Трамп: Путин ја „уништува“ Русија со тоа што одбива да стави крај на војната во Украина

Американскиот претседател Доналд Трамп изјави дека рускиот лидер Владимир Путин ја „уништува“ Русија со тоа што одбива да склучи договор за прекин на војната во Украина, додавајќи дека наскоро би можел да разговара со него.

„Тој треба да направи договор. Мислам дека ја уништува Русија со тоа што не склучува договор“, им рече Трамп на новинарите во понеделникот по пристигнувањето во Белата куќа по неговата инаугурација.

Тој додаде дека мисли дека „Русија ќе биде во голема неволја“, пренесе редакцијата на Радио Слободна Европа на англиски јазик.

„Повеќето луѓе мислеа дека војната ќе заврши за една недела“, рече Трамп во, како што се чини, неговата најкритична изјава за војната на Путин во Украина.

„Мислам дека би било добро тој да ја прекине таа војна“, додаде новиот американски претседател.

Русија потроши стотици милијарди долари на војната, имаше околу 700.000 жртви и ги заплаши своите соседи, а исто така го жртвуваше профитабилниот европски пазар на гас и пристапот до западните финансиски пазари бидејќи рубљата ја изгуби вредноста.

Видете и ова: Падот на рубљата и „колебливата“ руска економија

Кремљ троши околу 40 отсто од својот буџет на војската и се бори да ја задржи инфлацијата дури и со референтни каматни стапки над 20 отсто. За возврат, таа окупираше опустошена територија во Украина.

Трамп рече дека во одреден момент ќе разговара со Путин (за кого често изразува восхит) без да прецизира кога. Западните лидери, со исклучок на десничарските политичари како унгарскиот премиер Виктор Орбан, сојузник на Трамп, избегнуваа состаноци и во најголем дел, телефонски разговори со Путин во обид да го изолираат политички.

„Одлично се согласував (со Путин). Се надевам дека сака да се договори“, рече Трамп за можната средба со рускиот колега.

Американскиот претседател исто така рече дека украинскиот претседател Володимир Зеленски му рекол дека сака мировен договор за ставање крај на војната.

За време на претседателската кампања, Трамп вети дека ќе стави крај на војната во Украина во рок од 24 часа по преземањето на функцијата. Во последните недели тој ги повлече тие изјави, но сепак вети дека брзо ќе ја заврши војната.

Видете и ова: Трамп: Мировните преговори за Украина би можеле да започнат наскоро по инаугурацијата

Многу аналитичари велат дека ќе биде тешко да се стави крај на војната во блиска иднина, бидејќи Путин верува дека тој победува и нема поттик да ги прекине борбите, иако Русија трпи катастрофални загуби во работна сила и опрема.

„Кога тимот на Трамп ќе ги започне овие дискусии, ќе открие дека најтешката работа во овој процес ќе биде да го натера Путин да се откаже од својата цел да ја потчини цела Украина“, изјави за РСЕ Михаил Алексеев, професор по политички науки на Државниот универзитет во Сан Диего.

Алексеев рече дека Трамп ќе мора да продолжи да испраќа помош за Украина ако е сериозен да го натера Путин да ги прекине борбите.

Русија зазема територии во источна Украина со најбрзо темпо од почетокот на војната, бидејќи Киев се соочува со недостиг на работна сила.

Поддржувачите на Украина изразија загриженост дека Трамп, кој го критикуваше износот на помошта обезбедена од администрацијата на Џо Бајден, би можел да изврши притисок врз Киев да направи отстапки што досега ги одбиваше, како што е предавање на територија под руска окупација.

Што ќе биде приоритет во надворешната политика на Трамп?

Но, некои експерти се сомневаат дека Трамп ќе ја остави Украина, велејќи дека руската победа може да му наштети на неговиот имиџ исто толку колку што талибанското преземање на Кабул во август 2021 година го наруши угледот на администрацијата на Бајден.

Пред општата инвазија во февруари 2022 година, Русија првично го нападна украинскиот полуостров Крим, кој незаконски го анектираше во 2014 година и ги поддржа сепаратистите на истокот на Украина, каде потоа окупираше големи делови од територијата.

Алексеев рече дека Трамп може да се обиде да ја промени политиката на Путин за Украина со соочување со интересите на Кремљ во други региони како што се Арктикот, Блискиот Исток и Африка, или со таргетирање на нејзините сојузници како Иран и Северна Кореја.

„Она што можеме да го видиме од Трамп е проширување на преговарачката игра, носејќи ја во други области за да испрати повеќе пораки до Путин“, рече тој.

Неколку часа пред изјавата на Трамп за Путин и Украина, францускиот претседател Емануел Макрон предупреди дека војната нема да заврши „утре или задутре“ и дека е клучно Киев да се стави во позиција на сила пред потенцијалните мировни преговори.