Претседателот на Алијансата за Албанците, Арбен Таравари, реагираше на одлуката на Апелациониот суд со која се поништи одлуката на Основниот суд во Тетово. Со одлука на тетовскиот суд во април годинава печатите на партијата Алијанса за Албанците му припаднаа на крилото на Зијадин Села

Според Таравари, со последната одлука на судот Алијансата за Албанците се враќа во своето членство.

„Алијансата за Албанците е наша! Апелациониот суд одлучи дека партијата Алијанса за Албанците и припаѓа на апсолутното мнозинство. Партијата му се враќа во членството! Честитки до сите!“, изјави Таравари.

Инаку, синоќа (12 септември)Алијансата за Албанците соопшти дека Апелациониот суд во Гостивар го вратил предметот на политичката партија Алијанса за Албанците на повторно судење и ги прифатил жалбите на правниот застапник на Арбен Таравари.

„Апелациониот суд го враќа предметот на повторно судење по претходната одлука донесенс од Основниот суд Тетово, каде што се одолговлекуваше и се менуваа неколку судии додека не се донесе скандалозната одлука под притисок на поранешниот министер за правда Кренар Лога, партиските печати да и припаднат на фракцијата што и се придружи на ДУИ. Имајќи ги предвид доказите депонирани во Апелациониот суд во Гостивар, се очекува конечната одлука да биде во наша корист и партијата заедно со печатите да остане кај нејзиниот легитимен претседател Арбен Таравари“, соопштија од АА.

Видете и ова:

Судот во Тетово одлучил Села да ги добие печатите од Алијанса за Албанците, Таравари најавува жалба

Инаку во Основниот Суд Тетово се водеа два предмети, односно две барања за упис на промени во судскиот регистар на политичките партии во кој како барател и во двете барања се јавува Алијанса на Албанците со седиште во Тетово.

Алијанса за Албанците пред изборите се подели на две крила. Едното на Таравари и другото на Села, кој по напуштањето на лидерската позиција стана претседавач со партиското собрание. Причина за расколот беше настапот на партијата на претседателските и парламентарни избори.

Крилото на претседателот на партијата Арбен Таравари се приклучи на опозицскиот блок во кој се БЕСА на Биљал Касами, Алтернатива на Африм Гази и Демократското движење на Изет Меџити и ја формираа коалицијата Вреди, додека пак крилото на АА предводено од Села на претстојните избори коалицираше со ДУИ и стана дел од коалицијата Европски фронт.

Иран објави дека околу 120 негови државјани се депортирани од Соединетите Држави и дека ќе пристигнат во земјата оваа недела.

Генералниот директор за парламентарни и конзуларни работи во иранското Министерство за надворешни работи, Хосеин Нушабади, за новинската агенција Тасним изјави дека групата е дел од поширок план на американските имиграциски власти за депортирање на околу 400 Иранци, од кои повеќето влегле во САД нелегално, главно преку Мексико.

Некои од депортираните имале важечки дозволи за престој во САД, рече тој, но сепак биле ставени на списокот за депортација, со добиена согласност за репатријација.

Њујорк Tајмс, повикувајќи се на неименувани претставници во Техеран, објави дека авион со околу 100 Иранци ја напуштил Луизијана доцна во понеделник и требало да пристигне во Иран преку Катар следниот ден.

Иако околностите на нивното првично заминување од Иран и нивното пристигнување во САД се разликуваат, Нушабади рече дека тие ја напуштиле земјата легално и дека Иран им упатува „добредојде“, ветувајќи целосна конзуларна поддршка за нивното враќање.

Застапниците за човекови права ја критикуваа политиката на САД за протерување мигранти во земји со проблематични евиденции за човекови права.

Видете и ова:

По укинувањето на заштитениот статус, илјадници Авганистанци пред депортација и прогон

Ситуацијата со човековите права во Иран останува катастрофална, со широко распространет прогон на политички дисиденти, активисти, членови на религиозни малцинства и ЛГБТ+ лица.

Критичарите велат дека кампањата за депортација на американската администрација ги загрозува ранливите мигранти со тоа што ги враќа во тие сурови услови.

Во последниве години, многу Иранци се придружија на големи групи мигранти на јужната граница на САД, преминувајќи нелегално, а потоа барајќи азил. Многу од овие баратели на азил го наведоа прогонувањето во Исламската Република поради нивните политички или религиозни убедувања како главна причина за бегство.

И покрај овие тврдења, повеќето барања за азил се одбиваат или не се обработуваат до депортација.

Властите на Северна Македонија вложуваат значителни напори, но земјата сѐ уште не ги исполнува целосно минималните стандарди за елиминирање на трговијата со луѓе. Владата покажа генерално зголемени напори во споредба со претходниот период на известување, затоа Северна Македонија остана на Ниво 2, се наведува во извештајот на американскиот Стејт департментот за трговијата со луѓе во светот за 2025 година.

„Овие напори вклучуваа истрага на повеќе сомнителни случаи на трговија со луѓе и гонење на повеќе обвинети. Владата ги зголеми целокупните напори за заштита, вклучително и идентификување на повеќе жртви, развивање нови стандардни оперативни процедури за мобилни тимови и зголемување на ресурсите за засолниште управувано од невладини организации за жртви на трговија со луѓе. Доделени се средства за фондот за компензација на жртвите, формирана е комисија за судење на случаи и воспоставена е група составена од преживеани за давање препораки за напорите против трговијата со луѓе“, се вели во извештајот.

Сепак, како што се додава, не се исполните минималните стандарди во неколку клучни области. -

„Осудени се помалку трговци со луѓе, а Обвинителство за организиран криминал и корупција (ООККП) немаше доволно ресурси за да ги реши сите случаи под негова надлежност. Некои локални полициски и окружни обвинители не ги упатија потенцијалните случаи на трговија со луѓе до Работната група за борба против трговијата со луѓе или ООККП и користеа обвиненија за прекршоци со поблаги казни за гонење на трговците со луѓе. Владата не издвои средства за мобилни тимови кои ги идентификуваат повеќето потенцијални жртви секоја година, и покрај претходните обврски за тоа. Не е обезбедена специјализирана помош за машките жртви и немаше долгорочни услуги за поддршка за сите жртви“, пишува во извештајот.

Се додава дека поради недоследен скрининг од страна на локалната полиција и некои гранични служебници, властите не презеле ефикасни мерки за да спречи несоодветно казнување на потенцијалните жртви за незаконски дела извршени како директен резултат на трговијата со луѓе.

Видете и ова:

Стејт департмент: Зголемете ги ресурсите за истрага на трговијата со луѓе

Во него се посочени и препораки за земјава за подобрување на состојбата, меѓу кои, енергично истражување, гонење и процесуирање на кривичните дела поврзани со трговија со луѓе, вклучително и оние во кои има соучесници, изрекување соодветни казни за осудените трговци со луѓе, што треба да вклучува и значителни затворски казни.

„Потребно е да бидат издвоени доволно ресурси за заштита на жртвите, вклучително и за мобилните тимови за идентификација, за засолништето за жртви на трговија со луѓе и за поддршка на специјализирани услуги за возрасни машки жртви. Да се зголемат напорите за проактивно идентификување на жртвите на трговија со луѓе преку конзистентно скрининг за трговија со луѓе кај ранливите популации, вклучувајќи ги лицата во комерцијален секс, мигрантите, бегалците и другите популации изложени на ризик. Да се дадат доволно ресурси на полицијата и обвинителите за проактивно истражување на трговијата со луѓе и навремено гонење на случаите. Да се обезбеди жртвите да не бидат несоодветно казнувани само за незаконски дела извршени како резултат на трговијата со луѓе“, стои во препораките.

Се препорачува и подобро и побезбедно сместување за потенцијалните странски жртви на трговија со луѓе и дозволување на жртвите да ги напуштат засолништата по своја волја, воспоставување пристап до алтернативно сместување на жртвите по напуштањето на засолништето или кога засолништето е полно.

Една од препораките е и воспоставување на специјализирана обука за судии, обвинители и органите за спроведување на законот за истраги и гонења фокусирани на жртвите, како и да му се даде овластување на националниот известувач за успешно следење и евалуација на напорите против трговијата со луѓе.

Јутјуб ќе плати 24,5 милиони долари за да ја реши тужбата поради суспендирањето на профилот на американскиот претседател Доналд Трамп по нападот на Капитол на 6 јануари 2021 година, покажуваат судските документи објавени на 29 септември.

Од сумата, 22 милиони долари ќе бидат наменети за изградба на сала за балови во Белата куќа промовирана од Трамп, додека остатокот ќе биде распределен меѓу неколку ко-тужители.

Јутјуб, како и други платформи за социјални медиуми, го блокираше профилот на Трамп во последните денови од неговиот прв претседателски мандат, наведувајќи го ризикот од натамошно насилство откако неговите поддржувачи упаднаа во Капитол во обид да го спречат Конгресот да ја потврди изборната победа на Џо Бајден.

Видете и ова:

Фејсбук ја продолжи забраната за профилите на Трамп за уште две години

Со недели пред немирите, Трамп тврдеше – без да приложи докази – дека изборите во 2020 година биле украдени, што ги разгоре тензиите меѓу неговите поддржувачи.

Неговите профили останаа суспендирани до две години пред да бидат вратени на почетокот на 2023 година. Твитер, ребрендиран како X под раководство на милијардерот Илон Маск, го врати профилот на Трамп во ноември 2022 година.

Трамп, кој е реизбран за втор мандат, оттогаш покрена тужби против технолошките компании. Компаниите се одлучија за спогодби со повеќемилионски исплати.

Во јануари, Мета се согласи да му плати на Трамп 25 милиони долари, вклучувајќи 22 милиони долари наменети за планираната библиотека на Трамп. Платформата X, пак се спогоди во февруари за околу 10 милиони долари, објави „Волстрит Џурнал“.

Оттогаш, многу од учесниците во нападот на Капитол на 6 јануари 2021 година, вклучително и нападите врз полицијата, се помилувани од Трамп.

Хамас (вооружена група, означена како терористичка организација од САД и ЕУ) сè уште не му одговори на американскиот претседател Доналд Трамп за неговиот план за Газа, додека премиерот Бенјамин Нетанјаху изјави дека израелската војска ќе остане на поголемиот дел од територијата, откако тој му ја даде својата поддршка на Трамп.

Планот предвидува прекин на огнот, ослободување на заложниците од страна на Хамас во рок од 72 часа, разоружување на Хамас и постепено повлекување на Израел од Газа, проследено со повоена транзициска власт предводена од самиот Трамп.

Висок функционер на Хамас во понеделник изјави дека групата сè уште не го добила планот од 20 точки, но функционер информиран за ова прашање подоцна за АФП изјави дека катарските и египетските медијатори се сретнале со Хамас за да им го достават документот.

Катарскиот премиер, шеикот Мохамед бин Абдулрахман Ал Тани и шефот на египетското разузнавање, Хасан Махмуд Рашад „штотуку се сретнаа со преговарачите на Хамас и го споделија планот од 20 точки. Преговарачите на Хамас рекоа дека ќе го разгледаат со добра намера и ќе дадат одговор“, рече изворот, зборувајќи под услов да остане анонимен.

Во видео изјава објавена на неговиот Телеграм канал по неговата заедничка прес-конференција со Трамп, Нетанјаху рече дека војската ќе остане во поголемиот дел од Газа, а исто така рече дека не се согласил со палестинска држава за време на разговорите со Трамп.

„Ќе ги вратиме сите наши заложници, живи и здрави, додека (израелската војска) ќе остане во поголемиот дел од Појасот Газа“, рече тој.

Сепак, израелскиот министер за финансии од крајната десница, Безалел Смотрих, член на коалициската влада на Нетанјаху, го критикуваше планот како „убедлив дипломатски неуспех“.

„Според моја проценка, и тој ќе заврши со солзи. Нашите деца ќе бидат принудени повторно да се борат во Газа“, рече тој.

Видете и ова:

Трамп и Нетанјаху се согласија за план за завршување на војната во Газа, чекаат одговор од Хамас

Во понеделник во Вашингтон, Трамп инсистираше дека мирот на Блискиот Исток е „нешто повеќе од блиску“ и ја опиша објавата како „прекрасен ден - потенцијално еден од најголемите денови во цивилизацијата“.

Неговиот план вклучува распоредување на „привремена меѓународна стабилизациска сила“ - и создавање на преодна власт предводена од самиот Трамп, вклучувајќи го и поранешниот британски премиер Тони Блер.

Блер, кој сè уште е широко омразен на Блискиот Исток поради неговата улога во војната во Ирак во 2003 година, го поздрави „смелиот и интелигентен“ план.

Со договорот ќе се бара милитантите на Хамас целосно да се разоружаат и да бидат исклучени од идните улоги во владата, но оние кои ќе се согласат на „мирна коегзистенција“ ќе бидат амнестирани.

Видете и ова:

Убиени најмалку 44 лица во Газа додека Израел ги игнорира барањата за прекин на огнот

За време на прес-конференцијата, Нетанјаху фрли сомнеж врз тоа дали на Палестинската самоуправа, која номинално управува со окупираниот Западен Брег, ќе ѝ биде дозволена улога во управувањето со Газа.

Трамп истакна дека за време на нивниот состанок Нетанјаху остро се спротиставил на каква било палестинска државност - нешто за што американскиот план остава простор.

Трамп рече дека Израел ќе ја има неговата „целосна поддршка“ да го стори тоа, доколку Хамас не го прифати договорот.

Реакциите беа глобални и брзи. Клучните арапски и муслимански нации, вклучувајќи ги и медијаторите Египет и Катар, ги поздравија „искрените напори“ за договорот по нивните разговори со Трамп минатата недела.

Европските сојузници на Вашингтон веднаш изразија поддршка, а лидерите на Велика Британија, Франција, Германија и Италија споделија силни изрази на поддршка за планот.

И шефот на Европската Унија, Антонио Кошта, ги повика сите страни да „го искористат овој момент за да му дадат вистинска шанса на мирот“.

Генералниот секретар на НАТО, Марк Руте, во вторник (30 септември)повика на понатамошни напори за подобра заштита на воздушниот простор на сојузниците по серијата повреди на воздушниот простор и прелети на беспилотни летала.

„Мора да го чуваме нашето небо безбедно. Во последните неколку недели видовме што се случи со беспилотните летала во Полска, МиГ-31 (борбени авиони) во Естонија, но и што се случува сега во Данска“, рече Руте, зборувајќи заедно со претседателката на Европската комисија, Урсула фон дер Лајен, пред состанокот со комесарите на ЕУ.

Порано во септември, три руски борбени авиони влегоа во естонскиот воздушен простор откако голем број руски беспилотни летала го пробија полскиот воздушен простор. Повторените прелетувања на беспилотни летала во Данска сериозно го нарушија данскиот воздушен сообраќај.

„Во Данска, сè уште проценуваме што стои зад тоа, но кога станува збор за Полска и Естонија, јасно е дека станува збор за Русите. Сепак, проценуваме дали е намерно или не. Но, дури и да не е намерно, тоа е неодговорно и е неприфатливо“, рече Руте.

Видете и ова:

ЕУ планира „ѕид против дронови“ поради страв од руски упади во воздушниот простор

Руте ја поддржа идејата за изградба на таканаречен „ѕид од беспилотни летала“ за подобра заштита на европскиот воздушен простор, нарекувајќи ја „навремена и неопходна“.

„Не можеме да трошиме милиони евра или долари на ракети за да ги уништиме беспилотните летала, кои чинат само неколку илјади долари“, рече Руте.

Иницијативата, промовирана од фон дер Лајен, веројатно ќе биде дискутирана од лидерите на Европската Унија кои треба да се состанат во среда во Копенхаген.

Фон дер Лајен вети „итни мерки за создавање на ѕидот од беспилотни летала“.

„Европа мора да даде силен и обединет одговор на руските упади со беспилотни летала на нашите граници“, рече Фон дер Лајен.

Десетици луѓе се заробени по уривањето на повеќекатната училишна зграда во Индонезија, а спасувачите продолжуваат да бараат преживеани во вторник (30 септември), повеќе од 12 часа по уривањето.

Најмалку еден ученик е потврден како мртов, а околу 80 други се повредени и однесени во болница, според Агенцијата за управување со катастрофи на земјата.

Спасувачките екипи сè уште бараат 38 лица, вклучувајќи студенти и градежни работници. Телевизиската куќа Компас ТВ објави, повикувајќи се на тимовите за пребарување, дека седум од заробените се пронајдени живи до пладне по локално време.

Исламскиот интернат Ал Хозини во градот Сидоарџо во Источна Јава се урна во понеделник попладне додека работниците ставаа бетонски таван, според извештаите на локалните медиуми.

Си-Ен-Ен Индонезија го цитираше домарот на училиштето, велејќи дека потпорната конструкција можеби се распаднала под тежината на свежиот бетон, што ја предизвикало несреќата.

Видете и ова:

Насилни протести и судири во Индонезија по зголемени додатоци на плати на пратеници

Локалниот медиум Килат објави дека зградата била завршена само пред неколку месеци и била во завршна фаза на бетонските работи, но веќе се користела за настава.

Во времето на уривањето, околу 100 ученици биле на вториот кат за попладневна молитва.

Сведоците опишаа како ја гледале зградата како „тресе“ и слушале звуци пред да се сруши за неколку секунди, според извештаите на локалните медиуми.

Стотици лица за управување со катастрофи, пожарникари и волонтери ги пребаруваат урнатините со тешка опрема.

Си-Ен-Ен Индонезија го опиша местото на настанот како „поплава од цемент, греди и скелиња“.

Меѓу повредените има тинејџери со скршени коски, повреди на главата и исекотини, соопшти Си-Ен-Ен Индонезија. Според извештаите, на една жртва ѝ била потребна ампутација на раката.

Голем прекин на интернет го зафати Авганистан на 29 септември, само неколку недели откако владејачките талибански власти почнаа да ги сечат оптичките кабли во повеќе провинции, што доведе до локализирани прекини.

Многу меѓународни и локални медиуми што известуваат од Авганистан беа погодени од масовниот прекин, вклучувајќи ги Радио Азади и Радио Машал на Радио Слободна Европа.

„Авганистан сега е среде целосен интернет-прекин, бидејќи талибанските власти започнаа со имплементација на морални мерки, при што повеќе мрежи беа исклучени во текот на утрото,“ соопшти набљудувачот за интернет-управување „Netblocks“.

Раководството на Талибанците јавно не се изјасни за националното исклучување и не е јасно колку долго ќе трае.

Сепак, на 26 септември, Хаџи Захид, локален портпарол на Талибанците во северната провинција Балх, на платформата „X“ напиша дека забраната била наредена од нивниот лидер, Хибатулла Ахунџада, „за да се спречат неморални активности.“

Талибанците се повикуваат на исламскиот шеријатски закон за оправдување на своите екстремистички политики. Но, исламските научници велат дека нема верски основи за одлуката на групата да го исклучи интернетот.

Видете и ова:

Авганистан без музика, инструменти во пламен

Оваа блокада на интернетот е дел од поширока репресија врз индивидуалните слободи и слободниот проток на информации во Авганистан.

Од кога ја презедоа власта во 2021 година, Талибанците сериозно ги ограничија правата на Авганистанците, особено на жените, и насилно се пресметаа со сите облици на отпор.

Во разговор за Радио Машал на Радио Слободна Европа на 24 септември, портпаролката на американскиот Стејт департмент, Елизабет Стикни, изјави дека американската администрација внимателно ја следи ситуацијата.

„Овие извештаи се многу загрижувачки и ние не гледаме дека овие ограничувања им помагаат на луѓето во Авганистан. Напротив, тие ќе имаат негативно влијание врз животите на луѓето и врз економијата,“ рече таа.

Соединетите Држави и поголемиот дел од западните земји одбиваат да ги признаат Талибанците како легитимна влада на Авганистан, откако тие повторно ја презедоа контролата во 2021 година, по брзото повлекување на меѓународните трупи од земјата.

Американскиот претседател Доналд Трамп и израелскиот премиер Бенјамин Нетанјаху изјавија дека се согласиле за план за завршување на војната во Газа, но останува неизвесно дали Хамас, вооружена група означена од САД и ЕУ како терористичка, ќе ги прифати предложените услови.

На заедничка прес-конференција во Белата куќа на 29 септември, Трамп презентираше мировен план од 21 точка кој повикува на итно прекинување на огнот, ослободување на сите заложници во рок од 72 часа и формирање привремена администрација во Појасот Газа, јави АП.

Привремената администрација би ја предводел Трамп, заедно со поранешниот британски премиер Тони Блер, а би ја надгледувала меѓународна мисија поддржана од Обединетите Нации (ОН) и земјите од Заливот.

Планот не предвидува раселување на палестинското население, но повикува на разоружување на Хамас и крај на неговото владеење во Газа.

„Мислам дека веќе ја преминавме линијата „многу блиску. Сè уште не сме завршиле - мора да го добиеме Хамас“, рече Трамп.

Нетанјаху предупреди дека Израел ќе ја заврши работата ако Хамас го отфрли планот.

Трамп рече дека Израел ќе има „целосна поддршка“ од Соединетите Американски Држави ако Хамас го отфрли планот и потоа ќе биде слободен да продолжи со операциите против групата. Во исто време, Белата куќа изрази надеж дека брзо ќе се постигне договор.

„За да се постигне договор, двете страни може да бидат малку незадоволни. Но, така се постигнува мир“, рече портпаролката на Белата куќа, Каролин Ливит.

Видете и ова:

На средба со Нетанјаху, Трамп ќе се обиде да го протурка договорот за Газa

Трамп претходно изјави дека по разговорите со арапските лидери минатата недела практично е постигнат договор за прекин на речиси двегодишната војна во Газа, ослободување на заложниците што ги држи Хамас и разоружување на Хамас.

Војната во Појасот Газа беше предизвикана од нападот на Хамас на 7 октомври 2023 година, кога, според израелските бројки, беа убиени околу 1.200 луѓе, додека 251 лице беше земено како заложник.

Во последователните израелски офанзиви во Појасот Газа, според здравствените власти на територијата контролирана од Хамас, беа убиени повеќе од 65.549 Палестинци.

Ветија реформи, но не почнаа ниту една. Победија со лажен патриотизам и празни програми од кои ништо не остана, рече Венко Филипче, претседател на опозициската СДСМ од митинзите во Демир Хисар и во Крушево, од каде СДСМ ја почна изборната кампања за локалните избори на 19 октомври.

Кампањата почна денеска, 29 септември и ќе трае 20 дена.

Филипче ја критикуваше работата на ВМРО-ДПМНЕ, која според него, не направила суштински промени во интерес на граѓаните.

„Сите гледаме, после една и пол година централна власт и повеќе од четири нивна локална власт, дека се неспособни да донесат промени и да работат за и во интерес на граѓаните. Се грижат само за себе, за својата удобност и исклучиво за своите членови. Дали ова е гордата Македонија што ни ја ветија?, рече Филипче.

Тој наброја нефункционалност на институциите, ниски плати, раст на цените и застој во економијата и правосудните реформи.

-Нема реконструирани локални патишта, нема систем за отпад, депонијата во Стругово секојдневно ги труе граѓаните. Тутунарите се соочуваат со ниски откупни цени, младите ја напуштаат општината, здравството е во колапс, а културното наследство како Спомен-паркот на Даме Груев во Смилево е оставено да пропаѓа“, рече Филипче во Демир Хисар.

Видете и ова:

Црната кампања нема да ги заобиколи и овие локални избори

Филипче рече дека во Крушево, за осум години се реализирани 68 капитални и локални проекти од страна на локалната власт и градоначалникот од СДСМ, Томе Христовски, кој и на овие избори е кандидат за уште еден мандат.

Локални избори ќе се одржат во сите 80 општини во државата и во Град Скопје. Вкупно ќе има 3.480 избирачки места.

На изборите за сите градоначалнички места вкупно има 303 кандидати за градоначалници, а ќе се бираат и нови советници.

Во првиот круг треба да бидат избрани новите состави на општинските совети, додека за градоначалник ќе се смета дека е избран оној кој освоил 50 отсто плус еден глас под услов на гласање да излегле барем една третина од гласачите запишани во Избирачкиот список во конкретната општина. Според правилата, ако ниту еден од кандидатите не го исполни потребниот услов, се одржува и втор круг во кој граѓаните бираат меѓу двајца кандидати кои освоиле најголем број гласови.

Претстојните ќе бидат осми по ред локални избори од осамостојувањето на државата во 1991 година.

Овие избори не се само обични локални избори, туку тие ќе бидат одлука за тоа каква Македонија сакаме да имаме, каква држава сакаме да градиме и какви пораки ќе им се испратат на оние кои уриваат, наместо да градат, рече лидерот на ВМРО-ДПМНЕ и премиер, Христијан Мицкоски, од централниот митинг во Скопје, на првиот ден од кампањата за локалните избори што ќе се одржат на 19 октомври.

Во обраќањето пред присутните тој рече дека на овие избори има две тајни коалиции: првата на ДУИ и Левица, втората на СДСМ „со еден кандидат за градоначалник на скопска општина кој е на црната листа“.

Мицкоски се осврна и на резолуцијата за „црвени линии“ што ја предложи лидерот на СДСМ, Венко Филипче. За Мицкоски, оваа резолуција е „некое ново додворување на СДС кон Бугарите, на штета на Македонија“.

На предизборниот митинг тој говореше и за судството и обвинителството. Мицкоски рече дека не е задоволен од правосудниот систем, кој, според него, „е главното упориште на неправдите во државата.“

Видете и ова:

Црната кампања нема да ги заобиколи и овие локални избори

Орце Ѓорѓиевски, кандидатот на ВМРО-ДПМНЕ за градоначалник на Скопје, ја презентираше изборната програма. Тој најави 20 годишен стратешки документ изготвен од меѓународни и домашни експерти, наречен „Скопје 2025-2045“

„Тој во себе ги интегрира просторното планирање, мобилноста, зелената инфраструктура, енергетската ефикасност, заштитата на културното наследство согласно европските стандарди за квалитет на живеење. Ќе ја вратиме функцијата градски архитект и ќе се формира ново јавно претпријатие „Урбан центар Скопје“ за да се врати планирањето во раце на стручни лица и на граѓаните, а не на приватните интереси“, рече Ѓорѓиевски.

Тој најави генералка на Скопје во првите 72 часа, целосна комунална и сообраќајна обнова, катни гаражи во Буњаковец и Пролет и монтажни паркинзи во сите критични населби, обнова на Универзалната сала и киното „Милениум“, паметна картичка „SKOPJE CITY GO“ и „Градски портал“, ефикасен и достоинствен јавен превоз со нови, еколошки автобуси и градски воз кој ќе ги поврзе Драчево, Центар и Ѓорче Петров.

ВМРО-ДПМНЕ ја почна кампањата во спортската сала „Јане Сандански“ во Скопје, а ќе ја заврши во Охрид.

Кампањата ќе трае 20 дена.

Скопјани на локалните избори ќе имаат можност да избираат градоначалник на Град Скопје меѓу 16 кандидати. За 45 советнички места на изборниот натпревар има 19 листи со 855 кандидати.

Првиот круг на локалните избори ќе се одржи на 19 октомври, а вториот на 2 ноември.