Вести
Обвинителството истражува двајца кандидати од Академијата за судии и јавни обвинители
Досиеја за еден поранешен и еден актуелен кандидат на Академијата за судии и јавни обвинители „Павел Шатев“ се меѓу одземените работи за време на вчерашниот претрес во оваа институција, соопшти Обвинителството за гонење организиран криминал и корупција (ОЈО ГОКК).
Предметот бил отворен „благодарение“ на податоците што обвинителството ги добило од телефонот на осомничениот врховниот судија Наќе Георгиев против кого веќе се води случај за кривичното дело „примање награда за против законито влијание“.
Анализата на телефонот, како што велат, довела до „сознанија што упатуваат на можно сторување на друго кривично дело“.
„Како резултат на тоа, предметниот обвинител со цел да ги испита ваквите индиции оформи предмет со кој достави барање до судијата на претходна постапка при Основен кривичен суд Скопје за одземање на два мобилни телефони од лице вработено во Академијата за судии и јавни обвинители, како и видеозапис и две досиеја за еден поранешен и еден актуелен кандидат на Академијата“, велат од Обвинителството.
Во соопштението од ОЈО ГОКК нема детали дали од која генерација е поранешниот кандидат на Академијата, ниту дали веќе е избран судија или обвинител, како и за тоа дали актуелниот кандидат е од групата на идни судии или идни обвинители.
Претресот вчера (25 јули) беше извршен со асистенција на крим-полицијата.
„За сите дополнителни активности и детали кои нема да влијаат на постапката обвинителството ќе ја информира јавноста навремено“, додаваат од ОЈО ГОКК.
Во моментов на Академијата се школува осмата генерација.
Роднинските врски во седмата генерација
Седмата, пак, ја заврши обуката во февруари 2023 и беше една од генерациите за кои се крена најголема врева во јавноста. Таа беше во фокусот на јавноста поради тоа што во неа имаше членови на семејствата на познати политичари, судии, обвинители … Во оваа генерација беше и Кирил Георгиев, син на осомничениот судија Наќе Георгиев.
Двајцата беа во фокусот на јавноста кога Судскиот совет требаше да го избере синот за судија во јули лани. Во истиот период, таткото беше избран за член на Судскиот совет, па непосредно пред да даде заклетва се повлече од местото.
Во оваа генерација, како што се пишуваше лани, се најде и Илир Јакупи кој ја заврши академијата за да биде судија, поради блиски роднински врски со Иџет Мемети. Мемети е поранешен народен правобранител, а во моментов е член на Советот на јавни обвинители и е осомничен дека му помагал на судијата Георгиев во случајот за кој се води истрага.
Седмата генерација кандидати го привлече вниманието првично поради името на Барлет Џафери, син на тогашниот претседател на Собранието, а сега актуелен пратеник од ДУИ Талат Џафери. За него, Државната комисија за спречување корупција откри и дека сè уште недипломиран се здобил со право да полага правосуден испит во 2015 година. Меѓутоа, Барлет Џафери успешно ја заврши Академијата и сега е обвинител во Гостивар.
Од оваа генерација обвинителка стана и Албулена Абази, сопруга на шефот на ОЈО ГОКК, Ислам Абази. Од групата на судии, пак, во седмата генерација се најдоа: Симона Муцунски-Бубевска, сопругата на акутлениот министер за надворешни работи и надворешна трговија Тимчо Муцунски, потоа Билјана Иванова, снаа на доскорешната генерална секретарка на Собранието Цетанка Иванова, Драган Јосифовски, синот на обвинителката Елизабета Јосифовска и уште неколку други.
Деветата генерација - тема на политички препукувања
Академијата за судии и јавни обвинители беше тема на политички препирки и за деветтата генерација за која сè уште е во фаза процесот на прием на кандидати.
За сите дополнителни активности и детали кои нема да влијаат на постапката обвинителството ќе ја информира јавноста навремено. За деветтата генерација огласот беше распишан уште на 31 јануари 2023, меѓутоа досега не успеааја да се изберат кандидати. Една од пречките беше електронското полагање тестови, за што немаше софтвер. Поранешната влада на СДСМ и ДУИ предлагаше да се полага писмено додека да се набави софтвер, а ВМРО-ДПМНЕ обвинуваше дека на таков начин овие партии сакаат да протнат свои кадри.
Случајот се најде и пред Државната комисија за спречување корупција (ДКСК) и пред Управниот суд затоа што ВМРО-ДПМНЕ сметаше дека Академијата не смее да продолжи со спроведување на процесот на прием во изборниот период кога требаше да се одржат претседателските и парламентарните избори во април и мај годинава.
Раководството на Академијата и директорката Наташа Габер Дамјановка, пак, беа на став дека ова не значи вработување, туку само прием на кандидати за едукација, односно за слушање почетна обука. На почетокот на месецов, Габер-Дамјановска, си поднесе неотповиклива оставка од директрската позиција.
види ги сите денешни вести
ДИК: Одзивот е 45,71 отсто на ниво на цела држава
Точно во 19:00 часот, согласно Изборниот закон, навреме се затворени сите избирачки места каде што имаше гласање во вториот круг на локалните избори 2025 година - информираше претседателот на ДИК, Борис Кондарко на прес конференција.
Тој рече дека до Комисијата пристигнале податоци за излезност од 1340 избирачки места. Обработени се 97,60 отсто од податоците, кои покажуваат дека одзивот на гласачите бил 45,71 процент на ниво на цела држава.
„Вкупниот број гласачи кои гласале во овие избирачки места е 325.691“, рече Кондарко.
За Град Скопје одзивот до 18:30 часот изнесува 33,82 проценти.
„Од 19 часот избирачките одбори пристапуваат кон отворање на гласачките кутии и броење на гласачките ливчиња. Конечната излезеност ќе се знае по 23:00 часот кога ќе биде одржана последната прес-конфернеција за соопштување на целосните првични неофицијални резултати, добиени по електронски пат од секое избирачко место“, информира Кондарко.
Тој додаде дека Државната изборна комисија со неколку свои тимови овластени лица ќе го набљудува непосредно броењето на резултатите и составувањето на записниците во повеќе избирачки места во различни општини.
Обвинителство: Изборниот ден помина без поголеми нарушувања
По затворањето на избирачките места во вториот круг од локалните избори во Северна Македонија, Јавното обвинителство излезе со оценка дека изборниот дел поминал „без поголеми нарушувања на изборниот процес“.
„До јавното обвинителство во текот на денешниот ден е доставено само едно известување на подрачјето на Шуто Оризари за фотографирање на гласачко ливче. Итно се дадени насоки за документирање на настанот кој претставува прекршок“, соопштија од Јавното обвинителство.
И покрај мирниот изборен ден, оттаму додаваат дека Комисијата која е формирана за следење на евентуални кривични дека поврзана со изборите, ќе остане активна до целосно завршување на изборниот процес.
Во вториот круг од локалните избори, се бираат градоначалници на 33 општини, вклучително и во Градот Скопје.
Единствено во Шуто Оризари на три избирачки места имаше прегласување и за членовите на советот поради утврдени недоследности од страна на Државната изборна комисија во првиот круг.
Во првиот круг на 19 октомври беа избрани градоначалници во 44 општини. Од нив, најмногу освои владејачката ВМРО-ДПМНЕ – 33. Владиниот коалициски партнер ВРЕДИ тогаш освои пет градоначалнички места, а по три освоија опозициските СДСМ и коалицијата НАИ, којашто е предводена од ДУИ.
НАИ посочи на нерегуларности, ВРЕДИ очекува победа
Националната алијанса за интеграција (НАИ), коалицијата предводена од Демократската унија за интеграција (ДУИ) посочи за нерегуларности за време на изборите додека од коалицијата ВРЕДИ оценија дека гласањето се одвивало без „некои неправилности и во духот на граѓанската одговорост“, на првите прес-конференции по затворањето на гласачките места на вториот круг од локалните избори.
„Успешно се соочивме со нечесна и незаконска кампања кои го оцрнија процесот и ја нарушуваат еднаквоста на изборниот процес. Сведоци сме на масовно купување гласови, изборен асфалт, ноќно бетонирање, злоупотреба на јавните ресурси и брутална вмешаност на државниот апарат во корист на власта. Сепак и покрај сите тие злоупотреби граѓаните не дозволија овие темни методи да го искриват резултат во првиот круг. Затоа сме убедени дека нема да успеат да го искриват ниту сега, во вториот круг“ рече Арбер Адеми, портпарол на НАИ.
Во ВРЕДИ очекуваат од Државната изборна комисија(ДИК) фазата на затворање и броење на гласовите да се спроведе како и во првиот круг, „со целосна транспарентност, точност и професионализам во согласност со законот и со волјата на граѓаните“.
„Според нашите информации од теренот, кандидатите на коалицијата ВРЕДИ добија широка поддршка во сите општини каде што настапуваат и очекуваме резултати кои ќе ја потврдат таа доверба“, рече Дритон Сулејмани, портпарол на ВРЕДИ.
Со затворање на избирачките места во 19 часот заврши гласањето во вториот круг од локалните избори за градоначалници, по партиите излегуваат со првични реакции, а се очекува и да почне објавувањето на првичните резултати.
Во вториот круг од локалните избори се гласа за градоначалници во 33 општини, вклучително и во Градот Скопје.
Општини кои треба да добијат градоначалници се: Аеродром, Боговиње, Брвеница, Валандово, Виница, Дебар, Дебарца, Демир Капија, Карпош, Кичево, Конче, Кочани, Крушево, Куманово, Лозово, Македонска Каменица, Македонски Брод, Могила, Неготино, Пробиштип, Ранковце, Росоман, Струга, Студеничани, Тетово, Центар, Чешиново Облешево, Чучер Сандево, Шуто Оризари, Долнени, Дојран и Зрновци.
Заврши гласањето, се очекуваат првичните резултати
Со затворање на избирачките места во 19 часот заврши гласањето во вториот круг од локалните избори за градоначалници, по што се очекува партиите да излезат со првични реакции, како и да почне објавувањето на првичните резултати.
Во вториот круг од локалните избори се гласа за градоначалници во 33 општини, вклучително и во Градот Скопје.
Останатите 32 општини кои треба да добијат градоначалници се: Аеродром, Боговиње, Брвеница, Валандово, Виница, Дебар, Дебарца, Демир Капија, Карпош, Кичево, Конче, Кочани, Крушево, Куманово, Лозово, Македонска Каменица, Македонски Брод, Могила, Неготино, Пробиштип, Ранковце, Росоман, Струга, Студеничани, Тетово, Центар, Чешиново Облешево, Чучер Сандево, Шуто Оризари, Долнени, Дојран и Зрновци.
Од нив, во најмногу меѓусебни соочувања имаа ВМРО-ДПМНЕ и СДСМ – во 16 општини. Кандидати на коалициите во албанскиот блок, НАИ и ВРЕДИ се соочија во три општини. Во останатите, овие партии и коалиции ќе се борат за градоначалничко место со некоја од партии или независни кандидати.
Во првиот круг на 19 октомври беа избрани градоначалници во 44 општини. Од нив, најмногу освои владејачката ВМРО-ДПМНЕ – 33. Владиниот коалициски партнер ВРЕДИ тогаш освои пет градоначалнички места, а по три освоија опозициските СДСМ и коалицијата НАИ, којашто е предводена од ДУИ.
Во првиот круг се избраа и новите совет на општините. Единствено во Шуто Оризари на три избирачки места во Шуто Оризари имаше прегласување и за членовите на советот поради утврдени недоследности од страна на Државната изборна комисија во првиот круг.
Во четири општини – Гостивар, Маврово-Ростуше, Врапчиште и Центар Жупа изборите за градоначалник пропаднаа и ќе се распишат нови бидејќи не беше постигнат цензусот за одзив од најмалку една третина од запишаните гласачи во Избирачкиот список.
ДИК: До 17 часот гласале 39,28 проценти
До 17 часот излезеноста во Скопје е 28,52 проценти, а во сите општини низ државава каде што се гласа во вториот круг од локалните избори процентот на избирачи што излегле на гласање е 39,28, соопшти на прес-конференција Радица Тодоровска Алексовска, портпаролка на ДИК.
Најголем одзив на гласање има во Конче (64,44), а најмал во Сарај 8,77 проценти.
Во Скопје до 17 часот излегле 28,52 проценти односно 134.586 избирачи врз основа на 99,56 проценти од пристигнaти податоци до ДИК за вкупно 682 избирачки места.
Спорeдено со првиот круг, излезеноста во главниот град до 17 часот е помала, затоа што пред две недели излегле 39,62 проценти.
На ниво на држава, до 17 часот излезеноста е 39,28 проценти односно вклупно гласале 279.241 гласач од 96,94 проценти на податоци од избирачки места што пристигнале до ДИК.
Според податоците на ДИК, до 17 часот најголем одѕив за гласање има во Конче (64,44), како и во Дојран (62,96), Демир Капија (62,71), Крушево (61,89) и Росоман (63,58), а најслаб е одѕивот во Сарај (8,77), Шуто Оризари (25,82) и Куманово (27,72).
Тодоровска Алексовска соопшти дека до оваа прес-конференција до ДИК нема пријави за поголеми неправилности и нема пристигнато информација од некое избирачко место дека гласањето ќе продолжи по 19 часот.
До 15 часот одзивот е 30,26 проценти – соопшти ДИК
До 15 часот излезеноста за локалните избори во земјава е 30,26 проценти, а за Скопје 29,94 отсто - соопшти Државната изборна комисија (ДИК).
Портпаролката на ДИК, Радица Тодоровска Алексовска информираше дека на ниво на државата гласале 208.571 лице или 93,59 проценти на избирачки места од кои што се пристигнати податоци.
За Скопје гласале 104.182 лица, а податоци се пристигнати од 656 избирачки места или 95,77 отсто.
Најголема излезеност се забележува во Општината Карпош со 32,40 проценти и Општина Центар со 31,65 проценти. Најмала излезеност за Градот Скопје се забележува во Општина Сарај шест проценти и Општина Чаир 8,83 проценти - рече Тодоровска Алексовска.
Во првиот круг до 15 часот излезеноста била 31,16 проценти за Градот Скопје.
Тодоровска Алексовска информира дека гласањето до овој момент се одвива непречено и во најдобар ред. Потенцира дека сите приговори кои биле доставени до ДИК за лично избирачко право се решаваат и сите граѓани непречено си го остваруваат своето право на глас. Нагласи и дека засега до ДИК нема пријавено инциденти.
ДИК им ги одзеде акредитациите на осум набљудувачи поради агитирање пред гласачко место
Државната изборна комисија денеска (2 ноември) во рамки на 151. седница расправаше по два приговори за остварување на право на глас. Во двата случаи утврдено е дека лицата се запишани во Избирачкиот список и до 19 часот можат да го остварат своето право. При тоа, ДИК донесе одлука за одземање на акредитациите на осуммина домашни набљудувачи поради постапување спротивно на Изборниот законик и на Кодексот за набљудување.
Едниот приговор беше поднесен од лицето, Трајче Камчев од општина Центар и како што беше посочено на седницата по проверката на стручната служба утврдено е дека лицето е запишано во Избирачкиот список на избирачкото место 1354 во Општината, поради што приговорот е одбиен.
„Ова лице е запишано во Избирачкиот список на избирачко место 1354 во општина Центар и слободно може да го оствари своето право да гласа“, изјави претседателот на ДИК, Борис Кондарко.
Членовите на ДИК расправаа и по приговор, стигнат по електронска пошта од лицето Ќемал Исмаилоски од Кичево, кој приговара дека не бил пронајден во уредот за биометриска идентификација. Приговор, освен до ДИК е испратен и до Народниот правобранител и до државното Обвинителство. Кондарко посочи дека по проверката на стручната служба и на ИТ секторот е утврдено дека лицето е запишано во Избирачкиот список и во уредот за биометриска идентификација.
Членот на ДИК, Александар Даштевски побара воопшто да не се произнесат по овој приговор, бидејќи тој е доставен од електронска адреса, која не е од овластено лице и можеби не е лично од приговарачот, а исто така е доставен и до Омбудсманот и до Обвинителство.
Поради тоа, според него, воопшто не треба да се одлучува во ДИК, а Обвинителство да утврди дали приговорот е од тоа лице или се злоупотребени лични податоци.
Тој исто така посочи дека досега во ниту едно избирачко место не е забележано оневозможување на остварувањето на правото на гласање.
ДИК донесе одлука и за одземање на акредитациите за набљудување на осум лица. Станува збор за домашни набљудувачи во Општина Шуто Оризари, за кои во текот на денот ДИК добила пријава за злоупотреба на беџовите за домашни набљудувачи, односно агитирање во училиште пред гласачки места.
„На овие лица ДИК им издала акредатации за набљудување, согласно доставените податоци до нас и констатиравме дека овие лица го пречекориле Кодексот за набљудување за лица кои треба непристрасно да се однесуваат на гласачките места и вршеле агитирање на гласачките места“, изјави Кондарко.
Тој посочи дека Државната изборна комисија го известија МВР за овој настан, бидејќи тие агитирале надвор од гласачкото место, каде ДИК не е надлежна.
Кондарко додаде и дека по одземањето, ќе ја известат Општинската изборна комисија во Шуто Оризари и избирачките одбори да не им дозволуваат влез на овие лица во избирачките места и во објектите на гласање, односно дека не смеат да се повикуваат на акредитациите и беџовите, кои претходно им се дадени од ДИК.
Вучиќ: Парламентарните избори во Србија ќе бидат пред предвидениот рок
Претседателот на Србија, Александар Вучиќ, на 2 ноември изјави дека ќе се сретне со студентите во блокада, за да се одржат парламентарните избори пред предвиденото, пренесува агенцијата Бета.
Вучиќ рече дека за ова ќе одлучат „надлежните институции“.
Распишување предвремени избори е едно од барањата на масовните антивладини протести во Србија што започнаа поради несреќата на железничката станица во Нови Сад на 1 ноември 2024 година, кога загинаа 16 лица.
Вучиќ, исто така, изјави дека студентите во блокада реагирале негативно на неговото извинување, за острите зборови што ги изговорил за нив, бидејќи како што рече, „тоа е младината, во револуционерна екстаза истрчуваат пред да размислат“.
„Моето извинување беше искрено, не за да му се додворувам на некого, не затоа што, како што мислат некои, се плашев, туку со желба да ја променам атмосферата во општеството“, рече Вучиќ, за време на обиколката на градилиштето на Националниот стадион како дел од проектот EXPO.
Тој рече дека порано реагирал емоционално на „ирационални навреди“, но дека, за разлика од неговите противници, може да го признае тоа.
На 31 октомври, Вучиќ им се извини на „студентите, демонстрантите и другите луѓе“ за некои изјави и повика на дијалог.
„Мојата рака е подадена на оние кои размислуваат поинаку“, рече Вучиќ, додавајќи дека е среќен што одбележувањето на една година од несреќата на железничката станица во Нови Сад на 1 ноември било „мирно и достоинствено“.
На комеморативниот собир во Нови Сад на 1 ноември, десетици илјади луѓе им оддадоа почит на жртвите од падот на настрепницата на железничката станица во Нови Сад.
Денови пред состанокот во Нови Сад, неколку колони студенти од различни делови на Србија тргнаа кон овој град.
Поглаварот на Српската православна црква (СПЦ), патријархот Порфирије, отслужи комеморација за жртвите во Белград, на која присуствуваше државниот врв.
Една година по смртта на 16 лица и тешката повреда на едно лице, никој не е прогласен за виновен.
ДИК: Одзивот до 13 часот е 19, 96 отсто
До 13 часот излезеноста за локалните избори во земјава е 19,96 проценти, а за Скопје 15,28 отсто, соопшти Државната изборна комисија (ДИК) на попладневната прес-конференција.
Од скопските општини најголема е излезноста во Карпош-22, 14 процент, по што следуваат Центар 21, 74 отсто, Кисела Вода-19, 57, Аеродром-19, 21 % итн.
„Досега не се пристигнати пријави за какви било неправилности и нерегуларности, а за претставки за нарушување на изборниот молк има само информации по кои постапуваат надлежните институции“, истакна Радица Тодоровска - Алексовска, портпарол на ДИК.
Во првиот круг од локалните избори за градоначалници до 13 часот излезноста била 20,12 отсто, а за Скопје 20,07 проценти.
МВР: Гласањето се одвива во мирна и демократска атмосфера
Локалните избори 2025 се одвиваат во мирна, фер и демократска атмосфера на територија на целата држава, информираат од МВР.
Oттаму додаваат дека МВР презема мерки и активности во рамки на своите надлежности со цел непречено и безбедно спроведување на целиот изборниот процес.
„До сега не се регистрирани посериозни нарушувања на јавниот ред и мир. Регистрирани се неколку пријави за агитирање при гласање на повеќе места, но по преземени мерки до овој момент не се потврдени наводите од пријавите“, изјави портпаролот на МВР Гоце Андреевски.
МВР, како што истакна, апелира до сите граѓани и до политичките партии да придонесат за мирна, фер и демократска атмосфера и доколку има било какво нарушување на изборниот процес, граѓаните да пријават во најблиската полициска станица или на телефонските броеви 192 или 112.
Мултимедија
Најпосетени
Што треба да знаете