Европските лидери ги осудија ноќните напади со ракети и дронови врз Киев од страна на Русија, при што Велика Британија и Европската унија повикаа руски дипломати за да изразат негодување.
Најмалку 18 лица загинаа во Киев, откако руските ракети уништија станбени згради и домови во главниот град во текот на ноќта. Десетици се повредени, а спасувачите пребаруваа низ купишта чадливи урнатини во потрага по преживеани.
Овој напад беше најголемиот што го погодил Киев во последниве недели — најнов показател дека Русија нема намера да се повлече од своите напади, било на бојното поле, било врз цивилни цели.
Претседателката на Европската комисија, Урсула фон дер Лајен објави дека ЕУ наскоро ќе усвои нов пакет санкции, 19-ти по ред откако започна целосната инвазија на Русија во февруари 2022 година.
„Паралелно со тоа, напредуваме со работата околу замрзнатите руски средства. И, се разбира, обезбедуваме силна, непоколеблива поддршка за Украина – наш сосед, партнер, пријател и идeн член“, изјави фон дер Лајен.
Подоцна, таа напиша на социјалните мрежи дека разговарала со американскиот претседател, Доналд Трамп за смртоносните напади.
Шефицата за надворешна политика на ЕУ, Каја Калас изјави дека го повикала рускиот амбасадор во Брисел откако нападот врз Киев ги оштети просториите на делегацијата на ЕУ.
„Ниту една дипломатска мисија не смее никогаш да биде цел. Како одговор, го повикуваме рускиот претставник во Брисел“, напиша Калас на мрежата Икс (X).
Британскиот премиер, Кир Стармер ги опиша нападите како „бесмислени“ и го обвини рускиот претседател Владимир Путин дека ги саботира шансите за мир.
„Моите мисли се со сите засегнати од бесмислените руски напади врз Киев, кои го оштетија објектот на Британскиот Совет. Путин убива деца и цивили и ги уништува надежите за мир,“ изјави Стармер.
Sky News објави дека британското Министерство за надворешни работи ќе го повика рускиот амбасадор за да поднесе формален протест.
Францускиот претседател, Емануел Макрон исто така остро реагираше, нарекувајќи го ноќниот напад брутален акт на државен тероризам.
„Ова е руската претстава за мир. Терор и варварство. Повеќе од десетина загинати, вклучително и деца. Станбени населби и цивилна инфраструктура беа намерно цел на напад... Франција ги осудува овие бесмислени и сурови напади со најостри зборови“, напиша тој во порака на социјалните мрежи.
Нападот се случи речиси две недели по големиот самит меѓу рускиот претседател Владимир Путин и американскиот претседател Доналд Трамп, кој имаше за цел да се најде начин за запирање на 42-месечната инвазија на Украина од страна на Москва.
Потоа следуваа разговори во Вашингтон меѓу Трамп, украинскиот претседател Володимир Зеленски и европски лидери, кои завршија со повик до рускиот претседател Владимир Путин да одржи директни разговори со Зеленски.
Додека Зеленски јасно стави до знаење дека е подготвен за разговори, Москва одложува.
