Вашингтон им соопшти на Романија и на сојузниците дека ќе намали дел од американските трупи распоредени на источното крило на НАТО, соопшти романското Министерство за одбрана во среда, 29 октомври.

Одлуката не е „повлекување“, изјави романскиот министер за одбрана Јонут Мостеану за новинарите кратко по објавувањето на соопштението.

„Тоа е прекинување на ротацијата на бригада што имаше елементи во неколку земји на НАТО, вклучувајќи ги Бугарија, Романија, Словачка и Унгарија“, истакна министерот.

Во соопштението на министерството се наведува дека 1000 американски војници ќе останат распоредени во Романија.

Тие ќе помогнат „да се одврати каква било закана“ и претставуваат „гаранција за посветеноста на Соединетите Држави кон регионалната безбедност“, рече Мостеану.

Функционер на НАТО за АФП изјави биле однапред информирани од администрацијата на американскиот претседател Доналд Трамп и го минимизираше овој потег.

„Дури и со ова прилагодување, позицијата на американските сили во Европа останува поголема отколку што беше со години, со многу повеќе американски сили на континентот отколку пред 2022 година“, рече функционерот, додавајќи дека посветеноста на Вашингтон кон алијансата останува „јасна“.

Видете и ова:

По упадите на руските беспилотни летала, НАТО ја зајакнува одбраната на источното крило

Мостеану рече дека стратешките капацитети се „непроменети“, прецизирајќи дека „системот за ракетна одбрана во Девеселу останува целосно оперативен.

„Воздухопловната база Кампија Турзи продолжува да биде клучна точка за воздушни операции и сојузничка соработка, базата Михаил Когалничеану продолжува да се развива, а американското знаме ќе остане присутно на сите три локации“, продолжи тој.

„Воздухопловната борбена група ќе остане во воздухопловната база Когзлничеану, како што беше случај пред избувнувањето на конфликтот во Украина“, додаде тој.

Неговото министерство, исто така, рече дека „одлуката била очекувана“ и дека е „резултат на новите приоритети на (американската) администрација, објавени во февруари“.

Политиката нема право да се меша во академската слобода, а обврска на членовите на ова тело е да дебатираат и да носат заклучоци, засновани на научни методи, порача министерот за надворешни работи и надворешна трговија Тимчо Муцунски во врска со работата на Македонско-бугарската експертска комисија за историски и образовни прашања.

„Обврската на членовите на таа комисија е да дискутираат, дебатираат и ако успеат да донесат некои заклучоци врз основа на нивните научни познавања. Така што, политиката ги има тргнато рацете, откако Владата ја предводи премиерот Мицкоски и откако јас сум министер за надворешни работи и надворешна трговија“, рече Муцунски на денешната прес-конференција во Владата, одговарајќи на новинарско прашање да даде коментар на изјавата на бугарскиот копретседавач на Комисијата, Ангел Димитров дека Комисијата стагнира во своето работење.

Видете и ова:

Средба има, напредок нема на историската комисија во Софија за заеднички чествувања и учебници за VII одделение

Муцунски нагласи дека ниту имаат направено притисок, ниту влијаат на работата на членовите на Комисијата.

„Ние не смееме да правиме какви било притисоци, ниту со наше толкување на фактите, ниту со поставување какви било временски рамки. Тие имаат слобода да работат онака како што сметаат дека е најдобро“, одговори Муцунски.

Димитров за БНТ изјави дека Комисијата „е еден вид алиби во моментално многу комплицираните односи меѓу Бугарија и Северна Македонија“ и додаде дека смета оти нејзината работа во моментов стагнира.

Заедничката мултидисциплинарна експертска комисија за историски и образовни прашања минатата недела во Скопје ја одржа 38. редовна средба, согласно годишниот план за работа.

Во соопштението од Комисијата беше наведено дека за време на средбата од македонска страна биле доставени новите учебници за Историја и општество за V и VI одделение и се разговарало околу идниот пристап и методологија во однос на дискусиите околу учебниците.

Следната средба на Комсијата ќе се одржи во првата половина на декември во Софија.

Во периодот јули 2024-јуни 2025 година бројот на илегални преминувања на надворешните граници на ЕУ бележи намалување на 35 отсто, се наведува во Првиот годишен извештај за управување со миграцијата што го објави Европската комисија.

Во извештајот се наведува дека во периодот што тој го опфаќа, од јули 2024 до јуни 2025 година, е нотирано континуирано подобрување на миграциската состојба, со намалување на илегалните гранични преминувања за 35 отсто, како резултат на подобрената соработка со земјите партнери на ЕУ.

Во документот се нагласува дека и покрај овој напредок, остануваат предизвици поврзани со континуираниот притисок од нерегуларните пристигнувања и движења во рамките на ЕУ, со сместувањето на бегалците од Украина, со злоупотребата на миграцијата од страна на Русија и Белорусија на надворешните граници, како и со соработката во однос на враќањето и реадмисијата на илегалните мигранти.

„Земјите членки продолжуваат да напредуваат во спроведувањето на Пактот за миграција и азил и во обезбедувањето нивните национални системи за азил, прием и миграција да бидат подготвени до јуни 2026 година. Сепак, постои општа потреба да се забрза темпото на овие реформи. Постојаниот напредок во спроведувањето на сите компоненти на Пактот, трендот на намалување на нерегуларните пристигнувања и проекцијата за следната година, заедно со охрабрувачките резултати од сеопфатната соработка со земјите партнери, поставуваат солидна основа за ефикасно управување со миграцијата и азилот“, заклучува Европската комисија.

Видете и ова:

Бројот на мигранти во Велика Британија достигна нов рекорд

Во Извештајот се оценува дека Грција, Италија, Кипар и Шпанија се „под миграциски притисок“ како резултат на високото ниво на пристигнувања на мигранти во текот на изминатата година, поради што овие четири земји ќе имаат приоритет во остварувањето на правото на помош од Фондот за солидарност, кој би требало да стане оперативен со стапувањето во сила на Пактот за миграција и азил.

Од друга страна, за Белгија, Бугарија, Германија, Естонија, Ирска, Летонија, Литванија, Полска, Финска, Франција, Холандија и Хрватска, Комисијата проценува дека се изложени на „ризик од миграциски притисок“, како поради големиот број пристигнувања на мигранти во текот на претходната година, така и поради актуелната преоптовареност на нивните системи за прием.

За Австрија, Бугарија, Естонија, Полска, Хрватска и Чешка, се оценува и дека се соочуваат со „сериозна миграциска ситуација“ поради миграциските притисоци од последните пет години.

Според еврокомесарот за внатрешни работи и миграција, Магнус Брунер клучно за успехот на ЕУ во справувањето со предизвиците со миграцијата и азилот е зачувување на рамнотежата помеѓу солидарноста и одговорноста.

Извештајот дава сеопфатен преглед на состојбата со азилот и миграцијата во ЕУ и ги идентификува миграциските предизвици со кои се соочуваат земјите членки. Дополнително, со промоцијата на овој документ, Еврокомисијата предложи и создавање на Годишен фонд за солидарност.

ЕК најави и дека наскоро ќе објави и тендер вреден 250 милиони евра за поддршка во набавка на дронови и системи за справување со беспилотните летала, со цел за да им помогне на земјите членки кои се соочуваат со хибридни закани и зголемени упади на дронови.

Украинскиот министер за правда, Герман Галушченко, е суспендиран од функцијата по претресите поврзани со сеопфатна истрага за корупција во енергетскиот сектор на земјата, изјави премиерката Јулија Свириденко.

Акцијата е преземена за време на вонредниот состанок на кабинетот во среда наутро, изјави Свириденко во соопштението.

„Одлучивме да го суспендираме Герман Галушченко од вршење на должноста министер за правда“, рече таа, додавајќи дека неговите должности ѝ се доделени на заменик-министерот за правда за европски интеграции, Људмила Сухак.

Галушченко, поранешен министер за енергетика, кој беше министер за правда од јули, беше претресен во вторникот од страна на полицијата. Тој е меѓу неколку осомничени во она што украинските власти го опишуваат како далекусежна истрага за корупција поврзана со енергетската инфраструктура.

Иако коруптивни зделки поврзани со договори за оружје се појавија и претходно во Украина, ова е еден од најголемите вакви скандали во земјата откако започна целосната инвазија на Русија пред повеќе од три и пол години.

Галушченко на социјалните медиуми изјави дека се согласува со одлуката на владата, нарекувајќи ја „цивилизиран и коректен“ чекор додека истрагите се во тек. Тој вети дека ќе соработува со обвинителите додека целосно се брани. Властите не дадоа никакви детали за обвинувањата против Галушченко.

Видете и ова:

Голема антикорупциска операција во украинскиот енергетски сектор

Министерството за правда потврди дека им помага на истражителите, повторувајќи дека има „нулта толеранција“ за корупција.

Националното биро за борба против корупцијата (НАБУ) и Специјализираното обвинителство за борба против корупцијата (САП) соопштија дека истражуваат наводен поткуп во кој е вклучена државната нуклеарна компанија „Енергоатом“.

Случајот се фокусира на милиони долари мито наводно платени за време на изградбата на заштитни структури околу енергетските објекти наменети да ги заштитат од руски воздушни напади. Властите во вторникот соопштија дека пет лица се приведени, а седум се под истрага. Групата е осомничена за перење мито од околу 100 милиони долари.

Во центарот на истрагата е Тимур Миндич, долгогодишен соработник и деловен партнер на претседателот Володимир Зеленски од неговите денови работејќи во забавната индустрија. Обвинителите го обвинуваат Миндич за вршење влијание не само врз Галушченко, туку и врз поранешниот министер за одбрана Рустем Умеров. Умеров призна дека имал контакт со Миндич, но негираше какво било кривично дело. Миндич, кој е опишан како главен осомничен, наводно се обидел да влијае на државните одлуки „во енергетскиот и одбранбениот сектор“, рекоа обвинителите.

Се верува дека тој избегал од Украина. Зеленски побара сите што се прогласени за виновни да бидат казнети без оглед на нивната позиција или политички врски.

„Енергоатом“ соопшти дека истрагата немала влијание врз неговата финансиска стабилност, производство на енергија или нуклеарна безбедност.

Властите во Романија уапсија поранешен сенатор за наводен обид да понуди поткуп од милион евра (1,16 милиони долари) на министерот за одбрана на земјата за да олесни договор за оружје кој би можел да биде лажно финансиран од програма на Европската Унија.

Договорот бил сложен: купување гранати од руско потекло во Казахстан, нивно увезување во Романија, потоа реновирање и препакување како романски гранати и на крај нивно продавање во Украина преку посредници во Бугарија.

Идејата била да се создаде шема за идни бизниси што би можеле да добијат финансирање од програмата на ЕУ „Вооружете ја Европа“, започната во март за поддршка на производството на оружје во 27 земји-членки. Гранатите од руско потекло се широко користени во Украина, но не се произведуваат во земјите од ЕУ.

Романскиот сервис на РСЕ разговараше со две клучни лица во случајот.

Едната опиша како поранешниот сенатор Мариус Овидиу Исаила ѝ пристапил, а другиот како била контактирана од бугарскиот бизнисмен Роман Иванов Ангелов.

На почетокот на октомври, Ангелов наводно предводел делегација која контактирала со директорот на „Ромтехника“, компанија за трговија со оружје што го претставува романското Министерство за одбрана, обидувајќи се да ги искористи неговите контакти во Казахстан.

„Сомнителна“ понуда

„Ми понудија договор. Ќе земавме муниција од Казахстан и ќе им ја препродававме“, изјави за Радио Слободна Европа раководителот на „Ромтехника“, Разван Минцу.

Но, Минц рече дека понудата изгледала „сомнителна“ и ги отфрлил предлозите.

Според извештајот на романските обвинители, Исаила контактирал посредник за да се обиде да го поткупи министерот за одбрана Јонут Мостеану за да го олесни договорот.

РСЕ разговараше со посредникот, политичарот Октавијан Берчеан, кој станал информатор и направил 17 тајни снимки за органите за спроведување на законот за време на неговите состаноци со Исаила.

„Станува збор за група која сака да донесе руска или муниција од руски тип во Романија, која потоа може да ја извезе во Бугарија, а оттаму во Украина. Сè (купено) со пари од Европската Унија. Ми понудија 10 милиони евра (11,57 милиони долари) за да бидам дел од таа група. Тоа е метод, тие им нудат импресивни суми на политичарите за да ги придобијат.“

Видете и ова:

Романија вели дека САД ќе го намалат бројот на војници во Европа

Изјавите на Исаила во транскриптите од снимките на Берчану, објавени на 10 ноември од романскиот портал Гандул, сугерираат дека тој соработувал со други - честопати алудирајќи на „нас“ и алудирајќи на големи суми пари и политичко влијание.

Во еден момент беше цитиран како вели: „Јас сум оној што ја отвора вратата! И јас ја отворам вратата за вас: НАТО, амбасадата на САД, Германија.“

Во друга размена на пораки, беше цитиран како му вели на Берчану: „Кажи ми колку ти треба, а навечер за 24 часа ќе ги имаш сите пари.“

Исаила е цитиран и како опишува како ќе функционира шемата: „Ние купуваме гранати од Казахстан, сами ги расклопуваме, ги носиме расклопени тука, па повторно ги составуваме, ги боиме, ги средуваме и романската држава ги продава.“

„Милијардери преку ноќ“

Во транскриптите, Исаила исто така сугерира дека слична шема веќе е имплементирана во Албанија, правејќи ги оние што учествувале во шемата „милијардери преку ноќ“. Министерството за одбрана на Албанија и агенцијата за борба против корупцијата не одговорија веднаш на барањата на РСЕ.

Министерот за одбрана Мостеану на социјалните мрежи објави дека „едно лице се обидело да го купи моето влијание со милион евра за да олесни договор со Ромтехника. Категорично одбива каква било средба со тоа лице“.

Иако Исаила беше ставен во притвор 30 дена, не е познато каде се наоѓа бугарскиот бизнисмен Роман Ангелов. Ангелов е единствен сопственик на компанијата Софија Арм Тек, која минатата година доби лиценца за меѓународна трговија со оружје.

Пред тоа, компанијата не наведе никаква активност во документите што ги поднела до Бугарскиот трговски регистар по нејзиното основање во 2020 година. Податоците покажуваат дека има осум вработени. Немаше одговор од Ангелов или од компанијата на прашањата на бугарскиот сервис на РСЕ.

Илјадници студенти и граѓани, под слоганот „Ние сме жив ѕид“, протестираа против уривањето на комплексот на Генералштабот во Белград.

Протестот доаѓа откако српските власти, преку посебен закон (lex specialis), отворија пат за изградба на местото на зградите оштетени во бомбардирањето на НАТО на Сојузна Република Југославија во 1999 година.

Протестот го повикаа на 11 ноември студентите во блокадата на белградските факултети.

За време на протестот, студентите нацртаа црвена линија околу парцелите каде што се наоѓа комплексот на Генералштабот, а толпата формираше круг околу зградите, односно „жив ѕид“.

Како што истакнуваат, тие исто така сакаа да испратат симболична порака дека се против уривањето.

„Нашите барања се укинување на таканаречениот lex specialis за комплексот и парцелата на Генералштабот, поништување на незаконската одлука на Владата на Република Србија и враќање на статусот на културно добро на Генералштабот“, рече една од студентките во своето обраќање пред насобраните луѓе.

Видете и ова:

На повик на студентите во блокада, протест против уривањето на Генералштабот во Белград

Таа додаде дека студентите бараат и завршување на истрагата од страна на Обвинителството за организиран криминал за фалсификувањето на документот со кој српската влада го одзеде статусот на Генералштабот како културно богатство во ноември 2024 година.

„Ова е нашето прво предупредување. Нема да се откажеме од Генералштабот“, рече таа.

Специјалниот закон (lex specialis), усвоен од Парламентот на 7 ноември, предвидува дека сите процедури за проектот за ревитализација на Генералштабот се сметаат за итни.

Според законот, државните органи се должни да донесат акти во рамки на нивната надлежност без одлагање, со цел да се овозможи процесот на ревитализација.

Идејата за изградба на луксузни повеќекатни згради на местото на Генералштабот ги подели граѓаните, а на проектот се спротивставуваат и професионалци кои инсистираат на зачувување на статусот на културно богатство за комплексот.

Турското Министерство за одбрана во вторник објави дека турски воен товарен авион се урнал во близина на границата меѓу Азербејџан и Грузија.

Министерството на социјалните мрежи објави дека авионот Ц-130 полетал од Азербејџан и бил на пат кон Турција.

„Во нашиот авион што се урна имало 20 лица, вклучувајќи го и екипажот“, соопшти министерството.

Турските власти додадоа дека е започната спасувачка операција во соработка со Азербејџан и Грузија.

На социјалните мрежи циркулираат неколку кратки видеа од несреќата, од кои едно го прикажува целиот труп и делови од авионот како паѓаат на земја.

Исто така, имаше извештаи дека пилотот успеал да се катапултира од авионот, иако оваа информација не е потврдена.

Во Коалицијата ВРЕДИ постои согласност местото на Изет Меџити, по неговиот избор за градоначалник на Чаир, да го преземе Беким Сали, изјави денеска вицепремиерот за добро владеење Арбен Фетаи.

Тој посочи дека во текот на неделата коалицијата ќе одржи состанок со премиерот Христијан Мицкоски за да се најде заедничко решение околу реконструкцијата на Владата.

Фетаи коментираше и за критиките упатени кон министерката за образование Весна Јаневска, нагласувајќи дека таа веќе се извинила за случувањето во Тетово.

Потврди дека лично започнал да го учи македонскиот јазик, истакнувајќи дека нема проблем со користење на повеќе јазици.

Видете и ова:

И новите градоначалници никој не ќе може да ги смени

Говорејќи за состојбата со корупцијата, Фетаи рече дека најголемите предизвици за државата се криминалот и корупцијата на високо ниво, кризата во Државната комисија за спречување на корупцијата и потребата од реформи во правосудството.

Тој нагласи дека Владата ќе продолжи да делува неселективно и дека во изминатите 16 месеци биле регистрирани само два изолирани случаи на корупција за кои веднаш биле преземени мерки.

Фетаи денеска учествуваше на 10. Годишна регионална конференција за координација на безбедноста во Западен Балкан.

Истрагата за полициските службеници, во врска со пожарот во дискотеката „Пулс“ во Кочани, беше предвидено да заврши до крајот на септември годинава, меѓутоа имаше објективни околности околу сослушување на одредени сведоци, со тоа што најверојатно на почетокот на наредниот месец ќе се донесе и јавнообвинителска одлука, изјави републичкиот јавен обвинител Љупчо Коцевски, прашан до каде се другите истраги и предистраги за пожарот во дискотеката „Пулс“ во Кочани.

Во однос на предистрагата за службениците од УЈП, Коцевски рече, дека се води предистражна постапка во ОЈО Кочани и надлежниот јавен обвинител дал одредени наредби до надлежните институции за преземање на одредени процесни дејствија.

„Во тој дел не можеме се уште ништо да кажеме повеќе“, рече Коцевски.

Видете и ова:

Судењето за пожарот во дискотеката „Пулс“ во Кочани ќе почне на 19 ноември

Судскиот процес за случајот со пожарот во дискотеката „Пулс“ во Кочани почнува следната недела, на 19 ноември и, како што рече Коцевски, Јавното обвинителство има екипираност и веќе се договорени околу начинот на кој обвинителите ќе го застапуваат предметот. Тој уверува дека од страна на ЈО нема да има никаков проблем во однос на судењето.

„Во судница ќе го застапуваат обвинението истите обвинители што беа и досега, меѓутоа морам да нагласам дека вчера имавме состанок, најверојатно уште неколку обвинители ќе ангажираме имајќи предвид, да не се отежне односно да не се наруши постапката на другите обвинители, што имаат други предмети, што значи дека можеби не секогаш ќе присуствуваат сите обвинители, меѓутоа секогаш ќе има обвинители за да не се одолговлекува постапката или да не се одлага по, да не речам, вина на обвинителството“, изјави Коцевски, одговарајќи на новинарски прашања пред денешната седница на Советот на јавни обвинители.

За најголемата трагедија што се случила во Северна Македонија на обвинителна клупа ќе седнат 34 лица, а обвинети се и три фирми. Меѓу нив, поранешни министри за економија и директори на Дирекцијата за заштита и спасување (ДЗС), градоначалници на Кочани, инспектори, одговорни лица во фирмите кои раководеле со ноќниот клуб.

За случајот со „Пулс“ на 5 септември, обвинителството поднесе уште еден обвинителен акт против сопственикот на фирмата за обезбедување „Рубикон“, Александар Нацев.

Трагедијата во Кочани се случи за време на настап на музичката група ДНК, кога искри од пиротехниката го потпалиле таванот во дискотеката, огнот брзо се проширил, а паниката и тесниот излез од објектот предизвикале и стампедо. Во пожарот во „Пулс“, ноќта помеѓу 15 и 16 март, загинаа 63 лица и над 200 беа повредени.

Трошоците за јавни набавки во здравството во последните 10 години се зголемиле два и пол пати, односно од 1261 милиони евра во 2015 на повеќе од 3152 милиони евра во 2024 година, покажува најновото истражување на Центарот за граѓански комуникации (ЦГК) од каде што констатираат дека овој раст се случува во услови кога граѓаните постојано изразуваат незадоволство од квалитетот и од достапноста на здравствените услуги.

„Очигледната несразмерност помеѓу трошењето и квантитетот и квалитетот на услугите го засилува впечатокот дека јавните набавки не се реален одраз на потребите и интересите на граѓаните и дека дополнително ги потхрануваат недовербата и сомнежите за корупција“ се наведува во истражувањето.

Во периодот 2021 – 2024 година инфлацијата влијаела врз цените на опремата, услугите и градежните работи. Најголем раст на вредноста на јавните набавки е воочен кај клиниките и болниците. Кај нив, за десет години, тројно била зголемена вредноста на тендерите, покажува истражувањето.

„Но, наместо повеќе услуги и подобра грижа, граѓаните се соочуваат со поинаква реалност – тендерите растат, а работата на болниците и клиниките се намалува. Во периодот 2015 – 2024 година, бројот на прегледи во вкупно 55 клиники и болници е намален за 14 %, а на болнички денови за 24 %. Овој јаз отвора сериозни сомнежи дека јавните набавки се користат како канал за финансиско извлекување средства, наместо како инструмент за унапредување на здравствената заштита“, пишува во истражувањето од Центарот.

Растечките трошоци за јавни набавки не можат да се оправдаат ниту со специјалистичките прегледи. Па така, во последните три години бил евидентиран пад на специјалистичките прегледи за околу 700.000, односно за 19 %. Намалувањето на бројот на здравствените услуги во гинекологијата и акушерството, како и во трансфузионата медицина, надминува 60 отсто.

Видете и ова:

Нови ветувања - онколошка терапија и во други болници

Дури 78 % од договорите за јавни набавки се склучени од јавните здравствени установи во Скопје, а големиот раст на вредноста на јавните набавки во здравството е проследен со сè помал број понудувачи на тендерите. Во истражувањето се посочува дека речиси половина од вредноста на договорите се склучуваат во тендерски постапки во кои имало само по еден понудувач.

„Тендерите за набавка на реагенси и тестови во најголем дел се само формалност, бидејќи се спроведуваат за веќе одбран апарат, што значи дека, уште пред да почне постапката, јасно е кој ќе го добие тендерот. Апаратите се претходно добиени како донација, земени на користење од фирми кои продаваат реагенси или, пак, купени. Набавките на реагенси и тестови на годишно ниво достигнуваат и до 29 милиони евра и се зголемиле за 81 % во периодот на анализа“, пишува во истражувањето.

Видете и ова:

Промените каскаат, здравството заглавено во популизам и корупција

Понатаму се наведува дека двогодишните тендери за набавка на инсулин, глукагон, инсулински игли и ленти за мерење шеќер, инсулински пумпи и сензори за мерење гликемија, вредни и до 39 милиони евра, се спроведуваат во постапки во кои отсуствува конкуренција, а дополнително склучените договори се анексираат. За период од 10 години, бројот на пациенти на инсулинска терапија е зголемен за 21 %, а вредноста на договорите за 77 %.

Тендерите за вакцинацијата на населението се финансиски сè поголеми, а набавките во одредени години се проследени со слабости – од планирање до неуспех да се склучат договорите навреме.

„Трошоците за лекови за ретки болести во последната декада скокнале од 90 милиони денари на 1 милијарда денари (или од 1,5 на 19 милиони евра). Овој голем пораст се случува во услови кога Државниот завод за ревизија укажува дека Министерството за здравство нема целосни податоци за тоа дали терапиите навистина ја подобруваат здравствената состојба на пациентите. Причината е што за поголемиот дел од болестите за кои се набавуваат лекови не се спроведува евалуација, како што е предвидено со Програмата за лекување ретки болести“, пишува во истражувањето.

Истражувањето исто така открива дека од 110 здравствени институции, дури во 23 нема ниту едно лице со положен испит за јавни набавки, што е спротивно на Законот за јавни набавки.

Студентите во блокадата на белградските факултети повикаа на протест на 11 ноември.

Собраните носат голем транспарент со пораката „Не го даваме Генералштабот“.

Протестот се случи откако властите во Србија, преку посебен закон, отворија пат за изградба на местото на зградите на Генералштабот и Министерството за одбрана оштетени во бомбардирањето на НАТО во 1999 година.

Специјалниот закон (lex specialis), усвоен од Парламентот на 7 ноември, предвидува дека сите процедури за реализација на проектот за ревитализација на Генералштабот се сметаат за итни.

Видете и ова:

Српските пратеници го усвоија законот со кој ќе може да се гради на местото на Генералштабот во Белград

На почетокот на 2024 година, Џаред Кушнер, зет на американскиот претседател Доналд Трамп, ја изрази својата намера да изгради луксузен хотел на местото на Генералштабот.

Идејата е да се изгради хотел со канцелариски простор и станови на местото на Генералштабот.

Идејата за изградба на повеќекатници на местото на модернистичка зграда, изградена во средината на 20 век, ги подели граѓаните, а на проектот се спротивставува и професијата која инсистира на зачувување на статусот на комплексот како културно богатство.

Од друга страна, членовите на владејачкото мнозинство за време на парламентарната дискусија тврдеа дека зградата на Генералштабот не може да се обнови и дека треба да се сруши.

„Беше направен обид за реконструкција, но тоа не е можно поради оштетувања и материјали што повеќе не се произведуваат“, рече Миленко Јованов, шеф на пратеничката група „Александар Вучиќ – Србија не смее да запре“.

Сепак, спроведувањето на проектот беше запрено од истрагата на обвинителството за фалсификување документи врз основа на што Владата на Србија го одзеде статусот на културно богатство.

Видете и ова:

Србија ќе соработува со САД ако има истрага за аферите на зетот на Трамп

„Афинити партнерс“, фирмата на Џаред Кушнер, во мај објави дека судбината на проектот е неизвесна кога обвинителството ги објави обвинувањата за фалсификување.

Во тоа време, тие негираа каква било поврзаност со фалсификувањето документи.

На 15 мај 2024 година, Владата на Србија потпиша Договор за ревитализација на комплексот на Генералштабот со компанијата на Кушнер, на која ѝ даде земјиште под закуп на 99 години.

Весникот „Њујорк тајмс“ на 18 март објави дека инвестицијата е вредна 500 милиони долари и дека, според предложениот договор, државата Србија треба да добие 22 проценти од профитот.

Компанијата на Кушнер, исто така, се обврза да изгради меморијален комплекс во рамките на комплексот посветен на сите жртви од бомбардирањето на НАТО.

Комплексот беше бомбардиран двапати, во април и мај, за време на бомбардирањето на НАТО на СР Југославија во 1999 година.