Израел ги отфрли обвинувањата од Јужна Африка дека неговата кампања против Хамас е геноцид врз палестинскиот народ, а неговите правни претставници велат дека „ако ништо друго, Хамас е виновен за геноцид“.

Израелскиот адвокат Тал Бекер побара случајот да биде отфрлен, нарекувајќи го „клевета“ во неговата воведна изјава пред Меѓународниот суд на правдата во Хаг во петокот, 12 јануари.

Бекер пред судот изјави дека Хамас го започнал насилството со својот ненадеен напад врз Израел на 7 октомври во кој загинаа повеќе од 1 200 луѓе, покажувајќи слики од убиените.

Бекер го обвини Хамас дека ги крие своите борци и воени средства низ Газа во густонаселени цивилни области и дека користи џамии, домови, објекти на Обединетите нации и болници.

Тој, исто така, на судот покажа видео од функционерот на Хамас, Гази Хамад, кој вети дека ќе продолжи со нападите и ќе го уништи Израел.

Бекер го отфрли бројот од над 23 000 загинати Палестинци како „непроверена статистика објавена од самиот Хамас“.

„Ако постои закана за палестинските цивили во Газа, тоа првенствено произлегува од фактот дека тие живееле под контрола на геноцидна терористичка организација која целосно ги занемарува нивните животи и благосостојба“, рече Бекер, кој е правен советник на израелското Министерство за надворешни работи.

Друг израелски правен застапник, Малколм Шо, ги отфрли обвинувањата на Јужна Африка дека израелските власти покажале „геноцидна намера“, нарекувајќи ги изјавите наведени од правниот тим на Јужна Африка „случајни цитати кои не се во согласност со владината политика“.

Тој ги отфрли како „емотивни објави за војна без правно значење“.

Шо рече дека воениот кабинет и војската на Израел „дејствувале во согласност со меѓународното право“ и „се обиделе да избегнат хуманитарна катастрофа во Газа“, повикувајќи се на изјави на највисоките израелски официјални лица.

Јужна Африка го обвини Израел за геноцидни дејствија врз Палестинците во четвртокот, 11 јануари, на почетокот на постапката пред Меѓународниот суд на правдата во Хаг, највисокиот суд на ОН, покрената против разорната воена кампања на Израел во Газа.

Јужна Африка бара итно запирање на израелската воздушна и копнена офанзива во палестинската енклава, чија цел е „уништување на населението“ од Газа.

„Израел има геноцидни намери врз Палестинците во Газа“, изјави пред судот Тембека Нгкукаитоби, претставник на Високиот суд на Јужноафриканската Република.

„Ова е очигледно од начинот на кој се изведуваат овие воени напади. Намерата да се уништи Газа беше иницирана на највисоко државно ниво“, истакна Нгкукаитоби.

На судското рочиште кое е во тек, Јужна Африка бара од судот итно да дејствува „за да го заштити палестинскиот народ од понатамошна, сериозна и непоправлива штета според Конвенцијата за геноцид, која продолжува неказнето да се прекршува“.

„Подавајќи ги рацете кон народот на Палестина, ние го правиме тоа со целосна свест дека сме дел од човештвото. Ова беа зборовите на нашиот основачки претседател Нелсон Мандела, ова е духот во кој Јужноафриканската Република пристапи кон Конвенцијата за спречување и казнување на злосторството геноцид во 1998 година“, рече во воведниот говор на министерот за правда на Јужноафриканската Република, Роналд Ламола.

Насилството и уништувањето во Палестина и Израел не започнаа на 7 октомври 2023 година, потсети Ламола.

„Палестинците доживуваат систематско угнетување и насилство во изминатите 76 години, на 6 октомври 2023 година и секој ден од 7 октомври 2023 година“, рече тој.

Адила Хасим, која го застапува случајот на Јужноафриканската Република, рече дека ова е „случај што ја истакнува самата суштина на нашата заедничка хуманост како што е изразена во преамбулата на Конвенцијата за геноцид“.

„Јужноафриканска Република тврди дека Израел го прекршил членот 2 од Конвенцијата со извршување на дела кои потпаѓаат под дефиницијата за геноцид. Дејствата покажуваат систематски модели на однесување од кои може да се заклучи геноцид“, додаде таа.

Израел: Преторија како „правна рака“ на Хамас

Портпаролот на израелското Министерство за надворешни работи Лиор Хајат рече дека Јужна Африка „делува како правна рака на Хамас“.

Хајат ја обвини Преторија дека „го игнорирала фактот дека терористите на Хамас влегле во Израел, убиле, колеле, силувале и киднапирале израелски граѓани, само затоа што се Израелци, во обид да извршат геноцид“, пишуваат израелските медиуми.

Тој на платформата Х објави дека Јужна Африка „се стреми да му дозволи на Хамас да се врати за да ги изврши воените злосторства, злосторствата против човештвото и сексуалните злосторства што ги изврши на 7 октомври“.

Покрај тоа, тој ги означи јужноафриканските адвокати како „претставници на Хамас на суд“.

„Јужна Африка, која делува како правна рака на терористичката организација Хамас, целосно ја искривува реалноста за Газа по масакрот на 7 октомври“, се додава во соопштението на израелското министерство и се најавува дека „државата Израел ќе продолжи да ги брани нејзините граѓани во согласност со меѓународното право“.

Портпаролот на израелската влада Ајлон Леви ја спореди тужбата со вековната антисемитска теорија на заговор која лажно ги обвинува Евреите за ритуално убивање бебиња.

„Државата Израел ќе се појави пред Меѓународниот суд на правдата за да ја отфрли апсурдната крвна клевета на Јужна Африка, бидејќи Преторија му дава политичко и правно покритие на режимот на силувачи на Хамас“, рече Леви.

„Сакам да објаснам неколку работи: Израел нема намера трајно да ја окупира Газа или да го раселува цивилното население“, напиша израелскиот премиер Бенјамин Нетанјаху на социјалната мрежа Х.

Тој додаде дека Израел води војна против палестинските милитанти, а не против палестинскиот народ и „тоа го прави во целосна согласност со меѓународното право“.

Критика од еврејската заедница во Јужна Африка

Еврејската заедница во Јужна Африка ги обвини властите во земјата за двојни стандарди.

„Двојниот разговор и двојните стандарди на Јужна Африка се евидентни и со нејзината цврста решеност да остане неутрална и да ’разговара со двете‘ страни во руско-украинската војна“, се вели во соопштението, додавајќи дека оваа држава постојано презема казнени мерки против Израел.

„Вклучувајќи го и одбивањето да му се изрази сочувство на Израел по масакрот на 7-ми октомври, затворањето на амбасадата (во Израел), издавањето демарш до израелскиот амбасадор и сега покренувањето постапка против Израел пред Меѓународниот суд на правдата“, соопшти Еврејската заедница.

Оттаму додаваат дека жалат за сите цивилни жртви и дека ги поддржува сите иницијативи кои би довеле до мир.

„Хамас ја започна оваа војна. Хамас може да ја заврши. Јужноафриканската Република може да игра улога во олеснувањето на тој процес“, оценува Еврејската заедница.

Израел ја започна сеопфатната војна по прекуграничното дивеење на милитантите на Хамас на 7 октомври, во кое израелските власти соопштија дека 1 200 луѓе биле убиени, а 240 биле земени како заложници во Газа.

Министерот за правда на Јужноафриканската Република, Роналд Ламола, рече дека Јужна Африка го осудува нападот на Хамас на 7 октомври, но додаде дека секој напад, дури и оној кој вклучува грозоморни злосторства, не е оправдување за кршење на Конвенцијата за геноцид.

По апартхејдот, Јужна Африка долго време ја бранеше борбата на палестинскиот народ за своите права. Тој однос беше воспоставен кога борбата на Африканскиот национален конгрес против владеењето на белото малцинство беше поддржана од Организацијата за ослободување на Палестина на Јасер Арафат.

Хамас: Хашкиот суд да се спротивстави на израелскиот притисок

Официјалниот претставник на Хамас, Сами Абу Зухри, изјави за Ројтерс дека групата со голем интерес ја следи постапката во Меѓународниот суд на правдата.

„Правдата ќе биде ставена на тест денеска. Го повикуваме судот да отфрли секаков притисок и да донесе одлука за криминализирање на израелската окупација и запирање на агресијата врз Газа“, рече Зухри.

Организацијата за ослободување на Палестина, која го контролира Западниот Брег, истакнува дека процесот во Хаг е „историски настан во процесот на заедничката палестинска и јужноафриканска борба против неправдата и геноцидот“.

Поделени меѓународни реакции

И меѓународната заедница е поларизирана околу овој случај. Неколку западни земји му се придружија на Вашингтон во оценката дека обвинувањата за геноцид против Израел се неоправдани, не само поради немилосрдните напади на Хамас кои ја забрзаа војната.

„Всушност, оние кои насилно го напаѓаат Израел продолжуваат отворено да повикуваат на уништување на Израел и масовно убивање на Евреите“, изјави портпаролот на Стејт департментот Мет Милер.

Унгарија е меѓу земјите кои се против хашкиот процес.

„Да се обвини земја која претрпе терористички напад за геноцид е очигледно глупост. Ставот на Унгарија останува непроменет: Го поддржуваме правото на Израел на самоодбрана“, рече шефот на унгарската дипломатија Петер Сијатро.

Но, некои земји во развој, вклучително и Бразил, ја поддржаа иницијативата на Јужноафриканската Република.

Организацијата за исламска соработка го поздрави покренувањето на случајот од Јужноафриканската Република, а поддршка искажаа и некои други земји.

Белгиската вицепремиерка Петра Де Сутер сака нејзината земја „да преземе чекори пред Меѓународниот суд на правдата, по примерот на Јужноафриканската Република“.

Од нападот на Хамас на 7 октомври во кој загинаа најмалку 1 200 луѓе, во израелските напади, според Министерството за здравство управувано од Хамас, загинаа повеќе од 23 000 Палестинци во Газа од кои 70 отсто се жени и деца.

Агенцијата на ОН за палестински бегалци (UNRWA) процени дека 1,9 милиони луѓе се раселени поради војната во Газа, речиси 85 отсто од населението, додека десетици илјади згради се уништени.

„Делата и пропустите на Израел за кои се жали Јужноафриканската Република се од геноциден карактер бидејќи имаат за цел да доведат до уништување на значителен дел од палестинското население“, се наведува во писменото барање испишано на 84 страници од Јужноафриканската Република до судот за поведување постапка.

Случаите за геноцид, кои инаку тешко се докажуваат, може да траат со години, но Јужна Африка бара од судот итно да спроведе „привремени мерки“ и „да му нареди на Израел да престане да убива и да нанесува страдања и болки на палестинскиот народ во Газа“.

Барањето, исто така, повикува на прекин на ограничувањата за испорака на помош, како и забрана на израелските директиви за евакуација.

Бидејќи случајот го привлече глобалното внимание, поддржувачите на двете страни планираат собири во Хаг.

Илјадници про-израелски демонстранти маршираа на ниски температури рано во четвртокот во центарот на градот, носејќи израелски и холандски знамиња и постери со слики на луѓе земени како заложници од Хамас.

Меѓународниот суд на правдата се очекува да донесе одлука за можни итни мерки кон крајот на овој месец. Судот тогаш нема да одлучува за обвиненијата за геноцид – тој процес може да трае со години.

Одлуките на Меѓународниот суд се конечни и не се обжалуваат – но нема начин да се извршат.

Германската влада на 8 октомври одобри планови за ограничување на продажбата на канабис преку интернет, во обид да го ограничи порастот на увозот што следеше по легализацијата на рекреативната употреба минатата година.

Според амандманот на постојниот закон, рецептите за канабис сега ќе се издаваат само по посета на лекар, додека нарачките преку интернет и испораката по пошта ќе бидат забранети. Продажбата ќе биде ограничена на аптеките, каде што фармацевтите ќе мора да дадат совет за употреба.

Во април 2024 година, Германија стана деветтата земја во светот што го легализираше рекреативниот канабис. Оттогаш, увозот се зголеми за повеќе од 400 проценти во првата половина од годината во споредба со истиот период минатата година, според владини податоци.

„Масовното зголемување на увозот на канабис и практиката на препишување на лекот преку интернет, без никаков личен медицински контакт, бараат политичка акција“, изјави германската министерка за здравство Нина Варкен.

Владата соопшти дека зголемувањето на увозот не е поврзано со зголемената побарувачка кај тешко болните пациенти, бидејќи рецептите издадени преку системот за јавно здравствено осигурување се зголемија за едноцифрен процент

Германската партија Алтернатива за Германија (AfD) во Хамбург го исклучи локалниот партиски член Роберт Риш од градскиот совет откако сликите анализирани од РСЕ/РЛ покажаа дека тој присуствувал на форум на крајнодесничарската партија во Русија, на кој се собрале екстремнодесничарски политичари.

Риш присуствуваше на конференцијата во Санкт Петербург на 12 септември, покажа анализата на сликите.

Меѓу организаторите на настанот беше и Константин Малофеев, тајкун поврзан со Кремљ, под западни санкции за вмешаност во агресивната војна на Москва против Украина.

Помалку од еден месец подоцна, на 6 октомври, раководството на АФД (AfD) едногласно одлучи да покрене дисциплинска постапка против Риш, изјави Дирк Нокеман, лидерот на партијата од Хамбург.

Риш ги негираше обвинувањата, велејќи дека патувањето било приватно и дека „пријателка“, која е поранешната членка на советот на АФД во Хамбург, Олга Петерсен, го замолила да ја придружува на еден настан.

Тој додаде дека роденденот на Петерсен се паднал на истиот датум како и конференцијата и тврдеше дека немал претходно знаење за учесниците или за агендата.

Риш понатаму рече дека „води кампања за мир“ и не може да биде одговорен за оние „со кои седел во иста просторија“.

Покрената е и постапка за исклучување против Петерсен. Според германските медиуми, таа исто така присуствувала на настанот во Санкт Петербург и сега живее во Русија, јавно поддржувајќи ја руската влада.

Во март 2024 година, Петерсен дејствувала како набљудувач на изборите на кои претседателот Владимир Путин обезбедил нов мандат и наводно го нарекол гласањето „отворено, демократско и слободно“.

Во февруари, Петерсен, која е родена во Русија, објави фотографии на кои се гледа со руски војници во руски окупиран дел од Украина.

Најавен како основачка конференција на „меѓународна лига на антиглобалисти“ наречена Паладини, на форумот во украсениот Марински дворец во Санкт Петербург од царската ера присуствувале и крајно десничарски политичари од земји, вклучувајќи ги Франција, Германија, Италија, Мексико, Шпанија и Јужна Африка.

Уставниот суд на Косово на 8 октомври ја објави целосната одлука по жалбата поднесена од Српската листа - најголемата српска партија во Косово - во врска со конституирањето на Собранието.

Во одлука објавена неколку дена претходно, судот прогласи дека Собранието не е конституирано и им даде на пратениците 12 дена да го завршат процесот, од денот кога целосната одлука ќе биде објавена на неговата веб-страница.

Косовското собрание за РСЕ/РЛ изјави дека пресудата ги обврзува партиите да закажат седница во рок од 48 часа.

„Судот потсетува дека уставните одредби, Деловникот на Собранието и судската пракса на Судот не подразбираат никаква обврска за пратениците да гласаат во пакет за потпретседателите на Собранието, без разлика дали се тие предложени од 3 (три) најголеми парламентарни групи или заедници кои не го сочинуваат мнозинството. Во овој контекст, бидејќи гласањето во пакет не е изречно утврдено со Уставот, тоа може да се спроведе доколку постои договор меѓу парламентарните групи или пратениците“, се наведува во целосната одлука.

Судот, меѓу другото, наведува дека „врз основа на парламентарната пракса за избор на потпретседатели од редот на пратениците на заедниците кои не го сочинуваат мнозинството, од 2011 година, потпретседателите од редот на пратениците на заедниците кои не го сочинуваат мнозинството се гласаат и избираат во пакет. Затоа, Судот оценува дека таквата постапка за гласање останува на дискреционо право на пратениците и пратеничките групи, под услов да се спроведе избор на членови на Претседателството на Собранието“.

Српската листа поднесе жалба токму за оваа точка од постапката, оценувајќи дека негласањето во пакет за двајца потпретседатели од малцинствата претставува кршење на законот.

Емилија Реџепи беше избрана за потпретседател на Собранието од несрпското малцинство, додека ниту еден српски пратеник не го доби потребниот број гласови за местото резервирано за тоа малцинство, и покрај неколкуте круга гласање со промени на кандидатите.

По прифаќањето на жалбата, Уставниот суд изрече привремена мерка со која им забрани на пратениците да преземат какви било дејствија за формирање нова Влада, бидејќи постоеше сомневање за кршење на Уставот.

Јасно стави до знаење дека Собранието не се смета за конституирано без избор на потпретседател на Собранието од српска националност.

Низ целата пресуда, Судот наведе дека, врз основа на Уставот и Деловникот на Собранието, потпретседателот на Собранието од српската заедница се избира со мнозинство гласови од сите пратеници на Собранието, односно 61 глас „за“, а предлогот се поднесува писмено од мнозинството пратеници од српската заедница.

„Од горенаведеното, Судот подвлекува дека предлогот за потпретседател на Собранието од редот на пратениците на заедниците што не го сочинуваат мнозинството, во конкретниот случај на српската заедница, треба да го поднесе мнозинството или најголемиот број пратеници од редот на пратениците на српската заедница“, се наведува во пресудата.

Во Собранието на Косово, Српската листа има девет места резервирани за српската заедница, а уште едно го освои Ненад Рашиќ од српската партија За слобода, правда и опстанок. Рашиќ е министер во владата на Албин Курти

„Застапеноста на немнозинските заедници во структурата на Претседателството на Собранието е уставна гаранција, така што немнозинските заедници, имено српската заедница и другите немнозински заедници, се вклучени во целосното функционирање на Претседателството на Собранието, овозможувајќи им да учествуваат во донесувањето одлуки на Претседателството на Собранието, на начин утврден со Деловникот за работа на Собранието“, наведува Судот, меѓу другото, во образложението на одлуката.

И покрај фактот дека поминаа неколку месеци од одржувањето на парламентарните избори, Косово сè уште нема нови институции. Најголемите албански партии не постигнаа договор за продолжување на процесот и како резултат на тоа, Уставниот суд беше принуден неколку пати да донесе пресуди.

На парламентарните избори, движењето Самоопределување освои најмногу гласови и 48 места во Собранието. Демократската партија на Косово е втора со 24 места, Демократскиот сојуз на Косово е трет со 20, потоа Српската листа со девет и коалицијата на Алијансата за иднината на Косово и Социјалдемократската иницијатива со осум. Останатите места ги држат малцинствата.

Меѓународната заедница постојано повикува на Косово што поскоро да формира нови институции.

Веб страниците на социјалните платформи во Авганистан се „намерно ограничени“, соопшти во средата групата за сајбер безбедност и мониторинг на интернет Нетблокс (NetBlocks).

„Метриките покажуваат дека платформите на социјалните медиуми Instagram, Facebook и Snapchat сега се ограничени од повеќе провајдери во Авганистан; инцидентот следи по прекинот на телекомуникациите минатата недела и е најновиот во низата мерки за цензура на интернет воведени од Талибанците“, соопшти NetBlocks.

Некои корисници на социјалните мрежи во Авганистан изјавија за Радио Азади (авганистанскиот сервис Радио Слободна Европа ) претходно во текот на денот дека не можеле да пристапат до социјалните медиуми без користење филтри или VPN мрежи од вторник вечерта.

Владата предводена од Талибанците официјално не коментираше за исклучувањето на социјалните медиуми.

Минатата недела во Авганистан настана 48 часовен хаос, откако талибанските власти ги исклучија телекомуникациите низ целата земја. Талибанците го прекинаа пристапот до интернет со оптички влакна и мобилни телефонски услуги, кои се потпираат на истиот систем, без предупредување на 29 септември. Пристапот беше вратен на 1 октомври.

Овој потег предизвика хаос, ги прекина летовите и го прекина пристапот до банкарските и е-трговските системи, како и до онлајн бизнисите и училиштата.

Талибанците не ја соопштија официјалната причина за таквата одлука, но затворањето дојде неколку недели откако радикалната исламистичка група го блокираше пристапот до интернет преку оптички влакна во неколку провинции, наведувајќи загриженост за „неморал“.

Критичарите рекоа дека потегот е дел од поширока репресија врз индивидуалните слободи и слободниот проток на информации во Авганистан.

Запирањето на комуникациите ги погоди обичните Авганистанци, приватните бизниси и владините канцеларии и создаде предизвици за илјадници Авганистанци кои живеат надвор од земјата.

Интернетот беше спас за авганистанските жени, од кои многумина го загубија правото на работа и студирање откако Талибанците воведоа забрана во 2022 година. Прекинот на интернет предизвика страв кај жените дека нивната последна надеж бледнее.

Австриската влада повторно преговараше за годишното зголемување на платите на државните службеници, со што се заштедија 310 милиони евра од буџетот за следната година, соопшти владата во среда, додека се обидува да се справи со буџетскиот дефицит над ограничувањето на ЕУ и највисоката инфлација во Западна Европа.

Трипартиската коалициска влада на власт од март презеде многу необичен чекор за повторно отворање на договорот за плати што веќе беше договорен, заканувајќи им се на синдикатите со замрзнување на платите во следните години доколку не се согласат. Земјата едвај ќе избегне трета година рецесија оваа година.

Владата тврдеше дека буџетските ограничувања го направија овој потег неопходен. Австрија има традиција на колективни преговори за плати по сектори во кои работниците генерално добиваат зголемување на платите приближно во согласност со инфлацијата, а штрајковите се ретки.

„Австрискиот модел што нè направи богати со децении функционира - моделот на консензус, на балансирање на интересите. Мислам дека ова е добар договор“, изјави министерот за финансии Маркус Мартербауер.

Австриската инфлација е околу 4%, двојно повеќе од просекот во еврозоната. Канцеларот Кристијан Штокер издаде соопштение во кое ја повтори својата цел за намалување на инфлацијата на 2% следната година и рече дека договорот „ќе придонесе за прекинување на спиралата плати-цени и достигнување на таа цел за инфлација“.

Португалскиот фудбалер Кристијано Роналдо стана првиот милијардер меѓу фудбалерите, откако неговото богатство беше проценето на 1,4 милијарди долари, објави новинската агенција Блумберг.

Во извештајот се наведува дека Роналдо одамна заработувал речиси иста сума пари како и аргентинскиот фудбалер Лионел Меси, кој многумина го сметаат за негов главен ривал, но дека во 2023 година имало голем јаз меѓу нив двајца кога станува збор за финансиите.

Роналдо потпишал договор со фудбалскиот клуб Ал-Наср во Саудиска Арабија вреден 200 милиони долари.

Платата на Меси не е толку голема, но тој ќе има финансиски удел во фудбалскиот клуб Интер Мајами, каде што моментално игра, а по завршувањето на професионалната кариера би можел да има исто богатство како Роналдо.

Португалецот освоил пет титули во Лигата на шампионите, едно Европско првенство и две Лиги на нации за време на долгата и успешна кариера.

Тој е водечкиот стрелец на сите времиња за националните тимови и првиот фудбалер во историјата што постигнал 900 гола во натпреварувачки натпревари.

Сопругата на докторот и носител на советничка листа на ДУИ во општина Липково, Зеќирија Шахини, кој вчера беше нападнат и ранет со пиштол во центарот на Куманово, е уапсена, соопшти денеска полицијата.

Според Министерството за внатрешни работи(МВР), за 43 годишната тетовчанката е осомничена за поврзаност со обидот за убиство на нејзиниот сопруг.

Шахини беше нападнат вчера, кога маскиран човек со пиштол се доближи до неговиот автомобил и стрелаше, погодувајќи го во ногата. Тој бил вработен на скопската Клиника за пулмологија.

„На 07.10.2025 полициски службеници од СВР Куманово ја лишија од слобода А.А. (43) од Тетово, поради основи на сомнение дека е поврзана со обидот за убиство на нејзиниот сопруг З.Ш. (43) од село Слупчане, липковско. Исто така, во врска со настанот на службен разговор во СВР Куманово се повикани шест лица, а во домот на Б.С. (50) од Куманово по судска наредба, е извршен претрес“, е наведено во соопштението на МВР.

Оттаму додаваат дека осомничениот за пукањето, 36-годишен гостиварец, е во бегство.

„По целосно документирање на случајот, против А.А ќе следува соодветна пријава, додека против Љ.Ф. (36) од Гостивар, кој се сомничи за обид за убиство и се уште е во бегство, по консултација со Основното јавно обвинителство, исто така ќе биде поднесена кривична пријава“, велат од МВР.

Нападнатиот Зекирија Шахини е носител на советничката листа на ДУИ во Липково на претстојните локални избори.

Јавното обвинителство (ЈО) соопшти вчера дека првичните индиции не упатуваат на политички мотиви зад оружениот инцидент, но сите околности се проверуваат.

„Во пукањето е приведено едно лице, а по напаѓачот се трага“, соопшти Јавното обвинителство.

Од Министерството за здравство вчера реагираа со вознемиреност на веста дека нивниот колега бил нападнат со оружје, посочувајќи дека се надеваат на брза истрага и санкционирање на сторителите. Реакции имаше и од политичките партии кои бараат од институциите конкретни чекори за враќање на јавната доверба и безбедноста на теренот.

Во Северна Македонија на 19 октомври ќе се одржат локални избори. Во тек е 20-дневната предизборна кампања.

Рускиот претседател Владимир Путин минатата недела потпиша декрет кој се чини дека е насочен кон средствата на странските компании кои продолжуваат да работат во Русија. Путин го потпиша декретот како очигледен одговор на разгледувањето од страна на ЕУ за шема за позајмување милијарди долари на Украина врз основа на замрзнати руски средства што се чуваат во ЕУ, а кои се неподвижни откако Москва ја започна својата целосна инвазија пред повеќе од три години.

Декретот повикува на забрзана приватизација на државниот имот за да се обезбеди одбранбена способност, но директно се однесува на „непријателски дејствија“ на Соединетите Држави, западните земји и организации поврзани со нив, кои имаат за цел да воведат „рестриктивни мерки против граѓаните на Руската Федерација и руските правни лица“.

Декретот опишува посебна постапка за регистрација, продажба и пренос на средства, вклучително и забрзан временски рок, и ја именува ПСБ Банка (поранешна Промсвјазбанк) како единствен организатор на продажба на имот.

Путин го потпиша декретот како очигледен одговор на планот на ЕУ за шема за позајмување милијарди долари на Украина врз основа на замрзнати руски средства што се чуваат во ЕУ, откако Москва ја започна својата целосна инвазија пред повеќе од три години.

Претседателката на Европската комисија, Урсула фон дер Лајен, ја изнесе идејата за „заем за репарација“ во нејзиното годишно политичко обраќање до Европскиот парламент минатиот месец.

ЕУ разгледува различни начини за покривање на поголем дел од сметката за финансирање на одбранбените напори на Украина, бидејќи САД навестија дека можеби нема да бидат подготвени да ги финансираат одбранбените потреби на Украина уште долго.

Фон дер Лајен го изнесе својот аргумент пред лидерите на ЕУ на неформалниот самит во Копенхаген на 1 октомври за да разговараат за Украина, на кој присуствуваше и украинскиот претседател Володимир Зеленски.

Се очекуваше министрите за финансии на блокот подетално да го разгледаат планот на состанокот во Луксембург оваа недела.

По три години затвор добија обвинетите за предизвикување на пожар во дивата депонија Вардариште. Основниот кривичен суд ги прогласи за виновни Максуд Мемиши, Алмир Асани и Флорим Арифи за создавање на депонија која предизвикала опасност по здравјето на луѓето и загадување на земјата и воздухот.

Според пресудата, тие иако немале ниту фирма, ниту дозвола за откупувале отпад односно старо железо, акумулатори и други материјали на импровизирани пунктови спротивно на законот за управување со отпад.

Собраниот отпад го складирале на улицата „Зендел Џемаил“ во Скопје, а дивите депонии биле опасност по здравјето на граѓаните и ја загадиле на животната средина.

На претходното рочиште Мемиши, Асани и Арифи признаа вина во делот на загрозување на животната средина и природа бидејќи складирале отпад и создале диви депонии на улицата „Зендел Џемаил“ во Скопје, но не и за предизвикување на пожар.

Тројцата обвинети до сега не биле осудувани и се невработени, што судот го ценеше како олеснителна околност, додека тежината на кривичното дело и влијание врз животната средина од кривичното дело се смета за отежнителна околност. Мерката притвор ќе им биде продолжена до правосилност на пресудата поради опасност од бегство или повторување на делото.

Најсилниот пожар поради кој беа приведени осудените се случи на 31 август, поради што без струја останаа делови од населбите (или цели населби) Аеродром, Лисиче, Методија Андонов Ченто, индустриската зона, Кванташки пазар, Арачиново, Стајковци, Трубарево и Бунарџик.

Жители на општина Аеродром 37 дена ја блокираа раскрсницата меѓу булеварите „АСНОМ“ и „Србија“, барајќи конкретни мерки за решавање на проблемот со загадувањето од „Вардариште“.

Според податоците од Управата за управување со кризи само во изминатиот месец биле евидентирани над 15 пожари во Вардариште.

Долниот дом на рускиот парламент усвои одлука за повлекување од важен договор со Соединетите Држави, насочен кон намалување на големите залихи на плутониум што останале од илјадници нуклеарни боеви глави од ерата на Студената војна.

Спогодбата за управување и отстранување на плутониум, потпишана во 2000 година, ги обврза и САД и Русија да складираат најмалку 34 тони плутониум за воена употреба, количина за која американските претставници рекоа дека би била доволна за производство на околу 17.000 нуклеарни боеви глави.

Спогодбата стапи на сила во 2011 година.

„Соединетите Држави презедоа низа нови антируски чекори што фундаментално ја променија стратешката рамнотежа што постоеше во времето на договорот и создадоа дополнителни закани за стратешката стабилност“, се наведува во руското објаснување за законот со кој Москва се повлекува од договорот, објави Ројтерс.

Откако двете страни, Москва и Вашингтон, демонтираа илјадници боеви глави по Студената војна, тие останаа со големи залихи на плутониум од нуклеарно оружје, кои беа скапи за складирање и претставуваа потенцијален ризик од ширење.

Целта на договорот од Спогодбата за управување и отстранување на плутониум е плутониумот од нуклеарно оружје да се преработи во побезбедни форми како што е мешано оксидно гориво или да се користи во високонапонски реактори за производство на електрична енергија.

Во 2016 година, Русија го суспендираше спроведувањето на договорот, наведувајќи ги санкциите на САД и она што го опиша како непријателски потези против Русија, проширувањето на НАТО и промените во американскиот метод за отстранување на плутониумот.

Во тоа време, Русија тврдеше дека САД го прекршиле договорот бидејќи, без руско одобрение, и преминале на практиката на едноставно разредување на плутониумот и негово отстранување.

Ројтерс потсетува дека Русија и Соединетите Држави се убедливо најголемите нуклеарни сили во светот и заедно поседуваат околу 8000 нуклеарни боеви глави, односно значително помалку отколку во 1986 година, кога според податоците од Федерацијата на американски научници, имало дури 73 000.