Во Пале кај Сараево ексхумирани останки на две жртви од војната во 1990-тите

Нецелосни останки на најмалку две лица се пронајдени во општината Пале кај Сараево.

Обвинителството на Босна и Херцеговина на 5 јуни објави дека останкитр на едно од пронајдените лица најверојатно е на жртва од српска националност, која исчезнала во областа Сараево во 1994 година.

Идентитетот на исчезнатите лица, пронајдени на необележани места за погребување на Градските гробишта Репче, ќе се утврдува со ДНК анализа на пронајдените останки.

Видете и ова: Генералното собрание на ОН ја усвои резолуцијата за геноцидот во Сребреница

Околу 32.000 луѓе се исчезнати во Босна и Херцеговина за време на војната во 1990-тите, според Меѓународната комисија за исчезнати лица. Се уште се трага по повеќе од седум илјади.

Според извештајот на таа комисија од 2014 година, се проценува дека во конфликтите по распадот на поранешна Југославија загинале 140.000 луѓе.

Од тој број, повеќе од 100.000 се убиени во Босна и Херцеговина.

Се трага по околу 11.000 луѓе на поширокото подрачје на Западен Балкан.