест од десет случаи на напади биле извршени од полицајци. Наместо да ги заштитат новинарите и да ја обезбедат нивната работа, властите одговорни за заштита стануваат директни сторители на насилство, игнорирајќи ги своите законски обврски“, се вели во соопштението кое е потпишано од 15 новинарски здруженија.
Потписниците ги повикуваат полицијата и јавното обвинителство итно да ги обработат и решат сите напади и закани врз новинари, без оглед на тоа кој ги извршил нападите.
Тие потсетуваат дека во 2016 година беше потпишан Договор за соработка со Републичкото јавно обвинителство и Министерството за внатрешни работи, чија главна цел беше да се обезбеди повисоко ниво на заштита на новинарите и медиумските работници.
„Сепак, во ситуација кога речиси секој ден сме сведоци на брутални и неоправдани полициски акции против новинари на улиците, станува очигледно дека институциите кои се обврзаа да ги заштитат сега отворено ги игнорираат сопствените ветувања и законите на оваа земја“, се вели во соопштението.
Протести беа одржани во Нови Сад, Белград, Ниш и неколку други градови во Србија на 13 август, пред или во близина на ограноците на владејачката партија. Под слоганот „Србија, разбуди се“, граѓаните се собраа како одговор на насилството извршено од поддржувачите на СНС врз граѓаните на претходните протести, главно во Војводина.
Владини претставници, предводени од српскиот претседател Александар Вучиќ, ги обвинија демонстрантите дека предизвикуваат немири и напади врз просториите на владејачката партија. Од друга страна, учесниците во демонстрациите ги обвинија активистите на СНС дека ги нападнале со пиротехнички средства, а ја обвинија и полицијата дека не реагирала.
Антивладините протести во Србија, предводени од студенти, траат повеќе од девет месеци. Тие од власта бараат одговорност за смртта на 16 лица при уривањето на главната железничка станица во Нови Сад на 1 ноември.
види ги сите денешни вести
Ердоган и Мерц јавно ги „судрија“ ставовите околу војната во Газа
Турскиот претседател Реџеп Таип Ердоган и германскиот канцелар Фридрих Мерц се судрија околу војната во Газа за време на заедничката прес-конференција во Анкара на 30 октомври, јавува германската новинска агенција ДПА.
Додека Мерц ја потврди цврстата поддршка на Германија за Израел, Ердоган повторно ја обвини земјата дека извршува „геноцид“.
Турскиот лидер посочи дека Израел оваа недела извршил масовни воздушни напади врз Газа, иако стапи во сила примирје на 10 октомври. Израел, пак, во средата соопшти дека го „обновил“ спроведувањето на примирјето.
„Тие не само што ја напаѓаат Газа, туку отсекогаш имале намера да ја покорат преку глад и геноцид, и тоа сè уште трае,“ изјави Ердоган.
Забелешките на Ердоган беа одговор на изјавата на Мерц, кој на турски новинар му рече дека Израел станал прибежиште за милиони Евреи, меѓу кои и многумина преживеани од Холокаустот.
„Затоа Германија секогаш цврсто ќе стои на страната на Државата Израел,“ рече канцеларот.
Мерц додаде дека Израел го искористил своето „право на самоодбрана“ по нападот предводен од Хамас на 7 октомври 2023 година, велејќи дека разорната војна можела да се избегне доколку Хамас ги ослободел заложниците порано и го положел оружјето.
„Тогаш оваа војна ќе завршеше веднаш,“ изјави германскиот канцелар.
Ердоган возврати дека не се согласува со Мерц, нагласувајќи дека Хамас нема ниту нуклеарно, ниту тешко вооружување, додека Израел поседува такви средства и повторно ја бомбардирал Газа и покрај примирјето договорено пред две недели.
Ердоган изјави дека Израел повторно ја нападна Газа во последните денови и покрај прекинот на огнот во енклавата.
„Дали Германија не го гледа ова?“, праша Ердоган, додавајќи дека хуманитарна должност на Турција, Германија и другите земји е да го прекинат гладот и масакрите во Газа.
Во вторникот, израелскиот премиер Бенјамин Нетанјаху нареди обновени напади врз Газа по убиството на израелски војник во Рафах, на југот на Газа, и по, како што соопшти владата, „инсценираното“ пронаоѓање на остатоци од заложник.
Турција одржува контакти со Хамас, организација која САД и Европската унија ја сметаат за терористичка. Анкара одигра клучна улога во посредувањето на примирјето во Појасот Газа пред околу две недели, иако прекинот на огнот во меѓувреме стана нестабилен.
„Лукоил Македонија“ дел од странскиот имот што Русија го продава поради санкциите
„ЛУКОИЛ Македонија“ е во 100% сопственост на „LUKOIL International GmbH“, е кусиот одговор на новинарското прашање на Радио Слободна Европа до компанијата дали со најавата за продажбата на подружници надвор од Русија е опфатена и подружницата во Северна Македонија?
Лукоил ( LUKOIL International GmbH) соопшти дека ja прифатил понудaта од глобалниот трговец со стоки „Ганвор“ (Gunvor) за купување на неговиот странски имот, кои втората по големина руска нафтена компанија се обидува да го продаде откако Вашингтон воведе санкции врз неа минатата недела.
Како одговор на новинарските прашања на РСЕ, од македонскиот Лукоил се повикуваат на соопштението објавено од основачот на компанијата „LUKOIL International GmbH“ во кое е наведено дека и двете страни претходно ги договориле условите за транскацијата и дека Лукоил се обврзал да не преговара со други потенцијални купувачи.
„Продажбата на Лукоил се должи на рестриктивните мерки на некои држави воведени против компанијата и нејзините подружници“, е наведено во соопштението од Лукоил.
Во него се објаснува дека склучувањето на обврзувачкиот договор за трансакцијата ќе зависи од дозволата од американската Канцеларијата за контрола на странски средства на Министерството за финансии (OFAC) која треба да ја добие купувачот, компанијата „Ганвор“ .
„Како и сите други применливи лиценци, дозволи и други овластувања во други применливи јурисдикции. Доколку е потребно, страните планираат да поднесат барање за продолжување на постојната лиценца од OFAC и сите дополнителни лиценци за да се обезбеди непречено работење на меѓународните средства и нивното банкарско сервисирање за периодот до завршувањето на трансакцијата“, се вели во соопштението.
Македонската подржучница на Лукоил“ поседува мрежа од 40 бензински станици и еден нафтениот склад. Првата безниска станица во земјава започна со работа во 2006 тата година.
Имено, Ганвор се здоби со популарност во 2000-тите како најголем трговец со руска нафта во светот.
Меѓу неговите акционери во тоа време беше и Генадиј Тимченко, близок сојузник на претседателот Владимир Путин, кој го продаде својот удел во Гунвор откако САД го санкционираа по анексијата на Крим од страна на Русија во 2014 година.
Како и многу трговски компании, Ганвор многу профитираше од растот на цените на нафтата и гасот што започна со избувнувањето на војната во Украина и потегот на Европа да ја намали својата зависност од руска енергија.
Ганвор и комапниите Витол и Трафигура ги искористија тие профити за да стекнат средства, почнувајќи од рафинерии и нафтени полиња, па сè до електрани и ветерни фарми.
Лукоил, со седиште во Москва, учествува со околу 2% во глобалното производство на нафта.
Неговиот најголем странски имот е нафтеното поле Западна Курна 2 во Ирак, едно од најголемите во светот, во кое поседува 75% удел. Производството на полето достигна 480.000 барели дневно во април, објави руската новинска агенција Интерфакс.
Исто така, ја поседува рафинеријата Лукоил Нефтохим Бургас во Бугарија со капацитет од 190.000 барели дневно, најголемата на Балканот, како и рафинеријата за нафта Петротел во Романија.
Лукоил испорачува нафта во Унгарија и Словачка, како и во турската рафинерија СТАР, која е во сопственост на државната нафтена компанија на Азербејџан СОКАР и во голема мера зависи од руската сурова нафта.
Лукоил, исто така, има удели во нафтени терминали, како и во малопродажни синџири за гориво во Европа и поседува проекти за нагорен и низводен вод во Централна Азија, Африка и Латинска Америка.
Последни подготовки на ДИК пред вториот изборен круг
Вкупно 1 013 357 избирачки ливчиња за гласањето на вториот круг на Локалните избори 2025 се дистрибуираат низ државата. Од Државната изборна комисија (ДИК) велат дека дистибуцијата на избирачкиот материјал се одвива без никакви проблеми.
На 2 ноември ќе се бираат градоначалници во 32 општини и во Градот Скопје.
Во сабота гласаат болните и изнемоштените, затворениците и лицата во домашен притвор чии пријави се прифатени од општинските изборни комисии.
Локалните избори, според информациите на ДИК, ќе ги следат 1 569 набљудувачи, од кои 904 домашни и 651 меѓународни, а акредитирани за известување од изборите се и 14 странски новинари.
Поради недоволен цензус на првиот круг од локалните избори, во четири општини – Гостивар, Врапчиште, Центар Жупа и Маврово и Ростуше – ќе се спроведе нова изборна постапка за избор на градоначалници. Гласањето, согласно Изборниот Законик, нема да се одржи во недела, туку во рок од 60 дена од конечните резултати од Локалните избори 2025.
Во првиот изборен круг од Локалните избори 2025 беа избрани градоначалници во 44 општини, како и нови членови на советите во сите општини, освен во Шуто Оризари каде ќе има прегласување за Советот на три избирачки места.
Во четирите општини, поради непостигнат цензус, ќе има нови избори и целата постапка ќе се повтори од почеток до крај – од распишување избори, поднесување кандидатури, водење кампања, до гласање. Најверојатно денот на гласање би бил во првата половина од јануари 2026 година.
При новото гласање во Гостивар, Врапчиште, Маврово и Ростуше и Центар Жупа, нема да се „брка“ цензус од една третина излезност бидејќи Изборниот законик во меѓувреме е изменет со што овој услов се отстрани.
Германската економија стагнира, избегнувајќи рецесија
Германската економија стагнираше во третиот квартал, за малку избегнувајќи рецесија, покажуваат официјалните податоци објавени во четврток, под влијание на ослабениот извоз додека земјата се бори да се опорави од долготрајниот економски пад.
Најголемата економија во Европа забележа нулта раст од јули до септември во споредба со претходниот квартал, според прелиминарните податоци на сојузната статистичка агенција „Дестатис“.
Ова следи по пад од 0,2 проценти во вториот квартал. Аналитичарите анкетирани од финансиската компанија „Фактсет“ предвидуваа раст од 0,1 процент за третиот квартал.
Клучниот германски извоз „се намали во споредба со претходниот квартал“, соопшти агенцијата, иако инвестициите во машини и опрема обезбедија одредена поддршка.
Бројките покажуваат дека „работите сè уште не одат добро во Германија“, изјави економистот на од банката ЛББВ, Јенс-Оливер Николаш.
Според него планираниот голем јавен трошок за инфраструктура и одбрана „нема да биде доволен на долг рок“
„Потребни се реформи кои ќе го поттикнат растот“,додаде тој.
Годишната инфлација во Германија се намали во октомври на 2,3 проценти, од 2,4 проценти претходниот месец, според прелиминарните податоци на „Дестатис“.
Но падот беше побавен од очекуваното, аналитичарите од „Фактсет“ предвидуваа инфлација од 2,2 проценти за октомври.
Традиционалниот мотор на растот во еврозоната се намали и во 2024 и во 2023 година, погоден од кризата во индустријата, високите енергетски трошоци и слабата побарувачка за извоз.
Трговските царини што ги воведе американскиот претседател Доналд Трамп дополнително ги влошија условите, бидејќи САД се голем пазар за германски производи – од автомобили до фармацевтски и индустриски машини.
Растот беше поттикнат на почетокот на годината, кога американските компании забрзано складираа германски производи пред стапувањето во сила на царините на Трамп, но тој замав подоцна се изгуби.
Официјалните податоци објавени во четврток покажаа дека и италијанската економија стагнирала во периодот јули–септември, по падот во претходниот квартал.
Во меѓувреме, француската економија порасна побрзо од очекуваното – за 0,5 проценти во третиот квартал, и покрај политичката криза поврзана со огромниот јавен долг и буџетскиот дефицит. Економијата на еврозоната, исто така, забележа побрз од очекуваниот раст од 0,2 проценти во истиот период.
Околу 4000 студенти пешачеа од Белград до Нови Сад
На 30 октомври, околу 4000 студенти пешачеа од Белград до Нови Сад по повод комеморативниот собир на 1 ноември во тој град.
Во четврток во 10:00 часот наутро, тие тргнаа на патување од 90 километри за да бидат во Нови Сад за да ја одбележат првата годишнина од смртта на 16 лица при падот на настрешницата на главната железничка станица во тој град.
„Сакаме мирно да им оддадеме почит на жртвите и уште еднаш апелираме до владата да ги исполни барањата на студентите“, изјавија студентите за Радио Слободна Европа на пат кон Нови Сад.
Како што изјавија, во групата што оди од Белград има 4000 студенти.
Оваа група, која тргна од Нови Белград, беше пречекана со овации од голем број граѓани кои аплаудираа, мавтаа и ги поздравуваа со извици „студенти, студенти“ и „ве сакаме студенти“.
Претходниот ден, на пат кон Нови Сад, група студенти што пешачеа од Нови Пазар помина низ Белград.
Голем број луѓе од цела Србија, студенти, средношколци и други граѓани, пешачеа од Чачак, Краљево, Горњи Милановац, Ужице, Суботица, Вршац, Богатиќ, Шабац, Ваљево, Крагуевац, Петровац на Млава до Нови Сад. Група од Ниш оди со велосипед.
Веќе една година, самоорганизираното студентско движење предводи бран граѓански протести во Србија, барајќи одговорност од властите на Српската напредна партија (СНС) за смртта на 16 лица при падот на настрешницата на реконструираната главна железничка станица во Нови Сад на 1 ноември 2024 година.
Кон крајот на ноември минатата година, започнаа блокади на повеќе од 80 факултети на шест државни универзитети како одговор на физичкиот напад од страна на владини претставници врз студенти на Факултетот за драмски уметности (ФДУ) во Белград, додека стоеја на улицата и тивко им оддаваа почит на загинатите.
Во март, во Белград се одржа најголемиот протест организиран од студентите во изминатата година, на кој, според Архивата на јавни собири, присуствувале најмалку 280.000 до 330.000 луѓе.
Претходно, во ноември, студентите побараа објавување на целосна документација за реконструкцијата на железничката станица, итно гонење на функционерите на СНС кои ги претепаа студентите на ФДУ во Белград, прекин на судските постапки против уапсените за учество во демонстрациите и зголемување на буџетот за факултетите за 20 проценти.
Откако барањата не беа исполнети, во мај побараа распишување вонредни парламентарни избори.
Претседателот Александар Вучиќ, во име на владата, одби да распише нови избори.
Тројца германско-руски државјани виновни за шпионажа за Русија
Германски суд денеска прогласи три лица со двојно државјанство, германско-руски државјани, за виновни за шпионажа во корист на Москва, а осомничениот водач на групата е осуден и за планирање саботажа и учество во борбите во источна Украина.
Како што јави ДПА, високиот регионален суд во Минхен главниот осомничен го осуди на шест години затвор, додека другите двајца добија условни казни од шест месеци и една година.
Според судот, 41-годишниот главен обвинет служел како паравоен припадник во вооружена терористичка група, која се борела против украинските сили во источна Украина во периодот од Германски суд во четврток прогласи тројца германско-руски државјани со двојно државјанство за виновни за шпионажа за Москва, а осомничениот водач на групата е осуден и за планирање саботажа и борба за милиција во источна Украина.
Високиот регионален суд во Минхен го осуди главниот осомничен на шест години затвор, додека неговите двајца сообвинети добија условни казни од шест месеци и една година.
Според судот, беше утврдено дека 41-годишниот главен обвинет служел како паравоен припадник во вооружена терористичка група, која се борела против украинските сили во источна Украина во периодот од 2014 до 2016 година, како и дека имал силни врски со руската разузнавачка служба
Другите двајца осудени му помагале на првообвинетиот. Сите осудени ги негираа обвиненија.
Кремљ: Неодамнешните тестови за оружје што ги најави Трамп „не се нуклеарни“
Кремљ не верува дека започнала нова рунда од трката во вооружување меѓу Русија и САД, изјави портпаролот на рускиот претседател Дмитриј Песков.
Американскиот претседател, Доналд Трамп, претходно денеска нареди итен почеток на тестирањето на нуклеарно оружје и исто така спомена дека САД имаат полигони за тестирање на нуклеарно оружје, а деталите за тестовите ќе бидат објавени подоцна.
„Ова во никој случај не може да се протолкува како нуклеарен тест“, изјави Песков пред новинарите кога беше прашан дали изјавите на Трамп за почетокот на тестирањето на нуклеарно оружје може да се сметаат за нова рунда од трката во вооружување.
Рускиот претседател Владимир Путин вчера објави дека Русија пред два дена го тестирала подводното возило „Посејдон“, а, исто така, на 26 октомври објави дека се завршени и тестирањата на ракетата „Буревестник“ која има нуклеарен мотор и можност за носење нуклеарно оружје. Москва моментално разгледува опции за користење на ракетата, бидејќи војната во Украина продолжува без јасен исход.
Договорот за забрана на нуклеарни тестови во атмосферата, во вселената и под вода беше потпишан во Москва на 5 август 1963 година од претставници на СССР, САД и Велика Британија.
ЕУ и земјите од Западен Балкан ќе потпишат Договор за борба против тероризмот
Еврокомесарот за внатрешни работи и миграција Магнус Брунер и претставници на земјите од Западниот Балкан денеска(30 октомври)во Сараево ќе потпишат Договор за спречување и борба против тероризмот и насилниот екстремизам.
Како што јави МИА, договорот ќе биде потпишан во рамки на денешниот Министерски форум ЕУ-Западен Балкан за правда и внатрешни работи, што се одржува во главниот град на БиХ.
„Западниот Балкан не е само наш сосед. Тој е длабоко поврзан со внатрешната безбедност на ЕУ“, порача Брунер во пресрет на потпишувањето на Договорот, додавајќи дека документот е уште еден чекор кон зајакнување на соработката меѓу ЕУ и земјите од регионот во областа на безбедноста.
Целта на договорот е заедничко справување со растечките закани, како што се радикализацијата преку интернет и злоупотребата на новите технологии за терористички цели, но исто така и засилување на напорите за превенција од насилниот екстремизам.
Со договорот се предвидува зајакнување на соработката на полициите од земјите од Западниот Балкан со Европол, вклучително и во спроведување на заеднички истраги поврзани со тероризам, терористички активности и безбедносни закани.
Дополнително, договорот предвидува и вклучување на земјите од регионот во оперативните проекти на Центарот за препознавање на радикализацијата на Европол.
Потпишувањето на договорот доаѓа во пресрет на објавувањето на пакетот на извештаи на Европската комисија за напредокот на кандидатите за членство во ЕУ на нивниот европски пат, предвидено за во вторник, 4 ноември.
„Лукоил“ ја прифати понудата на „Ганвор“ да го купи нејзиниот странски имот
Лукоил соопшти дека ja прифатил понудaта од глобалниот трговец со стоки „Ганвор“ (Gunvor) за купување на неговиот странски имот, кои втората по големина руска нафтена компанија се обидува да го продаде откако Вашингтон воведе санкции врз неа минатата недела.
Планираната продажба на странски имот е досега најзначајната акција од страна на руска компанија како резултат на западните санкции воведени поради војната во Украина, која започна со целосната инвазија на Русија врз нејзиниот сосед во 2022 година.
Лукоил во соопштението соопшти дека прифатил понуда од „Гунвор“ за продажба на „Лукоил Интернешнл ГмбХ“, која ги контролира странските активи на нафтениот гигант.
„Клучните услови на трансакцијата се претходно договорени од страните. Од своја страна, Лукоил ја прифати понудата, обврзувајќи се да не преговара со други потенцијални купувачи“, соопшти Лукоил за понудата на „Ганвор“.
„Ганвор“ потврди дека е во преговори со „Лукоил“ за евентуално стекнување на целокупниот странски имот.
Инаку Министерството за финансии на САД издаде лиценца со која им дава на компаниите рок до 21 ноември да ги прекинат сите трансакции со Лукоил и Роснефт, уште една руска енергетска фирма насочена кон новата рунда санкции.
„Доколку е потребно, страните планираат да аплицираат за продолжување на тековната лиценца“, соопшти Лукоил.
Договорот е предмет на дозвола од Канцеларијата за контрола на странски средства на Министерството за финансии, додаде тој.
Ганвор се здоби со популарност во 2000-тите како најголем трговец со руска нафта во светот.
Меѓу неговите акционери во тоа време беше и Генадиј Тимченко, близок сојузник на претседателот Владимир Путин, кој го продаде својот удел во Гунвор откако САД го санкционираа по анексијата на Крим од страна на Русија во 2014 година.
Како и многу трговски компании, Ганвор многу профитираше од растот на цените на нафтата и гасот што започна со избувнувањето на војната во Украина и потегот на Европа да ја намали својата зависност од руска енергија.
Ганвор и комапниите Витол и Трафигура ги искористија тие профити за да стекнат средства, почнувајќи од рафинерии и нафтени полиња, па сè до електрани и ветерни фарми.
Лукоил, со седиште во Москва, учествува со околу 2% во глобалното производство на нафта.
Неговиот најголем странски имот е нафтеното поле Западна Курна 2 во Ирак, едно од најголемите во светот, во кое поседува 75% удел. Производството на полето достигна 480.000 барели дневно во април, објави руската новинска агенција Интерфакс.
Исто така, ја поседува рафинеријата Лукоил Нефтохим Бургас во Бугарија со капацитет од 190.000 барели дневно, најголемата на Балканот, како и рафинеријата за нафта Петротел во Романија.
Лукоил испорачува нафта во Унгарија и Словачка, како и во турската рафинерија СТАР, која е во сопственост на државната нафтена компанија на Азербејџан СОКАР и во голема мера зависи од руската сурова нафта.
Лукоил, исто така, има удели во нафтени терминали, како и во малопродажни синџири за гориво во Европа и поседува проекти за нагорен и низводен вод во Централна Азија, Африка и Латинска Америка.
Избори во Холандија: Крајните десничари на Вилдерс и либералите изедначени
По пребројување на 90% од гласовите, крајнодесничарската партија на холандскиот популист Гертс Вилдерс е „рамо до рамо“ со либералните демократи 66 (D66), по парламентарните избори кои се одржаа во среда (29 октомври). Се очекува двете партии да освојат 26 од 150 места во парламентот, според најновата проекција од изборната служба на холандската новинска агенција ANP, објавена рано во четврток, на 30 октомври.
Прелиминарните конечни резултати се очекуваат подоцна во текот на денот.
Претходните проекции и прогнози покажаа дека D66, предводена од Роб Јетен, има водство од две места пред Партијата за слобода (PVV) на Вилдерс. Сепак, најновите бројки означуваат назадување за Вилдерс во споредба со изборите во 2023 година, кога неговата партија обезбеди 37 места, додека D66 обезбеди само девет.
Либералната D66 се смета за победник, освојувајќи 17 места во споредба со резултатите од пред две години. Нејзиниот 38-годишен лидер Јетен има најголеми шанси за формирање владина коалиција, бидејќи сите големи партии ја исклучија можноста за соработка со Вилдерс.
Сегашната владејачка конзервативна Народна партија за слобода и демократија (VVD) може да очекува 22 места во парламентот, алијансата Лабуристичко-зелена левица (PvdA) се очекува да добие 20 мандати, а по нив следува Христијанско-демократскиот апел (CDA) со 18.
Вилдерс сака „100% сигурност“ пред следните чекори. Тој претходно го опиша резултатот на неговата партија како под очекувањата, кога првичните проекции сугерираа дека D66 освоила мнозинство места.
По најновите проекции, тој на платформата X напиша:
„PVV сака да ја преземе водечката улога во формирањето влада ако станеме најголема партија. Додека нема 100% сигурност за тоа, не може да почнеме да работиме на тоа. Ќе направиме сè за да го спречиме ова“, напиша Вилдерс.
Тој претходно им изјави на новинарите дека, иако се надевал на повеќе места во парламентот, неговата партија сепак го постигна својот втор најдобар резултат досега.
На последните избори пред две години, PVV се појави како најголема сила за прв пат. Тимерманс поднесе оставка од функцијата лидер на партијата по резултатите. Водечкиот кандидат на Алијансата на Лабуристите и Зелените од Левицата, Франс Тимерманс, ја објави својата оставка по резултатите. Алијансата се состои од холандските Зелени и социјалдемократите. Првично, ова беа две независни партии, а социјалдемократската Лабуристичка партија е една од најстарите. Двете партии планираат да се спојат во една партија под ново име.
Во меѓувреме, Вилдерс предизвика колапс на коалицијата. Изборите во Холандија станаа неопходни по предвремениот крај на претходната влада во јуни. Оваа влада од четири партии се сметаше за најдесничарска во холандската историја. Најголемиот од четирите коалициски партнери беше PVV на Вилдерс.
Сепак, тој не стана премиер. Оваа позиција ја држеше независниот Дик Шуф. По помалку од една година, Вилдерс ја повлече својата партија од владата, велејќи дека другите три коалициски партнери не ја поддржуваат имплементацијата на строга антимиграциска политика.
На прашањето дали оваа одлука била грешка, Вилдерс рече дека покажал „цврстина“. Ако сите големи партии го почитуваат своето одбивање да соработуваат со Вилдерс, далеку е од јасно кој ќе ја предводи новата влада - или колку време ќе биде потребно за да се формира.
Мултимедија
Најпосетени
Што треба да знаете