Ден по судирот со полицијата, Филозофскиот факултет во Нови Сад остана заклучен за студентите

Ситуацијата пред Филозофскиот факултет во Нови Сад денеска (28 август) е мирна, откако претходната вечер избувна судир меѓу демонстрантите и полицијата, која заедно со деканот ја држи оваа високообразовна установа под клуч.

Полицијата со опрема за растерување демонстрации сè уште го обезбедува влезот на Филозофскиот факултет, пренесе новосадскиот портал 021.

Судирот меѓу демонстрантите и полицијата на 27 август вечерта се случи откако присутните на протестот се обидоа да го пробијат кордонот на Жандармеријата поставен пред влезот на зградата на факултетот. Ова е трет ден како вратите на Филозофскиот факултет се заклучени од страна на деканот Миливоје Алановиќ, откако утрото на 26 август ги избрка студентите кои беа во блокада на зградата.

Истиот ден, тој ја повика полицијата, која од тогаш не им дозволува влез ниту на студентите, ниту на дел од вработените.

Како што пренесува порталот 021, сè уште се видливи трагите од синоќешниот судир меѓу демонстрантите и полицијата, за време на кој беа употребени солзавец и пиротехника.

Министерството за внатрешни работи (МВР) соопшти во четвртокот дека уште две лица се уапсени поради, како што е наведено, сомнение за кривично дело напад на полицијата.

МВР наведува дека уапсените за време на собирот пред Филозофскиот факултет „нападнале полициски службеници и повеќепати ги удриле“.

И студентите кои ја држат блокадата на Филозофскиот факултет потврдија дека двајца нивни колеги се уапсени.

Како што наведуваат, едниот од нив бил уапсен во автобус, а другиот за време на протестот бил „влечен“ во зградата на факултетот, па „долго време не знаеле што се случува со него“.

Протестите пред Филозофскиот факултет доаѓаат откако студентите на 26 август објавија дека деканот Миливоје Алановиќ тој ден наутро „влетал во факултетот со неколку професори и ја сменил бравата“, а на студентите кои ја држеле блокадата им се заканувал со дисциплински мерки.

Новосадскиот Филозофски факултет беше прв во градот што студентите го блокираа во декември минатата година, а потоа следеа блокади и на другите факултети.

Студентите започнаа со блокади по несреќата во Нови Сад, кога при уривање на настрешницата на реконструираната Железничка станица загинаа 16 лица.

Оттогаш, тие бараат кривична и политичка одговорност за несреќата.