Протестот во Белград, „Индексот е појак од палката“, кој се одржува на повик на студентите кои учествуваат во блокадата, се бара кривично гонење на полицајците за кои се тврди дека го прекршиле законот за време на антивладините протести во Србија, кои влегоа во својот десетти месец.

Скалите на Палатата на правдата беа испрскани со црвена боја со пораката „Вашите раце се крвави“, а потоа демонстрантите се упатија кон седиштето на Секторот за внатрешна контрола на Министерството за внатрешни работи (МВР) во Нов Белград, што е последната точка на протестот.

По патот кон Министерството беше блокиран мостот Газела, еден од најголемите во Белград.

Собирот следеше по протестот во Нови Сад во петокот на 5 септември, каде што полицијата ги растера демонстрантите од универзитетскиот кампус.

„Државата и институциите не функционираат ако селективно ја вршат својата работа“, рече Алексанадра Николиќ, студентка на Правниот факултет во Белград, која додаде дека претрпела полициско насилство.

Видете и ова:

Акција на полицијата на антивладиниот протест во Нови Сад

Како што изјави таа, припадник на жандармеријата ја удрил со палка во главата за време на протестот во Белград, нанесувајќи ѝ повреди на главата и лицето.

Таа рече дека владата сака да им испрати порака на граѓаните: „бидете послушни, плашете се, молчете“.

„Ги молам и ги охрабрувам сите оние кои преживеаја насилство да пријават што им се случило и да се борат за своите права. Ова е единствениот начин да ја отстраниме анонимноста на полицајците“, им рече таа на демонстрантите потсетувајќи ги дека фотографиите од неа со крвава глава сè уште циркулираат на социјалните мрежи.

Демонстрантите се упатија од српската Влада кон Палатата на правдата, зградата на Единицата за обезбедување на одредени лица и предмети (ЈЗО), а протестот заврши во Нов Белград кај Секторот за внатрешна контрола на Министерството за внатрешни работи.

Адвокатката Јелена Стојиќ праша на протестот пред Палатата на правдата зошто полицајците кои го прекршиле законот и ги пречекориле своите овластувања не се гонети.

„Каде е внатрешната контрола на Министерството за внатрешни работи и каде е Јавното обвинителство и што прави“, рече таа.

Полициските службеници претходно ги отфрлија обвинувањата за полициска бруталност, тврдејќи дека постапиле во согласност со законот.

Пред седиштето на Единицата за обезбедување на одредени лица и предмети (ЈЗО), зборуваше студентката Николина Синѓелиќ, обвинувајќи го командантот на единицата, Марко Кричек, за насилство и закани за силување откако беше приведена на антивладиниот протест на 14 август во Белград. Полицијата го негираше ова.

Во Нови Сад полицијата интервенираше и ги растера демонстрантите кои се собраа во голем број во петокот вечерта, на 5 септември, на протестот свикан од студентите. Протестот, насловен „Србија, нè слушаш ли?“, беше мирен, но заврши со сцени на насилство.

Таа рече пред зградата на ЈЗО дека „целиот државен апарат е насочен против нејзините граѓани“.

„Нè погоди секоја тупаница што удри граѓанин на Република Србија, наместо криминалците. Нè погоди секоја палка што падна врз студент наместо врз член на мафијата, нè погоди солзавец, гумени куршуми и кордони што ги штитат моќните од сопствениот народ“, рече таа.

За време на говорот на студентката, учесниците извикуваа навреди кон српскиот претседател Александар Вучиќ и пораки како „Апсеете го Кричек“.

Антивладините протести во Србија бараат одговорност за смртта на 16 лица при уривањето на бетонска настрешница на железничката станица во Нови Сад.

Најновото барање е распишување предвремени парламентарни избори.

Во последните недели се одржаа контра-протести „Граѓаните против блокадите“, во кои учествуваа поддржувачи на владата.

Видете и ова:

Студенти во Нови Сад: Невозможни се испити под полициска окупација

Српскиот претседател Александар Вучиќ присуствуваше на еден од овие собири на 7 септември во белградската населба Борча.

Поддржувачите на владата се собраа еден ден по антивладините студентско-граѓански протести во Белград, Крагуевац, Чачак, Ниш, Сремска Митровица и Суботица, одржани поради употребата на полициска сила против демонстрантите во Нови Сад на 5 септември.

На протестот во Нови Сад во петокот вечерта, голем број полицајци употребија палки, оклопни возила, солзавец и топовски удари за да ја растераат толпата, откако мала група маскирани демонстранти нападнаа полицајци во кордон пред зградата на Филозофскиот факултет.

Постојат сомненија дека пожарот во скопската депонија Дрисла е предизвикан намерно, изјави вечерта на 9 септември директорот на Дирекцијата за заштита и спасување (ДЗС), Стојанче Ангелов.
Пожарот, според неговите тврдења, нема опасност да се прошири надвор од депонијата.

„Бригадата за противпожарна заштита Скопје со сите сили се обидува да го локализира пожарот во депонијата Дрисла, направени се противпожарни појаси за да не се дозволи огнот да тргне кон блиската трева, грмушки и шума од горната страна на депонијата“, вели Ангелов.

Црниот чад од пожарот кој изби во попладневните часови можеше да се забележи од повеќе населби во Скопје.

Ангелов претходно потенцираше дека гаснењето на која било депонија е сложен процес поради „хемиските и биолошките процеси кои се одвиваат во внатрешноста на депонијата како резултат на кои се создаваат запаливи гасови“.

Депонијата Дрисла се простира на површина од 76 хектари и во неа се врши третман на комунален отпад, градежен шут, индустриски и медицински отпад.

Видете и ова:

Пожар во скопската депонија Дрисла

Командантот на Територијалната противпожарна бригада на Градот Скопје, Звонко Томевски, информираше дека на терен се десет противпожарни возила, а била побарана и помош од Јавното претпријатие „Комунална хигиена“. Од таму пратиле две цистерни за дотур на вода и од нив директно на самата локација се дополнуваат противпожарните возила.

Бил побаран и авион на ДЗС, но немало услови да се интервенира од воздух.

„Станува збор за посериозен пожар од поголеми размери, имаше опасност да се зафати околната борова шума која е во близина на депонијата и да се предизвика дополнително шумски пожар којшто можеше да загрози понатаму и објекти кои се во близина“, додаде командантот на скопските пожарникари.

Видете и ова:

Вардариште - каблите повторно во пламен, институциите 30 години не реагираат

Сепак, неговите очекувања се дека за брзо пожарот ќе биде изгаснат.

Дрисла е лоцирана во југоисточниот дел од територијата на Град Скопје и е оддалечена 14 километри од центарот на градот.

Суд во Азербејџан ја потврди деветгодишната затворска казна изречена на новинарот и економист Фарид Мехрализада по обвиненијата за кои тој вели дека се директно предизвикани од неговото критичко известување за азербејџанскиот сервис на Радио Слободна Европа (РСЕ).

На 9 септември, судот ги отфрли жалбите за пресудите против Мехрализада и шест други новинари од кои сите негираа каква било вина за кривичните дела што им се ставаат на товар. На групата новинари првично им беа изречени казни помеѓу 7 и пол и девет години на 20 јуни.

„Остро ја осудуваме одлуката на судот да ја потврди неправедната и неоснована казна за Фарид. Денес требаше да го одбележиме враќањето на Фарид кај сопругата и бебето. Наместо тоа, тој останува зад решетки, лишен од правдата што ја заслужува“, изјави претседателот и главен извршен директор на Радио Слободна Европа, Стив Капус, по објавувањето на соопштението од судот.

Мехрализада првпат беше приведен на 30 мај 2024 година, кога безбедносните агенти го фатија, му ставија качулка на главата и шепотејќи му на уво, му порачаа: „Премногу зборуваш“.

Видете и ова:

Во Баку, новинар на РСЕ е осуден на 9 години затвор во случај што се смета за политички мотивиран

Два дена подоцна, судот во Баку го смести Мехрализада во притвор за „заговор за шверц на девизи“ во врска со случајот што азербејџанските власти го покренаа против „Абзас Медиа“.

Веднаш по апсењето, „Абзас Медиа“ излезе со соопштение во кое тврдеше дека Мехрализада нема директна врска со медиумот и оти е еден од многуте експерти чии коментари биле пренесувани на нивната веб-страница.

Основачот на „Абзас“, Улви Хасанли и главниот уредник, Севињ Абасова, исто така, беа осудени на по девет години затвор на 20 јуни.

Уште еден вработен во „Абзас“, Махамад Кекалов, беше осуден на 7 и пол години, додека уредникот на информативната агенција Туран, Хафиз Бабали, доби девет години. Новинарките Наргиз Абсаламова и Елнара Гасимова беа осудени на по осум години затвор.

За време на судењето, Мехрализада внимателно ги раскажуваше околностите под кои бил уапсен како доказ дека случајот е политички мотивиран поради неговите „критички мислења во врска со социјалните и економските политики во Азербејџан“.

Економските анализи на Мехрализада често ја критикуваа зависноста на Азербејџан од нафта и гас и ги доведуваа во прашање официјалните статистики за невработеност и сиромаштија.

Тој првично беше обвинет за шверц, но потоа обвинението беше проширено вклучително и со обвиненија за нелегално претприемништво, даночно затајување и фалсификување документи – обвинувања што тој и неговите поддржувачи ги карактеризираа како измислени и дополнителни докази за тоа дека зад случајот стојат политички сили.

Видете и ова:

Новинар на РСЕ, една година во затвор во Азербејџан, сведочи за атакот врз независните медиуми

Тренд на потиснување на неистомислениците

Откако ја презеде власта кратко пред смртта на неговиот претходник и татко, Хејдар Алиев, во 2003 година, претседателот на Азербејџан Илхам Алиев се соочи со обвинувања за потиснување на неистомислениците со притворање новинари, опозициски личности и активисти на граѓанското општество.

Се чини дека овој тренд се забрза неодамна, со апсење на повеќе од 30 новинари и борци за човекови права кои се гонат по слични обвиненија, а коишто меѓународните институции ги сметаат за политички мотивирани.

Сепак, азербејџанските власти постојано ги негираат овие критики. За случајот на Мехрализада и другите неодамна приведени лица, Владата инсистира на тоа дека апсењата произлегуваат од конкретни кривични дела, а не од политичка одмазда.

Голем пожар попладнево избувнал во скопската градска депонија Дрисла, информираа од Дирекцијата за заштита и спасување (ДЗС).

Директорот на ДЗС, Стојанче Ангелов, информираше дека не станува збор за алармантен пожар, но оти гаснењето е сложено.

„Бригадата за противпожарна заштита на Скопје работи на негово гаснење. Гасењето пожар на која било депонија е сложен процес поради хемиските и биолошките процеси кои се одвиваат во внатрешноста на депонијата како резултат на кои се создаваат запаливи гасови“, посочи Ангелов.

Депонијата Дрисла е лоцирана во југоисточниот дел од територијата на Град Скопје и е оддалечена 14 километри од центарот на градот. Се простира на површина од 76 хектари и во неа се врши третман на комунален отпад, градежен шут, индустриски и медицински отпад.

Видете и ова:

Вардариште - каблите повторно во пламен, институциите 30 години не реагираат

Изминатиот период Скопје се соочува со уште еден пожар, на поранешната градска депонија Вардариште. Таа е лоцирана на левиот брег на реката Вардар, веднаш под индустрискиот комплекс „Металски завод Тито“, на околу седум километри од центарот на градот.

Иако е затворена пред три децении, локацијата и денес претставува сериозен еколошки ризик, се користи како дива депонија, а избувнувањето пожар во неа е честа појава.

За решавање на проблемот со Вардариште, жители на скопската општина Аеродром, која е најпогодена од загадување на воздухот кога таму избувнува пожар, од 2 септември секојдневно излегуваат и на околу еден час ја блокираат раскрсницата меѓу булеварите „Србија“ и АСНОМ.

Израел во вторник (9 септември) ги нападна лидерите на Хамас во Катар, проширувајќи ја својата воена акција на Блискиот Исток до оваа арапска држава каде што палестинската група, која САД и ЕУ ја прогласија за терористичка, долго време има своја политичка база.

Израелскиот премиер Бенјамин Нетанјаху потврди дека наредил напади врз лидерите на Хамас во Доха, ден по смртоносните напади во Ерусалим за кои одговорноста ја презеде палестинската милитантна група.

Катар, кој заедно со Египет дејствува како посредник во разговорите за прекин на огнот во речиси двегодишната војна во Појасот Газа, го осуди нападот како „кукавички“ и како флагрантно кршење на меѓународното право.

Два извори од Хамас за новинската агенција Ројтерс изјавија дека претставници на оваа група, кои биле дел од преговарачкиот тим за прекин на огнот, го преживеле нападот.

Видете и ова:

Израелската армија нареди евакуација на целиот град Газа пред копнената офанзива

Во заедничко соопштение на Нетанјаху и министерот за одбрана Израел Кац се вели дека во понеделникот, по смртоносните напади во Ерусалим и Газа, премиерот „им наредил на сите безбедносни агенции да се подготват за можно таргетирање на лидерите на Хамас“.

„Денес напладне, со оглед на оперативната можност, премиерот и министерот за одбрана одлучија да ја спроведат директивата дадена синоќа“, се додава во соопштението.

Кабинетот на израелскиот премиер претходно соопшти дека нападот врз лидерите на Хамас бил „целосно независен“.

„Денешната акција против високите терористички лидери на Хамас беше целосно независна израелска операција“, се вели во соопштението од канцеларијата на Нетанјаху во кое се додава: „Израел ја иницираше, Израел ја спроведе и Израел ја презема целосната одговорност“.

Официјален претставник на Белата куќа изјави дека Израел ги информирал САД однапред за нападот врз Катар.

Израелски претставници за Ројтерс изјавија дека нападот бил насочен кон високи лидери на Хамас, вклучувајќи го и Калил ал-Хаја, шефот на групата во Појасот Газа кој е во егзил и главен преговарач.

Сведоци раскажуваат дека во Доха се слушнале неколку експлозии. Црн чад се издиганал од бензинска пумпа во градот. До неа се наоѓа мал станбен комплекс кој од почетокот на конфликтот во Газа е под 24-часовно обезбедување од катарските емиратски гардисти.

На улиците околу местото на експлозијата еден час по нападот беа забележани амбулантни возила и најмалку 15 полициски и необележани владини возила.

Израелските сили ликвидираа неколку високи лидери на Хамас откако радикалната група го нападна Израел во октомври 2023 година, убивајќи 1.200 луѓе и земајќи 251 заложник, според израелските статистики.

Оттогаш, Израел започна и со воздушни напади и други воени акции во Либан, Сирија, Иран и Јемен за време на конфликтот во Газа.

Во Либан, го нападна Хезболах, поддржан од Иран, а во Јемен, започна воздушни напади против Хутите, исто така поврзани со Иран. Двете групи започнаа напади врз Израел за време на конфликтот во Газа.

Видете и ова:

Трамп најави можен договор за Газа

Израелски функционер за Ројтерс потврди дека е извршен напад врз лидерите на Хамас во Катар. Катарската телевизиска станица Ал Џезира, повикувајќи се на извор од Хамас, објави дека нападот бил насочен кон преговарачите на Хамас за прекин на огнот во Појасот Газа.

Нападот, пишува Ројтерс, веројатно ќе нанесе сериозен, ако не и фатален удар врз напорите за постигнување прекин на огнот, особено затоа што се случи во арапската држава Катар каде што се одржаа неколку рунди преговори.

Претставници на пет опозициски партии од Србија, за време на нивното обраќање пред членовите на Европскиот парламент (ЕП) во Стразбур, побараа воведување санкции против претседателот Александар Вучиќ и други високи државни функционери.

Копретседателката на Зелениот лев фронт (ЗЛФ) Билјана Ѓорѓевиќ порача дека бараат јасна осуда на полициската бруталност и санкции во форма на замрзнување на средства, како и забрани за патување за високи државни функционери кои го поддржаа насилството врз демонстрантите во Србија.

Преку антивладините протести во Србија, кои траат веќе десетти месец, демонстрантите бараат одговорност од властите за загинувањето на 16 лица при уривањето на настрешницата на железничката станица во Нови Сад. Демонстрантите ја обвинуваат полицијата и за бруталност во обидите да ги разбие протестите што, пак, властите го отфрла како точно.

Видете и ова:

Протест во Белград - „Индексот е посилен од палката“

За време на панел-дискусијата во ЕП насловена „Србија: Демократија на крстопат“, Ѓорѓевиќ изјави дека бараат санкции против Вучиќ, премиерот Ѓуро Мацут, претседателката на парламентот Ана Брнабиќ и министерот за внатрешни работи Ивица Дачиќ.

На ова реагираше српскиот министер за надворешни работи, Марко Ѓуриќ, кој во гостување на ТВ Прва, оцени дека повиците за санкции „ѝ штетат на Србија“.

Како што рече Ѓуриќ, токму тоа го очекуваат „разни пропагандисти во регионот кои сакаат да ја прикажат Србија како незрел деспотизам во кој национализмот и омразата царуваат и во редовите на власта и во редовите на опозицијата“.

Во Нови Сад полицијата интервенираше и ги растера демонстрантите кои се собраа во голем број во петокот вечерта, на 5 септември, на протестот свикан од студентите. Протестот, насловен „Србија, нè слушаш ли?“, беше мирен, но заврши со сцени на насилство.

Панелот „Србија: Демократија на крстопат“ се одржа на маргините на заседанието на ЕП во кое европратениците на пленарна седница на која ќе учествуваат и претставници на Европската комисија и Советот на ЕУ, ќе дебатираат на тема „Бранот насилство и континуираната употреба на сила против демонстрантите во Србија“.

Оваа дебата беше ставена на дневен ред по иницијатива на пратеничката група на социјалистите и демократите во ЕП.

Основното јавно обвинителство (ОЈО) од Штип поднесе обвинение против суспендираниот шеф на Вишото јавно обвинителство (ВЈО) Скопје, Мустафа Хајрулахи, за пет кривични дела „малтретирање во вршење на службата“, како и за едно кривично дело „злоупотреба на службената положба и овластувања“ за кое како соизвршител се товари уште еден виш јавен обвинител.

Истрагата против него беше отворена во ноември 2024 година, по што републичкиот јавен Љупчо Коцевски одлучи да го суспендира од функцијата додека трае кривичната постапка. Хајрулахи, кој и претходно тврдеше дека постапката против него е тенденциозна и ги отфрлаше обвинувањата, денеска изјави дека „најкатегорично ги отфрла сите наводи“ и оти во ниту еден случај „ниту некого малтретирал ниту навредувал“.

Во обвинението против него, пак, сега се наведува дека во периодот од септември 2023 до октомври 2024, тој се заканувал и вршел континуирано психичко насилство врз пет вработени жени во обвинителството „со цел да им нанесе душевна болка преку понижувачко постапување“.

„Користејќи ја неговата службена хиерархиска надреденост, во повеќе наврати грубо им се заканувал дека има моќ и може веднаш да ги избрка од работа, дека ’ќе ги дигнел на клоци‘, ’ќе ги фрлел од 6-ти кат‘, ’ќе ги ставел во притвор и под посебни истражни мерки‘. Дел ги навредувал дека ’му го грделе обвинителството‘ и им забранувал да комуницираат меѓу себе и со други вработени“, пишува во соопштението на штипското Обвинителство.

Видете и ова:

Суспендираниот обвинител Хајрулахи поднесе кривична против државниот обвинител

Според обвинението, петте вработени жени реагирале писмено до Јавното обвинителство, Советот на јавните обвинители како и до ОЈО Скопје и барале заштита односно да се преземат итни мерки. Обвинителството тврди дека откако Хајрулахи дознал за писмата, ги повикувал вработените една по една во неговата канцеларија и „продолжил со психичкото насилство“ принудувајќи ги да напишат писмени изјави дека биле изманипулирани.

„Притоа, им се заканувал дека ќе им поднесе тужби за клевета со барање за отштета од 100.000 евра, велејќи им дека тој може да влијае на сите судии и адвокати, дека имаат деца на кои треба да мислат и дека ќе ги изгубат работните места. Откако ќе одбиеле да потпишат таква изјава им поведувал дисциплински постапки и ги прераспоредувал на работни места во обвинителството“, велат од ОЈО Штип.

Две од жените, според обвинението, подлегнале под притисокот и напишале изјави кои тогашниот шеф без одобрение ги заверил со печат од Вишото обвинителство, за потоа писмено да им побара јавно извинување и повлекување.

Во оваа постапка околу заведувањето на барањата што тој им ги упатил, ОЈО Штип тврди дека бил прекршен и Правилникот за внатрешно работење на јавните обвинителства.

Според обвинението, психичкиот притисок продолжил и во наредниот период кога на состанок со сите вработени во јавнообвинителската служба, обвинетиот како шеф ги читал наводите од писмените барања и „ги исмевал и понижувал пред останатите“.

„Потоа, повторно користејќи ја неговата надреденост во службата, побарал од сите вработени кои не биле потписници на писменото барање за преземање на итни мерки, да напишат своерачни изјави во кои ќе го опишат ’каков е тој како шеф‘. Како резултат на ваквото деградирачко и понижувачко однесување, една од вработените се разболела и добила анксиозно растројство“, се тврди во обвинението.

Покрај за ова, ОЈО Штип поднело и обвинителен предлог против Хајрулахи и уште еден обвинител од ВЈО Скопје дека тие како соизвршители сториле кривично дело злоупотреба на службената положба и овластувања.

Видете и ова:

Обвинителката Крстевска Цалева бара да не биде шефица на Вишото јавно обвинителство Скопје

Со обвинението се тврди дека спротивно на Правилникот, Хајрулахи примените писма ги задржувал кај него и барал да не бидат заведени истиот ден или редоследно туку со неколку дена разлика и под различен датум.

„Истовремено барал од службениците тие предмети директно ’без многу галама‘ да бидат доделувани на второобвинетиот“, додаваат од ОЈО Штип.

Со ракција за ова обвинение, Хајрулахи излезе преку изјава за државната агенција МИА. Токму изјавите од другите вработени за кои обвинителството наведува дека самиот барал да ги напишаат тој ги наведува во своја одбрана.

„Најкатегорично ги отфрлам сите наводи од предметното обвинение, во ниту еден случај никого ниту сум малтретирал ниту сум навредувал. Доказ за тоа се изјавите на другите вработени кои што доброволно се пријавија и секој од нив достави име, презиме и адреса, со цел да бидат повикани од страна на јавниот обвинител Татјана Кацарова и истите да ја прикажат реалната состојба во Вишото јавно обвинителство, а не конструкциите направени од обвинителката Фатиме Фетаи и нејзината дружина кои што се наводно оштетени од моја страна“, вели Хајрулахи.

Тој повторно обвинува дека ова обвинение е конструкција против него од републичкиот обвинител Љупчо Коцевски, а простот го вперува и кон дел од обвинителите од поранешното Специјално јавно обвинителство (СЈО) тврдејќи дека целта е да се заштита лицата опфатени во предметот за бонусите што биле исплаќани во СЈО.

Хајрулахи претходно, откако беше отворена истрага против него, поднесе и кривична пријава против Коцевски, но и шефовите на основното и вишото обвинителство во Штип, Татјана Кацарова и Ристо Бојаџиски, како и Ермон Незири, обвинител кој во моментов е член на Советот на јавни обвинители. Тој ги пријави за злоупотреба на службената положба и овластувања со тврдења дека постапката против него била тенденциозна.

Инаку, со поднесеното обвинение за суспендираниот шеф на скопското Вишо јавно обвинителство со поднесеното обвинитение се бара судот да му определи мерки на претпазливост – повремено јавување во суд, одземање на пасошот и забрана за приближување на петте жени за кои се тврди дека биле малтретирани.

Рускиот министер за надворешни работи Сергеј Лавров и поранешниот претседател на Република Српска, Милорад Додик, ги повторија своите претходни ставови дека „комплицираните односи во Босна и Херцеговина се резултат на грубо мешање на Западот во внатрешните работи на Босна и Херцеговина“.

Двајцата се сретнаа во Москва на 9 септември.

На прес-конференцијата, Лавров ги повтори критиките кон Кристијан Шмит, високиот претставник на меѓународната заедница во БиХ, повторувајќи дека Шмит „нема мандат од Советот за безбедност на Обединетите Нации“ и дека „се обидува да наметне одлуки и закони по налог на Западот“.

„Остро ги осудуваме обидите за отстранување од власт на српските лидери кои се непожелни за Западот, а особено на нашиот денешен соговорник, нашиот пријател, легално избраниот легитимен претседател на Република Српска, преку измислени кривични случаи“, рече Лавров.

Централната изборна комисија на Босна и Херцеговина му го одзеде мандатот на претседател на РС на Додик по конечната пресуда на Судот на Босна и Херцеговина, поради непочитување на одлуките на високиот претставник на Меѓународната заедница во Босна и Херцеговина. На почетокот на август, Додик беше законски осуден на една година затвор и шестгодишна забрана за вршење јавни функции во Босна и Херцеговина.

Видете и ова:

На Република Српска ѝ се заканува институционален распад

Лавров објави дека Русија ќе го преземе претседателството со Советот за безбедност на ОН во октомври 2025 година и најави седница за ситуацијата во БиХ за 31 октомври, „кога нашите колеги во Советот ќе мора да одговорат на многу непријатни прашања за БиХ“.

Додик рече дека „Босна и Херцеговина никогаш не донела одлука за воведување санкции врз Руската Федерација, бидејќи Република Српска го направила тоа невозможно преку своите претставници“.

Поголемиот дел од своето обраќање до медиумите, Додик му го посвети на високиот претставник Кристијан Шмит.

„Високите претставници разрешија над 900 избрани претставници во Босна и Херцеговина, од кои две третини од Република Српска. Република Српска остана посветена на „зборот“ од Дејтонскиот договор, додека Западот го користеше таканаречениот „дух на договорот“. Со години имаме неименуван странец по име Шмит преку кого тие наметнуваат одлуки“, рече Додик.

Видете и ова:

Будимпешта ја игнорира одлуката на Судот на БиХ, Сијарто му се обраќа на Додик како претседател

Додик, меѓу другото, рече дека нема малигно руско влијание во Босна и Херцеговина.

Неодамна во интервју за рускиот „Спутник“, Додик објави дека во октомври ќе се сретне и со рускиот претседател Владимир Путин.

Како што тогаш рече, од Русија ќе биде побарано да стави вето на продолжувањето на мировната мисија ЕУФОР Алтеа во Босна и Херцеговина, за која се гласа секој ноември во Советот за безбедност на Обединетите Нации.

На 4 септември, Додик се сретна и со унгарскиот министер за надворешни работи, Петер Сијарто, кој го претстави како претседател на Република Српска, поради што Министерството за надворешни работи на Босна и Херцеговина испрати протестно писмо. Во недела, на пат кон Москва, тој се сретна и со претседателот на Србија, Александар Вучиќ, во Белград.

Непалскиот премиер К.П. Шарма Оли поднесе оставка, потврди неговиот помошник. Во исто време, демонстрантите против корупцијата го прекршија полицискиот час и се судрија со полицијата.

Непал ја укина забраната за социјалните медиуми во вторник (9 септември)по масовните протести предизвикани од самата забрана.

„Владата ја укина забраната за социјалните мрежи воведена минатата недела“, објави портпаролот на кабинетот и министер за комуникации и информатичка технологија, Притви Суба Гурунг.

Најмалку 19 лица загинаа, а повеќе од 300 беа повредени во протестите предводени од членовите на „Генерацијата З“.

Властите воведоа полициски час во метрополитенската област Катманду за да ги спречат понатамошните протести.

„Протестите, масовните собири и состаноците нема да бидат дозволени за време на полицискиот час“, објави Чхабилал Риџал, градскиот окружен управник.

Видете и ова:

Најмалку 62 исчезнати во свлечишта во Непал

Ова соопштение следеше откако демонстрантите ги повикаа граѓаните да учествуваат во заедничкото изразување на жалост за мртвите. Организаторите на протестите, кои се проширија и во други градови во хималајската земја, ги нарекоа „демонстрации на Генерацијата З“.

Тие велат дека протестите го одразуваат широко распространетото незадоволство кај младите луѓе поради недостатокот на конкретни потези од страна на владата во борбата против корупцијата и создавањето економски можности.

Насилните протести во Непал вчера оставија најмалку 14 мртви и десетици повредени. Непалската влада на 4 септември соопшти дека ги блокирала повеќето платформи на социјалните медиуми, вклучувајќи ги Фејсбук, Инстаграм и Јутјуб, бидејќи компаниите не ги почитувале прописите што бараат од нив да се регистрираат кај владата.

Законот, кој не е усвоен од парламентот на Непал, беше широко критикуван како алатка за цензурирање и казнување на противниците кои ги изразуваат своите ставови преку интернет.

Руски напад во источниот украински регион Донецк уби најмалку 20 лица, објави украинскиот претседател Володимир Зеленски во објава на социјалните мрежи, на 9 септември.

Москва го прогласи индустрискиот регион за дел од Русија и покрај тоа што нема целосна контрола врз него, а Киев вели дека Кремљ распоредил 100.000 војници на клучен дел од фронтовската линија за нова офанзива.

„Брутално дивјачки руски воздушен напад со воздушна бомба врз руралната населба Јарова во регионот Донецк. Директно врз луѓе. Обични цивили. Во истиот момент кога се исплаќаа пензиите“, напиша Зеленски во својата објава.

„Според прелиминарните информации, повеќе од 20 лица се убиени“, додаде украинскиот лидер.

Гувернерот на регионот Донецк изјави дека 21 лице е убиено и дека исто толку луѓе се ранети.

Видете и ова:

Најголем руски напад врз Киев до сега, прв пат погодена зградата на Владата

Зеленски објави аматерско видео од местото на настанот на кое се гледаат трупови расфрлани по земјата и изгорено мини-комбе во близина на игралиште, со лични работи, документи и чевли расфрлани насекаде.

АФП не можеше независно да ги потврди сликите објавени од украинските власти.

Јарова, која се наоѓа на приближно осум километри (речиси пет милји) од линијата на фронтот, имала предвоена популација од околу 1900 луѓе.

Зеленски ги повика сојузниците на Украина да одговорат на нападот.

„Потребен е одговор од Соединетите Држави. Потребен е одговор од Европа. Потребен е одговор од Г20. Потребни се силни акции за да се натера Русија да престане да носи смрт“, додаде Зеленски.

Русија ја почна целосната инвазија врз Украина на 24 февруари 2022 година.

Службата за општи и заеднички работи на Владата отопочна постапка за брендирање, односно означување на сите службени возила во државата.

„Целта е до 29 септември, односно до почеток на кампањата за локалните избори сите службени возила и возила во сопственост на државата да бидат брендирани, односно да ги заменат регистарските таблички на службените возила со нови, специјални таблици во боја, изјави директорот на Службата за општи и заеднички работи на Владата, Ивица Томовски.

Томовски вели дека станува збор за околу 7 до 7,5 илјади возила, нагласувајќи дека МВР заклчучно со 31 декември годинава презело обврска да направи регистар на службени возила.

„Им дадовме насока и препорака на сите институции во државата да отпочнат со промена на тие таблици. Ова нека биде втор повик. Имаат рок до 15 септември, овој месец да ги брендираат сите возила. Доколку и тоа не го направат, ќе повикаме по трет пат да се брендираат, со цел до 29 септември, односно до почеток на кампањата за локални избори сите службени возила и возила во сопственост на државата да бидат брендирани“, нагласи Томовски.

Видете и ова:

Владата апелира институциите да ги пријават службените возила во ДКСК

Правилникот не предвидува казни, рече Томовски, појаснувајќи дека доколку некои избегнат односно не направат брендирање во рокот до 29 септември тоа ќе мора да го направат со регистрација, кога ќе добијат специјални таблици во боја.

Правилникот предвидува да се брендираат сите возила кои што се во сопственост на државата, како што се владините возила, општинските возила, возилата на Јавните претрпијатија и се она што значи доминантна сопственсот на државата.

Правилникот ќе претрпи мали измени во текот на годинава, бидејќи ги опфаќа и возилата кои што се за специфични намени, како што се дел од возилата на МВР и дел на Агенцијата за национална безбедност. Тие ќе бидат исклучени од ова брендирање, но сите останати ќе бидат брендирани.

„Зборуваме најмногу за возила кои го користи администрацијата. Да ќе има дел од МВР кои што ќе бидат исклучени, но дел ќе бидат брендирани, бидејќи ги користи администрацијата“, изјави Томовски.

Одлуката за оваа новина беше донесена на владината седница на 29 јули, а први чии возила веќе се брендирани се СОЗР, ТИРЗ, Агенцијата за храна и ветеринарство и Царинската управа.