Истрагата за полициските службеници, во врска со пожарот во дискотеката „Пулс“ во Кочани, беше предвидено да заврши до крајот на септември годинава, меѓутоа имаше објективни околности околу сослушување на одредени сведоци, со тоа што најверојатно на почетокот на наредниот месец ќе се донесе и јавнообвинителска одлука, изјави републичкиот јавен обвинител Љупчо Коцевски, прашан до каде се другите истраги и предистраги за пожарот во дискотеката „Пулс“ во Кочани.

Во однос на предистрагата за службениците од УЈП, Коцевски рече, дека се води предистражна постапка во ОЈО Кочани и надлежниот јавен обвинител дал одредени наредби до надлежните институции за преземање на одредени процесни дејствија.

„Во тој дел не можеме се уште ништо да кажеме повеќе“, рече Коцевски.

Видете и ова:

Судењето за пожарот во дискотеката „Пулс“ во Кочани ќе почне на 19 ноември

Судскиот процес за случајот со пожарот во дискотеката „Пулс“ во Кочани почнува следната недела, на 19 ноември и, како што рече Коцевски, Јавното обвинителство има екипираност и веќе се договорени околу начинот на кој обвинителите ќе го застапуваат предметот. Тој уверува дека од страна на ЈО нема да има никаков проблем во однос на судењето.

„Во судница ќе го застапуваат обвинението истите обвинители што беа и досега, меѓутоа морам да нагласам дека вчера имавме состанок, најверојатно уште неколку обвинители ќе ангажираме имајќи предвид, да не се отежне односно да не се наруши постапката на другите обвинители, што имаат други предмети, што значи дека можеби не секогаш ќе присуствуваат сите обвинители, меѓутоа секогаш ќе има обвинители за да не се одолговлекува постапката или да не се одлага по, да не речам, вина на обвинителството“, изјави Коцевски, одговарајќи на новинарски прашања пред денешната седница на Советот на јавни обвинители.

За најголемата трагедија што се случила во Северна Македонија на обвинителна клупа ќе седнат 34 лица, а обвинети се и три фирми. Меѓу нив, поранешни министри за економија и директори на Дирекцијата за заштита и спасување (ДЗС), градоначалници на Кочани, инспектори, одговорни лица во фирмите кои раководеле со ноќниот клуб.

За случајот со „Пулс“ на 5 септември, обвинителството поднесе уште еден обвинителен акт против сопственикот на фирмата за обезбедување „Рубикон“, Александар Нацев.

Трагедијата во Кочани се случи за време на настап на музичката група ДНК, кога искри од пиротехниката го потпалиле таванот во дискотеката, огнот брзо се проширил, а паниката и тесниот излез од објектот предизвикале и стампедо. Во пожарот во „Пулс“, ноќта помеѓу 15 и 16 март, загинаа 63 лица и над 200 беа повредени.

Државната изборна комисија (ДИК) на седница што ја одржа на 12 март ги прогласи локалните избори во Северна Македонија за официјално и конечно завршени.

Членовите на ДИК го донесоа и дополнувањето на заклучокот за конечност на резултати од гласањето на вториот круг за избор на градоначалници на општините и градоначалник на Град Скопје и Заклучокот за завршување на локалните избори 2025 за избор на членови на советите на општините, совет на Град Скопје и градоначалници на општините и градоначалник на Град Скопје.

Претседателот на ДИК Борис Кондарко истакна дека денеска е рокот кога ги објавуваат конечните резултати и заклучокот за завршување на изборите, откако вчера ги добиле официјално и одлуките на Управниот суд со кои се одбиени сите тужби, односно со кои се потврдени одлуките на ДИК за одбивање на претходно донесените приговори.

Приговори и тужби имаше поднесно за гласањето во општините Брвеница, Карпош и Шуто Оризари.

Видете и ова:

И новите градоначалници никој не ќе може да ги смени

Локалните избори се одржаа на 19 октомври (прв круг) и на 2 ноември(втор круг). Според резултатите од двата круга на локалните избори, коалицијата предводена од владејачката партија ВМРО-ДПМНЕ победи во 54 општини и Град Скопје.

Втора по бројот на освоени градоначалнички места е коалицијата ВРЕДИ со девет. Коалицијата на СДСМ ќе има шест градоначалници, НАИ 4, а Движење ЗНАМ и Унијата на Ромите, по еден градоначалник.

Две општини ќе ги водат независни кандидати.

По девет месеци „чекање“, Парламентот на Црна Гора на 12 ноември усвои одлука за приклучување на Армијата на Црна Гора во активностите на НАТО за воспоставување безбедносна помош и обука за Украина (НСАТУ).

За одлуката гласаа 44 пратеници, петмина беа против, а двајца беа воздржани.

Одлуката е донесена врз основа на предлогот усвоен од Советот за одбрана и безбедност на 7 февруари.

Членовите на Советот се согласија во тоа време дека активностите на припадниците на Армијата во рамките на НСАТУ можат да се спроведуваат исклучиво на територијата на една од земјите - членки на НАТО.

НАТО, меѓу другото, ќе ја координира обуката на украинските безбедносни сили.

Министерот за одбрана Драган Краповиќ изјави дека одлуката за продолжување на поддршката на Украина е донесена на самитот на НАТО во Вашингтон минатата година.

Демократската народна партија (ДНП), една од партиите на владејачкото мнозинство, се спротивставува на оваа одлука.

„Тоа може само дополнително да ги загрози нашите односи со Руската Федерација. Би било попаметно да се држиме настрана од конфликтите на никого“, рече Владислав Бојовиќ, пратеник на ДНП.

Ова е една од двете таканаречени „украински мисии“ по руската инвазија во февруари 2022 година во кои се очекува да учествува и Црна Гора. Другата ја организира Европската Унија(ЕУ).

И таа одлука - учеството на црногорски војници во Мисијата за воена помош на Европската Унија во Украина (ЕУМАМ) чекаше 9 месеци за усвојување во Парламентот, од септември 2024 до јуни 2025 година.

Видете и ова:

Пад на поддршката на НАТО во Црна Гора, покажува истражување

Парламентот го води лидерот на прорускиот Демократски фронт, Андрија Мандиќ.

Опозицијата потоа го обвини Мандиќ, кој е противник на НАТО и поддржувач на рускиот претседател Владимир Путин, дека го попречува усвојувањето на одлуката.

Неговата партија, која е дел од владејачката коалиција, се спротивставува на членството во Алијансата и на санкциите што Црна Гора ги воведе врз Русија поради нејзината агресија врз Украина.

Црна Гора се приклучи на НАТО во 2017 година за време на владеењето на Демократската партија на социјалистите (ДПС), која беше отстранета од власт во 2020 година.

Судбината на долгорочниот договор меѓу Украина и Црна Гора е неизвесна.

Договорот за десетгодишна безбедносна соработка што треба да го потпишат премиерот Милојко Спајиќ и украинскиот претседател Володимир Зеленски речиси и не се споменува, иако можноста за пристигнување на Зеленски во Подгорица во оваа пригода беше спомената во мај од претседателот Јаков Милатовиќ.

Договорот се однесува на поддршка во случај на вооружен напад, инвестиции во одбранбената индустрија, разузнавачка соработка, како и обнова на воено разурната Украина.

Сличен договор со Украина потпишаа околу 30 земји, главно членки на НАТО.

И тој договор, откако ќе биде потпишан, треба да биде ратификуван од Парламентот.

Русија и Казахстан се согласија да го зајакнат своето партнерство во нафтениот сектор по разговорите меѓу рускиот претседател Владимир Путин и казахстанскиот претседател Касим - Жомарт Токаев во Кремљ на 12 ноември, јави агенцијата Ројтерс.

„Се согласивме да го зајакнеме нашето партнерство во областите на производство, транспорт и снабдување со нафта, нафтени производи, јаглен и електрична енергија. Детално разговаравме за перспективите за соработка во гасот, особено снабдувањето со гас на регионите на Казахстан што граничат со Русија, како и транзитот до трети земји“, изјави Токаев по разговорите со Путин.

Видете и ова:

Руското производството на гас во Казахстан погодено од украински напад

Путин и Токаев присуствуваа на дводневен состанок во Москва, а тема на разговорите беа гасните проекти и последиците од санкциите на САД врз руските нафтени компании.

Казахстан произведува околу 14 милиони тони нафтени производи годишно - најмногу во Централна Азија - и увезува уште 1,2 милиони тони од Русија секоја година.

Земјата има големи резерви на енергија и поседува технологија за рафинирање на својата нафта.

Нови тимови полицајци од Унгарија се испратени во мисијата за заедничка заштита на границите на Србија и Бугарија, соопшти унгарската полиција.

Во Србија е испратен 36-от полициски контингент, а во Бугарија е пратен 11-тиот контингент.

„Тие ќе извршуваат патролни задачи за спречување и откривање на нелегални гранични преминувања, како и апсење на шверцери на луѓе и нелегални мигранти на територијата на земјите домаќини“, изјави секретарот на унгарското Министерство за внатрешни работи, Бенце Ретвари.

Секретарот Ретвари изјави дека мисијата е долгорочна, успешна и дава конкретни резултати.

„Заедничката работа на Унгарија, Србија и Бугарија придонесува за поефикасна заштита на границите, сузбивање на нелегалната миграција и брзо враќање на лицата кои нелегално ја преминуваат границата, со што се зголемува безбедноста во регионот“, рече Ретвари.

Унгарските полицајци, како што е најавено, ќе патролираат и по патиштата во пограничните области со цел да се зачува јавната безбедност.

Унгарија е членка на Европската Унија (ЕУ) чија јужна граница, од правец на Србија, е една од најоптоварените од приливот мигранти кои се упатуваат кон западните земји во минатата деценија. Во последниве години, западната граница на Бугарија, исто така членка на ЕУ, е една од рутите преку кои мигрантите преку соседна Србија се обидуваат да стигнат до Хрватска, Австрија, Германија и скандинавските земји.

Српската царина објави дека на 5 ноември, во Шид на границата со Хрватска, полицијата пронашла шест мигранти во камион со пченица што се движел кон Италија. Четири возрасни, еден тинејџер и единаесетгодишно дете биле спасени од товарот на камионот.

Унгарија и Србија имаат заеднички патроли на границата на двете земји од 15 октомври 2021 година.

Видете и ова:

Намален бројот на илегални преминувања во ЕУ за 35 отсто

Како што беше објавено, унгарските полицајци ги извршуваат своите должности под надзор на властите на земјата домаќин, патролираат во непосредна близина на границата и во подалечни области, користат службени возила за сите терени, уреди за ноќно гледање, рачни и мобилни термални камери.

На крајот на јуни 2024 година, Европската Унија потпиша договор со Белград за оперативни активности со Европската агенција за гранична и крајбрежна стража (Фронтекс), што подразбира распоредување на членови на Фронтекс низ целата територија на Србија и спроведување на извршни овластувања како што се гранични проверки и регистрација на лица.

Дотогаш, според претходниот договор за статус меѓу Белград и Брисел, Фронтекс и Србија имаа заеднички операции само на границата на Србија со земјите од Европската Унија. Врз основа на тој закон, Фронтекс имаше 111 членови во заедничка операција на границите на Србија со Унгарија и Бугарија.

Според податоците од европските организации кои се занимаваат со прашањето на миграцијата, од почетокот на светската мигрантска криза до денес, повеќе од милион и пол мигранти поминале низ Србија по таканаречената балканска рута. Во тие десет години, мигранти и бегалци од Азија, Блискиот Исток и Африка поминале низ овој пат обидувајќи се да стигнат до земјите од Европската Унија. Рутата минувала низ Турција, Грција, Северна Македонија, Србија, Босна и Херцеговина и Хрватска, или алтернативно низ Бугарија и Србија кон западот на Европа.

На Светскиот ден на бегалците, 20 јуни, Комесаријатот за бегалци и миграција објави дека во прифатните и азилантските центри во Србија има 307 мигранти од Авганистан, Египет, Турција, Сирија и Мароко. Беше наведено дека од почетокот на годината во центрите се регистрирани 3.636 лица и дека ова е половина од бројот во споредба со истиот период во 2024 година.

Кривичниот суд, Јавното обвинителство и Адвокатската комора уверуваат дека ќе направат сѐ за судењето за пожарот во дискотеката „Пулс“ во Кочани, во која животот го загубија 63 лица, а беа повредени околу 200, да се одвива непречено и ефикасно.

Од Кривичниот суд информираат дека ќе бидат преземени засилени безбедносни мерки, вклучително и присуство на лекарска екипа. Оштетените сведоци нема да можат да ја следат постапката до нивното сослушување.

Најавуваат строга контрола на лекарските оправдувања и другата медицинска документација, со која учесниците во процесот ќе бараат одложување од здравствени причини, а се внимавало и на возраста на поротниците во судечкиот совет, затоа што ним мандатот им престанува на возраст од 60 години.

Судењето ќе почне на 19 ноември, а на денешниот брифинг со новинарите беше кажано дека ќе се води со темпо од две рочишта неделно. Првичните термини се закажани за 19, 25 и 26 ноември. Процесот ќе го суди судијката Диана Груевска Илиевска.

Државниот јавен обвинител Љупчо Коцевски веќе соопшти дека обвинителството е целосно подготвено, со проширен тим од 15 обвинители, со цел како што рече, да не се дозволи одложување на рочиштата.

Иако доказниот материјал е обемен, тој истакна дека постапката ќе биде ефикасна и фер.

Видете и ова:

Петнаесет обвинители ќе го застапуваат предметот за пожарот во „Пулс“

Од Адвокатската комора повикаа на дисциплина и професионалност од страна на адвокатите, со цел да се овозможи непречено одвивање на процесот и заштита на правата на оштетените.

Со оглед на чувствителноста на случајот и бројот на оштетени (над 200) надлежните упатија апел до медиумите и јавноста да се воздржат од сензационализам и да известуваат со почит кон жртвите и нивните семејства.

Случајот опфаќа 38 обвинети, односно 35 физички и три правни лица. Помеѓу обвинетите кои се товарат за тешки дела против општата сигурност се сопственици на локали, управители, инспектори, градоначалници, членови на обезбедување и државни службеници.

Трагедијата во Кочани се случи за време на настап на музичката група ДНК, кога искри од пиротехниката го потпалиле таванот во дискотеката, огнот брзо се проширил, а паниката и тесниот излез од објектот предизвикале и стампедо.

Во пожарот во „Пулс“, ноќта помеѓу 15 и 16 март, загинаа 63 лица, а над 200 беа повредени.

Политиката нема право да се меша во академската слобода, а обврска на членовите на ова тело е да дебатираат и да носат заклучоци, засновани на научни методи, порача министерот за надворешни работи и надворешна трговија Тимчо Муцунски во врска со работата на Македонско-бугарската експертска комисија за историски и образовни прашања.

„Обврската на членовите на таа комисија е да дискутираат, дебатираат и ако успеат да донесат некои заклучоци врз основа на нивните научни познавања. Така што, политиката ги има тргнато рацете, откако Владата ја предводи премиерот Мицкоски и откако јас сум министер за надворешни работи и надворешна трговија“, рече Муцунски на денешната прес-конференција во Владата, одговарајќи на новинарско прашање да даде коментар на изјавата на бугарскиот копретседавач на Комисијата, Ангел Димитров дека Комисијата стагнира во своето работење.

Видете и ова:

Средба има, напредок нема на историската комисија во Софија за заеднички чествувања и учебници за VII одделение

Муцунски нагласи дека ниту имаат направено притисок, ниту влијаат на работата на членовите на Комисијата.

„Ние не смееме да правиме какви било притисоци, ниту со наше толкување на фактите, ниту со поставување какви било временски рамки. Тие имаат слобода да работат онака како што сметаат дека е најдобро“, одговори Муцунски.

Димитров за БНТ изјави дека Комисијата „е еден вид алиби во моментално многу комплицираните односи меѓу Бугарија и Северна Македонија“ и додаде дека смета оти нејзината работа во моментов стагнира.

Заедничката мултидисциплинарна експертска комисија за историски и образовни прашања минатата недела во Скопје ја одржа 38. редовна средба, согласно годишниот план за работа.

Во соопштението од Комисијата беше наведено дека за време на средбата од македонска страна биле доставени новите учебници за Историја и општество за V и VI одделение и се разговарало околу идниот пристап и методологија во однос на дискусиите околу учебниците.

Следната средба на Комсијата ќе се одржи во првата половина на декември во Софија.

Во периодот јули 2024-јуни 2025 година бројот на илегални преминувања на надворешните граници на ЕУ бележи намалување на 35 отсто, се наведува во Првиот годишен извештај за управување со миграцијата што го објави Европската комисија.

Во извештајот се наведува дека во периодот што тој го опфаќа, од јули 2024 до јуни 2025 година, е нотирано континуирано подобрување на миграциската состојба, со намалување на илегалните гранични преминувања за 35 отсто, како резултат на подобрената соработка со земјите партнери на ЕУ.

Во документот се нагласува дека и покрај овој напредок, остануваат предизвици поврзани со континуираниот притисок од нерегуларните пристигнувања и движења во рамките на ЕУ, со сместувањето на бегалците од Украина, со злоупотребата на миграцијата од страна на Русија и Белорусија на надворешните граници, како и со соработката во однос на враќањето и реадмисијата на илегалните мигранти.

„Земјите членки продолжуваат да напредуваат во спроведувањето на Пактот за миграција и азил и во обезбедувањето нивните национални системи за азил, прием и миграција да бидат подготвени до јуни 2026 година. Сепак, постои општа потреба да се забрза темпото на овие реформи. Постојаниот напредок во спроведувањето на сите компоненти на Пактот, трендот на намалување на нерегуларните пристигнувања и проекцијата за следната година, заедно со охрабрувачките резултати од сеопфатната соработка со земјите партнери, поставуваат солидна основа за ефикасно управување со миграцијата и азилот“, заклучува Европската комисија.

Видете и ова:

Бројот на мигранти во Велика Британија достигна нов рекорд

Во Извештајот се оценува дека Грција, Италија, Кипар и Шпанија се „под миграциски притисок“ како резултат на високото ниво на пристигнувања на мигранти во текот на изминатата година, поради што овие четири земји ќе имаат приоритет во остварувањето на правото на помош од Фондот за солидарност, кој би требало да стане оперативен со стапувањето во сила на Пактот за миграција и азил.

Од друга страна, за Белгија, Бугарија, Германија, Естонија, Ирска, Летонија, Литванија, Полска, Финска, Франција, Холандија и Хрватска, Комисијата проценува дека се изложени на „ризик од миграциски притисок“, како поради големиот број пристигнувања на мигранти во текот на претходната година, така и поради актуелната преоптовареност на нивните системи за прием.

За Австрија, Бугарија, Естонија, Полска, Хрватска и Чешка, се оценува и дека се соочуваат со „сериозна миграциска ситуација“ поради миграциските притисоци од последните пет години.

Според еврокомесарот за внатрешни работи и миграција, Магнус Брунер клучно за успехот на ЕУ во справувањето со предизвиците со миграцијата и азилот е зачувување на рамнотежата помеѓу солидарноста и одговорноста.

Извештајот дава сеопфатен преглед на состојбата со азилот и миграцијата во ЕУ и ги идентификува миграциските предизвици со кои се соочуваат земјите членки. Дополнително, со промоцијата на овој документ, Еврокомисијата предложи и создавање на Годишен фонд за солидарност.

ЕК најави и дека наскоро ќе објави и тендер вреден 250 милиони евра за поддршка во набавка на дронови и системи за справување со беспилотните летала, со цел за да им помогне на земјите членки кои се соочуваат со хибридни закани и зголемени упади на дронови.

Украинскиот министер за правда, Герман Галушченко, е суспендиран од функцијата по претресите поврзани со сеопфатна истрага за корупција во енергетскиот сектор на земјата, изјави премиерката Јулија Свириденко.

Акцијата е преземена за време на вонредниот состанок на кабинетот во среда наутро, изјави Свириденко во соопштението.

„Одлучивме да го суспендираме Герман Галушченко од вршење на должноста министер за правда“, рече таа, додавајќи дека неговите должности ѝ се доделени на заменик-министерот за правда за европски интеграции, Људмила Сухак.

Галушченко, поранешен министер за енергетика, кој беше министер за правда од јули, беше претресен во вторникот од страна на полицијата. Тој е меѓу неколку осомничени во она што украинските власти го опишуваат како далекусежна истрага за корупција поврзана со енергетската инфраструктура.

Иако коруптивни зделки поврзани со договори за оружје се појавија и претходно во Украина, ова е еден од најголемите вакви скандали во земјата откако започна целосната инвазија на Русија пред повеќе од три и пол години.

Галушченко на социјалните медиуми изјави дека се согласува со одлуката на владата, нарекувајќи ја „цивилизиран и коректен“ чекор додека истрагите се во тек. Тој вети дека ќе соработува со обвинителите додека целосно се брани. Властите не дадоа никакви детали за обвинувањата против Галушченко.

Видете и ова:

Голема антикорупциска операција во украинскиот енергетски сектор

Министерството за правда потврди дека им помага на истражителите, повторувајќи дека има „нулта толеранција“ за корупција.

Националното биро за борба против корупцијата (НАБУ) и Специјализираното обвинителство за борба против корупцијата (САП) соопштија дека истражуваат наводен поткуп во кој е вклучена државната нуклеарна компанија „Енергоатом“.

Случајот се фокусира на милиони долари мито наводно платени за време на изградбата на заштитни структури околу енергетските објекти наменети да ги заштитат од руски воздушни напади. Властите во вторникот соопштија дека пет лица се приведени, а седум се под истрага. Групата е осомничена за перење мито од околу 100 милиони долари.

Во центарот на истрагата е Тимур Миндич, долгогодишен соработник и деловен партнер на претседателот Володимир Зеленски од неговите денови работејќи во забавната индустрија. Обвинителите го обвинуваат Миндич за вршење влијание не само врз Галушченко, туку и врз поранешниот министер за одбрана Рустем Умеров. Умеров призна дека имал контакт со Миндич, но негираше какво било кривично дело. Миндич, кој е опишан како главен осомничен, наводно се обидел да влијае на државните одлуки „во енергетскиот и одбранбениот сектор“, рекоа обвинителите.

Се верува дека тој избегал од Украина. Зеленски побара сите што се прогласени за виновни да бидат казнети без оглед на нивната позиција или политички врски.

„Енергоатом“ соопшти дека истрагата немала влијание врз неговата финансиска стабилност, производство на енергија или нуклеарна безбедност.

Властите во Романија уапсија поранешен сенатор за наводен обид да понуди поткуп од милион евра (1,16 милиони долари) на министерот за одбрана на земјата за да олесни договор за оружје кој би можел да биде лажно финансиран од програма на Европската Унија.

Договорот бил сложен: купување гранати од руско потекло во Казахстан, нивно увезување во Романија, потоа реновирање и препакување како романски гранати и на крај нивно продавање во Украина преку посредници во Бугарија.

Идејата била да се создаде шема за идни бизниси што би можеле да добијат финансирање од програмата на ЕУ „Вооружете ја Европа“, започната во март за поддршка на производството на оружје во 27 земји-членки. Гранатите од руско потекло се широко користени во Украина, но не се произведуваат во земјите од ЕУ.

Романскиот сервис на РСЕ разговараше со две клучни лица во случајот.

Едната опиша како поранешниот сенатор Мариус Овидиу Исаила ѝ пристапил, а другиот како била контактирана од бугарскиот бизнисмен Роман Иванов Ангелов.

На почетокот на октомври, Ангелов наводно предводел делегација која контактирала со директорот на „Ромтехника“, компанија за трговија со оружје што го претставува романското Министерство за одбрана, обидувајќи се да ги искористи неговите контакти во Казахстан.

„Сомнителна“ понуда

„Ми понудија договор. Ќе земавме муниција од Казахстан и ќе им ја препродававме“, изјави за Радио Слободна Европа раководителот на „Ромтехника“, Разван Минцу.

Но, Минц рече дека понудата изгледала „сомнителна“ и ги отфрлил предлозите.

Според извештајот на романските обвинители, Исаила контактирал посредник за да се обиде да го поткупи министерот за одбрана Јонут Мостеану за да го олесни договорот.

РСЕ разговараше со посредникот, политичарот Октавијан Берчеан, кој станал информатор и направил 17 тајни снимки за органите за спроведување на законот за време на неговите состаноци со Исаила.

„Станува збор за група која сака да донесе руска или муниција од руски тип во Романија, која потоа може да ја извезе во Бугарија, а оттаму во Украина. Сè (купено) со пари од Европската Унија. Ми понудија 10 милиони евра (11,57 милиони долари) за да бидам дел од таа група. Тоа е метод, тие им нудат импресивни суми на политичарите за да ги придобијат.“

Видете и ова:

Романија вели дека САД ќе го намалат бројот на војници во Европа

Изјавите на Исаила во транскриптите од снимките на Берчану, објавени на 10 ноември од романскиот портал Гандул, сугерираат дека тој соработувал со други - честопати алудирајќи на „нас“ и алудирајќи на големи суми пари и политичко влијание.

Во еден момент беше цитиран како вели: „Јас сум оној што ја отвора вратата! И јас ја отворам вратата за вас: НАТО, амбасадата на САД, Германија.“

Во друга размена на пораки, беше цитиран како му вели на Берчану: „Кажи ми колку ти треба, а навечер за 24 часа ќе ги имаш сите пари.“

Исаила е цитиран и како опишува како ќе функционира шемата: „Ние купуваме гранати од Казахстан, сами ги расклопуваме, ги носиме расклопени тука, па повторно ги составуваме, ги боиме, ги средуваме и романската држава ги продава.“

„Милијардери преку ноќ“

Во транскриптите, Исаила исто така сугерира дека слична шема веќе е имплементирана во Албанија, правејќи ги оние што учествувале во шемата „милијардери преку ноќ“. Министерството за одбрана на Албанија и агенцијата за борба против корупцијата не одговорија веднаш на барањата на РСЕ.

Министерот за одбрана Мостеану на социјалните мрежи објави дека „едно лице се обидело да го купи моето влијание со милион евра за да олесни договор со Ромтехника. Категорично одбива каква било средба со тоа лице“.

Иако Исаила беше ставен во притвор 30 дена, не е познато каде се наоѓа бугарскиот бизнисмен Роман Ангелов. Ангелов е единствен сопственик на компанијата Софија Арм Тек, која минатата година доби лиценца за меѓународна трговија со оружје.

Пред тоа, компанијата не наведе никаква активност во документите што ги поднела до Бугарскиот трговски регистар по нејзиното основање во 2020 година. Податоците покажуваат дека има осум вработени. Немаше одговор од Ангелов или од компанијата на прашањата на бугарскиот сервис на РСЕ.

Илјадници студенти и граѓани, под слоганот „Ние сме жив ѕид“, протестираа против уривањето на комплексот на Генералштабот во Белград.

Протестот доаѓа откако српските власти, преку посебен закон (lex specialis), отворија пат за изградба на местото на зградите оштетени во бомбардирањето на НАТО на Сојузна Република Југославија во 1999 година.

Протестот го повикаа на 11 ноември студентите во блокадата на белградските факултети.

За време на протестот, студентите нацртаа црвена линија околу парцелите каде што се наоѓа комплексот на Генералштабот, а толпата формираше круг околу зградите, односно „жив ѕид“.

Како што истакнуваат, тие исто така сакаа да испратат симболична порака дека се против уривањето.

„Нашите барања се укинување на таканаречениот lex specialis за комплексот и парцелата на Генералштабот, поништување на незаконската одлука на Владата на Република Србија и враќање на статусот на културно добро на Генералштабот“, рече една од студентките во своето обраќање пред насобраните луѓе.

Видете и ова:

На повик на студентите во блокада, протест против уривањето на Генералштабот во Белград

Таа додаде дека студентите бараат и завршување на истрагата од страна на Обвинителството за организиран криминал за фалсификувањето на документот со кој српската влада го одзеде статусот на Генералштабот како културно богатство во ноември 2024 година.

„Ова е нашето прво предупредување. Нема да се откажеме од Генералштабот“, рече таа.

Специјалниот закон (lex specialis), усвоен од Парламентот на 7 ноември, предвидува дека сите процедури за проектот за ревитализација на Генералштабот се сметаат за итни.

Според законот, државните органи се должни да донесат акти во рамки на нивната надлежност без одлагање, со цел да се овозможи процесот на ревитализација.

Идејата за изградба на луксузни повеќекатни згради на местото на Генералштабот ги подели граѓаните, а на проектот се спротивставуваат и професионалци кои инсистираат на зачувување на статусот на културно богатство за комплексот.