ОН денеска (4 декември) апелираа за повеќе од 47 милијарди американски долари за испорака на витална помош следната година, предупредувајќи дека зголемените конфликти и климатската криза ќе остават стотици милиони луѓе незаштитени.
„Светот е во пламен“, изјави во Женева новиот шеф за хуманитарни прашања на Обединетите Нации, Том Флечер, признавајќи дека со „страв“ гледа кон 2025 година.
Со конфликтите во места како Газа, Судан и Украина, и со оглед на тоа што климатските промени и екстремните временски услови земаат се повеќе жртви, ОН процени дека следната година, на 305 милиони луѓе на глобално ниво ќе им треба некаков облик на итна помош.
„Во моментов се справуваме со поли-криза на глобално ниво, а цената ја плаќаат најранливите луѓе во светот“, рече Флечер, предупредувајќи дека зголемената нееднаквост во комбинација со конфликтите и климатските промени создале „совршена бура“ од потреби.
Видете и ова: ОН: Шеснаесет региони во светот се соочуваат со критично ниво на гладПрезентирајќи го Глобалниот хуманитарен преглед, Флечер призна дека ОН и нивните партнери нема да можат да допрат до сите кои имаат потреба.
Годишниот апел на агенциите на ОН и другите хуманитарни организации бара 47,4 милијарди долари за 2025 година, малку помалку од апелот за годинава, кои би требало да се доволни за да се обезбеди помош за 189,5 милиони најранливи луѓе.
Флечер истакна дека со овој план нема да може да бидат опфатени 115 милиони луѓе.