Украина започна истрага за убиство во саботата откако поранешниот претседател на парламентот Андриј Парубиј, клучна фигура во револуцијата на Мајдан во 2014 година, беше застрелан во западниот град Лвив.
Канцеларијата на генералниот обвинител соопшти дека вооружен човек испукал неколку куршуми кон Парубиј, убивајќи го на лице место. Напаѓачот избегал и започната е потера, се вели во соопштението.
Парубиј, 54, бил член на парламентот, претседател на парламентот од април 2016 до август 2019 година и еден од водачите на протестите во 2013-14 година, кои бараа поблиски врски со Европската Унија.
Тој беше и секретар на Советот за национална безбедност и одбрана на Украина од февруари до август 2014 година, период кога започнаа борбите во источна Украина, а Русија го анектираше полуостровот Крим.
Видете и ова: Зеленски вели дека рускиот напад на Киев е „удар врз претседателот Трамп“Службениците не дадоа непосредни индикации дали убиството имало директна врска со војната на Русија во Украина.
„Министерот за внатрешни работи Игор Клименко и генералниот обвинител Руслан Кравченко штотуку известија за првите познати околности на ужасното убиство во Лвив. Андриј Парубиј е убиен“, напиша претседателот Володимир Зеленски на социјалната платформа X.
Тој испрати сочувство до семејството и најблиските на Парубиј.
„Сите потребни сили и средства се вклучени во истрагата и потрагата по убиецот,“, додаде тој.
Украинската полиција соопшти дека пукањето во Лавив било пријавено околу пладне (09:00 часот по Гринич). Градоначалникот на Лавив, Андриј Садови, изјави дека пронаоѓањето на убиецот и утврдувањето на околностите на нападот е од најголема важност.
„Ова е прашање на безбедност во земја во војна, каде што, како што можеме да видиме, нема целосно безбедни места“, напиша тој на социјалната платформа Телеграм.
Сочуство за смртта на поранешниот претседател на украинскиот Парламент пристигнаа од колегите во парламентот и владата, пофалувајќи го придонесот на Парубиј во борбата на Украина за суверенитет и независност како еден од водачите на она што стана познато како протести на Евромајдан во 2013-14 година.
Поранешниот претседател Петро Порошенко напиша на Телеграм дека убиството на Парубиј, кој беше член на парламентарниот комитет за национална безбедност, одбрана и разузнавање, било „истрел во срцето на Украина“.
„Андриј беше голем човек и вистински пријател. Затоа се одмаздуваат, од тоа се плашат“, рече тој, пофалувајќи го придонесот на Парубиј во градењето на украинската армија.
Во изјава објавена на Телеграм, министерот за надворешни работи Андриј Сибиха го опиша Парубиј како „патриот и државник кој даде огромен придонес во одбраната на слободата, независноста и суверенитетот на Украина. Тој беше човек кој со право припаѓа во книгите по историја“.
Украинските органи за спроведување на законот не дадоа информации за идентитетот или мотивите на убиецот. Украинската премиерка Јулија Свириденко повика на брза истрага за убиството, нарекувајќи го „длабока загуба“ за земјата.
„Секогаш останавте патриот на Украина и дадовте голем придонес во формирањето на нашата држава“, напиша таа на X.