Полицијата тврди дека косовските безбедносни сили „по грешка“ биле на северот на земјата

Заменик-директорот на косовската полиција за северниот регион Ветон Елшани за Радио Слободна Европа потврди дека припадници на косовските безбедносни сили биле во Северна Митровица во четврток, но „по грешка“.

„Се изгубиле, ГПС-навигацијата по грешка ги одвела на север“, рече Елшани.

Според него, косовската полиција ги забележала Косовските безбедносни сили, разговарала со нив, по што го напуштиле северот на земјата.

Видеата што кружат на социјалните мрежи покажуваат како возилата на косовските безбедносни сили се вртат на бензинска пумпа во близина на полициска станица и се упатуваат кон југ.

Елшани за Радио Слободна Европа изјави дека, според полицијата, возилата на косовските безбедносни сили биле паркирани на оваа пумпа пет до десет минути, по што, во придружба на полицијата, ја избрале „најбрзата рута“, веднаш до автобуската станица во близина на местото познато како „Дудин Крш“.

Канцеларијата за Косово во Владата на Србија побара итна реакција од Меѓународната заедница поради присуството на неколку возила на косовските безбедносни сили на северот од Косово и оцени дека тоа е „директно кршење на цврстите гаранции на НАТО“.

Иако косовската полиција изјави дека станува збор за грешка, Канцеларијата за Косово тврди дека косовските власти, предводени од вршителот на должноста премиер Албин Курти, „испратиле два камиона и четири хамери на КБС на северот од Косово“, еден ден по посетата на претседателката на Европската комисија, Урсула фон дер Лајен, која побара смирување на тензиите.

Косовските безбедносни сили не смеат да бидат присутни на северот од Косово, каде што живее мнозинското српско население, без претходно одобрение од Мисијата на НАТО во Косово (КФОР) врз основа на гаранциите на Хашим Тачи во 2013 година како премиер на Косово.

Потоа Тачи размени писма со тогашниот генерален секретар на НАТО, Андерс Фог Расмусен, во кои се обврза дека косовските безбедносни сили нема да бидат распоредени на северот од Косово без претходна согласност од КФОР на Косово.

Радио Слободна Европа се обрати до Министерството за одбрана со прашање дали има информации дека косовските безбедносни сили биле на северот од Косово и зошто, и чека одговор.

Одговор на истото прашање се чека и од КФОР.