Премиерот Зоран Заев, министерот за транспорт и врски Благој Бочварски и градоначалникот на Град Скопје, Петре Шилегов одржаа состанок во Владата со менаџментот на германската компанија „Лидл“, која планира да инвестира во земјава. Заев, како што соопшти владината прес-служба, истакнал дека новите инвестиции се од голема важност за зголемување на понудата, нови вработувања, како и подобрување на севкупната економија.
„Од менаџментот истакнаа дека компанијата планира својата прва инвестиција во Северна Македонија да ја реализира преку изградба на сопствен модерен логистички центар кој ќе ги поседува сите меѓународни сертификати на „Лидл“ и кој ќе служи како центар за снабдување на синџирот маркети. Опремата која ќе се користи во центарот за логистика е според најсовремените стандарди во Европа“, се вели во соопштението.
На средбата, според соопштението, било истакното дека сите маркети кои „Лидл“ планира да ги отвори во земјава ќе бидат позиционирани во градовите со одржлива демографска и економска моќ.
